Read Saluan 1 SAMUEL 9 Bible Online

1 SAMUEL 9 - Saluan bible

1 SAMUEL 9

¹Daagi ko samian anu kaya ka' o angga'i hi aha tulunan mae nu bansa Benyamin, sanggonyo i Kish. Ia anak mae i Betkhorat julu mae nu aha mian nu Afiah. Tuumanyo i Abiel ka' kele'nyo i Zeror.

²I Kish kino anak mo'ane sanggonyo i Saul samian na olitau anu ma'ima' na butongnyo ka' mule' mahoson. Madi' ko samian anu lebe olitau molingkudui ia hi aha mian Israel iwi-iwi'. Butongnyo mule' lebe matangkas; iwi-iwi' na aha mian nu Israel kotangkasnyo ola toka i bekoangnyo.

³Daagi kino sansinaan, keledai pa' sangkuka na konjoo'nyo anu i Kish nolapusmo. Kalana aijo' pinoto'imo i Kish hi Saul, “Boa sala' samian na posaihon ka' lio na keledai haha itina'.”

⁴Lantas i Saul tiba posaihonnyo nambamo nonsongkohi daerah anu i bungkutnyo nu Efraim ka' tano' Salisa, panyo madi' ihumpak na binatang haha aijo'. Lapas aijo' aha sabole-bolemo i lumajang namba i tano' Sahalim, panyo keledai haha aijo' madi' ahi' i humpak.

⁵Salatan aha tinokamo i tano' Zuf, i Saul notataemo hi posaihonnyo, “Imbo' sahanyo kita minsusule'mo, boli-boli aha tuuma talalomo bata-bata na mompotutugakon kita, misa'mo montutugi keledai haha uutu.”

⁶Posaihon aijo' nontaami, “Boli pe'e! I kota aiya daagi ko posaihon nu Tumpu Allah. Ia o angga'i hondo nu mian kalana apaa na anu nu taloakon saja' totu-totu'u jadi madi' baleko'. Imbo' da kita mamba hi ia, ihe na monsumbu' timbali nu poto'i, iyamae na keledai haha uutu.”

⁷Koonyo i Saul, “De kita mamba hi ia apaa na anu obee'to hi ia? Mantu anu binoanto mae ningkotmo, madi'mo ko apa-apaa aiya hi kita na obee' hi posaihon nu Tumpu Allah aijo', kabai mosia o?”

⁸Posaihon aijo' nontaami, “Aiya hi belengku daagi' ko doi salaka sa'angu'. Aiyaje na ku bee' hi posaihon nu Tumpu Allah kiijo' da nu poto'i mae hi kita iya na keledai haha uutu.”

⁹“Sumo itina'mo!” Na tinaaman i Saul, “Imbo' kita mambamo.” Lantas aha nambamo i kota kajojoongan nu posaihon nu Tumpu Allah aijo'. Salatan aha nindakomo i bungkutnyo anu mompanjolongimo kota' aijo', siningkabotmo na aha tiba to pia-piangkuka na langkoyang anu mambamo montauk uee i bubung. Lantas pinokilawamo nu aha hi langkoyang anu mamba montauk uee i bubung. Lantas pinokilawamo nu aha hi langkoyang haha aijo', “Pa' ko anu monsubmu' montahi'i kiijo' i kota?” (Tempo'nyo aijo' samian na nabi osanggohi anu monsumbu' montahi'i, jadi de ko samian mongkahanda'i mompokilawa apa-apaa hi Tumpu Allah, ia motatae sumo uuka, “Imbo' da kita mamba hi mian anu monsumbu' montahi'i.”)

¹²“Ii' daagi”, tinaaman nu langkoyang haha aijo', “sala'je uuka na ia notulu madi' pinin belemiu tinokamo mae. De belemiu malia' na lumajang, ugaat osampamo nu belemiu. Ia sala'je tinoka i kota kalana sinaa aiya kiita i Mezbah i bungkutnyo daagi' ko anu monsombahkon koloban na aha mian da'isan. To mia-mian anu i laga mongkaan ma'isa mongkaan de ia ma'isa toka, kalana ia na tionyo ahi' mombalakati pe'e koloban aijo'. De belemiu mambamo uuka aiya daagi otokai nu belemiu ma'isa pe'e mindako i bungkutnyo mamba mongkaan.”

¹⁴Jadi i Saul tiba posaihonnyo nambamo i kota, ka' salatan aha ninsoopmo i sabatan daka' nu kota' aha no jajalanmo tiba i Samuel anu hau-haunyomo laja-lajang mamba itampat ponsomban i bungkutnyo.

¹⁵Memang na bongi sina-sinaa Tumpu nompotuunmo Hi Samuel sumo uuka na koonyo,

¹⁶“Dodop subu-subu kila-kila sumo uuka aiya Ku saimo mae na samian aha tulunan mae nu bansa Benyamin monsingkaboti beleyum. Hangkatmo na ia da timbali polaya' ka' obalakati, ka' odudu'i lanya' susumo anu saja'mo obau de mohangkatmo tomundo' hi aha mian nu Israel, anu pinalesayamo hi beleng-Ku, Iamo na momposalamat mian anu pinalesayamo hi beleng-Ku da bolimo nu poposia nu aha mian Filistin. Tinoang-Kumo na kasansala'an nu aha mian anu pinalesayamo hi beleng-Ku ka' nohongomo aha i humang nomoita tulung.”

¹⁷Salatan i Samuel nontoamo i Saul Tumpu notataemo hi ia, “Aiyamo na mian anu pinoto'ing-Kumo hi beleyum aijo'. Iamo na mompalentah mian anu pinalesayamo hi beleng-Ku.”

¹⁸Tempo'nyo aitu i Saul nongohanimo i Samuel koko sabatan daka' nu kota', ka' nompokilawamo, “Tabea' pe'e kita Tuumangku, iya na laigan nu mian anu monsumbu' montahi'i?”

¹⁹Tinaaman i Samuel, akumo na mian anu biasa montahi'i aijo'. Lako'mo momona i tampat ponsomban aita i bungkutnyo kalana sinaa uuka aiya beleyum mongkaanmo hingga-hinggat tiba aku. Dodop subu-subu iwi-iwi' na anu pinokilawamo nu beleyum ku taamije, lapas aijo' timbalije beleyum minsusule'.

²⁰Mongkona keledai nu beleyum iwi-iwi' anu nolapusmo tolunsinaamo uuka na kopinnyo, boli okanohobakon, kalana kinabotmo. Pakalaus anu talalo hondo ko angga'nyo i songko-songko na Israel ku bee'mo hi beleyum tiba hi to utu-utus mae nu tuuma nu beleyum.

²¹Tinaaman i Saul, “Aku aiya tulunan mae nu aha bansa Benyamin, tulunan nu bansa anu sangkiding hondo hi aha Israel ka' mule' to utu-utuskumo na anu madi' hondo ko alati'nyo hi aha tulunan nu bansa aijo'. Jadi kadaka' kita Tuuma motataemo sumo itina' hi belengku?”

²²Lapas aijo' i Samuel nongendemo i Saul tiba posaihonnyo da minsoopmo i uno nu salipi' anu ewa lantas binee'annyomo tampat anu talasanggo hi aha i ahop nu to mia-mian anu ilaga mongkaan, anu konjoo'nyo kila-kila aha tolumpulu' na mian.

²³Ka' mule' i Samuel nompoto'imo hi to mia-mian panggalima, “Tatuakonmo mae na antoknyo anu u'uka binee'ku hi belemiu aijo' da okola'akon mae.”

²⁴Lantas panggalima aijo' nongalamo mae antok nu pa'anyo anu pinile'anmo lantas tinatuakonnyomo hi ahop i Saul. I Samuel notataemo, “Aiyamo na bagian anu pinosi po iwi'kumo da bau bagi nu belento da okaan nu belento uuka aiya hingga-hinggat tiba to mia-mian sangga'at anu i lagamo. Kaanmo mae.” Lantas kinaanmo i Saul, Jadi sinaa aijo' i Saul nongkaanmo hingga-hinggat tiba i Samuel.

²⁵Lapas aijo' aha nintudunmo lengkat mae aita i tampat ponsomban ka' nambamo i kota'. I Saul suele binee'anmo kamale'an kiita i bangkala'

²⁶lantas ia ihoyotmo. Salatan sinaa binete'mo, i Samuel nolagamo i Saul anu kiita i bangkala' ka' notatae, “Pobulamo, imbo' da ku boamo na beleyum minsusule'mo.”

²⁷Salatan aha tinokamo isohipi' nu kota' notataemo na i Samuel hi Saul, “Pokaumo na posaihon aijo' da mambamo momona.” Lantas nambamo na posaihon aijo' ka' notatae mule' na i Samuel, “Soba tinjo pe'e sasaingoni' i aiya, da ku poto'i na potuunon nu Tumpu Allah hi beleyum.”