Read Samba Leko Mata 8 Bible Online

Mata 8 - Samba Leko bible

Mata 8

¹Zɔ̀ŋ aa Yéésù símà kɔ̀l wàà yílə́ gə́, nɛ́b zùúm bəd bagə̀ bòórú.

²Kàanyée gə́, màn váàn aa gərə́ kò'ù rə, gbad yaà oò sunú, pí' yaà kùm kə̀ dunlígə̀d oò númú, bít bààù: «Báátììkpɛ̀ŋá, dáà ń í'ì gə́, ń dá mə́ kíìn báàn si' nyɛ́'ǹmbìá.»

³Yéésù nàb nɛɛ̀n pigə̀ gə́, bít bàà: «Mə́ í' yàá, si' ń oò nyɛd kúnú!» Kə̀ nwɔŋ aa nuù yée kíinní, si' oò nyɛd yàá.

⁴Bítsɔ̀ŋ, Yéésù bààù: «In aa taà yérə, m̀ bàà nɛ́ŋə̀ nə́ŋ̀má sí. Zá dáá ǹ ì' si' ń də *nɛ́d láŋsə́ bə̀ ma'ǹ númú, nɛɛ̀n aa ń kùm dú roó; bít m̀ pii in tɛdńní bə̀ aa Musa bàà dàà boò pii roó. Aarə, bɔbm̀ sedako ma'ǹmbə̀ nɛ́b bəd kóólé númú, si' ń yɛd yàá.»

⁵Yéésù tə́ ɛɛ̀m Kapɛrnaum bìlú. Zɔ̀ŋ aa tə́ dáàn piìn bìlə́ gə́, sóózè bəd gààd nə́ŋ̀ nyɛ̀mə̀, oò láŋ bəǹ kúnú.

⁶Sóózè bəd gààd bààù: «Báátììkpɛ̀ŋá, nɛ́d tù' bə̀ ma'ǹ mə́ ləə tə́ wúuú, kilə̀ ba. Bán si' wá'ǹmbə̀ gá, bít bé' búúd tə́ gbàákù.»

⁷Yéésù bààù: «Má kíìn dáánàá, máùráàn kíìn gáŋàá.»

⁸Zá sóózè bəd gààd kè' í'ù, bàà: «Báátììkpɛ̀ŋá, máá gə́, mə́ də́ŋ ámbə̀ dɛdǹ aànmbə̀ máá yiìl sé. Zá ǹ bàà nwɔŋ nə́ŋ̀ní tə́ŋtə́ŋ, bít nɛ́d tù' bə̀ ma'ǹ mə́ si' dákíìn gágàá.

⁹Kə̀ aakíin də, máá kɔ̀ mə́ tə́ kə̀ nɛ́b gbàád mə́ bəd máá yílú, bít mə́ tə́ kə̀ sóózè bəd máá dùú. Mə́ bàà nə́ŋ̀ì: ‹Ǹ dáá zɔ̀ŋə› gə́, dákíìn dáánàá. Mə́ bàà nə́ŋ̀ ɔ̀rì: ‹Ǹ yaà kúnú› gə́, dáà kíìn yaanàá! Mə́ bàà kɔ̀' mə́ nə́ŋ̀ì: ‹M̀ mà' in aaú› gə́, dá in də kíìn ma'nàá.»

¹⁰Zɔ̀ŋ aa Yéésù kìì nwɔŋ bəraa sóózè bəd gààd gám yée gə́, kò'ù yíl yàá. Lìb bí' núù nɛ́b zùúm aa tə́ù bagǹ də sunú, bít bàà bə̀: «Mə́ tə́ì kíìn baanàá, aarə nwɔŋ sɔ̀ɔ̀ná, bé' mə́ bèd tɛ́mbagké luùm aa sɛŋ nə́ŋ̀má sé, kóó zɔ̀ŋə Israila yɛ́b ba.

¹¹Mə́ tə́ ii kíìn baàn nyɛ́'nàá, nɛ́b zùúm bəd dáà vúgǹnà zɔ̀ŋ gə́ kóólé, kùm yaà bə̀ dá in líìn *Vɛnɛ́b Gààd lɛgə́ paà bə̀ rú, kə̀ Abraham tá, kə̀ Isiyaku tá, bít kə̀ Yakubu tá.

¹²Zá nɛ́b gààd yiìl bə̀ bəd gə́, vú' bə̀ dá bə̀ lɛ́ɛ̀l gbaarú, zɔ̀ŋ tígə́l bə̀ rú. Zɔ̀ŋ aa ìì dá kpə̀ə́ǹ kpəə̀n bít ìì dá nə́gə́l fu'ǹ bərə ba.»

¹³Bít Yéésù bàà sóózè bəd gààd: «Ǹ ɛ̀m kíìn ám kàrú. Vɛnɛ́b oò pii n kə̀ nɛɛ̀n aa tɛ́m ámbə̀ bàg yérə kíni.» Bít sóózè bəd gààd kɔ̀'váàn si' gág sɛŋ aarə bə ní.

¹⁴Yéésù zá' ɛ̀m Piyɛr yiilú, dá bɔ̀b Piyɛr gúùn kéèn tə́ mad kilə̀ ba, kàdǹ tə́ù sə̀n ma'nàá.

¹⁵Zɔ̀ŋ aa Yéésù yaà pig wàà kéèn də nɛɛ̀n bə gə́, sɛŋ aarə bə ní, kàdǹ zá' dààù yàá. Zá' lɛgú, bít pìì bə̀ inlíìnmbə̀ ma'ǹmbìá.

¹⁶Zɔ̀ŋ aa nyàm yaà mà' gə́, pú' ìì àà nɛ́b mad bə̀ bəd zùúm Yéésù sunú. Nɛ́b aarə, nwul vaksə́ bəd vɔ̀gə̀l bə̀ sùnú. Kə̀ nwɔŋ oò gú' bə̀ bə ní, Yéésù nìŋ vúŋ taà nwul vaksə́ bərá, bít gáŋ nɛ́b mad bə̀ bəd kóólé.

¹⁷Yéésù mà' kàandə, bɔ̀b nwɔŋ aa Vɛnɛ́b bàà dàà *gbantumsə̀ oò Esaya gú' bərə, oò ma'míìn kúnú: «Oòra, kə̀ yíl oò bìá, pà' zá' si' yɛlké bə́ bəd yàá, kə̀ mad bə́ bəd tá.»

¹⁸Nyàm nə́ŋ̀, Yéésù bé' nɛ́b zùúm yaà wál oò səǹ yée gə́, bàà taà boò na' nwuu gbà'á gon naà gúuú.

¹⁹*Nɛ̀n indaŋ̀mbə̀ nə́ŋ̀ gbad yaà Yéésù sunú, bààù: «Nɛ̀ná, má n bagǹ zɔ̀ŋ aa ń dáráàn bərə gə́ kóólé.»

²⁰Yéésù kè' í', bààù: «Sàg bəd tə́ kə̀ lib bəd naú, bít núú lɛgə́ paà bə̀ bəd kɔ̀, ìì tə́ kə̀ wàsàg bəd naú. Zá nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə gə́, kə̀ zɔ̀ŋ aa ləə dá nyi'ǹ bərə naà sé.»

²¹Nɛ́ŋ váàndo ɔ̀d nə́ŋ̀ kɔ̀, sɛŋ də, kùmà *nɛ́b sáànmbə̀ oò bəd tə́ŋú, bààù: «Báátììkpɛ̀ŋá, ǹ dàà mə́ dá máà ləəà báá mə́ val sína.»

²²Zá Yéésù bààù: «Ǹ bàg máára, bít ǹ dàà val bəd boò lə̀ə̀ val boò bərá.»

²³Yéésù pìì kə̀ə̀rú, bít *nɛ́b sáànmbə̀ oò bərì bàgə̀ bòórú.

²⁴Zɔ̀ŋ aa bə̀ tə́ ɛɛ̀m nwuu gbà'á rú yée gə́, zab nwul gbà'á zá'à nwuu gbà'á yílú, pɛ̀b páà wəl yaà tə́ kə̀ə̀d kíìn bɔ̀màá. Zá oò gə́, tə́ ləəm ləənàá.

²⁵*Nɛ́b sáànmbə̀ bəd ìì gbarà oò sunú, dɛ̀d yaà bə̀ lɛ́mə̀ ləəmú, bít ìì bààù: «Báátììkpɛ̀ŋá, yaà ǹ súú bə́ kúnú! Báan kíìn bɔ̀bə̀l wəlú.»

²⁶Yéésù kè' í' bə̀: «Kə̀ níìbə̀ íí nùù taà də́dǹ kàan gú? Tɛ́mbagké íí tə́ bɛ̀ŋ́sə̀wàá.» Kàanyée gə́, zá' lɛgú, pél nwul bəd kə̀ nwuu gbà'á tá nwɔŋá. Bít zɔ̀ŋ yaà dìì zé sə́ə́m.

²⁷Boò kóólé, in aa kò' bə̀ yíl yàá, bít ìì bàà: «Aa gə́, nɛ́ŋə̀ luùm dé, nwul bəd kə̀ nwuu gbà'á tá, ìì ləəù taà gú?»

²⁸Yéésù ɛ̀m dá wə́ə́ nwuu gbà'á gon gúu bə̀ ba, nɛ́b Gadareniya bə̀ bəd yɛ́b ba. Zɔ̀ŋ aarə ba, nɛ́b vɔ̀ɔ̀m bəd iira, bə̀ vúgə́là sàà ba, yaà bə̀ sáŋ kə̀ oòra. Nɛ́b aarə, nwul vaksə́ bəd vɔ̀gə̀l bə̀ kúnú, bít bə̀ gbəŋ̀ kə̀ nɛ́b bərá. Kóó nɛ́ŋə̀ nə́ŋ̀má bán taànmbə̀ kpaŋ̀ aa yérə bə gá.

²⁹Zá ìì ɛ̀ga, kpə̀ə̀ bə̀ tə́ baàn: «Vɛnɛ́b Wàá, ń í' bə́ níì ma'ǹmbə̀ gú? Ń yaà báà búúd í'ǹmbèì? Bə́ŋ̀ sɛŋ aa bá búúd í'ǹ bərə wə́ə́ sé.»

³⁰Sɛŋ də, sìírə̀ gə̀b gbà'á nə́ŋ̀ tə́ líìn zɔ̀ŋ bùúd bə kə̀ boò ra.

³¹Nwul vaksə́ bəd nyɛ̀m Yéésù in aa yóo: «Dáà ń í' bə́ì niŋ̀mbə̀ gə́, nìŋ ǹ àà bə́ sìírə̀ bəd gə̀b aa yée rú.»

³²Yéésù bàà bə̀: «Ìì ɛ̀m kúnú!» Nwul vaksə́ bəd bə̀ vúgə́l nɛ́b vɔ̀ɔ̀m bəraa iirə rə sisú, bít nùù dá bə̀ pìì sìírə̀ bərú. Kə̀ nwɔŋ aa nuù yée kíinní, sìírə̀ bəd bə̀ símà nwuu gbà'á lɔ̀ŋ gú' ba, yaà ìì píl bəd nwuu gbà'á rú, boò kóólé, bít bə̀ vàl kíìn wəlú.

³³Sìírə̀ yibə̀ bəd zá' ìì nùù bəd kúnú, bə̀ ɛ̀m bìlú. Ɛ̀m dá bə̀ ùd nwɔŋ aarə kóólé, bít kə̀ in aa taà nɛ́b vɔ̀ɔ̀m bəraa nwul vaksə́ kò' bə̀ iirə yée yílə́ roó.

³⁴Kàanyée gə́, nɛ́b aa bìlə́ rə kóólé, vúgə́l yaà bə̀ sáŋ kə̀ Yéésù ra. Zɔ̀ŋ aa ìì bé'ù gə́, bə̀ nyɛ̀mə̀ zá' oò dàà bənə́ yɛ́b bənə́ ra.