Read Samba Leko Markus 8 Bible Online

Markus 8 - Samba Leko bible

Markus 8

¹Sɛŋ aarə, nɛ́b zùúm ɔ̀d wál sɔ̀ŋ. Bə̀ bɔ̀b in nə́ŋ̀má líìnmbə̀ sé. Yéésù dɛ̀d *nɛ́b sáànmbə̀ oò bəd, bít bàà bə̀:

²«Búúd mà' mə́ tə́ kíìn kə̀ nɛ́b zùúm aaú. Bə́ŋyée mà'ì sɛŋ toora, bə̀ kùm taà kə̀ máá tá, in nə́ŋ̀má nyɛ́d bə̀ líìnmbə̀ sɔ̀ŋ sé.

³Bít bə́ŋyée mə́ dàà bə̀, bə̀ ɛ̀mì boò kàrú, gulùm ní gə́, gulùm dá bə̀ kíìn tu'ǹ kpaŋ̀ tɛ́mú. Nɛ́b kam boò tə́ŋú, bə̀ vúgə́là zɔ̀ŋ bùúd ba.»

⁴*Nɛ́b sáànmbə̀ oò bəd kè' bə̀ í'ù: «Inlíìnmbə̀ aa dá nɛ́b aa də́ŋ̀ də, nɛ́ŋə̀ sàà dá bɔbm̀ bínì zɔ̀ŋə fɔ̀gú gú?»

⁵Yéésù dɛ̀d bə̀: «Íí tə́ kə̀ bə̀rɛ́d bəd naà leè gú?» Kè' bə̀ í'ù, bə̀ bàà: «Nə́ŋsínà.»

⁶Kàanyée gə́, Yéésù bàà nɛ́b zùúm bəd kə̀ kpɛŋsɛ́lá, boò kùm yɛ́b ba. Pà' bə̀rɛ́d bəraa nə́ŋsínà rə, bít mɔ̀' Vɛnɛ́bá, wèl kúnú, pii *nɛ́b sáànmbə̀ oò bəd gàm boò pii nɛ́b zùúmá. *Nɛ́b sáànmbə̀ bəd mà' kə̀ aa bàà bə̀ rə kíni.

⁷Bə̀ kə̀ díb yɛb naà zɔ̀gɔ̀ kɔ̀. Yéésù mɔ̀' Vɛnɛ́b bə wərə̀ sɔ̀ŋ, bít bàà *nɛ́b sáànmbə̀ oò bəd boò gàm nɛ́b bəd sɔ̀ŋ.

⁸Boò kóólé, ìì líí yàá, bít ìì wùb yàá. Bòórú gə́, *nɛ́b sáànmbə̀ bəd ìì pú' bə̀rɛ́d welké kə̀ díb welké bəraa nyɛ́d də tá, pìlə̀m nə́ŋsínà.

⁹Nɛ́b bəraa líí rə, mà'ì nɛ́b bəd laa núnà zɔ̀ŋ laa iira. Yéésù zíg nɛ́b zùúm bəd boò ɛ̀m kúnú.

¹⁰Záàn gə́, pìì kə̀ə̀rú kə̀ *nɛ́b sáànmbə̀ oò bəd tá, bít ɛ̀m Dalmanuta yɛ́b ba.

¹¹*Farisa bəd gə̀b yaà wə́ə́ gə́, bə̀ pìì nwɔŋ nyá'ǹmbə̀ kə̀ Yéésù ra. Bə̀ í'ù gɔ̀'wà gúdǹmbìá. Kə̀ taàbìá, bə̀ dɛ̀rə̀ mà' oò ì' bənə́ inkɔrə nə́ŋ̀ aa dá i'ǹ gə́, oò tə́ kə̀ kpɛŋsɛ́l naà roó.

¹²Yéésù tɛ́m nyágə́lə̀ gə́, dùm zé m̀m̀, bít dɛ̀d: «Kə̀ níìbə̀ nɛ́b aa bə́ŋyée rə, bə̀ sàà taà inkɔrə bəd bé'ǹmbə̀ gú? Mə́ tə́ ii kíìn baanàá, nwɔŋ sɔ̀ɔ̀ná, bə̀ bɔ̀b inkɔrə nə́ŋ̀má bé'ǹmbə̀ gá.»

¹³Yéésù zá' dàà bə̀, bít kidbíd kíìn kə̀ə̀rú, na' ɛ̀m wəl naà gúuú.

¹⁴Yéésù *nɛ́b sáànmbə̀ bəd yid bə̀ bɔ̀' bə̀rɛ́d bəd pa'ǹmbə̀ bée. Bə̀ kə̀ bə̀rɛ́d bəd naà zùúm sé. Bə̀ kò'à bə̀rɛ́d naà nə́ŋ̀ní tə́ŋtə́ŋ, kə̀ə̀rú.

¹⁵Yéésù tɔ̀g bàà bə̀: «Ìì gú' yíl aí bə̀ kə̀ *Farisa bəd gə̀b inváàndoá, kə̀ *Hirudus inváàndoá!»

¹⁶*Nɛ́b sáànmbə̀ bəd bə̀ bàà ɔ̀dnə́ŋ̀ bəd boò bòdba: «Bə́n pa'ǹnà bə̀rɛ́d naà síndə, gám taà inváàndo nwɔŋ kàani.»

¹⁷Yéésù gàb nwɔŋ aa ìì tə́ gáàm də gə́, bít dɛ̀d bə̀: «Kə̀ níìbə̀ íí bàà taà, bənə́ kə̀ bə̀rɛ́d bəd naà sín gú? Íí kìì bə́ŋ̀ sínì? Íí gàb sínì, yílə íí tə́ pi'kè bə́ŋyée ní sàì?

¹⁸Íí tə́ kə̀ núù naú, íí bé' géè? Íí tə́ kə̀ túŋ naú, íí kìì géè? Sèl íí zá' géè?

¹⁹Sɛŋ aa mə́ wèlà bə̀rɛ́d núnà, mə́ zànà kə̀ nɛ́b bəd laa núnà zɔ̀ŋ laa iira zè kób də gə́, bə̀rɛ́d welké pìlə̀m leè íí pú' taà gú?» Bə̀ bààù: «Pú' bə́ nyí' pìlə̀m kób zè iira.»

²⁰«Sɛŋ aa pɛ̀d mə́ pii nɛ́b bəd laa núnà zɔ̀ŋ laa iirə bə̀rɛ́d nə́ŋsínà rə gə́, pìlə̀m leè pú' íí nyí' taà gú?» Kè' bə̀ í'ù: «Pìlə̀m nə́ŋsínà.»

²¹Bít bàà bə̀: «Níì mà' ii sə̀n, bə́ŋ̀ íí gàb taà sə́n gú?»

²²Kàanyée gə́, Yéésù kə̀ *nɛ́b sáànmbə̀ oò bəd tá, bə̀ ɛ̀m Bɛdsaida bìlú. Dáá bə̀ wə́ə́ wərə̀ gə́, nɛ́b bəd ààùwà nyəd nə́ŋ̀á. Bít bə̀ nyɛ̀mə̀ oò pigə̀ kúnú, bɔ̀b oò gág kúnú.

²³Yéésù kò' nyəd nɛɛ̀n ba, bít ààù bìl bòórú. Bítsɔ̀ŋ, tó'ù sudn núùrú, zígə̀ nɛɛ̀n yílú, bít dɛ̀rə̀: «Ḿ bé' in nə́ŋ̀ tə́ béeì?»

²⁴Zá nyəd də kèd ɛ̀g núù gə́, bít bàà: «Mə́ bé' tə́ nɛ́b bərá, zá bə̀ lúŋ tə́ téé bərá, bít bə̀ ɛ̀m tə́ kúnú.»

²⁵Yéésù zígə̀ nɛɛ̀n núùrú sɔ̀ŋ. Bít zɔ̀ŋ aa ɛ̀g wád núù kə́rúm gə́, núù oò ked yàá, bít bé' núù oòì nyɛdkè dág.

²⁶Yéésù bàà oò ɛ̀m kíìn oò kàrú, bít bààù: «M̀ pìì bìlə́ sí.»

²⁷Bòórú oòrə gə́, Yéésù kə̀ *nɛ́b sáànmbə̀ oò bəd tá, ìì ɛ̀m bìl bəraa Kaisara aa Filipiya bìlə́ rə ba. Bə̀ wə́ə́ kpaŋ̀ tɛ́mú gə́, Yéésù dɛ̀d bə̀ gə́, bàà: «Nɛ́b bəd bàà mə́ nɛ́ɛ̀réè?»

²⁸Kè' bə̀ í'ù: «Nɛ́b kam bàà bə̀ ń Yohana nɛ́d Baptisma bə̀ piìn da. Nɛ́b ɔ̀d kam bə̀ bàà ń Eliya ra. Nɛ́b ɔ̀d kam sɔ̀ŋ bə̀ ɛ̀g n tə́ kìínmbə̀ *Vɛnɛ́b gbantumsə̀ bəd nə́ŋ̀ kíin.»

²⁹Yéésù dɛ̀d bə̀: «Zá aí gə́, íí bàà mə́ nɛ́ɛ̀réè gú?» Piyɛr kè' í' bààù: «Ámda ń kùmsə̀n Krístù.»

³⁰Yéésù tɔ̀g bə̀, bàà: «Nwɔŋ aarə, ìì bàà nɛ́ŋə̀ nə́ŋ̀má sí.»

³¹Yée gə́, Yéésù sɔ̀d *nɛ́b sáànmbə̀ bəd in sáànmbə̀ gə́, bàà: «Nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, dá búúd bé'ǹ gbàákù. *Dam bərá, kə̀ láŋsə́ gààd bərá, bít kə̀ *nɛ̀n indaŋ̀mbə̀ bəd gə̀b tá, məə bə̀ dáù kíìn daanàá. Bə̀ dáù kíìn lo'nàá; sɛŋ toorə bə gə́, dákíìn díìm valú.»

³²Yéésù bàà nyɛ́' bə̀ nwɔŋ bəraa rə sɔ̀ɔ̀nkè. Bít Piyɛr dɛ̀d gbá'ù kàrú oò nə́ŋ̀ní, bít álə̀ kúnú.

³³Zá Yéésù lìb bí' núù, ɛ̀g *nɛ́b sáànmbə̀ oò kamá, bít pél Piyɛr nɔ̀má, bàà: «Ǹ gbad kíìn máá bòórú, ń *Satan! Inselké ń lúŋ Vɛnɛ́b bə̀ sé, zá tə́ kìínmbə̀ nɛ́b bəd bə̀ kíin.»

³⁴Bít dɛ̀d nɛ́b zùúm bəd kə̀ *nɛ́b sáànmbə̀ oò bəd tá, bàà bə̀: «Nɛ́ŋə̀ aa í' mə́ì bagǹmbə̀ rə, oò dàà yíl oò bə̀ seèlǹmbìá. Oò pà' téélɛŋké oòra, bít oò bàg mə́ kúnú.

³⁵Kàandə, màn aa í' gɔ̀ŋsə́ oò súùnmbə̀ rə, dáù kíìn bɔ̀'nàá. Zá màn aa dá gɔ̀ŋsə́ oò bɔ̀'ǹ máá bòórú kə̀ *Nwɔŋ Puu Sɔ̀ɔ̀nkè bòórú rə, dá *gɔ̀ŋsə́ aa bɛ́d bə gá rə bɔbàá.

³⁶Nɛ́ŋə̀ bɔ̀b in bəraa zɔ̀ŋə yɛ́b bərəì kóólé, bít bɔ̀' gɔ̀ŋsə́ oòì Vɛnɛ́b númú gə́, dáù níì gbá'ǹ gú? In nə́ŋ̀má sé.

³⁷In aa nɛ́ŋə̀ dá piìn zɔ̀ŋə yɛ́b ba, dá kə̀ gɔ̀ŋsə́ oò káàn ke'ǹ də, níì gú? In nə́ŋ̀má sé.

³⁸Kə̀ taàbìá, dáà nɛ́ŋə̀ nùù sə́ə́mnúùì kə̀ máára, bít kə̀ nwɔŋ mə́ udǹmbə̀ nɛ́b tɛ́m yɛ̀ɛ́l bəraa ìì ləə Vɛnɛ́b indaŋ̀mbə̀ síndə tə́ŋú, bít kə̀ nɛ́b invaksə́ bə̀ ma'ǹ bəd tə́ŋú gə́, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə kɔ̀, dáù sə́ə́mnúù nuùn sɛŋ aa dáà yaànà oò gààrú, kə̀ Báá oò kaŋsɛ́l laa nyɛdkè tá, kə̀ *malaika gìdń oò bəd tə́ roó.»