Read Samba Leko Mata 9 Bible Online

Mata 9 - Samba Leko bible

Mata 9

¹Yéésù na' pìì kə̀ə̀rú, taà bírà nwuu gbà'á naà gúuú, bít zá' ɛ̀m oò bìlú.

²Bə̀ ààùwà nɛ́ŋ váàndo nə́ŋ̀ si' valá, ləə gəd nə́ŋ̀ú. Yéésù bé' nɛ́b aa tɛ́mbagké boò gə́, bàà nɛ́ŋ váàndo si' val lə: «Ǹ kùm kə̀ tɛ́m làmkèá, wàà mə́ra! Invaksə́ ḿ bəd daamíìn yàá!»

³Kàanyée gə́, *nɛ̀n indaŋ̀mbə̀ kambəd bə̀ sèl boò tɛ́mú: «Nɛ́ŋ Váàndo aa yée bàà gə́, bəǹ Vɛnɛ́bá; aarə gám nwɔŋ vaksə́ tə́ Vɛnɛ́b yiilú!»

⁴Yéésù gàb inselké boò tɛ́mú bə̀ yée gə́, bàà bə̀: «Kə̀ níìbə̀ íí sèl taà nwɔŋ vaksə́ bəd aí tɛ́mú kàan gú?

⁵Gbò' sín gbàákù baànmbə̀: ‹Invaksə́ ḿ bəd daamíìn yèè,› sínkɔ̀ baànmbə̀: ‹Ǹ zá' lɛgú, bít ǹ ɛ̀m kínì?›

⁶Zá mə́ í' ìì gàb kúnú, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, tə́ kə̀ kpɛŋsɛ́l naà invaksə́ bə̀ lo'ǹ daàn zɔ̀ŋə yɛ́b ba.» Kàanyée gə́, bàà nɛ́ŋ váàndo si' val lə: «Ǹ zá' lɛgú. M̀ pà' kilə̀ ń da, ǹ ɛ̀m kíìn ám yiilú!»

⁷Nɛ́ŋ váàndo rə kɔ̀ zá' lɛgú, bít ɛ̀m kíìn oò yiilú.

⁸Zɔ̀ŋ aa nɛ́b zùúm bəd bé' kàangə́, də́dǹ mà' bə̀ kúnú, bít bə̀ káŋ Vɛnɛ́b aa pii nɛ́b bəd kpɛŋsɛ́l luùm kə̀ aakíin doó.

⁹Yéésù zá' wərà, tə́ taàn kpaŋə́ yée gə́, bé' nɛ́ŋ váàndo nə́ŋ̀ kùm ba'káám wúuú, nə́gə́l oò Mata. Yéésù bààù: «M̀ bàg mə́ kúnú!» Mata zá' lɛgú, bít bàg Yéésù kúnú.

¹⁰Zɔ̀ŋ aa Yéésù kùm tə́ gbèd líìn Mata wúu yée gə́, nɛ́b ba'káám bə̀ ke'ǹ bəd, kə̀ nɛ́b invaksə́ bə̀ ma'ǹ bəd tá, wál kùm yaà bə̀ líí gbèd kə̀ oò tá, bít kə̀ *nɛ́b sáànmbə̀ oò bəd tá.

¹¹Zɔ̀ŋ aa *Farisa bəd gə̀b bé' in aarə kàangə́, bít ìì bàà *nɛ́b sáànmbə̀ oò bəd: «Kə̀ níìbə̀ nɛ̀n íí líí taà inlíìnmbə̀ kə̀ nɛ́b ba'káám bə̀ ke'ǹ bəd tá, bít kə̀ nɛ́b invaksə́ bə̀ ma'ǹ bəd tə́ gú?»

¹²Nɛ́ɛ̀m Yéésù kìì nwɔŋ bəraa kàangə́, bít bàà: «Nɛ́b si' gaŋsə́ bə̀ bəd sàà sə̀n nɛ́d ganté bə̀ gá, zá nɛ́b mad bə bəd bə̀ sàà sə̀n nɛ́d ganté bìá.

¹³Ìì ɛ̀m kúnú, gád dá ìì ì' nɛ́b bəd nɛɛ̀n aa Núúboòd Gìdń nwɔŋ bəraa í' baànmbə̀ rú roó: ‹Mə́ í' ɛ̀g ìì bé' ɔ̀dnə́ŋ̀ búúrá, zá mə́ sàà inzanzáàn bəraa lòd íí tə́ piìn tɛdńní rə gá.› Kàandə, máá rə, mə́ yaà nɛ́b wɔ̀ɔ̀lə̀ bəd dɛdǹmbə̀ gá, zá mə́ yaà nɛ́b invaksə́ bə̀ ma'ǹ bəd dɛdǹmbìá.»

¹⁴Kàanyée gə́, Yohana nɛ́d baptisma bə̀ piìn *nɛ́b sáànmbə̀ oò bəd bə̀ yaà Yéésù sunú, bít bə̀ dɛ̀rə̀: «Obə́ gə́, bə́ kə̀ *Farisa bəd gə̀b tá, bə́ tə́ *in gíràá. Kə̀ níìbə̀ *nɛ́b sáànmbə̀ ámbə̀ bəd gə́, ìì gíd taà in gá gú?»

¹⁵Bít Yéésù kè' í' bə̀, bàà: «Íí sèl lə gə́, nɛ́b aa bə̀ dɛ̀d bà yaà boò líí wèéd gbèd də, ìì dá bée kuùm kə̀ tɛ́m nwuukè sɛŋ aa bə́ŋ̀ wèéd váàndo tə́ kə̀ boò tə́ reè? Ə́ùwə́, kàan gá! Sɛŋ kambəd dáà kíìn yaanàá, pà' bə̀ dá wèéd váàndo kíìn zá'nàá; bít sɛŋ aarə ba, bə̀ dá taà *in gíràá.

¹⁶«Nɛ́ŋə̀ nə́ŋ̀má sèè *gɔ̀' puu dá làà kə̀ gɔ̀' doo gá. Dáà nɛ́ŋə̀ mà'ì kàangə́, gɔ̀' doo dákíìn seenàá, bít *gɔ̀' seeké puu rə kɔ̀, sɔ̀ɔ̀n də́ŋ kə̀ doo rə gá.

¹⁷Bə̀ pɛ́n badn visə̀ nə́əd doorú gá. Dáà nɛ́ŋə̀ mà'ì kàangə́, badn visə̀ pììyì dɔbm̀ ú'ǹmbə̀ gə́, dá nə́əd bəd kíìn selàá. Bít badn kə̀ nə́əd bəd tá kóólé, bə̀ dákíìn bɔ̀bm̀ dugàá. Zá aa dá sɔɔ̀n də gə́, m̀ pɛ́n badn visə̀ nə́əd puu rú! Bít badn kə̀ nə́əd tá, bə̀ dá taà kuùm sɔ̀ɔ̀ní.»

¹⁸Zɔ̀ŋ aa Yéésù tə́ bə̀ nwɔŋ bəraa baàn kàangə́, Yahudu bəd gààd nə́ŋ̀ yaà wə́ə́ yàá. Yaà kùm kə̀ dunlígə̀d oò númú, bít bààù: «Val kò'à wàà kéèndo mə́ kíìn bə́ŋyée ní. Zá ǹ yaà kúnú, dáàn zígə̀ nɛɛ̀n yílú, bít dákíìn díìm valú.»

¹⁹Yéésù zá' lɛgú, bít ɛ̀m bàgə̀ bòórú, kə̀ *nɛ́b sáànmbə̀ oò bəd tá.

²⁰Bít nɛ́ŋ kéèndo nə́ŋ̀ wərà, kìì nwuukè gbàákù, kə̀ za'ké nyɛ̀lə́m bìá, mà'ì zèd kób zè iira. Ɛ̀m gbarà Yéésù bòórú, yaà pigə̀ gɔ̀' ba.

²¹Kàandə, sèl bàà oò tɛ́mú: «Dáà bɔ̀b máà pig gɔ̀' gú' oò ní, si' mə́ dákíìn gágàá.»

²²Yéésù lìb bí' núù ɛ̀gə̀ gə́, bít bààù: «Ǹ kùm kə̀ tɛ́m làmkèá, wàà kéèndo mə́ra! Tɛ́mbagké ń gáŋ n si' yàá.» Bít nɛ́ŋ kéèndo aarə si' oò gág zɔ̀ŋ də bə ní.

²³Yéésù dá pìì gààd kàrú. Bít zɔ̀ŋ aa Yéésù dá bé' nɛ́b léd bə̀ íìl bəd kə̀ nɛ́b zùúm bəraa tə́ kpə̀ə́ǹ páàl val bə̀ ləə̀n yée gə́,

²⁴bàà bə̀: «Ìì vúgə́l kíìn zɔ̀ŋə. Kàandə, wàà kéèndo bèlzá aarə val kò'ù kíìn gá, ləə ləəmá.» Bít dìì bə̀ fɔ̀ɔ̀mə̀ kúnú.

²⁵Zɔ̀ŋ aa Yéésù nìŋ vúŋ nɛ́b zùúm bəd gə́, pìì wúuú, kò' wàà kéèndo bèlzá rə nɛɛ̀n ba, bít wàà kéèndo rə tɔ̀d zá' kùm lɛgú.

²⁶Bít in aa Yéésù mà' rə, nwɔŋ oòrə sa' bɛ́' yɛ́b aarə bə zé kóólé.

²⁷Yéésù zá' wərə̀ gə́, nyəd bəd iira bə̀ bàgə̀ bòórú, kə̀ nwɔŋ kpaàmbìá: «Ń Dauda Wàà Váàndoá, ɛ̀g m̀ bé' bə́ búúrá!»

²⁸Zɔ̀ŋ aa ɛ̀m dáá wə́ə́ yiìl gə́, nyəd bərì yaà oò sunú; bít Yéésù dɛ̀d bə̀: «Íí kè'ì aí tɛ́mú, má ii bée báàn si' gáŋ̀mbèì?» Kè' bə̀ í'ù: «Èè Báátììkpɛ̀ŋá, ń dákíìn bánàá.»

²⁹Nɛ́ɛ̀m kàanyée gə́, pig bə̀ núùrú gə́, bàà: «Vɛnɛ́b oò mà' ii kə̀ nɛɛ̀n aa tɛ́m íí kè' rú yérə kíin.»

³⁰Bít núù boò bəd ked yàá. Yéésù tɔ̀g bə̀ kíìn sɔ̀ɔ̀nkè, bàà bə̀: «Ìì gú' yíl aí bìá, dá ìì bàà nɛ́ŋə̀ nə́ŋ̀má nwɔŋ aarə sí!»

³¹Zá zɔ̀ŋ aa ìì vúg kíinní, dá ìì ùd in aa Yéésù mà' rə, yɛ́b aarə bə kóólé.

³²Zɔ̀ŋ aa nyəd bəd zá' bə̀ tə́ ɛɛ̀m yée gə́, nɛ́b bəd pà' bə̀ àà Yéésù nɛ́ŋ váàndo nə́ŋ̀ aa gám bán nwɔŋ gá roó; kàandə, tə́ kə̀ nwul vaksə́ naú.

³³Zá zɔ̀ŋ aa Yéésù nìŋ vúŋ nwul vaksə́ rə gə́, màn váàn də sɔ̀rì nwɔŋ gáàmbìá. In aarə kò' nɛ́b zùúm bəd yíl yàá, bít ìì bàà: «Bé' bə́ bèd in luùm aa yée Israila yɛ́b bə sé.»

³⁴Zá *Farisa bəd gə̀b bàà: «Aa yérə nwul vaksə́ bəd gààd piiù sə̀n kpɛŋsɛ́l nwul vaksə́ bəraa rə niŋ̀mbìá!»

³⁵Yéésù gəə̀l pìì bìl gbàád bərú kóólé, bít kə̀ bìl bɛ̀ŋ́sə̀ yɛbú kóólé; sán nɛ́b bəd in *Yahudu bəd wúlwáàlbə̀ bərú, ùd nɛ́b bəd *Vɛnɛ́b Gààd *Nwɔŋ Puu Sɔ̀ɔ̀nkèá, gáŋ nɛ́b bəd marú kóólé, bít kə̀ nɛ́b aa mad yɛ̀l bə̀ si' rə tə́ kóólé.

³⁶Tɛ́m oò nyìì kə̀ buurúmá, kə̀ nɛ́b zùúm aa bé' bə̀ kə̀ tɛ́m lɔbkèá, bít bə̀ bán ɔ̀dnə́ŋ̀ láŋ̀mbə̀ sín yéroó. Bə̀ tə́ kìínmbə̀ bɛ̀rə̀ gə̀b aa kə̀ yibə̀ naà síndə kíin.

³⁷Kàanyée gə́, Yéésù bàà *nɛ́b sáànmbə̀ oò bəd kə̀ aakíin: «Lɛ' kàŋ yàá, zá nɛ́b yɛd bə̀ kɛdǹ bəd gə́, bə̀ ká' sé.

³⁸Ìì nyɛ̀m Báátììkpɛ̀ŋ tùm oò ààiyà nɛ́b tù' bə̀ ma'ǹ bəd zùúm, yaà boò kɛ̀rə̀ yɛrá.»