Read Samba Leko Mata 17 Bible Online

Mata 17 - Samba Leko bible

Mata 17

¹Sɛŋ nɔ̀ŋgɔ̀s taà gə́, Yéésù pà' Piyɛr ra, Yakuba kə̀ kudvɛɛ̀l oò Yohana tá, bít àà bə̀ kɔ̀l nə́ŋ̀ bùúd gbà'á yílú, boò ní.

²Vɛnɛ́b pɛ́n Yéésù si' boò núùrú ní, gbə̀' oò yaà nyɛd kìínmbə̀ nyàm kíni, bít gɔ̀' oò bəd kɔ̀ yaà bíl biíd tál tál, kìínmbə̀ laa nyɛdkè kíin.

³Kə̀ nwɔŋ aa nuù yée kíinní, *nɛ́b sáànmbə̀ bəraa toorə yée, bə̀ bé' Musa kə̀ *Eliya tá, dìì bə̀ tə́ nwɔŋ gáàm kə̀ Yéésù ra.

⁴Kàanyée gə́, Piyɛr bàà Yéésù: «Báátììkpɛ̀ŋá, tə́ sɔ̀ɔní obə́n bə̀ kuùmbə̀ zɔ̀ŋə. Ń í'ì gə́, má dìí bəd kudǹ dí'ǹ zɔ̀ŋə toora, nə́ŋ̀ ám bìá, nə́ŋ̀ Musa bìá, bít nə́ŋ̀ kɔ̀ *Eliya bìá.»

⁵Nɛ́ɛ̀m bə́ŋ̀ tə́ nwɔŋ gáàm kàangə́, mɔb laa nyɛdkè bə̀ yaà kág bə̀ bée, bít kìì pə̀gə̀lib nwɔŋ nə́ŋ̀ vúgà mɔbú, bàà: «Nɛ́ŋə̀ aa yée kùmsə̀n Wàà mə́ra, mə́ í'ù tə́ gbàákù' tɛ́m làmkè mə́ kóólé, mə́ zíg tə́ oò ba. Ìì zɛ̀ŋ̀ kúnú!»

⁶Zɔ̀ŋ aa *nɛ́b sáànmbə̀ bəd ìì kìì nwɔŋ aa kàangə́, də́dǹ gbà'á mà' bə̀ yàá, yi' bə̀ wúb núù yɛ́b ba.

⁷Zá Yéésù gbad yaà pig bə̀ gə́, bít bàà: «Ìì zá' lɛgú. Ìì nùù də́dǹ sí!»

⁸Bə̀ zá' núù lɛgə́ gə́, bə̀ bé' Yéésù dìì sə̀ní oò nə́ŋ̀ní.

⁹Nɛ́ɛ̀m bə̀ tóò kɔ̀l síìmmà gə́, Yéésù tɔ̀g bàà bə̀ nwɔŋ aa yóo: «Ìì bàà in aa íí bé' yérə nɛ́ŋə̀ nə́ŋ̀má sí, *Nɛ́ŋ Váàndo Wàà oò zá'à sína val bəd tə́ŋú.»

¹⁰*Nɛ́b sáànmbə̀ bəd ìì dɛ̀rə̀ nwɔŋ aa yóo: «Kə̀ níìbə̀ *Nɛ̀n indaŋ̀mbə̀ bəd bə̀ bàà taà *Eliya oò yaà sína» gú?

¹¹Yéésù kè' í' bə̀, bàà: «Aarə vɛ́nà nwɔŋ sɔ̀ɔ̀ná, *Eliya dáà sína yaanàá, bít kùd yaà dá in bəd sína zígǹ kóólé.

¹²Zá máá gə́, mə́ tə́ ii kíìn baanàá, *Eliya yaaì gbòód, nɛ́b bəd bə̀ gàbə̀ sé. Zá bə̀ mà'ù in aa bə̀ í' roó. Bít kə̀ nɛɛ̀n aarə kíinní, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə kɔ̀, dá búúd bé'ǹ boò nɛɛ̀n tɛ́mú.»

¹³Kàanyée gə́, *nɛ́b sáànmbə̀ bəd sèl ìì gàb yàá, gám bəní Yohana nɛ́d baptisma bə̀ piìn nwɔŋá.

¹⁴Zɔ̀ŋ aa yaàì tə́ wə́ə̀n nɛ́b zùúm bəd səǹ gə́, nɛ́ŋ váàndo nə́ŋ̀ yaà pí' Yéésù númú, kə̀ dunlígə̀rá,

¹⁵bít bàà: «Báátììkpɛ̀ŋá, ɛ̀g m̀ bé' wàà mə́ búúrá. Tə́ kə̀ laagbíìd naú, bít kìì nwuukè tə́ gbàákù. Sɛŋ kam gə́, pí' laa rú, sínkɔ̀ wəlú.

¹⁶Pà' mə́ ààùwà *nɛ́b sáànmbə̀ ḿ bəd sunú, zá ìì bánə̀ gáŋ̀mbə̀ sé.»

¹⁷Yéésù kè' í' bə̀ gə́, bàà: «Éì, íí nɛ́b luùm bəraa íí gàb in wɔ̀ɔ̀lə̀ kə̀ invaksə́ tə́ sín yóo! Dá ma'ǹ sɛŋ leè sɔ̀ŋ, má taà kuùm kə̀ aí tə́ gú? Bít dá ma'ǹ sɛŋ leè sɔ̀ŋ, má ii taà sidǹ gú? Ìì àà máà wàà rə zɔ̀ŋə.»

¹⁸Yéésù gám nwul vaksə́ nwɔŋ kə̀ kpɛŋsɛ́lá, nwul vaksə́ vúg taá. Bít sɛŋ də bəní, wàà rə si' gág yàá.

¹⁹Kàanyée gə́, *nɛ́b sáànmbə̀ bəd ìì gbarà Yéésù sunú, boò ní, bít ìì dɛ̀rə̀: «Kə̀ níìbə̀ bə́ bán taà nwul vaksə́ aa niŋ̀ vúŋ̀mbə̀ sín gú?»

²⁰Yéésù kè' í' bə̀, bàà: «Tɛ́mbagké íí tə́ bɛ̀ŋ́sə̀wàá. Mə́ tə́ ii kíìn baanàá, aarə nwɔŋ sɔ̀ɔ̀ná, dáà íí tə́ kə̀ tɛ́mbagké naà kìínmbə̀ kpànwà lɛ̀ɛ́ŋke kíin gə́, íí dá kɔ̀l aa baàn: ‹Zá' ǹ gbad kíìn zɔ̀ŋə, dá ǹ dìì zɔ̀ŋə géú,› bít oò kɔ̀ dákíìn zá'nàá; bít in nə́ŋ̀má aí bə̀ kaànmbə̀ sé. [

²¹Zá kə̀ Vɛnɛ́b nyɛɛ̀mbìá, bít kə̀ *in gídǹmbìá, nɛ́ŋə̀ dá taà nwul vaksə́ luùm aarə báàn niŋ̀ vú'ǹmbìá.]»

²²Nyàm nə́ŋ̀, *nɛ́b sáànmbə̀ bəd kóólé, ìì wál ɔ̀dbə Galili yɛ́b bə yée gə́, Yéésù bàà bə̀: «Kò' bə̀ dá nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə kíìn piìn nɛ́b vaksə́ bəd nɛɛ̀n tɛ́mú.

²³Bə̀ dáù kíìn lo'nàá, zá sɛŋ toorə bə gə́, Vɛnɛ́b dáù kíìn díìm valú.» Nwɔŋ aa yée nyágə́l *nɛ́b sáànmbə̀ oò bəd tɛ́mì gbàákù.

²⁴Nɛ́ɛ̀m Yéésù kə̀ *nɛ́b sáànmbə̀ oò bəd tá, yaà ìì wə́ə́ Kapɛrnaum bìlə́ yée gə́, nɛ́b ba'káám bə̀ ke'ǹ bəraa láŋsə́ wúu rə, gbad bə̀ yaà Piyɛr sunú, bít bə̀ dɛ̀rə̀: «Nɛ̀n íí káá ba'káám láŋsə́ wúu bə̀ kɔ̀ì?»

²⁵Piyɛr kè' í' bə̀: «Èè, káá kúnú.» Nɛ́ɛ̀m sɛŋ aa Piyɛr tə́ piìn wúu rə, Yéésù éèn gám sə̀n nwɔŋá, bàà: «Simon, sèl ḿ bé' tə́ leè gú? Nɛ́ɛ̀réè dá sə̀n gààd gbàád yɛ́b bə̀ bəd ba'káám bəd káàn piìn gú? Yɛb yɛ́b bə̀ bəd náà, sínkɔ̀ sɛ̀ɛ́n bərì?»

²⁶Piyɛr kè' í', bàà: «Sɛ̀ɛ́n bərá.» Yéésù bààù: «Tə́ kàangə́, yɛb yɛ́b bə̀ bəd gə́, ìì káá gá.

²⁷Bə́ŋyée, bə́n saàn nɛ́b aa yée tɛ́m díŋm̀bə̀ gá. Kə̀ taàbìá, ǹ ɛ̀m nwuu gbà'árú, dáàn lɛ́' kpɛ'wà wəlú, bít dìŋ ǹ vúŋà díb aa éèn yaà dá líìn də kúnú. Ǹ kèrə̀ gúsá, ń dá ba' lɛ̀ɛ́ŋə̀ nə́ŋ̀ bɔbm̀ dú wərà; aa dá də́ŋ̀ ba'káám máá bə̀ káànmbə̀ kə̀ ámbə̀ tə́ roó. M̀ pà' ba' lɛ̀ɛ́ŋə̀ aarə, bít ǹ káá bə̀ ba'káám bə́n da.»