Read Samba Leko Mata 14 Bible Online

Mata 14 - Samba Leko bible

Mata 14

¹Sɛŋ də bərə, *Hirudus, gɔ̀mnà Galili yɛ́b bə bə̀, kìì bə̀ gám nwɔŋ Yéésù yílú.

²Bít bàà nɛ́b tù' bə̀ ma'ǹ oò bəd: «Aarə Yohana nɛ́d baptisma bə̀ piìnná' díímàì valú, bít kə̀ taàbìá, bɔ̀b taà kpɛŋsɛ́l inwulubə̀ bəd ma'ǹmbìá.»

³Nɛ́ŋ kéèndo nə́ŋ̀ bə̀ dɛ̀rə̀ *Hirudia. Nɛ́ŋ kéèndo aarə, pà' *Hirudus kudvɛɛ̀l aa bə̀ dɛ̀rə̀ Filip doó. Bòórú oòrə, *Hirudus nyá' yaà pà' nɛ́ŋ kéèndo aarə kúnú. *Hirudus mà' in aa kə̀ aa kíin yée gə́, Yohana bààù: «Indaŋ̀mbə̀ bə́n pii kpaŋ̀ *Hirudia pa'ǹmbə̀ ám yiìl sé.» Nwɔŋ aarə, mà' *Hirudus nɔ̀m yàá. *Hirudus tùm sóózè bəd, kò' dá boò páá Yohana wúltígə́l bə̀ rú.

⁵*Hirudus í' Yohana lo'ǹmbìá, zá nùù *Yahudu bərá. Kàandə, Yohana kùmsə̀n kìínmbə̀ *Vɛnɛ́b gbantumsə̀ kíin.

⁶Nɛ́ɛ̀m, sɛŋ aa bə̀ tə́ wálke ma'ǹ zèd aa bə̀ lɛ̀b *Hirudus bərə gə́, *Hirudia wàà kéèndo pìì yaà nàà náb nɛ́b aa ìì dɛ̀d bə̀ rə númú. *Hirudus tɛ́m làmə̀wì gbàákù kə̀ *Hirudia wàà kéèndo aa roó.

⁷Kàanyée gə́, nwɔ̀m in bààù gə́, in aa oò dɛ̀d bəǹ də gə́ kóólé, bəǹ dáù kíìn piinàá.

⁸Kàanyée gə́, wàà kéèndo rə bààù: «M̀ pii mə́ Yohana nɛ́d baptisma bə̀ piìn yílə zɔ̀ŋə magə̀rú bə́ŋyóo!» Aarə, nà'á oò bàà piiùwà sə̀n nwɔŋ aa roó.

⁹Gààd *Hirudus tɛ́m dìgə̀ yàá. Zá in aa nwɔ̀m nɛ́b zùúm bəraa dɛ̀rà rə númú rə bòórú, bàà boò pììù kúnú.

¹⁰Bít tùm nɛ́ŋə̀ nə́ŋ̀ dùb dá oò və̀rà Yohana nɛ́d baptisma bə̀ piìn yílə wúltígə́l bə̀ rú.

¹¹Pà' bə̀ páà Yohana yílə rə magə̀rú, yaà bə̀ pii wàà kéèndo bèlzá roó, bít oò kɔ̀ kè' àà nà'á oòra.

¹²Yohana *nɛ́b sáànmbə̀ bəd yaà bə̀ pà' si' oò aa yɛ́d doó, dá bə̀ lə̀ə̀ kúnú, bít ɛ̀m dá ìì bàà taà Yéésù in aa taà Yohana yílə́ roó.

¹³Zɔ̀ŋ aa Yéésù kìì nwɔŋ bəraa taà Yohana yílə́ rə kàangə́, zá' zɔ̀ŋ aarə ba, pìì kə̀ə̀rú, ɛ̀m oò nə́ŋ̀ní, dáá kùm zɔ̀ŋ mɛdkè rú. Zá nɛ́b zùúm bərì bàà nyà'aa Yéésù ɛ̀mì kə̀ kə̀ə̀rá. Bə̀ vúgə́là bəd bìlú, bít ìì bàg Yéésù ra. Ɛ̀m ìì pɛ́ŋ kə̀ nwuu gbà'á kàd tá.

¹⁴Zɔ̀ŋ aa Yéésù yaà vúg kə̀ə̀rú gə́, bé' nɛ́b zùúm bərá. Tɛ́m oò nyìì kə̀ buurúmá, kə̀ nɛ́b aa roó, bít zá' pìì nɛ́b mad bə̀ bəd si' gáŋ̀mbìá.

¹⁵Zɔ̀ŋ aa nyàm pìì gə́, Yéésù *nɛ́b sáànmbə̀ bərì gbarà oò sunú, bít ìì bààù: «Nyàm pìì yàá, bít zɔ̀ŋ aa bə kɔ̀, tə́ fɔ̀gú. Ǹ zíg nɛ́b aa yée boò ɛ̀m kíìn bìl bərú, bɔ̀b dá boò lɛ́b inlíìnmbə̀ boò bərá.»

¹⁶Yéésù kè' í' bə̀, bàà: «Aa dá sɔɔ̀n də gə́, boò ɛ̀m sí. Ìì pii bə̀ inlíìnmbə̀ kə̀ yíl aí bìá!»

¹⁷Zá bə̀ bààù: «Bə́ tə́ kə̀ naà zɔ̀ŋə bə̀rɛ́d núnà, kə̀ díb iirə ní.»

¹⁸Bít Yéésù bàà bə̀: «Ìì àà máà zɔ̀ŋə.»

¹⁹Bòórú gə́, bàà nɛ́b zùúm bəraa rə boò kùm yɛ́b ba, fɔ̀g yílú. Pà' bə̀rɛ́d bəraa núnə̀ rə, kə̀ díb bəraa iirə rə tá, zá' núù lɛgə́ paà gə́, bít mɔ̀' Vɛnɛ́bá. Bítsɔ̀ŋ, wèè bə̀rɛ́d bərá, bít pii *nɛ́b sáànmbə̀ oò bərá. *Nɛ́b sáànmbə̀ oò bəd kɔ̀ ìì gàm nɛ́b zùúm bərá.

²⁰Nɛ́b bəd kóólé, bə̀ líí yàá, bít ìì wùb bəd yàá. Bít pú' ìì nyí' bə̀rɛ́d welké bəraa nyɛ́d kə̀ díb tə́ rə, pìlə̀m kób zè iira.

²¹Nɛ́b aa líí rə, mà'ì nɛ́b bəd laa núnà zɔ̀ŋ laa iira zè kób. Nɛ́b kɛ́ɛ̀m kə̀ yɛb bɛ̀ŋ́sə̀ bəd tá, ìì pìì sé.

²²Bít Yéésù bàà *nɛ́b sáànmbə̀ oò bəd boò pìì kə̀ə̀rú, éèn taà boò na' kíìn kə̀ obəǹ wəl naà gúuú. Sɛŋ aa *nɛ́b sáànmbə̀ bəd bə̀ tə́ ɛɛ̀m də, Yéésù kɔ̀ àà tə́ nɛ́b zùúm bəd zígàá.

²³Zɔ̀ŋ aa àà zíg nɛ́b zùúm gə́, na' ɛ̀m kɔ̀l yílú, Vɛnɛ́b dáàn nyɛɛ̀mbìá. Nɛ́ɛ̀m tígə́l tə́ nyágə̀l gə́, kùm wərə̀ oò nə́ŋ̀ní tə́ŋtə́ŋ.

²⁴Sɛŋ aa Yéésù tə́ Vɛnɛ́b nyɛɛ̀m dú rə, kə̀ə̀d ɛ̀m gbarì zɔ̀ŋ bùúd bə wəl tə́ŋú; wəl bəd ìì pììùwì wá'ǹmbìá. Nwul pɛ̀b sə̀n gə̀ə́lá, bíd sə̀n boò gbə̀sú.

²⁵Sɛŋ aa tə́ tə́ŋtəŋ ba' toora, kə̀ ba' nɔ̀ŋgɔ̀s kə̀ limtə́ bə̀ rə, Yéésù zá' ɛ̀m bìrà boò sunú, na'à wəl yílú.

²⁶Zɔ̀ŋ aa *nɛ́b sáànmbə̀ bərì bé'ù tóò yaànà wəl yílə́ gə́, tɛ́m nyágə́l bə̀ yàá, bə̀ bàà: «Aarə ginnazi!» Bít bə̀ sɔ̀d bəd kpə̀ə́ǹ pálǹmbə̀ kə̀ də́dǹná.

²⁷Zá kə̀ nwɔŋ aa nuù yée kíinní, Yéésù bàà bə̀: «Ìì kùm kə̀ váàndoá. Ìì nuù də́dǹ sí, aarə máára!»

²⁸Kàanyée gə́, Piyɛr kè' í' bààù: «Báátììkpɛ̀ŋá, aarə tə́ ám vɛ́nà gə́, m̀ bàà máà ɛ̀m wəl yílú, máà bírà obəǹ sunú.»

²⁹Yéésù kè' í', bààù: «Ǹ yaà kúnú!» Piyɛr vúg kə̀ə̀rú, bít pí' ɛɛ̀mbə̀ wəl yílú, dáànmbə̀ kə̀ Yéésù sunú.

³⁰Zá zɔ̀ŋ aa bé' nwul tə́ pɛbm̀ kàangə́, tɛ́m lɔbə̀ yàá. Zɔ̀ŋ aa tə́ sɔ̀dǹ kɛ́ɛ̀mbə̀ wəl dùù yée gə́, zá' páá kpə̀ə́ǹá, bàà: «Báátììkpɛ̀ŋá, yaà ǹ súú mə́ kúnú!»

³¹Kə̀ nwɔŋ aa nuù yée kíinní, Yéésù nàb nɛɛ̀ná, kò'ù gə́, bít bààù: «Tɛ́mbagké ń tə́ bɛ̀ŋ́sə̀wàá! Kə̀ níìbə̀ ń zìb taà pìrə̀ ám tɛ́mú gú?»

³²Zɔ̀ŋ aa na' bə̀ pìì kə̀ə̀rú boò iirə gə́, nwul vəd bəní pɛbm̀bìá.

³³Kàanyée ní, *nɛ́b sáànmbə̀ bəraa kə̀ə̀rú wərə̀ rə, yaà bə̀ kùm kə̀ dunlígə̀d Yéésù númú, bít ìì bàà: «Vɛ́nà nwɔŋ sɔ̀ɔ̀ná, ámda ń kùmsə̀n Vɛnɛ́b Wàá!»

³⁴Na' bə̀ bɛ́' wəl nwuu gə́, bít yaà ìì wə́ə́ *Zenezarɛt yɛ́b ba.

³⁵Nɛ́b aa wərə̀ rə, ɛ̀g ìì gàb Yéésù yàá. Tùm bə̀ pii nwɔŋ bìl bəraa yɛ́b bə wərə̀ rə rú kóólé, yaaké Yéésù bə̀ aarə bòórú. Bít bə̀ ààùwà nɛ́b mad bə̀ bəd gə́ kóólé.

³⁶Bə̀ nyɛ̀mə̀ oò dàà bənə́ pignə́ gɔ̀' gú' oò ní. Nɛ́b aa pig gɔ̀' gú' oòrə kóólé, si' boò bəd gág yàá.