Read Samba Leko Markus 11 Bible Online

Markus 11 - Samba Leko bible

Markus 11

¹Yéésù kə̀ *nɛ́b sáànmbə̀ oò bəd tá, bə̀ tə́ ɛɛ̀m Urusalima bìlú. Dá bə̀ wə́ə́ Bɛdfaze bìlú, kə̀ Betaniya bìlú, dáànmbə̀ kə̀ kɔ̀l aa Oliva nyìì bəd dìì bəroó. Zɔ̀ŋ aarə ba, Yéésù tùm *nɛ́b sáànmbə̀ oò bəd iira,

²bàà bə̀: «Ìì ɛ̀m bìl aa aí númú yée rú. Ɛ̀m íí dáráàn piìn bìlú wərə̀ gə́, íí dáráàn bɔbm̀ bə̀ tab vɔɔmlə̀ wàà tə́ wərà, bə́ŋ̀ nɛ́ŋə̀ nə́ŋ̀má na' kùm bèrə̀ yílə́ sé. Bìn ìì ààùwà kúnú.

³Bít nɛ́ŋə̀ nə́ŋ̀ dɛ̀riyì: ‹Íí dá kə̀ níì ma'ǹ gú?› gə́, kè' ìì í'ù: ‹Báátììkpɛ̀ŋ í' tə́ kúnú, bít dáiyà kíìn bí'ǹnà bə́ŋyée ní.› »

⁴Boò kɔ̀, zá' ìì ɛ̀m, dáá ìì bɔ̀b bə̀ tab vɔɔmlə̀ wàà ligə̀ waàl ba, kpaŋ̀ tɛ́mú, bə̀ bìnə̀wà kúnú.

⁵Nɛ́b kam dìì wərà, ìì dɛ̀d bə̀: «Íí tə́ níì ma'ǹ gú? Kə̀ níìbə̀ íí tə́ taà vɔɔmlə̀ wàà aarə biìn gú?»

⁶Kè' bə̀ í' kə̀ nɛɛ̀n aa Yéésù bàà bə̀ rə kíni. Bít ìì dàà bə̀, bə̀ ɛ̀mà kíìn kə̀ vɔɔmlə̀ wàà rə naú.

⁷Bə̀ àà vɔɔmlə̀ wàà rə Yéésù sunú. Bə̀ wɔ̀d gɔ̀' boò bəd vɔɔmlə̀ wàà pɛŋú, bít Yéésù na' kùm ba.

⁸Nɛ́b zùúm bəd wɔ̀d gɔ̀' bəd kpaŋ̀ tɛ́mú. Nɛ́b kam kɔ̀, ìì və̀l téé yɛsə̀ bəd lɛsú, ìì wɔ̀d kpaŋ̀ tɛ́mú, bɔ̀b oò bə̀ káŋ̀mbìá.

⁹Nɛ́b aa ɛ̀m Yéésù númú roó, kə̀ nɛ́b kam aa ɛ̀mà oò bòórú rə tá, ìì pál bəd kpə̀ə́ǹá, ìì bàà: «Kaŋsɛ́l tə́ Vɛnɛ́b naú! Vɛnɛ́b oò zíg màn aa tóò yaànnà Báátììkpɛ̀ŋ nə́gə́lə́ rə nɛɛ̀n yílú!

¹⁰Dauda gààd dáà kíìn yaanàá! Vɛnɛ́b oò zígə̀ nɛɛ̀n yílú! Hosana! (Kaŋsɛ́l tə́ Vɛnɛ́b naà lɛgə́ poú!)»

¹¹Yéésù pìì Urusalima bìlú. Ɛ̀m dáá pìì láŋsə́ wúuú, gəə̀l ɛ̀g bé' bɛ́d in bəd kóólé. Bít nyàm tə́ ma'ǹ yée gə́, zá' ɛ̀m Betaniya bìlú, kə̀ *nɛ́b sáànmbə̀ oò bəraa kób zè iirə rə tá.

¹²Nwúndù oòrə, Yéésù vúgà Betaniya bìlú gə́, gulùm nwuù yàá.

¹³Kàanyée gə́, dìì bé' gààm nyìì yɛsə̀ bə̀ zɔ̀ŋ bùúd ba. Ɛ̀m dáá ɛ̀g, bəǹ dá béení wàà bɔbì. Zá gbad yaà wə́ə́ gààm nyìì dùù gə́, bɔ̀b yɛsə̀ ní, gààm yɛb sɛŋ taà yàá.

¹⁴Yéésù bàà gààm nyìì: «Ogə́, nɛ́ŋə̀ nə́ŋ̀má oò líí wàà ń sɔ̀ŋ sí, sə́g sə́g!» *Nɛ́b sáànmbə̀ oò bəd tə́ù zɛŋàá.

¹⁵Bə̀ wə́ə́ Urusalima bìlə́ gə́, Yéésù dáá pìì láŋsə́ wúuú. Dáá sɔ̀d nɛ́b dùm bə̀ gə́ə̀l bəd kə̀ nɛ́b dùm bə̀ lɛ́bm̀ bəd niŋ̀ sa'ǹmbə̀ láŋsə́ wúuú. Sùd lɛ́l nɛ́b ba' bə̀ pɛ́ɛ̀n bəd téébúrù bərá. Bít sùdlɛ́l nɛ́b mìrə̀ bə̀ gə́ə̀l bəd téé kuùm bə̀ bəd yɛ́b ba.

¹⁶Dàà nɛ́ŋə̀ nə́ŋ̀má pà' taà kə̀ in naà láŋsə́ wúl kàd nə́ŋ̀ bə sé.

¹⁷Bít sán nɛ́b bəd in, bàà bə̀ nwɔŋ aa yóo: «Aa yée nwɔŋ aa bə̀ bád Núúboòd Gìdńnú roó' wúl máá bə̀ gə́, bə̀ dáù dɛdǹ wúl Vɛnɛ́b bə̀ nyɛɛ̀m nɛ́b kun bəd kóólé bìá. Zá aí gə́, pà' íí bí'ù lííro bəd vɔ̀g libá!»

¹⁸*Láŋsə́ gààd bəd, kə̀ *nɛ̀n indaŋ̀mbə̀ bəd tá, ìì kìì in aa Yéésù mà' rə yàá, bə̀ sàà kpaŋ̀ oò bə̀ ko'ǹ lo'ǹmbìá. Nɛ́b zùúm kóólé, in bəraa Yéésù sán nɛ́b bəd də, kò' bə̀ yíl yàá. Kə̀ taàbìá, *láŋsə́ gààd bəd kə̀ *nɛ̀n indaŋ̀mbə̀ bəd tá, bə̀ nùù taà Yéésù ko'ǹmbìá.

¹⁹Zɔ̀ŋ aa nyàm pìì yée gə́, Yéésù kə̀ *nɛ́b sáànmbə̀ oò bəd tá, bə̀ vúgə́l kíìn Urusalima bìlú.

²⁰Nwúndù oòrə, kə̀ limtá, bə̀ tə́ taàn kpaŋ́ gə́, ìì bé' gààm nyìì aa níin də wààrì kə̀ lígə́d bəd tə́ kóólé.

²¹Piyɛr sèlzá' in aa taà rə gə́, bít bàà Yéésù: «Nɛ̀ná, ǹ ɛ̀ga, gààm nyìì aa níin ń yɛ̀lə̀ nwɔŋyɛɛ̀l lə, wàd yàá.»

²²Kàanyée gə́, Yéésù bàà *nɛ́b sáànmbə̀ oò bəd: «Mə́ tə́ ii kíìn baanàá, aarə nwɔŋ sɔ̀ɔ̀ná' Ìì zíg tɛ́m Vɛnɛ́b naú!

²³Dáà nɛ́ŋə̀ nə́ŋ̀ bàà kɔ̀l aa yàá: ‹Ǹ zá' kíìn zɔ̀ŋ aa ba, bít dá m̀ pí' nwuu gbà'á rú,› zìb pìrə̀ oò tɛ́mú sé, bàgì gə́, in aa bàà rə, dákíìn ma'mínàá, kə̀ aa bàà rə kíin vɛ́nà.

²⁴Kə̀ taàbìá, mə́ bàà ii taá' in aa íí dá dɛdǹ kə̀ Vɛnɛ́b nyɛɛ̀mbə̀ rə, ìì kè' kíìn aí tɛ́mú. Íí dákíìn bɔbàá, bít Vɛnɛ́b dái kíìn piinàá.

²⁵Bít sɛŋ aa íí dìì yàá, íí tə́ Vɛnɛ́b nyɛmàá, sèl íí zá' yàá íí tə́ kə̀ nwɔŋ nə́ŋ̀ tɛ́mú kə̀ nɛ́ŋə̀ nə́ŋ̀ gə́, lo' ìì dààù nwɔŋ aarə kúnú. Kə̀ aakíin də, bɔ̀b Báá íí aa lɛgə́ paà rə kɔ̀, lɔ' oò dàài invaksə́ íí bəd də kúnú. [

²⁶Zá lɔ' íí dàà ɔ̀dnə́ŋ̀í invaksə́ aa mà' ii rə síngə́, Báá íí Vɛnɛ́b aa lɛgə́ paà rə kɔ̀, lo' dàà ii invaksə́ bəraa íí mà' rə gá.]»

²⁷Yéésù kə̀ *nɛ́b sáànmbə̀ oò bəd tá, ìì bírà Urusalima bìlú sɔ̀ŋ. Bít zɔ̀ŋ aa Yéésù tə́ gəə̀l láŋsə́ wúu kàangə́, *láŋsə́ gààd bərá, *nɛ̀n indaŋ̀mbə̀ bəd kə̀ *dam bəd tá, bə̀ yaà oò sunú,

²⁸bít bə̀ bààù: «Nɛ́ɛ̀réè piinnà sə̀n kpɛŋsɛ́l, ḿ mà' taà kə̀ in bəraa gú? Bít nɛ́ɛ̀réè pii n sə̀n kpɛŋsɛ́l, in aarə ma'ǹmbə̀ gú?»

²⁹Yéésù kè' í' bə̀: «Máá kɔ̀ máá ii nwɔŋ nə́ŋ̀ dɛdǹ kɔ̀; kè' ìì í' mə́ nwɔŋ aarəì gə́, máá ii taà zɔ̀ŋ aa mə́ bɔ̀bà kpɛŋsɛ́l bə, mə́ tə́ kə̀ in bəraa rə ma'ǹ də baanàá.

³⁰Nɛ́ɛ̀réè piià sə̀n Yohana kpaŋ̀, yaà oò pii nɛ́b bəd baptisma gú? Vɛnɛ́bì? Sínkɔ̀ nɛ́b bərì? Kè' ìì í' mə́ kúnú.»

³¹Bít bə̀ pìì nwɔŋ nyá'ǹmbə̀ boò bòdba, bə̀ bàà: «Kè' bə́n í'ǹ bə́n baàn tə́' Vɛnɛ́b tùmə̀wà sə̀n gə́, dá bə́n dɛdǹ: ‹Kə̀ níìbə̀ íí bàgə̀ taà sín gú?›

³²Bít kè' bə́n í'ǹnì: ‹Nɛ́b bəd tùmə̀wà sə̀n gə́,› » dá baàn bə́n nuùn nɛ́b bərá. Kàandə, nɛ́b bəd kóólé, bə̀ zíg Yohana tə́ kìínmbə̀ *Vɛnɛ́b gbantumsə̀ vɛ́nà bə̀ kíin.

³³Kàanyée gə́, kè' bə̀ í' Yéésù, bə̀ bàà: «Bə́ gàb sé.» Bít Yéésù bàà bə̀: «Máá kɔ̀, mə́ bàà ii zɔ̀ŋ aa mə́ bɔ̀bà kpɛŋsɛ́l bə, mə́ mà' kə̀ in bəraa rə gá.»