Read Samba Leko Mata 3 Bible Online

Mata 3 - Samba Leko bible

Mata 3

¹Zèd taà zɔ̀gɔ̀ gə́, Yohana nɛ́d baptisma bə̀ piìn yaà ì' yíl oò fɔ̀gú, Yahudiya yɛ́b ba, bàà:

²«Ìì sɔ̀g kúnú, kàandə sɛŋ aa Vɛnɛ́b yaà dá gààd ləə̀n nɛ́b oò bəd yílə́ rə, tə́ kíìn wə́ə́nàá!»

³Yohana kùmsə̀n nɛ́ŋə̀ aa *Vɛnɛ́b gbantumsə̀ aa bə̀ dɛ̀rə̀ Esaya, gám nwɔŋ oò, sɛŋ aa bàà kə̀ kùrú: «Nɛ́ŋə̀ nə́ŋ̀ páá kpə̀ə́ǹ tə́ fɔ̀gú, bàà tə́: ‹Làm ìì kùd Báátììkpɛ̀ŋ kpaŋ̀á, ìì mà'ù kpaŋ̀ bəd kíìn wɔ̀ɔ̀lə̀ sɔ̀ɔ̀nkè› » roó.

⁴Yohana páá gɔ̀' aa bə̀ kùd kə̀ geloba gí' roó, bít tab və̀d si' kə̀ gɔ̀g kúlá, líí sáá sii bərá, bít kə̀ núúd fɔ̀gú bìá.

⁵Sɛŋ aa Yohana tə́ Vɛnɛ́b nwɔŋ udǹ də, nɛ́b Urusalima bìlə́ bìá, nɛ́b Yahudiya yɛ́b bə bə̀ kóólé, kə̀ nɛ́b bəraa ləə yɛ́b bəraa Urdun nwuu kàd bərə tə́ kóólé, bə̀ yaà oò sunú.

⁶Bàà bə̀ vúŋ invaksə́ boò bəd nɛ́b bəd númú, bít pii bə̀ baptisma Urdun nwuurú.

⁷Zɔ̀ŋ aa bé' *Farisa gə̀b zùúm tóò yaanà oò sunú, kə̀ Saduki bəd gə̀b tá, baptisma yaàn ke'ǹmbə̀ oò naà gə́, bàà: «Íí pàì kun bəraa yóo! Nɛ́ɛ̀réè bàà iiyà sə̀n ìì nùù Vɛnɛ́b fágə́n aa dáà yaanà aí yílə́ rə kíìn gú?

⁸Bə́ŋyée gə́, ìì mà' tùsaa dá i'ǹ gə́, íí sɔ̀gì roó,

⁹bít ìì dìì baànmbə̀ kə̀ yíl aí bə̀ní: ‹Obə́ gə́, bə́ Abraham yɛb ní› sí! Kàandə, mə́ tə́ ii kíìn baanàá, ìì ɛ̀g bəŋ bəraa yóo, Vɛnɛ́b dá bə̀ kíìn báàn bí'ǹmbə̀ boò kùm Abraham yɛb kàá bərá.

¹⁰Vɛnɛ́b pà' bə̀rə́ì nɛɛ̀n tɛ́mú gbòód, téé aa lɛ̀b wàà sɔ̀ɔ̀n síndə gə́ kóólé, dáù kíìn dubàá, bít dáù páàn laarú.

¹¹Máá gə́, mə́ tə́ ii baptisma piìn kə̀ wəl dìíŋ̀á, bɔ̀b aí bə̀ i'ǹmbə̀ gə́, íí pɛ́n tɛ́m yàá. Zá màn aa tóò yaanà máá bòórú rə, kàn mə́ sə̀n kə̀ kpɛŋsɛ́lá. Máá gə́, mə́ də́ŋ tábə́ oò pa'ǹmbə̀ naà sé. Oò gə́, dá ii baptisma piìn kə̀ Nwul Gìdńná, bít kə̀ laá.

¹²Kò' magə̀ oò tə́ nɛɛ̀n tɛ́mú, dá pɛ́gə̀ oò tədǹ nyɛ́'nàá, dá yɛd lɛ̀ɛ́ŋə̀ wədǹ pɛdǹ kə̀ yɛd kpásàgá. Dá yɛd wàà lɛ̀ɛ́ŋə̀ wáàl kə́dǹ oò bɔ̀ɔ̀nú. Zá yɛd kpásàg gə́, dá dú'ǹ laa aa fə́' bə gá rə rú.»

¹³Kàanyée gə́, Yéésù zá'à Galili yɛ́b ba, yaà Yohana sunú, Urdun nwuu rú, bɔ̀b Yohana oò pii bəǹ baptisma.

¹⁴Zá Yohana məə bée, bít bààù: «Nɛ́ɛ̀m máára mə́ í' sə̀n baptisma ke'ǹmbə̀ ám naú gə́, bít ń yaà máá səǹ wa!»

¹⁵Zá Yéésù kè' í'ù, bàà: «Bə́ŋyée gə́, ǹ kè' oò ma'míìn kàani. Kàandə, aa dá sɔɔ̀n də, báà ma'ǹ in aa Vɛnɛ́b í' rə kíìn kóólé.» Kàanyée gə́, Yohana kè' taá.

¹⁶Zɔ̀ŋ aa Yohana pii Yéésù baptisma kíinní, Yéésù vúgà kíìn wəlú. Sɛŋ aarə bəní, lɛg keèd zé wə̀ə́d, bít Yéésù bé' Vɛnɛ́b Nwul Gìdń símà oò yílú, kìínmbə̀ mìrə gə́blə̀ kíni.

¹⁷Bít bə̀ kìì pə̀gə̀lib nwɔŋ nə́ŋ̀ vúgà lɛgə́ poú, bàà: «Màn aa yée kùmsə̀n Wàà mə́ra. Mə́ í'ù tə́ gbàákù! Mə́ zíg tɛ́m làmkè mə́ kóólé tə́ oò ba.»