Read Samba Leko Mata 25 Bible Online

Mata 25 - Samba Leko bible

Mata 25

¹«Ìì ɛ̀ga, *Vɛnɛ́b Gààd, lúŋ tə́ zagəm nwɔŋ aa yóo' Nyàm nə́ŋ̀ kàani, yɛb kɛ́ɛ̀m bèlzá bəd kób, bə̀ pú' bəd lampə̀ boò bərá, bít ìì ɛ̀m dáàn sáŋ̀mbə̀ kə̀ wèérá.

²Boò tə́ŋə́ rə, yɛb kɛ́ɛ̀m núnà ìì kə̀ yílə naà sé, bít yɛb kɛ́ɛ̀m núnə̀ kɔ̀ ìì kùmsə̀n nɛ́b in bə̀ gabm̀ bərá.

³Yɛb kɛ́ɛ̀m bəraa núnà, ìì kə̀ yílə naà síndə, bə̀ pà' lampə̀ boò bərá, zá bə̀ kò' kílə́m ɔ̀d naà sé.

⁴Zá yɛb kɛ́ɛ̀m in bə̀ gabm̀ bəd də gə́, ìì pà' bəd kílə́m bùn naà, kə̀ lampə̀ boò bəd tá.

⁵Kàanyée gə́, wèéd náŋà kíìn yaànmbìá. Yɛb kɛ́ɛ̀m bəraa boò kób yée kóólé, ləəm núù kò' bə̀ yàá, bít pí' bə̀ ləə bəd ləəm yàá.

⁶«Sibə̀wà kàà gə́, bə̀ kìì kpə̀ə́ǹ páànmbə̀ ní tígə́lú: ‹Ìì ɛ̀ga, wèéd wə́ə́ yàá! Ìì vúg kúnú, ɛ̀m dá ìì sáŋ kə̀ oòra!›

⁷Kàanyée gə́, yɛ́b kɛ́ɛ̀m bèlzá bəraa kób yée bɛ́rì lɛ́m bəd yàá, bít ìì pìì bəd lampə̀ boò bəd kudǹmbìá.

⁸Yɛb Kɛ́ɛ̀m bèlzá bəraa ìì kə̀ yílə naà síndə, ìì dɛ̀d yɛb kɛ́ɛ̀m bèlzá in bə̀ gabm̀ bərá: ‹Ìì pii bə́ kílə́m íí rə zɔ̀gɔ̀, kàandə, lampə̀ bə́ bəd bə̀ tə́ kíìn fə́'nàá.›

⁹Yɛb kɛ́ɛ̀m bèlzá in bə̀ gabm̀ bəd kè' ìì í' bə̀: ‹Ə́ùwə́, kàandə, də́ŋ obə́ bə̀ kə̀ aí bə̀ tə́ gá. Ìì ɛ̀m nɛ́b kílə́m bə̀ gə́ə̀l bəd sunú, dá ìì lɛ́bà aí bìá.›

¹⁰Yɛb kɛ́ɛ̀m bəraa ìì kə̀ yílə naà síndə, zá' ìì ɛ̀m bəd kílə́m dáàn lɛ́bm̀bìá. Zá sɛŋ aarə bəní, wèéd yaà wə́ə́ yàá. Yɛb kɛ́ɛ̀m bèlzá bəraa núnə̀, bə̀ kùd bəd si' boò yée gə́, ìì pìì kə̀ oò tá, wúl kéèn bə̀ pa'ǹnú, bít ìì ke' wúl waàl kə̀ kɔ̀msə̀wàá.

¹¹Bòórú sɛŋ pà' gə́, yɛb Kɛ́ɛ̀m kam bəraa yaà ìì wə́ə́ taá. Bít ìì dɛ̀d nwɔŋ, ìì bàà: ‹Gbàároá, gbàároá, ǹ kèd bə́ wúl waàlá!›

¹²Zá wèéd kè' í', bàà: ‹Mə́ tə́ ii kíìn baanàá, aarə nwɔŋ sɔ̀ɔ̀ná, mə́ gàb ii sé.› »

¹³Yéésù bàà zəg sɔ̀ŋ: «Kùm ìì nwán kúnú. Kàandə, íí gàb nyàm də sé, bít íí gàb sɛŋ də sé.»

¹⁴«Ìì ɛ̀ga, sɛŋ aa Vɛnɛ́b dá sɔ̀dǹ gààd ləə̀nmbə̀ bərə, tə́ kìínmbə̀ zagəm nwɔŋ aa yée kíin. Nyàm nə́ŋ̀ kàani, nɛ́ŋ váàndo nə́ŋ̀ ligə̀ bə̀ tə́ ɛɛ̀m sɛ̀ɛ́ná. Dɛ̀rà nɛ́d tù' bə̀ ma'ǹ oò bərá, bít pii bə̀ gbaŋə̀ oò bərá.

¹⁵Pii nə́ŋ̀ bəŋzɔ' dìg núnà, nə́ŋ̀ ɔ̀d kɔ̀ piiù dìg iira, nə́ŋ̀ toorúb kɔ̀ piiù dìg nə́ŋ̀, kóó nɛ́ɛ̀réè kə̀ kpɛŋsɛ́l oòra. Bòórú oò gə́, zá' ɛ̀m kúnú.

¹⁶Sɛŋ də bəní, màn aa kè' dìg núnə̀ rə, zá' ɛ̀m, nɔ̀ŋ lɛ́b vúŋ dìg núnə̀ ɔ̀d sɔ̀ŋ.

¹⁷Kə̀ nɛɛ̀n aarə kíinní sɔ̀ŋ, màn aa kè' dìg iirə rə, zá' ɛ̀m dá nɔ̀ŋ lɛ́b vúŋ dìg iirə ɔ̀d sɔ̀ŋ.

¹⁸Zá màn aa oò gə́ piiù ba' dìg nə́ŋ̀ də, zá' ɛ̀m dá gbə̀' lib yɛ́b ba, bít mə́' əd nɛ̀n oò basaa rə rú wərà.

¹⁹«Sɛŋ bùùd sína, nɛ́b tù' bə̀ ma'ǹ bəraa yée, nɛ̀n boò yaà wə́ə́ taá, bít dɛ̀d bə̀, yaà boò ùd bəǹ in aa boò mà' kə̀ basaa roó.

²⁰Màn aa piiù dìg núnə̀ rə, gbad yaà, bít ì' dìg núnə̀ ɔ̀d bəraa bɔ̀b doó, bàà: ‹Nɛ̀ná, pii ń dàà mə́ dìg núnà. Ǹ ɛ̀ga, aa yée dìg ɔ̀d bəraa nɔ̀ŋ sàà mə́ bɔ̀bà yílə́ wərə̀ roó.›

²¹Nɛ̀n oò bààù: ‹Aarə sɔ̀ɔ̀n yàá. Ń nɛ́d tù' bə̀ ma'ǹ sɔ̀ɔ̀ná, bít ń nɛ́d vɛ́nà bìá. Ń kùmì nɛ́d sɔ̀ɔ̀n in bɛ̀ŋ́sə̀ yɛb aa kə̀ pɛ̀sə́ naà síndə ba. Tə́ kàangə́, máá n in ɔ̀d kam bəraa kə̀ pɛ̀sə́ naà gbàákù rə piinàá. Ǹ yaà kúnú, yaàn kìì tɛ́m làmkè kə̀ máá tá.›

²²Nɛ́d tù' bə̀ ma'ǹ aa piiù dìg iirə rə, oò kɔ̀ gbad yaà taà bòórú, bít bàà: ‹Nɛ̀ná, pii ń dàà mə́ ba' dìg iira. Ǹ ɛ̀ga, aa yée ba' dìg iirə ɔ̀d bəraa nɔ̀ŋ sàà mə́ bɔ̀b yílə́ wərə̀ roó.›

²³Nɛ̀n oò bààù: ‹Aarə sɔ̀ɔ̀n yàá. Ń nɛ́d tù' bə̀ ma'ǹ sɔ̀ɔ̀ná, bít ń nɛ́d vɛ́nà bìá. Ń kùmì nɛ́d sɔ̀ɔ̀n in bɛ̀ŋ́sə̀ yɛb aa kə̀ pɛ̀sə́ naà síndə ba. Tə́ kàangə́, máàn in ɔ̀d kam bəraa kə̀ pɛ̀sə́ naà zùúm də piinàá. Ǹ yaà kúnú, yaàn kìì tɛ́m làmkè kə̀ máá tá.›

²⁴Bòórú gə́, nɛ́d tù' bə̀ ma'ǹ aa piiù dìg nə́ŋ̀ də, oò kɔ̀ yaà wə́ə́ taá, bít bàà: ‹Nɛ̀ná, mə́ gàb yàá, ám gə́, ń gàb ba' nwɔŋì gbàákù. Ń kɛ̀d zɔ̀ŋ aa ń wùù bə síndə ba, bít ń və̀l yɛd, zɔ̀ŋ aa ń lɛ́' yɛd luùm bə síndə ba.

²⁵Mə́ nùù də́dǹná, bít mə́ mà' tù' kə̀ ba' ń də sé. Ɛ̀m dá mə́ mə́' ba' ń də yɛ́b ba. Ǹ ɛ̀ga, ba' ń də yóo.›

²⁶Nɛ̀n oò kè' í'ù: ‹Ń nɛ́d tù' bə̀ ma'ǹ vaksə́ murə̀ bìá! Ń gàb yàá, mə́ kɛ̀d zɔ̀ŋ aa mə́ wùù bə síndə ba, bít mə́ və̀l zɔ̀ŋ aa mə́ lɛ́' luùm bə̀ síndə ba.

²⁷Dáà ń gàbì gə́, m̀ páá ba' mə́ ba' wúuú, bít mə́ bíràì gə́, yaà má gbaŋə̀ mə́ vúŋ̀ kə̀ tɔ̀ɔ̀d tá.

²⁸Nyá' ìì kè'ù ba' dìg nə́ŋ̀ aa kə̀ naà rə gə́, bít ìì pii màn aa kə̀ ba' dìg kób doó.

²⁹Kàandə, kóó nɛ́ɛ̀réè, tə́ kə̀ naà gə́, Vɛnɛ́b pii dáù ɔ̀d zəgàá, bít dá kuùm kə̀ naà zùúm. Zá màn aa kə̀ naà síndə, aa wàà aa kə̀ naà rə, Vɛnɛ́b nyá' dákíìn ke'nàá.

³⁰Nɛ̀n oò bààù' Ń nɛ́d tù' bə̀ ma'ǹ tɛdńná. Pà' ìì lɛ́'ù gbaarú, tígə́lú. Oò kpə̀ə̀ wərə̀ kə̀ nə́gə́l fu'ǹmbìá.› »

³¹«Sɛŋ aa nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə dáà yaànnà kìínmbə̀ gààd gbà'á kíin, kə̀ *malaika bəd tə́ kóólé rə, yaà dá kuùm gààd mə̀ə̀d káŋke bə̀ oò ba.

³²Nɛ́b kun bəraa zɔ̀ŋə yɛ́b bərə kóólé, yaàì dá wáàl oò númú. Bít dá nɛ́b bəd pɛɛ̀l kə̀ ɔ̀dnə́ŋ̀ bərá, kìínmbə̀ bɛ̀rə̀ yibə̀ pɛ̀l bɛ̀rə̀ bəd tə́ kə̀ vəə bəd kíin.

³³Bít dá bɛ̀rə̀ bəd zígǹ oò nɛɛ̀n váànú. Vəə bəd kɔ̀, dá bə̀ bí'ǹ nɛɛ̀n kéènú.

³⁴Kàanyée gə́, gààd gbà'á dá taà nɛ́b aa bə̀ dá kuùm oò nɛɛ̀n váànú rə baanàá: ‹Ìì yaà kúnú, íí nɛ́b aa Báá mə́ zígi nɛɛ̀n yílə́ roó. Yaà ìì pìì *Vɛnɛ́b gààraa kùd zígi, sɛŋ aa séé lɛg kə̀ yɛ́b tə́ rə rú.

³⁵Kàandə, mə́ kììà gulùmá, bít íí pii máà inlíìnmbə̀ yàá. Mə́ kììà wəlsúurá, bít íí pii máà wəl yàá. Mə́ yaà sɛ̀ɛ́ná, bít íí kè' máàì aí yiilú.

³⁶Mə́ kùmà záání, bít íí páá máà gɔ̀' yàá. Mə́ ləəà mará, bít ləə íí nwán máà yàá. Mə́ kùmà wúltígə́l bə̀ rú, bít ɛ̀m dá íí dɔ̀m máà yàá.›

³⁷Nɛ́b aa Vɛnɛ́b kè' bə̀ kìínmbə̀ nɛ́b wɔ̀ɔ̀lə̀ bəd kíin də, bə̀ dáù ke'ǹ í'ǹ kə̀ aakíin: ‹Báátììkpɛ̀ŋá, nɛ́mbínì bə́ bé'nnà taà gulùmá, bít bə́ piìnnà taà inlíìnmbə̀ gú? Sínkɔ̀ wəlsúurá, bə́ piinnà taà wəl nyəə̀nmbə̀ gú?

³⁸Nɛ́mbínì ń taà sɛ̀ɛ́ná, bít bə́ ke'ǹnà taà obə́ yiìl gú? Sínkɔ̀ nɛ́mbínì bə́ bé'nnà taà záání, bít bə́ páànnà taà gɔ̀' gú?

³⁹Nɛ́mbínì ń taà kə̀ mará, bít ləə dá bə́ nwáàn taà gú? Sínkɔ̀ nɛ́mbínì bə́ bé'nnà taà wúltígə́l bə̀ rú, ɛ̀m dá bə́ dɔ̀mmà taà gú?›

⁴⁰Gààd gbà'á kè' dá bə́ í'ǹ: ‹Mə́ tə́ ii kíìn baanàá, aarə nwɔŋ sɔ̀ɔ̀ná, sɛŋ gə́ kóólé, íí mà' in bəraa rə yàá, nɛ́ŋə̀ nə́ŋ̀ ɔ̀dkudvɛɛ̀l mə́ bəraa kə̀ pɛ̀sə́ naà síndə tə́ŋə́ gə́, aarə máára íí mà' taá.›

⁴¹Bítsɔ̀ŋ, gààd dá nɛ́b aa kùm oò nɛɛ̀n kéènú rə baàn: ‹Ìì ɛ̀m zɔ̀ŋ bùúd kə̀ máára. Íí nɛ́b aa Vɛnɛ́b mà' ii nwɔŋyɛɛ̀l yóo! Ìì ɛ̀m laa aa fə́' bə gá, bə̀ zíg Sámbàŋyɛ́rə̀ kə̀ *malaika oò bəd tə́ rə rú!

⁴²Kàandə, mə́ kùmà gulùmá, bít íí pii máà inlíìnmbə̀ sé. Mə́ kììà wəlsúurá, bít íí pii máà wəl nyəə̀nmbə̀ sé.

⁴³Mə́ ɛ̀mà sɛ̀ɛ́ná, bít íí kè' máà aí yiìl sé. Mə́ kùmà záání, bít íí páá máà gɔ̀' sé. Mə́ ləə mará, bít mə́ kùmà wúltígə́l bə̀ rú, bít ləə íí nwán máà sé.›

⁴⁴Kè' bə̀ dáù í'ǹ kə̀ aakíin: ‹Báátììkpɛ̀ŋá, nɛ́mbínì bə́ bé'nnà taà gulùmá, bít bə́ piinnà taà inlíìnmbə̀ sín gú? Sínkɔ̀ nɛ́mbínì bə́ bé'nnà taà kə̀ wəlsúurá, sínkɔ̀ sɛ̀ɛ́ná, sínkɔ̀ záání, sínkɔ̀ mará, sínkɔ̀ wúltígə́l bə̀ rú, bít láŋ yaà bə́ ma'ǹ taà tù' bə sín gú?›

⁴⁵Gààd kè' dá bə̀ í'ǹ: ‹Mə́ tə́ ii kíìn baanàá, aarə nwɔŋ sɔ̀ɔ̀ná, sɛŋ gə́ kóólé, íí məəì in bəraa yée ma'ǹmbə̀ nɛ́ŋə̀ nə́ŋ̀ nɛ́b aa kə̀ pɛ̀sə́ naà síndə tə́ŋə́ gə́, aarə íí məə máá ma'ǹmbìá.›

⁴⁶Bít nɛ́b aarə, bə̀ dá ɛɛ̀m búúd nwuukè zèd kə̀ zèd bə̀ rú. Zá nɛ́b wɔ̀ɔ̀lə̀ bəd gə́, ìì dá ɛɛ̀m *gɔ̀ŋsə́ aa bɛ́d bə gá rə rú.»