Read Samba Leko Markus 4 Bible Online

Markus 4 - Samba Leko bible

Markus 4

¹Nyàm nə́ŋ̀ kàani, Yéésù pìì nɛ́b bəd in sáànmbə̀ wəl nyìgə̀l kàd bə sɔ̀ŋ. Nɛ́b zùúm wál oò sunú. Kə̀ taàbìá, Yéésù zá' na' dá kùm taà kə̀ə̀rú, wəl yílú. Nɛ́b zùúm bəraa rə kóólé, bə̀ kùm yɛ́b ba, wəl kàd ba.

²Sán bə̀ in zùúm kə̀ zagəmú, bàà bə̀ kə̀ aakíin:

³«Ìì zɛ̀ŋ túŋá, nɛ́d inluùm bə̀ wuùn, vúg ɛ̀m inluùm dáàn wuùnmbìá.

⁴Zɔ̀ŋ aa tə́ inluùm wuùn gə́, inluùm kambəd píl kpaŋú. Núú bəd yaà bə̀ líí kúnú.

⁵Inluùm ɔ̀d kambəd píl bəŋ zɔ̀ŋú, bə̀ bɔ̀b yɛ́b gbàákù sé. Vúgə́l bə̀ kàŋ kə̀ báŋ, bə̀ bɔ̀b yɛ́b lígə́d bə̀ páàn sé.

⁶Zɔ̀ŋ aa nyàm dùù yée gə́, nyàm laa tàm bə̀ yàá. Bə̀ wàd kúnú, bə̀ kə̀ lígə́d naà síndoó.

⁷Inluùm ɔ̀d kambəd kɔ̀ píl ku' bəd tə́ŋú. Ku' bəd kàŋ yàá, fɔ̀gə̀d bə̀ yàá, bít bə̀ bɔ̀b yɛb lɛbm̀bə̀ sé.

⁸Inluùm ɔ̀d kambəd kɔ̀ píl yɛ́b lììmkè ba, bə̀ kàŋ yàá, bít bə̀ lɛ̀b yɛb bəd yàá. Inluùm nə́ŋ̀ lɛ̀b yɛb bəd laa nə́ŋ̀ zè kób, ɔ̀d nə́ŋ̀ sɔ̀ŋ, lɛ̀b yɛb bəd laa toora, bít ɔ̀d nə́ŋ̀ kɔ̀, lɛ̀b yɛb bəd laa núnà.»

⁹Bít Yéésù bàà bə̀: «Íí tə́ kə̀ túŋ naà kiìnmbə̀ gə́, ìì kìì nwɔŋ aarə kíìn sɔ̀ɔ̀nkè!»

¹⁰Sɛŋ aa Yéésù kùm oò nə́ŋ̀ní, nɛ́b zùúm wərə̀ síndə, nɛ́b aa nyɛ́d wərə̀ roó, kə̀ *nɛ́b sáànmbə̀ oò bəd kób zè iira, bə̀ dɛ̀rə̀ nwɔŋ zagəm aa gám də yílú.

¹¹Yéésù kè' í' bàà bə̀: «Vɛnɛ́b piià aíra, ìì gàb inmə́'ke bəraa obəǹ gààrú roó. Zá nɛ́b gbaarú bə̀ bəd gə́, dá bə̀ gáàm kə̀ zagəmú.

¹²In aarə ma'míìn kə̀ aakíin də, bɔ̀b: ‹Bə̀ ɛ̀gì kə̀ núù boò gə́, boò bé' sí; bít bə̀ zɛ̀ŋì kə̀ túŋ boò gə́, kìì boò gàb sí, bɔ̀b boò pɛ́n tɛ́m boò sí, bít Vɛnɛ́b lɛ́' oò dàà bə̀ invaksə́ boò bəd sí!› »

¹³Bít bàà: «Kìì íí gàb zagəm aa sínì? Kə̀ aakíin də, ééleè íí dá taà zagəm bəd kiìn gabm̀ kóólé gú?

¹⁴Nɛ́d inluùm bə̀ wuùn gə́, wùù Vɛnɛ́b nwɔŋá.

¹⁵Nɛ́b kam dìì kpaŋ̀ gú' ba, zɔ̀ŋ aa ìì wùù nwɔŋ bəroó. Ìì zɛ̀ŋì gə́, kə̀ nwɔŋ aa nuù yée kíinní, *Satan pà' yaà zá' nwɔŋ aa ìì wùù boò tɛ́mə́ rə kúnú.

¹⁶Nɛ́b kam kɔ̀ tə́ kìínmbə̀ inluùm aa ìì wùù bəŋ zɔ̀ŋú rə kíin. Màìgə́ ìì kìì nwɔŋì gə́, bə́ŋ̀ ìì kè' kə̀ tɛ́m làmkèá.

¹⁷Zá ìì kə̀ lígə́d naà sé. Ìì kò' nwɔŋ də sɛŋ zɔ̀gɔ̀ní. Záàn gə́, nwɔŋ gbò'kèá, sínkɔ̀ nwɔŋ saasɛ́l yaà nìb bɔ̀b bə̀ì gə́, nùù ìì dàà Vɛnɛ́b nwɔŋ bagǹmbə̀ zɔ̀ŋ də bəní.

¹⁸Nɛ́b kam tə́ sɔ̀ŋ, bə̀ lúŋ tə́ inluùm bəraa ìì wùù ku' bəd tə́ŋə́ roó. Zɛ̀ŋ ìì kìì Vɛnɛ́b nwɔŋ yàá,

¹⁹zá inselké zɔ̀ŋə yɛ́b bə bə̀ bərá, í'sɛ̀l gbaŋə̀ bə̀ bɔbm̀ aa tə́ nɛ́ŋə̀ zá'ǹ doó, inlɛ'kè vaksə́ tɛ́m bə bə̀ bərá, nìb Vɛnɛ́b nwɔŋ aa bə̀ kìì rə kúnú, bít bɔ̀b kaŋ̀mbə̀ boò tɛ́mə́ gá.

²⁰Nɛ́b kam kɔ̀, bə̀ lúŋ tə́ inluùm aa bə̀ wùù yɛ́b lììmkè bə roó. Nɛ́b aarə, bə̀ kìì Vɛnɛ́b nwɔŋì gə́, bə̀ kè' kúnú. Kàŋ bə̀ mà' sɔ̀ɔ̀nkè kə̀ Vɛnɛ́b nwɔŋá. Bə̀ tə́ kìínmbə̀ inluùm bəraa nə́ŋ̀ lɛ̀b yɛb laa nə́ŋ̀ zè kób, ɔ̀d kɔ̀ lɛ̀b yɛb laa toora, bít ɔ̀d nə́ŋ̀ sɔ̀ŋ lɛ̀b yɛb laa núnə̀ rə kíin.»

²¹Yéésù dìì baànmbə̀ ní: «Nɛ́ŋə̀ kó' lampə̀ì gə́, wúbə̀ kɛ̀ɛ̀l dùùì, sínkɔ̀ pááù lesə̀ dùùì? Zá aa dá sɔɔ̀n də gə́, bə̀ zígə̀ téé dàndun wàà yílú.

²²Kə̀ aakíin də, in aa tə́ mə́'ke *Vɛnɛ́b gààrú rə, nɛ́b bəd dákíìn bé'nàá, bít in aa nɛ́b bəd gàb bə́ŋyée *Vɛnɛ́b gààrú síndə, bə̀ dákíìn gabàá.

²³Bít Yéésù bàà zəg sɔ̀ŋ' Íí tə́ kə̀ túŋ naà kiìnmbə̀ gə́, ìì kìì nwɔŋ aarə kíìn sɔ̀ɔ̀nkè!»

²⁴Yéésù bàà bə̀ sɔ̀ŋ: «Ìì gú' yíl íí kə̀ nɛɛ̀n aa íí tə́ nwɔŋ kiìn dú roó. Bə̀ dá ii də́'ǹ kə̀ in aa də́' íí sáá kə̀ nɛ́b bəd doó. Bít aí bə̀ gə́, bə̀ dá ɔ̀d zəgǹ yílú wərà.

²⁵Kə̀ aakíin də, màn aa tə́ kə̀ naà rə, pii bə̀ dáù ɔ̀d zəgàá; zá màn aa kə̀ naà síndə, aa kə̀ naà zɔ̀gɔ̀ rə máá, nyá' bə̀ dákíìn ke'nàá.»

²⁶Yéésù bàà sɔ̀ŋ: «Ìì ɛ̀g in aa *Vɛnɛ́b gààd lúŋ doó' Nɛ́ŋ váàndo nə́ŋ̀ dá wùù inluùm oò lɛsú.

²⁷Kóó oò ləə ləəmá, sínkɔ̀ oò kùm galàá, tígə́lú, kə̀ nyàámbərə̀ tá, inluùm tə́ kíìn lúràá, tə́ kíìn kaŋàá. Oò gə́, gàb nɛɛ̀n aa taà rú rə sé.

²⁸Yɛ́b lúd vú' inluùmá' bə́ŋ̀ la' kə̀ fɔ̀g kíin, bít pà' bàgə̀lá, pí' yílá. Bòórú gə́, yɛd wàà ú' gəgə̀d sə̀n sə́ə̀mú.

²⁹Bít yɛd wàà ú'ì gə́, nɛ́d lɛ' bə̀ pà' yɛ́ràá, yɛd dáàn vəə̀lǹmbìá, aarə yɛd kɛdǹmbə̀ sɛŋ wə́ə́ sunú.»

³⁰Yéésù bàà: «Bɔ̀b báan *Vɛnɛ́b gààd də́'ǹ kə̀ níì gú? Sínkɔ̀ báan níì zagəm naàn báan taà də́'ǹ kə̀ kùrú gú?

³¹*Vɛnɛ́b gààd lúŋ tə́ kpànwà luùm aa ìì wùùì yɛ́b bə gə́, kùmsə̀n bɛ̀ŋ́sə̀wà gbàákù inluùm bəraa yɛ́b bərə kóólé tə́ŋə́ roó.

³²Bə̀ wùùì gə́, bùùd kàŋ kàn sə̀n nwɔgə̀ bəraa bə̀ wùù lɛsú rə kóólé. Sàb nɛɛ̀n gbàád bərá, núú lɛgə́ paà bə̀ bəd bə̀ dá wàsàg kudǹ nɛɛ̀n oò bəd də bə zé.»

³³Yéésù bàà bə̀ Vɛnɛ́b nwɔŋ bəd zùúm kə̀ zagəmú; nɛɛ̀n aa bə̀ dá báàn kiìnmbə̀ rú roó.

³⁴Yéésù bàà sáá bə̀ nwɔŋ kə̀ zagəmú. Sɛŋ aa kùmì kə̀ *nɛ́b sáànmbə̀ oò bəd tə́ ní rə gə́, bàà ì' bə̀ nwɔŋ bəraa gám bə̀ kə̀ zagəmú roó.

³⁵Nyàm də bəní, nyàmbídńná, Yéésù bàà *nɛ́b sáànmbə̀ oò bəd: «Báà na'ǹ gon gúu bə̀ ba.»

³⁶Zá' bə̀ dàà nɛ́b zùúm gə́, *nɛ́b sáànmbə̀ oò bəd yaà bə̀ pìì kə̀ə̀raa kùm dú roó, bít bə̀ ɛ̀m kúnú. Kə̀ə̀d kambəd kə̀ə̀d nə́ŋ̀ aarə kàd ba.

³⁷Nwul nə́ŋ̀ kpɛŋké zá' pɛ̀b kúnú. Wəl bəd yaà bə̀ gáá kə̀ə̀d zé káb. Záàn gə́, wəl yaà nyìì kə̀ə̀rú.

³⁸Bít oò gə́, ləə ləəm kə̀ə̀d zɔ̀ŋ bòórú bə̀ ba. Gbà' yílə kalə̀ ba. *Nɛ́b sáànmbə̀ oò bəd dɛ̀d bə̀ lɛ́mə̀, bít bə̀ bààù: «Nɛ̀ná, val tə́ bə́n kíìn koràá, ḿ mà' in nə́ŋ̀má gá rə, búúd mà' n sínì?»

³⁹Yéésù lɛ́m gə́, pél nwul nwɔŋá, bít bàà nwuu gbà'á rə: «Ǹ kùm dìímsə̀ní, ǹ tɛb tɛ́ba!» Bít zɔ̀ŋ yaà dìì zé sə́ə́m!

⁴⁰Yéésù bàà bə̀: «Kə̀ níìbə̀ íí nùù taà də́dǹ kàan gú? Íí kə̀ tɛ́mbagké naà bə́ŋ̀ sínì?»

⁴¹Zɔ̀ŋ aa də́dǹ gbà'á yaà mà' bə̀ gə́, bít bə̀ bàà bəd ɔ̀dnə́ŋ̀ bəd boò bòdba: «Aa gə́, bɔ̀b nɛ́ɛ̀réè, nwul kə̀ nwuu gbà'á tá, bə̀ ləəù taà gú?»