Read Samba Leko Mata 19 Bible Online

Mata 19 - Samba Leko bible

Mata 19

¹Zɔ̀ŋ aa Yéésù gám bɛ́' nwɔŋ aa kàangə́, zá' Galili yɛ́b ba, bít ɛ̀m Yahudiya yɛ́b ba, Urdun nwuu naà gúu.

²Nɛ́b zùúm bəd bàgə̀ bòórú, bít gáŋ nɛ́b mad bə̀ bəd si' zɔ̀ŋ aarə ba.

³*Farisa gə̀b kambəd, gbad ìì yaà oò sunú, oò bə̀ gúdǹ ko'ǹmbə̀ kə̀ gɔ̀'wàá; bə̀ dɛ̀rə̀: «Indaŋ̀mbə̀ bə́n dàà béení nɛ́ŋ váàndo oò vúŋ kéèn oò kə̀ nɛɛ̀n aa í' rə kíniì?»

⁴Yéésù kè' í', bàà: «Íí gád nwɔŋ aa bə̀ bád Núúboòd Gìdńnú rə sínì? Sɛŋ aa Vɛnɛ́b sɔ̀d kùd nɛ́b bəd də, kùd nɛ́ŋ váàndo kə̀ nɛ́ŋ kéèndo tá.»

⁵Bít Vɛnɛ́b bàà: «Kə̀ taàbìá, nɛ́d váàndo zá' dá báá oò daàn kə̀ nà'á oò tá, bít yaà dá pe'ǹ kə̀ kéèn oò tá, bít boò iirə kóólé, yaà ìì dá kuùm si' nə́ŋ̀ní.»

⁶Bít Yéésù kə̀ yíl oò bìá, bàà: «Kə̀ aakíin, bə̀ kùm nɛ́ŋə̀ iirə sɔ̀ŋ gá, zá ìì dá kuùm si' nə́ŋ̀ní. Kə̀ aakíin də, nɛ́ŋə̀ oò pɛ̀d in aa Vɛnɛ́b wál lə sí.»

⁷*Farisa bərì dɛ̀rə̀: «Kə̀ níìbə̀ Musa pii taà kpaŋ̀, bàà taà nɛ́ŋ váàndo nìŋ vúŋ kéèn oòì gə́, bád oò piiù núúboòraa vúŋ lɛ́'ù kə̀ kùrú rə naà gú?»

⁸Yéésù kè' í' bə̀, bàà: «Musa pii ii kpaŋ̀ bɔ̀b ìì vúŋ kɛ́ɛ̀m íí bəd də, tɛ́m kpɛŋké íí bòórú. Zá sɛŋ aa sɔ̀d dú rə gə́, kàan sé.

⁹Mə́ tə́ ii kíìn baanàá' Dáà nɛ́ŋə̀ nə́ŋ̀ nìŋ vúŋ kéèn oò yàá, labsə̀ nwɔŋ bòórú gá, bít pà' kéèn ɔ̀d nə́ŋ̀ì gə́, mà' labsə̀ yàá.»

¹⁰*Nɛ́b sáànmbə̀ bərì bààù: «Dáà nɛ́ŋə̀ kùm tə́ kə̀ aakíin kə̀ kéèn oò gə́, sɔ̀ɔ̀n kéèn pa'ǹmbə̀ sé.»

¹¹Yéésù kè' í' bə̀, bàà: «Nɛ́b bəd kóólé bə̀ dá sə̀n báàn insánke aa ke'ǹmbə̀ gá. Zá nɛ́b aa Vɛnɛ́b pii bə̀ ingabké, bɔ̀b boò gàb kíìn də, bə̀ dá sìní ke'nàá.

¹²In bəd tə́ gɔ̀ŋ gɔ̀ŋ, dàŋ sə̀n nɛ́b vɔ̀ɔ̀m kam kɛ́ɛ̀m pa'ǹmbìá. Nɛ́b kam gə́, bə̀ vúgà nà'á boò bàgələ́ rə máá, bə̀ kə̀ si' váàndo naà sé. Nɛ́b ɔ̀d kam kɔ̀, nɛ́b bəd bí' bə̀ sə̀n nɛ́b beèn bərá; bít nɛ́b kam kɔ̀, bə̀ bí' yíl boò kàandə, *Vɛnɛ́b Gààd nwɔŋ bòórú. Ogə́, màn aa bánì insánke aa ke'ǹmbə̀ rə kɔ̀, oò kè' kúnú!»

¹³Kàanyée gə́, nɛ́b bəd àà yɛb bɛ̀ŋ́sə̀ bəd Yéésù sunú, bɔ̀b oò zíg bə̀ nɛɛ̀n yílú, oò nyɛ̀m bə̀ Vɛnɛ́bá. Zá *nɛ́b sáànmbə̀ bəd bə̀ ál bə̀ kúnú.

¹⁴Bít Yéésù bàà bə̀: «Ìì dàà yɛb bɛ̀ŋ́sə̀ bəd boò yaà máá sunú, ìì dàŋ bə̀ sí. Kàandə, Vɛnɛ́b ləə gààd tə́ nɛ́b aa kìínmbə̀ yɛb bɛ̀ŋ́sə̀ bəraa kíin də yílú.»

¹⁵Bòórú zíg bə̀ nɛɛ̀n yílə́ gə́, bít nyɛ̀m bə̀ Vɛnɛ́b, bɔ̀b Vɛnɛ́b oò mà' bə̀ pə̀dkèá. Bít in aarə taà gə́, Yéésù zá' kíìn zɔ̀ŋ aarə ba.

¹⁶Nyàm nə́ŋ̀ kàani, nɛ́ŋ váàndo nə́ŋ̀ gbad yaà wə́ə́ Yéésù sunú, bít dɛ̀rə̀: «Nɛ̀ná, má níì insɔ̀ɔ̀n ma'ǹ, má taà *gɔ̀ŋsə́ aa bɛ́d bə gá rə bɔbm̀ gú?»

¹⁷Yéésù bààù: «Kə̀ níìbə̀ ń dɛ̀d mə́ taà nwɔŋ insɔ̀ɔ̀n yílə́ gú? Vɛnɛ́b oò nə́ŋ̀ní, kùmsə̀n nɛ́ŋə̀ sɔ̀ɔ̀ná. Dáà ń í'ì *gɔ̀ŋsə́ aa bɛ́d bə gá rə bɔbm̀bə̀ gə́, kò' ǹ kùd Vɛnɛ́b indaŋ̀mbə̀ bərá.»

¹⁸Wàà váàn aarə, bàà: «Indaŋ̀mbə̀ bəd déè gú?» Yéésù kè' í' bààù: «Ǹ lò' yíl sí, m̀ mà' labsə̀ sí, ǹ pà' lííro sí, ǹ mà' sedako gúsuúm bə̀ nɛ́ŋə̀ yílə́ sí.

¹⁹Ǹ káŋ báá ḿ da, kə̀ nà' ḿ da, ǹ í' ɔ̀dnə́ŋ̀ ń kə̀ nɛɛ̀n aa ń í' yíl ámbə̀ rə kíin.»

²⁰Wàà váàn bààù: «Indaŋ̀mbə̀ bəraa kóólé, mə́ kò' yàá, máà mà' níì sɔ̀ŋ gú?»

²¹Yéésù bààù: «Ń í'ì kuùmbə̀ nyɛdkè gə́, ǹ ɛ̀m kúnú, dáàn gə́l in bəraa ń kə̀ naà rə kíìn kóólé, bít ba' rə, ǹ pii nɛ́b búúd bə̀ bərá. Kàandə, ń dá taà gbaŋə̀ bəd dáàn bɔbm̀ lɛgə́ poú. Bít yaà ǹ bàg mə́ kúnú.»

²²Zá zɔ̀ŋ aa wàà váàn aa kìì nwɔŋ bəraa kàangə́, zá' ɛ̀m kíìn kə̀ gbə̀' tabm̀bìá. Ba' zùúm aa kə̀ naà rə, tɛ́m nwu'ù taàbìá.

²³Kàanyée gə́, Yéésù bàà *nɛ́b sáànmbə̀ oò bəd: «Mə́ tə́ ii kíìn baanàá, aarə nwɔŋ sɔ̀ɔ̀ná' Dá kuùm gbò'kèá, nɛ́d gbaŋə̀ bə̀ piìnmbə̀ *Vɛnɛ́b gààrú.

²⁴Bít mə́ tə́ ii kíìn baàn sɔ̀ŋ' Dá kuùm ɔ̀gkeá, geloba piìnmbə̀ zìlə̀wà nyíírú, kə̀ nɛ́d gbaŋə̀ bə̀ piìnmbə̀ *Vɛnɛ́b gààrə́ gə́ roó.»

²⁵Zɔ̀ŋ aa *nɛ́b sáànmbə̀ bərì kìì nwɔŋ aa kàangə́, kò' bə̀ yílì gbàákù, bít ìì bàà: «Zá nɛ́ɛ̀m tə́ kàangə́, nɛ́ɛ̀réè dá sə̀n báàn súùnmbə̀ gú?»

²⁶Yéésù zá' núù ɛ̀g bə̀ gə́, bít bàà bə̀: «Nɛ́b bəd naà gə́, bə̀ bán yíl boò bə̀ súùnmbə̀ gá. Zá Vɛnɛ́b dá bə̀ sə̀n súúnàá.»

²⁷Kàanyée gə́, Piyɛr kè' í' nwɔŋ, bít bàà: «Ǹ zɛ̀ŋ túŋá, zá' bə́ dàà in bəraa bə́ kə̀ naà rə yàá, bít bə́ bàg n yàá. Obə́ gə́, níì dá sə̀n wə́ə̀n obə́ yílə́ gú?»

²⁸Yéésù bàà bə̀: «Mə́ tə́ ii kíìn baanàá, aarə nwɔŋ sɔ̀ɔ̀ná, màìgə́ nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, yaà dá kuùm gààd mə̀ə̀d káŋke oò bə, yɛ́b puu bə gə́, íí nɛ́b bəraa kób zè iirə íí bàg mə́ rə, aí kɔ̀ íí dá kuùm mə̀ə̀d káŋke bəd ba. Íí dá Israila kun bəraa kób zè iirə rə fágàá.

²⁹Bít nɛ́b aa zá' bə̀ dàà ligə̀ boò bərá, sínkɔ̀ kudvɛɛ̀l boò bərá, níí boò bərá, kun kɛ́ɛ̀m boò bərá, báá boò ra, nà'á boò ra, yɛb boò bərá, bít kə̀ lɛ' boò bəd tə́ máá nə́gə́lə́ rə, bə̀ dá in bɔbm̀ zùúm; dá aa bə̀ dàà yérə kíìn kanàá. Bít bə̀ dá *gɔ̀ŋsə́ aa bɛ́d bə gá rə kíìn bɔbàá.

³⁰Zá nɛ́b aa bə́ŋyée bə̀ nɛ́b yíl bə̀ bəd də, bə̀ dá sə̀n kuùm nɛ́b aa bə̀ bí' yíl boò dùù roó. Bít nɛ́b zùúm bəraa bə́ŋyée bə̀ bí' yíl boò dùù rə kɔ̀, bə̀ dá sə̀n kuùm nɛ́b yíl bə̀ bərá.»