Read Samba Leko Mata 15 Bible Online

Mata 15 - Samba Leko bible

Mata 15

¹Kàanyée gə́, *Farisa bəd gə̀b kə̀ *nɛ̀n indaŋ̀mbə̀ bəd gə̀b tá, bə̀ zá'à Urusalima bìlú, bə̀ yaà Yéésù sunú, bít bə̀ bààù:

²«Kə̀ níìbə̀ *nɛ́b sáànmbə̀ ḿ bəd ìì ləə taà *dam bə́ bəd láŋsə́ sín gú? Sɛŋ aa bə̀ tə́ in líìn dú rə, bə̀ sùg nɛɛ̀n kìínmbə̀ nɛɛ̀n aa dam láŋsə́ bàà rú rə kíin sé.»

³Yéésù kè' í' bàà bə̀: «Bít aí gə́, kə̀ níìbə̀ íí ləə taà Vɛnɛ́b indaŋ̀mbə̀ sé, dam íí bəd láŋsə́ bòórú gú?

⁴Kə̀ aakíin də, Vɛnɛ́b bàà: ‹Ǹ káŋ báá ḿ da, kə̀ nà'á ḿ da,› bít ‹Màn aa gám nwɔŋ vaksə́ báá oò yílú, sínkɔ̀ nà'á oò yílə́ rə, boò lò'ù kúnú.›

⁵Zá aí gə́, íí sán nɛ́b bəd in gə́, íí bàà: ‹Dáà nɛ́ŋə̀ nə́ŋ̀ bàà báá oòra, sínkɔ̀ nà'á oòra: «In aa mə́ zíg, máan láŋ̀ bə kə̀ kùrú rə, mə́ pii n gá, má Vɛnɛ́b piìn» gə́,

⁶nɛ́ŋə̀ aarə, káŋ báá oò sé sínkɔ̀ nàá oò sé.› Kə̀ aakíin, məə íí dàà taà Vɛnɛ́b nwɔŋ, dam láŋsə́ íí bòórú.

⁷Íí nɛ́b gú' bàrə̀b bə̀ bərá. *Vɛnɛ́b gbantumsə̀ aa bə̀ dɛ̀rə̀ Esaya rə, gám nwɔŋ sɔ̀ɔ̀n aí yílú, sɛŋ aa bàà:

⁸‹Nɛ́b kun bəraa yée, bə̀ káŋ mə́ tə́ kə̀ gúsá, zá tɛ́m boò gə́, tə́ zɔ̀ŋ bùúd kə̀ máára.

⁹Bə̀ káŋ mə́ tə́ tɛdńní, kàandə, ìì sán *nɛ́b bəd indaŋ̀mbə̀ bəraa nɛ́b bəd zíg sə̀n doó, kìínmbə̀ ìì tə́ *nɛ́b bəd indaŋ̀mbə̀ mə́ sáàn kíin.› »

¹⁰Bít Yéésù dɛ̀d nɛ́b zùúm bəd gə́, bàà bə̀: «Ìì zɛ̀ŋ túŋá, bít ìì gàb in aa yóo:

¹¹‹In aa nɛ́ŋə̀ tə́ líìn, bít tə́ nyəə̀n də, díŋ̀ kɔ̀ gá.› Nɛ́ɛ̀m nwɔŋ aa nɛ́ŋə̀ tə́ gáàm də, díŋ sááù sùnú.»

¹²Kàanyée gə́, *nɛ́b sáànmbə̀ bərì gbarà Yéésù sunú, bít ìì bààù: «Gabm̀bə̀ nwɔŋ aa ń gám yérə, pii *Farisa bəd gə̀b sə́ə́mnúùì rə, ń gàb sínì?»

¹³Yéésù kè' í', bàà: «Téé aa Báá mə́ Vɛnɛ́b lɛgə́ paà bə̀ ləg sə̀n gá rə gə́ kóólé, bə̀ dákíìn bə'nàá.

¹⁴Ìì vúg kíìn *Farisa bəd gə̀b tə́ŋú. Aarə, nɛ́b kpaŋ̀ bə̀ ké'ǹ nyəd bəd tə́ sə̀n ɔ̀dnə́ŋ̀ nyəd bəd gubàá! Bít dáà nyəd nə́ŋ̀ gùb nyəd nə́ŋ̀ì gə́, boò iirə kóólé, bə̀ dáráàn pí'ǹ lɔ̀ŋ gbà'á rú.»

¹⁵Piyɛr kè' í' bààù: «Bàà ǹ ì' bə́ bə́ŋ̀ zagəm aarə ge.»

¹⁶Bít Yéésù bàà bə̀: «Aí kɔ̀ íí kə̀ yílə in bə̀ gabm̀ naà sínì?

¹⁷Íí gàb sínì, máàn in aa nɛ́ŋə̀ líí bít nyəə rə gə́ kóólé, sím ɛ̀m bàgəlú, bít vúŋ làà dá bə̀ lɛ́'ù fɔ̀gúì?

¹⁸Zá in aa vúg gú' bə nuù rə gə́, zá'à tɛ́mú, bít aarə, díŋ yɛ̀l sáá sə̀n nɛ́ŋàá.

¹⁹Kə̀ aakíin də, in bəraa vúgə́là nɛ́ŋə̀ tɛ́mə́ rə' inselké vaksə́ bərá, yíl lo'kéá, labsàá, in vaksə́ kilə̀ bə̀ wáàlǹná, lííroá, gúsuúm vədǹmbə̀ bərá, ɔ̀dnə́ŋ̀ yíl yɛɛ̀lǹmbìá.

²⁰Ìì ɛ̀ga, in bəraa yée, díŋ yɛ̀l sáá sə̀n nɛ́ŋàá! Zá líìnmbə̀ inlíìnmbìá, nɛɛ̀n sugǹmbə̀ sí, kə̀ nɛɛ̀n aa dam láŋsə́ bàà rú rə kíin gə́, aarə díŋ yɛ̀l nɛ́ŋə̀ kɔ̀ gá.»

²¹Bítsɔ̀ŋ, Yéésù zá' wərə̀ gə́, ɛ̀m zɔ̀ŋ bəraa pe' kə̀ Tirus bìlá kə̀ Sidon bìl lə ba.

²²Nɛ́ŋ kéèndo nə́ŋ̀ Kanan yɛ́b bə bə̀ wərə̀ yɛ́b aarə ba, yaà Yéésù sunú, bít kpə̀ə̀ yaà dɛ̀rə̀: «Báátììkpɛ̀ŋá, nɛ́ŋə̀ aa bə̀ dɛ̀rə̀ Dauda Wàà roó, ɛ̀g ǹ bé' mə́ búúrá! Nwul vaksə́ vɔ̀gə̀l mə́ wàà kéèndo tə́ kúnú, si' nwuù tə́ kúnú!»

²³Zá Yéésù kè' í' nwɔŋ nə́ŋ̀má sé. *Nɛ́b sáànmbə̀ oò bəd ìì gbarà oò sunú, yaà bə̀ dɛ̀rə̀ nwɔŋ aa yóo: «Nìŋ m̀ bí'ù kúnú, dàà bə́n kpəə̀n bagǹmbə̀ sé.»

²⁴Yéésù kè' í': «Máá gə́, Vɛnɛ́b tùm máà nɛ́b Israila bə̀ bəraa bə̀ kùm kìínmbə̀ bɛ̀rə̀ kíin də sunú.»

²⁵Zá nɛ́ŋ kéèndo aarə yaà kùm kə̀ dunlígə̀d Yéésù númú, bít bààù: «Báátììkpɛ̀ŋá, ǹ láŋ mə́ ba!»

²⁶Yéésù kè' í': «Sɔ̀ɔ̀n yɛb bɛ̀ŋ́sə̀ bəd inlíìnmbə̀ pa'ǹmbìá, bít laàn lɛ́'ǹmbə̀ yagəd bəd sé.»

²⁷Nɛ́ŋ kéèndo rə kɔ̀ bàà: «Aarə vɛ́nà nwɔŋ sɔ̀ɔ̀ná, Báátììkpɛ̀ŋá, kóó tə́ kàan máá, yagəd bəd kɔ̀ bɔ̀b ìì líí gbèd welké bəraa píl nɛ̀n boò bəd magə̀ dùù roó.»

²⁸Kàanyée gə́, Yéésù kè' í' bààù: «Wàà kéèná, tɛ́mbagké ń tə́ gbà'á! In aa ń í' rə, Vɛnɛ́b oò mà' n kúnú.» Bít sɛŋ aarə bəní, wàà kéèndo oò si' gág yàá.

²⁹Yéésù zá' wərə̀ gə́, bít ɛ̀m Galili nwuu gbà'á kàd ba. Zá' na' kɔ̀l wàà yílú, bít dáá kùm yɛ́b ba.

³⁰Nɛ́b zùúm yaà oò sunú. Bə̀ àà nɛ́b dun kɛlké bərá, nyəd bərá, nɛ́b aa mad yɛ̀l bə̀ si' roó, nɛ́b aa gám bán nwɔŋ gá roó, bít kə̀ nɛ́b mad bə̀ luùm kambəd sɔ̀ŋ. Yaà bə̀ kúm bəd Yéésù dùú, bít oò kɔ̀ gáŋ bə̀ sisá.

³¹Zɔ̀ŋ aa nɛ́b bəd bé' nɛ́b aa gám bán nwɔŋ gá rə, bə̀ tə́ nwɔŋ gámàá, bít nɛ́b aa mad yɛ̀l bə̀ si' rə, bə̀ tə́ kíìn gágàá, nɛ́b dun kɛlké bəd tə́ dun ɛmàá, bít nyəd bəd tə́ núù bé'ǹ yée gə́, kò' bə̀ yíl yàá, bít ìì pìì Vɛnɛ́b Israila bə̀ káŋ̀mbìá.

³²Yéésù dɛ̀rà *nɛ́b sáànmbə̀ oò bəd gə́, bít bàà bə̀: «Búúd mà' mə́ì kə̀ nɛ́b aa yóo. Ìì ɛ̀ga, nyà'aa mà'ì sɛŋ toora, ìì tə́ taà kuùm kə̀ máá tá, ìì kə̀ in nə́ŋ̀má líìnmbə̀ naà sé. Mə́ í' bə̀ niŋ̀ bí'ǹmbə̀ gulùm ní sé. Bə̀ tə́ bídǹ gə́, bə̀ dákíìn tu'ǹ kpaŋə́ kə̀ gulùmá.»

³³*Nɛ́b sáànmbə̀ bərì dɛ̀rə̀: «Báan inlíìnmbə̀ aa báan kə̀ nɛ́b zùúm aa zaàn də bɔbm̀ bínì gú? Kə̀ aa kíin də kɔ̀, bə́n tə́ən fɔ̀gú.»

³⁴Yéésù dɛ̀d bə̀: «Íí tə́ kə̀ bə̀rɛ́d naà leè gú?» Kè' bə̀ í'ù: «Bə̀rɛ́d nə́ŋsínà, kə̀ díb bɛ̀ŋ́sə̀ yɛb zɔ̀gɔ̀ kɔ̀.»

³⁵Kàanyée gə́, bàà nɛ́b zùúm bəraa rə kóólé, boò kùm yɛ́b ba.

³⁶Bítsɔ̀ŋ, pú' bə̀rɛ́d bəraa nə́ŋsínà rə, kə̀ díb bəd tá, mɔ̀' Vɛnɛ́bá, wèl kúnú, pii *nɛ́b sáànmbə̀ oò bərá, bít boò kɔ̀ ìì gàm nɛ́b zùúm bərá.

³⁷Nɛ́b bəd kóólé, ìì líí yàá, bít ìì wùb yàá. Bít nɛ́b sáànmbə̀ bəd wál ìì pú' welké bəraa nyɛ́d də, bə̀ nyí' pìlə̀m gbàád bəd nə́ŋsínà.

³⁸Nɛ́b aa líí rə, mà'ì nɛ́b bəd laa núnà zɔ̀ŋ laa iira. Gád bə̀ páá nɛ́b kɛ́ɛ̀m bəd kə̀ yɛb bɛ̀ŋ́sə̀ bəd tə́ sé.

³⁹Zɔ̀ŋ aa bə̀ líí in gə́, Yéésù bàà nɛ́b zùúm bəd boò ɛ̀m kúnú. Na' pìì kə̀ə̀rú, bít zá' ɛ̀m Magadan yɛ́b ba.