Read Samba Leko Mata 20 Bible Online

Mata 20 - Samba Leko bible

Mata 20

¹Yéésù nàà bə̀ zagəm ɔ̀d sɔ̀ŋ: «Kə̀ aakíin də, ìì ɛ̀g in aa *Vɛnɛ́b Gààd lúŋ doó' *Vɛnɛ́b Gààd lúŋ tə́ nɛ́d ligə̀ bə̀ aa kə̀ lɛ' gbà'á naú, vúg kə̀ limtə́ pít, bɔ̀b bəǹ dá nɛ́b tù' bə̀ ma'ǹ bəd dáàn páàn obəǹ lɛsə́ rə kíin.

²Gám yaà dúg gú' kə̀ boò ra, bəǹ dá bə̀ kíìn káánàá, nyàm nə́ŋ̀ ba' lɛ̀ɛ́ŋə̀ nə́ŋ̀, kìínmbə̀ nɛɛ̀n aa ìì lɛɛ̀m də kíni. Bít tùm àà bə̀ lɛsú.

³Bít ba'wà dàànə́ŋ̀ní kə̀ limtə́ bə̀ wə́ə́ gə́, vúg walú sɔ̀ŋ, bít bé' nɛ́b kam tɛdńní, tù' nə́ŋ̀má ìì mà' naà sé.

⁴Bàà bə̀: ‹Aí kɔ̀ ɛ̀m dá ìì mà' tù' máá lɛsú, yaà máá ii *mú'sɛ̀l dùm íí kíìn káàn sɔ̀ɔ̀nkè.›

⁵Bít ìì ɛ̀m lɛsə́ wərə̀ kɔ̀. Nɛ́d ligə̀ bə̀ vúg nyàm yíl tə́ŋú, bít nyàm nyɛ́g ba' toorə gə́, mà' kə̀ nɛɛ̀n aarə kíin sɔ̀ŋ.

⁶Bít nyàm bídń ba' núnə̀ mà' gə́, vúg gə́, bít dá bɔ̀b nɛ́b kam tə́ diìn walú, nɛɛ̀n tɛdńní sɔ̀ŋ. Dɛ̀d bə̀: ‹Kə̀ níìbə̀ íí kùm taà zɔ̀ŋə nyàm fɛ́rr, tù' nə́ŋ̀má íí mà' taà naà sín gú?›

⁷Kè' bə̀ í': ‹Nɛ́ŋə̀ nə́ŋ̀má pà' bə́ oò tùsú sé.› Bàà bə̀: ‹Èè, tə́ sɔ̀ɔ̀ní! Aí kɔ̀ ìì ɛ̀m máá lɛsú, dá ìì mà' mə́ tùsá.›

⁸«Zɔ̀ŋ aa nyàm mà' gə́, nɛ́d ligə̀ bə̀ dɛ̀rà nɛ́d gbaŋə̀ bə̀ ko'ǹ oòra, bààù: ‹Ǹ dɛ̀rà nɛ́b tù' bə̀ ma'ǹ bərá, bít ǹ káá bə̀ sòò ba' boò ra. Ǹ sɔ̀rà nɛ́b aa ìì mà' tù' bòórú rə ba, bít yaà ǹ zə́' kə̀ nɛ́b aa éèn íí sɔ̀d tù' ma'ǹmbə̀ roó.›

⁹Nɛ́b aa ìì sɔ̀d tù' nyàm mà'kè ba' núnə̀ rə, ìì yaà sùnú. Bít kóó nɛ́ɛ̀réè, kè' ba' lɛ̀ɛ́ŋə̀ nə́ŋ̀ nə́ŋ̀.

¹⁰Nɛ́b aa éèn bə̀ páá bə̀ tùsú rə, bə̀ yaà taà bòórú. Bə̀ sèl bəní dáánnə́ ba' ke'ǹ zùúm. Zá boò kɔ̀ ìì káá bə̀ nɛ́ŋə̀ gə́ kóólé, ba' lɛ̀ɛ́ŋə̀ nə́ŋ̀ nə́ŋ̀.

¹¹Sɛŋ aa bə̀ tə́ ba' rə ke'ǹ də, bə̀ zòl in bəd nyíírú, kə̀ nɛ́d ligə̀ bìá,

¹²bít bə̀ bàà: ‹Nɛ́b tɔ̀l bə̀ le'ǹ bəraa bə̀ mà' bəd tù' ba' wàà nə́ŋ̀ní, bít ń də́' bə̀ kə̀ obə́ bə́ nɛ́b aa bə́ mà' tù', bə́ sìd mú'sɛ̀l nyàámbərə̀ bə̀ kə̀ nyàmlaarú bə̀ tə́ rə nə́ŋ̀ní wa?›

¹³Zá nɛ́d ligə̀ bə̀ kè' í' nɛ́ŋə̀ nə́ŋ̀ boò tə́ŋú: ‹Ɔ̀dzéd mə́ra, mə́ mà' n invaksə́ nə́ŋ̀má sé. Gám bə́n tabm̀ gú' ba' lɛ̀ɛ́ŋə̀ nə́ŋ̀ bə̀ géè?

¹⁴Ǹ kè' mú'sɛ̀l dùm ḿ da, ǹ dàà mə́ nɛɛ̀ná, bít ǹ ɛ̀ma! Máá màn aa lè' tɔ̀l yée piìn nɛɛ̀n aarə rú, kìínmbə̀ ám kíin.

¹⁵Bə̀ dàŋ mə́ tə́ kíìn in aa mə́ í' rə ma'ǹmbə̀ kə̀ gbaŋə̀ máá bèì? Sínkɔ̀, kisɛ̀l mà' n tə́ kíìn kə̀ pə̀dkè aa mə́ tə́ ma'ǹ deè?›

¹⁶‹Nɛ́b bəraa bə́ŋyée bə̀ nɛ́b yíl bə̀ bəd də, bə̀ dá sə̀n tɔ̀l le'nàá, bít nɛ́b bəraa bə́ŋyée bə̀ lè' tɔ̀l lə kɔ̀, bə̀ dá sə̀n kuùm nɛ́b yíl bə̀ bərá.› »

¹⁷Sɛŋ aa Yéésù tə́ na'ǹ ɛɛ̀m Urusalima bìlə́ rə, ɛ̀m kə̀ nɛ́b sáànmbə̀ oò bəraa kób zè iirə rə tə́ ní. Bít bə̀ wə́ə́ kpaŋə́ gə́, bàà bə̀:

¹⁸«Ìì ɛ̀ga, bə́n tə́ən na'ǹ ɛɛ̀m Urusalima bìlú. Kò' bə̀ dáráàn nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə piìn *láŋsə́ gààd bəd nɛɛ̀n tɛ́mú, kə̀ *nɛ̀n indaŋ̀mbə̀ bəd nɛɛ̀n tɛ́mú. Fág kò' bə̀ dáù kíìn lo'nàá.

¹⁹Bít kò' ìì dáù piìn nɛ́b aa bàg Vɛnɛ́b síndə nɛɛ̀n tɛ́mú, lòò bə̀ dáù kèéd bí'nàá, bə̀ dáù kíìn zibàá, bít bág bə̀ dáù lo'ǹ téélɛŋké ba. Zá sɛŋ toorə bə gə́, Vɛnɛ́b dáù kíìn díìm valú.»

²⁰Zɔ̀ŋ aa Yéésù gám bɛ́' nwɔŋ kə̀ *nɛ́b sáànmbə̀ oò bəd gə́, Zebede kéèn yaà oò sunú, kə̀ yɛb vɔ̀ɔ̀m oò bəd tá; bít yaà pí' yɛ́b bə kə̀ dunlígə̀rá, bɔ̀b in nə́ŋ̀ nyɛɛ̀mbìá.

²¹Yéésù bààù: «Ń í' níì gú?» Oò kɔ̀ kè' í'ù: «In aa mə́ í' rə, yɛb vɔ̀ɔ̀m mə́ bəraa iirə yée, boò pìì ám gààrú. Nə́ŋ̀ oò kùm ám nɛɛ̀n váànú, nə́ŋ̀ ɔ̀d kɔ̀ oò kùm ám nɛɛ̀n kéènú.»

²²Yéésù kè' í', bàà: «Íí gàb in aa íí nyɛ̀m də sé. Íí dá bée ke'ǹ búúd bé'ǹmbə̀ kə̀ máá kíniì?» Bə̀ bààù: «Bá kíìn bánàá.»

²³Bít Yéésù bàà bə̀: «Vɛ́nà, íí dá búúd bé'ǹ kə̀ máá kíin. Zá in aa ɛ̀g dáàn kuùmbə̀ máá nɛɛ̀n váànú, sínkɔ̀ nɛɛ̀n kéènú rə gə́, dá vúgǹ máá naà gá. Zɔ̀ŋ bəraa rə, Báá mə́ kùd zíg nɛ́b aa sàà vúŋ də bìá.»

²⁴Zɔ̀ŋ aa *nɛ́b sáànmbə̀ bəraa nyɛ́d kób yée, bə̀ kìì nwɔŋ aa kàangə́, dìì bə̀ mà' nɔ̀m kə̀ ɔ̀dkudvɛɛ̀l bəraa iirə yóo.

²⁵Zá Yéésù dɛ̀d àà bà oò sunú, bít bàà bə̀: «Íí gàb yàá, gààd yɛ́b bə̀ bəd, mà' bə̀ tə́ nɛ́b boò bəd bí'ǹ kìínmbə̀ kɔ̀' bəd kíin; bít nɛ́b gbàád bəd kɔ̀, bə̀ tə́ gààd ləə̀n nɛ́b bəd yílú, kə̀ kpɛŋsɛ́lá.

²⁶Zá aí tə́ŋə́ gə́, in aarə oò taà kàan sí. Dáà tə́ kàangə́, nɛ́ŋə̀ nə́ŋ̀ aí tə́ŋú, í'ì nɛ́ŋ gbàáro bílǹmbə̀ gə́, oò kùm nɛ́d tù' bə̀ ma'ǹ íí ra.

²⁷Bít kóó nɛ́ɛ̀réè, í'ì kuùmbə̀ nɛ́d yíl bə̀ aí tə́ŋə́ gə́, oò kùm kə̀ kɔ̀'váàn íí kíin.

²⁸Kə̀ aarə kíin, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, yaà zɔ̀ŋə yɛ́b bərə, bɔ̀b boò mà' bəǹ tù' gá. Zá yaà nɛ́b bəd tù' ma'ǹmbìá, bít piìnmbə̀ yíl oòra, bɔ̀b nɛ́b zùúm bəd bə̀ káàn ke'ǹná.»

²⁹Zɔ̀ŋ aa Yéésù kə̀ *nɛ́b sáànmbə̀ oò bəd tá, ìì tə́ vúgǹ Yeriko bìlə́ gə́, nɛ́b zùúm bəd bàg Yéésù bòórú.

³⁰Ɛ̀m dá bə̀ wə́ə́ kpaŋə́ gə́, nyəd vɔ̀ɔ̀m bəd iira, ìì kùm kpaŋ̀ kàd ba. Bə̀ kìì Yéésù tə́ taàn boò səǹ gə́, bít kpə̀ə̀ bə̀ dɛ̀rə̀: «Báátììkpɛ̀ŋá, Dauda Wàá, ɛ̀g m̀ bé' bə́ búúrá!»

³¹Nɛ́b zùúm bəd ál bə̀ kúnú, boò tɛb nwɔŋá. Zá boò gə́, bə̀ kpàm nwɔŋ taà nɛɛ̀n dú: «Báátììkpɛ̀ŋá, Dauda Wàá, ɛ̀g ǹ bé' bə́ búúrá.»

³²Yéésù dìì gə́, bàà bà boò yaà kúnú, bít dɛ̀d bə̀: «Íí í' máà mà' ii níì gú?»

³³Kè' bə̀ í'ù: «Báátììkpɛ̀ŋá, bə́ í' gə́, núù bə́ bəd boò keèd kúnú.»

³⁴Yéésù búúd mà'ù gə́, pig bə̀ núùrú. Bít kə̀ nwɔŋ aa nuù yée kíinní, ìì ɛ̀g núù boò bəd gə́, ìì bɔ̀b núù boò bəd keèd yàá, bít bə̀ bàg Yéésù yàá.