Read Samba Leko Mata 23 Bible Online

Mata 23 - Samba Leko bible

Mata 23

¹Nɛ́ɛ̀m Yéésù tə́ nwɔŋ gáàm kə̀ nɛ́b zùúm, bít kə̀ nɛ́b sáànmbə̀ oò bəd yée gə́, bàà:

²«*Nɛ̀n indaŋ̀mbə̀ bəd gə̀b kə̀ *Farisa bəd gə̀b tá, bə̀ zíg, bə̀ bàà boò ì' *nɛ́b bəd Musa indaŋ̀mbə̀ bərá.

³Ìì ləə bə̀ nwɔŋ kúnú, bít ìì mà' in aa bə̀ tə́ ii baàn də kíìn kóólé. Zá ìì mà' tù' boò bəraa ìì tə́ ma'ǹ də gə́ sí. Kàandə, bə̀ mà' tù' kə̀ nwɔŋ aa ìì tə́ sáàn də sé.

⁴Bə̀ pè' nɛ́b bəd kə̀ kpɛŋsɛ́lá, boò ləə indaŋ̀mbìá, kìínmbə̀ inpi'kè aa nɛ́b bəd tə́ pa'ǹ yíləsú rə kíin. Zá boò gə́, bə̀ í' inpi'kè aarə pigǹmbə̀ nɛɛ̀n wàà yíl bə, bɔ̀b nɛ́b bəd láŋ̀ pa'ǹmbə̀ bə sé.

⁵Bə̀ mà' tù' boò bəd kóólé, bɔ̀b nɛ́b bəd boò bé' bənə́ kúnú. In aa bə̀ bád Vɛnɛ́b nwɔŋ bə, bə̀ tab gbə̀sú, kə̀ nɛɛ̀n bərə, boò bə̀ gə́, bə̀ kùd gbàád bərá. Dàál gú' boò bəd kɔ̀ tə́ yádkeá, bɔbm̀ i'ǹmbə̀ bənə́ nyɛɛmnə́ Vɛnɛ́b tə́ gbàákù.

⁶Bə̀ í' kuùmbə̀ zɔ̀ŋ káŋke bə̀ bə gbèd magə̀ ba. Bít *Yahudu bəd wúlwáàlbə̀ bərú kɔ̀, bə̀ í' dáàn kuùmbə̀ mə̀ə̀d gbàád bəd bə númú.

⁷Í' bə̀ sáá boò dɔ̀m bənə́ kúnú, zɔ̀ŋ aa nɛ́b bəd wál bəroó. Bít bə̀ í' nɛ́b bəd boò dɛ̀d bənə́ ‹Nɛ̀ná.›

⁸Zá aí gə́, ìì mà', bɔ̀b nɛ́b bəd boò dɛ̀ri ‹Nɛ̀nə́› sí. Kə̀ aakíin də, nɛ́ŋə̀ nə́ŋ̀ní tə́ŋtə́ŋ kùmsə̀n nɛ̀n íí ra. Bít aí gə́, íí kóólé, íí ɔ̀dkudvɛɛ̀l bərá.

⁹Bít nɛ́ŋə̀ nə́ŋ̀má ìì dɛ̀d zɔ̀ŋ yɛ́b bə ‹Báá› sí. Kàandə, nɛ́ŋə̀ nə́ŋ̀ní tə́ŋtə́ŋ kùmsə̀n Báá íí ra; nɛ́ŋə̀ aa kùm lɛgú paà roó.

¹⁰Ìì zíg yíl íí, boò dɛ̀ri ‹Gààd bəd› sí. Kə̀ aakíin də, nɛ́ŋə̀ nə́ŋ̀ní tə́ŋtə́ŋ kùmsə̀n Gààrá, Krístù.

¹¹Nɛ́ŋ gbàáro aa aí tə́ŋə́ rə, oò kùm nɛ́d tù' bə̀ ma'ǹ íí ra.

¹²Kóó nɛ́ɛ̀réè, káŋ yíl oòì gə́, Vɛnɛ́b dáù bí'ǹ dùú; bít nɛ́ŋə̀ aa bí' yíl oò dùù rə kɔ̀, Vɛnɛ́b dáù ná'ǹ lɛgú.»

¹³Kə̀ aakíin də, Yéésù bàà: «Búúd tə́ aí yílú, íí *nɛ̀n indaŋ̀mbə̀ bəd gə̀b kə̀ *Farisa bəd gə̀b tá. Íí nɛ́b gú' bàrə̀b bə̀ bərá! Íí lè' nɛ́b bəd *Vɛnɛ́b Gààd lɛgú paà bə̀ waàl bée. Íí pìì rú wərə̀ kə̀ yíl aí bə̀ sé, bít íí dàà nɛ́b bəraa í' piìnmbə̀ rə kɔ̀ kpaŋ̀ sé. [

¹⁴«Búúd tə́ aí yílú, íí *nɛ̀n indaŋ̀mbə̀ bəd gə̀b kə̀ *Farisa bəd gə̀b tá. Íí nɛ́b gú' bàrə̀b bə̀ bərá! Íí í' Vɛnɛ́b bùúd nyɛɛ̀mbìá, bɔ̀b boò ɛ̀gi kìínmbə̀ nɛ́b sɔ̀ɔ̀n bəd kíin. Bít kè' íí sáá in aa val kɛ́ɛ̀m bəd kə̀ naà roó. Íí dá búúd nwuukè gbà'á bɔ̀bm̀, dá sə̀n nɛ́b kambəd bə̀ kanàá!]

¹⁵«Búúd tə́ aí yílú, íí *nɛ̀n indaŋ̀mbə̀ bəd gə̀b kə̀ *Farisa bəd gə̀b tá. Íí nɛ́b gú' bàrə̀b bə̀ bərá! Íí gəə̀l yɛ́b gə́ kóólé, nwuu gbàád bərú kóólé, bɔ̀b nɛ́b bəd boò pɛ́n tɛ́m kə̀ Vɛnɛ́b bagǹmbìá. Bít màìgə́ sàà íí bɔ̀b nɛ́ŋə̀ì nə́ŋ̀ gə́, mà' íí bí'ù, búúraa bɔ̀b laa aa fə́' bə gá rə rú rə, kànsə̀n aa íí dá bɔbm̀ də zɔ̀ŋ iira.

¹⁶«Búúd tə́ aí yílú, íí nɛ́b kpaŋ̀ bə̀ i'ǹ nyəd bərá! Íí bàà: ‹Dáà nɛ́ŋə̀ nwɔ̀m inì kə̀ láŋsə́ wúlá, bɔ̀b in nə́ŋ̀ ma'ǹmbìá, zá mà' in də síngə́, mà' in nə́ŋ̀má gá. Zá dáà nɛ́ŋə̀ nwɔ̀m inì kə̀ in aa bə̀ kùd kə̀ bəŋzɔ' láŋsə́ wúu roó, bɔbm̀ in nə́ŋ̀ ma'ǹmbə̀ gə́, in aa nwɔ̀m də, oò ma'míìn kúnú.›

¹⁷Íí nɛ́b kèéd bərá, kə̀ nyəd bərá! In déè kànsə̀n kə̀ pɛ̀sə́ gú? Bəŋzɔ' náà, sínkɔ̀ láŋsə́ wúl aa bí' bəŋzɔ' Gìdń deè?

¹⁸Bít íí bàà sɔ̀ŋ: ‹Dáà nɛ́ŋə̀ nwɔ̀m in tə́ kə̀ *gannyàgə̀lá, bɔ̀b in nə́ŋ̀ ma'ǹmbìá, zá mà' in də síngə́, mà' in nə́ŋ̀má gá. Zá dáà nɛ́ŋə̀ nwɔ̀m in tə́ kə̀ in aa bə̀ pii *gannyàgə̀lə́ roó, bɔ̀b in nə́ŋ̀ ma'ǹmbə̀ gə́, in aa nwɔ̀m də, oò ma'míìn kúnú.›

¹⁹Íí nyəd bərá! Níì kùmsə̀n in yíl bə̀ gú? Láŋsə́ in aa bə̀ pii reè, sínkɔ̀ *gannyàgə̀l aa bí' láŋsə́ in aa bə̀ piì rə gìdń deè?

²⁰Màn aa nwɔ̀m in tə́ kə̀ *gannyàgə̀l də, nwɔ̀m in tə́ kə̀ *gannyàgə̀lá, kə̀ in aa yílə́ wərə̀ rə tə́ kóólé.

²¹Màn aa nwɔ̀m in tə́ kə̀ láŋsə́ wúl lə, nwɔ̀m in tə́ kə̀ láŋsə́ wúlá, kə̀ Vɛnɛ́b aa ləə wúu wərə̀ rə tə́ kóólé.

²²Bít màn aa nwɔ̀m in tə́ kə̀ lɛg də, nwɔ̀m in tə́ kə̀ gààd mə̀ə̀rá, bít nwɔ̀m in tə́ kə̀ Vɛnɛ́b aa kùm bə wərə̀ roó.

²³«Búúd tə́ aí yílú, *nɛ̀n indaŋ̀mbə̀ bəd gə̀b kə̀ *Farisa bəd gə̀b tá. Íí nɛ́b gú' bàrə̀b bə̀ bərá! Íí bɔ̀b inì kób gə́, pà' íí pii nə́ŋ̀, kìínmbə̀ in yɛsə̀ sol bə̀ aa páá íí sáá nwɔgə̀ rú, bɔ̀b nwɔgə̀ oò sɔ̀ɔ̀n kə̀ kùrú roó; kìínmbə̀ Anisa yɛsə̀ kíin, bít kə̀ kumin yɛsə̀ kíin. Zá məə íí dàà insánke aa kàn kə̀ pɛ̀sə́ indaŋ̀mbə̀ rú roó' Wɔ̀ɔ̀làá, sɔ̀ɔ̀ná, bít kə̀ vɛ́nà. Zá aa yée kùmsə̀n in aa dáà íí dá diìn ma'ǹmbə̀ roó. Ɛ̀g íí gɔ̀n in kam bəraa nyɛ́d də gá kɔ̀.

²⁴Íí nɛ́b kpaŋ̀ bə̀ i'ǹ nyəd bəraa yóo! Íí tììd wəl nyəə̀nmbə̀ íí ra, íí vúŋ nyàányáàá, zá bít íí tə̀ə̀m geloba.

²⁵«Búúd tə́ aí yílú, íí *nɛ̀n indaŋ̀mbə̀ bəd gə̀b kə̀ *Farisa bəd gə̀b tá. Íí nɛ́b gú' bàrə̀b bə̀ bərá! Íí sùg badn magə̀wà zɔ̀ŋ pɛŋə́ bìá, bít kə̀ gbèd magə̀ pɛŋá. Zá in aa íí páá rú wərə̀ rə gə́, in aa nyá' íí kè'à nɛ́b bəd naà kə̀ kpɛŋsɛ́l loó, kə̀ in ɔdǹmbə̀ vaksə́ bərá.

²⁶Ń *Farisa nyəərá! Éèn ǹ sùg bə́ŋ̀ badn magə̀wà zɔ̀ŋ tɛ́mə́ bə̀ sína, bít kə̀ zɔ̀ŋ pɛŋə́ bìá, badn magə̀wà dá taà kuùm nyɛdkèá.

²⁷«Búúd tə́ aí yílú, íí *nɛ̀n indaŋ̀mbə̀ bəd gə̀b kə̀ *Farisa bəd gə̀b tá. Íí nɛ́b gú' bàrə̀b bə̀ bərá! Íí lúŋ tə́ sàà bəraa bə̀ bííd doó. Sàà bəraa rə, bə̀ sɔ̀ɔ̀n gbaarú, zá zɔ̀ŋ nuù bə̀ gə́, nyìì tə́ kə̀ níŋsə́ nwɔnké bərá, bít kə̀ in nwɔnké luùm gɔ̀ŋ gɔ̀ŋ bərá.

²⁸Aí kɔ̀, íí tə́ nɛɛ̀n aarə rú, íí ì' yíl íí nɛ́b bəd núùrú, kìínmbə̀ íí nɛ́b sɔ̀ɔ̀n bəd kíin. Zá aí tɛ́mə́ gə́, íí nyìì tə́ kə̀ gú' bàrə̀bá, bít kə̀ invaksə́ ma'ǹmbìá.»

²⁹«Íí *nɛ̀n indaŋ̀mbə̀ bəd gə̀b kə̀ *Farisa bəd gə̀b tá, íí nɛ́b gú' bàrə̀b bə̀ bərá! Búúd tə́ aí yílú, kàandə, íí wə̀' sə̀n *Vɛnɛ́b gbantumsə̀ bəd sàà sɔ̀ɔ̀nkè bərá, bít bád íí kùd sə̀n nɛ́b wɔ̀ɔ̀lə̀ Vɛnɛ́b bə̀ bagǹ bəd sàà bərá.

³⁰Bít íí bàà: ‹Dáà bə́ kùmà tə́ doo bə́ bəd sɛŋə́ gə́, bá wáàl kə̀ boò tá, bə́ lòd *Vɛnɛ́b gbantumsə̀ bəd gá.›

³¹Íí mà' ìì kə̀ aakíin gə́, íí mà' sedako tə́ aí yílú ní. Bít aíra íí kùmsə̀n nɛ́b aa bə̀ lòd *Vɛnɛ́b gbantumsə̀ bəd də yɛb bərá.

³²Èè, sɔ̀ɔ̀n yàá! Ìì dáá kə̀ númú ní, mà' ìì bɛ́' tùsaa doo íí bəd dàà roó!

³³Íí nɛ́b vaksə́ bəraa kìínmbə̀ pàì kíin yóo! Ééleè sèl íí bàà taà, bənə́ dáánnə́ kíìn súúnàá, fág bə̀ kò' bənə́ laa aa fə́' bə gá rə rú gá gú? Íí bán gá.

³⁴Kə̀ taàbìá, ìì kìì nwɔŋ aa yóo' Tùm má ii *Vɛnɛ́b gbantumsə̀ bəd aanàá, kə̀ nɛ́b in bə̀ gàbm̀ bəd tá, bít kə̀ nɛ̀n Vɛnɛ́b nwɔŋ bə̀ sáàn bərá. Íí dá kam kíìn loràá, íí dá kam bágǹ téélɛŋké ba, íí dá kambəd kíìn zibm̀ *Yahudu bəd wúlwáàlbə̀ íí bərú, bít íí dá bə̀ búúd í'ǹ bìl kə̀ bìlá.

³⁵Tùm má bə̀ aàn aí sunú, bɔ̀b má taà nɔ̀m máá bə̀ sí'ǹ nɛ́b aa bə̀ mà' invaksə́ sín də bòórú, dá sɔ̀d Abɛl nɛ́d wɔ̀ɔ̀lə̀ nyɛ̀lə́m ba, yaà dá wə́ə̀n Zakariya nyɛ̀lə́m ba. Zakariya rə, Barakiya wàá. Zakariya rə, màn aa zìb íí lò' tə́ŋtə́ŋ Zɔ̀ŋ Gìdńnú kə̀ *gannyàgə̀lú roó.

³⁶Mə́ tə́ ii kíìn baanàá, aarə nwɔŋ sɔ̀ɔ̀ná, búúraa ìì dá bé'ǹ kə̀ yíl lo'ké bəraa rə kóólé, wál dá pí'ǹ nɛ́b bəraa bə́ŋyée rə yílú!»

³⁷«Káiya, íí nɛ́b Urusalima bìlə́ bìá, nɛ́b aa lòd íí sáá *Vɛnɛ́b gbantumsə̀ bəd, bít làà íí lòd nɛ́b aa Vɛnɛ́b tùmà rə kə̀ bəŋ doó! Mə́ í' ii dɛdǹ wáàlǹmbə̀ máá sunú, kìínmbə̀ kòò wàà bə̀ dɛ̀d tə́ yɛb oò bəd wáàl oò bɛgə̀l dùù kíin! Zá aí gə́, íí məə kúnú!

³⁸Ìì ɛ̀ga! Wúl íí yaà dá kuùm ígá.

³⁹Kə̀ aakíin də, mə́ tə́ ii kíìn baanàá, íí bé' mə́ sɔ̀ŋ gá, yaà dá wə́ə̀n sɛŋ aa íí dá baàn: ‹Báátììkpɛ̀ŋ Vɛnɛ́b oò zíg màn aa tóò yaànà oò nə́gə́lə́ rə nɛɛ̀n yílú› rə bə zé!»