Read Samba Leko Mata 7 Bible Online

Mata 7 - Samba Leko bible

Mata 7

¹Yéésù tə́ diìn nɛ́b bəd in sáànmbə̀ ní: «Ìì fág nɛ́b bəd sí, bɔ̀b aí kɔ̀ Vɛnɛ́b oò fági sí.

²Kàandə, Vɛnɛ́b dá ii fágǹ nɛɛ̀n aa íí fág nɛ́b bəd dú rə rú, bít nwɔŋ bəraa íí fág kə̀ nɛ́b bəd də, Vɛnɛ́b kɔ̀ dá ii fágǹ kə̀ kùrú.

³Kə̀ níìbə̀ ḿ bé' taà saal wàà ɔ̀dnə́ŋ̀ ń núùrú, bít ḿ bé' taà téé aa ám núùrú rə gá gú?

⁴Ééleè, ń dá taà ɔ̀dnə́ŋ̀ ń báàn baànmbə̀: ‹Ǹ dàà mə́, máà pà' vú' n saal wàà tə́ núùrú›, ám kɔ̀ ń tə́ kə̀ téé wàà ám núùrú gú?

⁵Ń nɛ́d gú' bàrə̀b bə̀ aa yóo, éèn pà' ǹ vúŋ téé aa ám núùrú rə sína, bít kə̀ aakíin, ń dá taà báàn núù bé'ǹmbə̀ nyɛdkè, bɔ̀b saal wàà aa ɔ̀dnə́ŋ̀ ń núùrú rə pa'ǹ vú'ǹmbìá.

⁶«Ìì pú' in gìdń bəd, ìì pii yagəd bəd sí. Íí mà'ì kàangə́, lìb bə̀ dáà núù bí'ǹ, bít bə̀ dá ii kíìn lumàá. Ìì lɛ́l síbə́ bəŋ íí bəd sìírə̀ bəd númú sí. Íí mà'ì kàangə́, sìírə̀ bəd bə̀ dákíìn nádǹ dunú.»

⁷«Ìì dìì nyɛɛ̀mbə̀ ní, bít bə̀ dá ii kíìn piinàá. Ìì dìì saànmbə̀ ní, íí dákíìn bɔbàá. Ìì dìì waàl tɔɔ̀mbə̀ ní, bə̀ dá ii kíìn keràá.

⁸Kàandə, nɛ́ŋə̀ aa dìì nyɛɛ̀mbə̀ rə gə́ kóólé, bə̀ piiù kúnú. Màn aa dìì saànmbə̀ rə kɔ̀, bɔ̀b kúnú, bít màn aa dìì waàl tɔɔ̀mbə̀ rə kɔ̀, bə̀ kèrə̀ waàl kúnú.

⁹Nɛ́ɛ̀réè aí tə́ŋú, wàà oò nyɛ̀mə̀ tə́ bə̀rɛ́d gə́, piiù taà bəŋ gú?

¹⁰Sínkɔ̀ nyɛ̀mə̀ tə́ díb gə́, pììù taà bi' gú? Nɛ́ŋə̀ nə́ŋ̀má sé.

¹¹Íí nɛ́b in vaksə́ bə̀ ma'ǹ bəd máá, íí gàbì yɛb íí bəd insɔ̀ɔ̀nkè bəd piìnmbìá. Ééleè Báá bə́n aa lɛgə́ paà rə, pii taà nɛ́b bəraa nyɛ̀mə̀ in də, insɔ̀ɔ̀nkè bəd gá gú? Vɛ́nà, dákíìn piinàá.

¹²«In aa íí í' nɛ́b bəd boò mà' ii rə gə́ kóólé, aí kɔ̀ ìì mà' bə̀ kɔ̀. Aarə, in aa Musa indaŋ̀mbə̀ bàà roó, bít nwɔŋ bəraa Vɛnɛ́b gám kə̀ *gbantumsə̀ oò bəd gú' roó.»

¹³«Ìì pìì waàl bo'kè rú. Waàl aa àà sáá nɛ́ŋə̀ laarú rə gə́, tə́ yádkeá. Nɛ́b zùúm bəd pìì bə̀ sáá sə̀n waàl aarə rú.

¹⁴Zá waàl aa tə́ bo'kè rə gə́, kpaŋ̀ gbò'kèá, àà sáá nɛ́ŋə̀ *gɔ̀ŋsə́ aa bɛ́d bə gá rə rú, bít nɛ́b aa ìì bàg kpaŋ̀ aarə, bə̀ ká' gbàákù sé.»

¹⁵«Ìì gú' yíl aí bə̀ kə̀ Vɛnɛ́b gbantumsə̀ gúsuúm bə̀ bərá. Bə̀ tóò yaànà aí səǹ gə́, bə̀ lúŋ *bɛ̀rə̀ bərá, zá boò tɛ́mú gə́, ìì gbàál lɛ̀gsɛ́rə̀ bərá.

¹⁶Íí dá nɛ́b aarə gabm̀ kə̀ tù' boò bəraa ìì tə́ ma'ǹ doó. Insɔ̀ɔ̀nkè vúg nɛ́b vaksə́ bəd naà gá. Ku' nyìì lɛ̀b nwɔ̀dǹ gá, bít gəəku' kɔ̀, lɛ̀b gààm wàà gá.

¹⁷Kə̀ aarə kíin, téé nyìì sɔ̀ɔ̀n, lɛ̀b sáá téé yɛb sɔ̀ɔ̀ná; téé nyìì vaksə́ kɔ̀, lɛ̀b sáá téé yɛb vaksá.

¹⁸Téé nyìì sɔ̀ɔ̀n bán wàà vaksə́ lɛbm̀bə̀ gá, bít téé nyìì vaksə́ kɔ̀, bán téé yɛb sɔ̀ɔ̀n lɛbm̀bə̀ gá.

¹⁹Téé nyìì aa lɛ̀b téé yɛb sɔ̀ɔ̀n síndə, dùb bə̀ dáù kíìn vəràá, bít bə̀ dáù lɛ́'ǹ laarú.

²⁰Kə̀ aarə kíin, íí dá Vɛnɛ́b gbantumsə̀ gúsuúm bə̀ bəd gabm̀ kə̀ tù' boò bəraa ìì tə́ ma' ǹ doó.»

²¹«Nɛ́b aa tə́ mə́ baàn: ‹Báátììkpɛ̀ŋ, Báátììkpɛ̀ŋ› rə, ìì dá sə̀n piìn *Vɛnɛ́b Gààd lɛgə́ paà bərú gá, zá nɛ́b aa tə́ in aa Báá mə́ lɛgə́ paà bə̀ í' rə ma'ǹ də, bə̀ dá sə̀n piinàá.

²²Màìgə́ fágə́n nyàm yaà wə́ə́ì gə́, nɛ́b bəd zùúm, bə̀ dá mə́ baàn: ‹Báátììkpɛ̀ŋá, Báátììkpɛ̀ŋá, nyàam də, bə́ bàà nɛ́b bəd Vɛnɛ́b nwɔŋ ám nə́gə́lú, nìŋ bə́ vúŋ nwul vaksə́ bəd nɛ́b bəd sisú, ám nə́gə́lú, bə́ mà' inwulubə̀ bəd zùúm ám nə́gə́lú.›

²³Bít máá kɔ̀ má bə̀ baàn nyɛdkè dág: ‹Gàb mə́ bèri sé, gbad ìì ɛ̀m zɔ̀ŋ bùúd kə̀ máára, íí nɛ́b invaksə́ bə̀ ma'ǹ bəraa yóo!› »

²⁴«Kə̀ aakíin də, kóó nɛ́ɛ̀réè, kìì nwɔŋ bəraa mə́ gám yée yàá, bít ləə bə̀ì gə́, lúŋ tə́ nɛ́ŋə̀ in bə̀ gabm̀ aa wə̀' wúl oò bəŋ yílə́ roó.

²⁵Zɔ̀ŋ aa nwan yaà naŋ̀ gə́, wəl vúg yàá, nwul pɛ̀b kə̀ kpɛŋsɛ́l wúl lə ba. Zá wúl lə yi' sé. Kàandə, páá wúl bèl oòrə tə́ bəŋ peel yílú.

²⁶Zá kóó nɛ́ɛ̀réè, kìì nwɔŋ bəraa mə́ bàà yée yàá, bít ləə síngə́, lúŋ tə́ nɛ́ŋə̀ nə́ŋ̀ kèéd aa ɛ̀m dá wə̀' wúl oò kàaní, nyìŋsə́ rú roó.

²⁷Zɔ̀ŋ aa nwan yaà naŋ̀ gə́, wəl vúg yàá, nwul pɛ̀bì kə̀ kpɛŋsɛ́l wúl lə ba; bít wúl lə yaà yi' wɔbə̀l zé kùrùb!»

²⁸Zɔ̀ŋ aa Yéésù gám bɛ́' nwɔŋ aa kàangə́, nɛ́b bəd kóólé, in aa Yéésù sán bə̀ rə, kò' bə̀ yíl yàá.

²⁹Kàandə, sán bə̀ in kìínmbə̀ *nɛ̀n indaŋ̀mbə̀ boò bəd də kíin sé, zá gám ì' bə̀ nwɔŋ kə̀ váàndoá.