Read Samba Leko Luka 11 Bible Online

Luka 11 - Samba Leko bible

Luka 11

¹Nyàm nə́ŋ̀ Yéésù nyɛ̀m Vɛnɛ́b zɔ̀ŋ nə́ŋ̀ ba. Zɔ̀ŋ aa nyɛ̀m bɛ́' Vɛnɛ́b gə́, nɛ́d sáànmbə̀ oò nə́ŋ̀ bààù: «Báátììkpɛ̀ŋá, ǹ sán bə́ Vɛnɛ́b nyɛɛ̀mbə̀, kìínmbə̀ Yohana sán *nɛ́b sáànmbə̀ oò bəd də kíni.»

²Yéésù bàà bə̀: «Màìgə́, íí tə́ Vɛnɛ́b nyɛɛ̀m gə́, ìì bàà: ‹Báá Vɛnɛ́bá, Nə́gə́l ámbə̀ oò kùm *gìdńná. Yaà ǹ ləə gààd nɛ́b bəd yílú.

³Bə́ nyɛɛ̀m, m̀ pii bə́ inlíìnmbə̀ nyà'aa yée bìá.

⁴Lɛ́' ǹ dàà bə́ invaksə́ bəraa bə́ mà' roó, kàandə, kə̀ yíl bə́ máá, lɛ́' bə́ dàà invaksə́ bəraa nɛ́b bəd mà' bə́ rə tə́ kúnú. Bít ǹ dàà bə́ báà pìì inzááke rú sí.› »

⁵Yéésù bàà *nɛ́b sáànmbə̀ oò bəd sɔ̀ŋ: «Bàà báà də́'ǹ in aa yóo: Nɛ́ŋə̀ nə́ŋ̀ aí tə́ŋú, kə̀ ɔ̀dzéd nə́ŋ̀ naú. Ɛ̀m dá oò bɔ̀bə̀ oò kàrú, sibə̀ rú, oò nyɛɛ̀mə̀ kə̀ aakíin: ‹Ɔ̀dzéd mə́ra, m̀ pii mə́ inlíìnmbə̀ kpobá.

⁶Ɔ̀dzéd mə́ nə́ŋ̀ dáà sɛ̀ɛ́ná, yaà wə́ə́ tə́ máá kàrú. Zá mə́ kə̀ in aa máù piìn dá líìn də naà sé.›

⁷«Bít kə̀ baànmbə̀ kíin sɔ̀ŋ, nɛ́ŋə̀ aa kè' oò í'ùwà wúu nuù: ‹Ǹ vɔ̀gə̀l mə́ sí! Waàl ke'míìn yàá, mə́ kə̀ yɛb mə́ bəd tá, pìì bə́ ləə yàá. Mə́ bán zá'ǹmbə̀ lɛgú, bít ámbə̀ inlíìnmbə̀ dáàn piìnmbə̀ gá.›

⁸Mə́ tə́ ii kíìn baanàá, zá' dáù piìn ɔ̀dzéd nwɔŋ bòórú gá. Zá dá zá'ǹ, bít dáù in aa í' rə gə́ kóólé kíìn piinàá. Kàandə, ɔ̀dzéd oò dààù dɛdǹmbə̀ sé.

⁹«Bít máá gə́, mə́ tə́ ii kíìn baanàá' Ìì dìì dɛdǹmbə̀ ní, bít Vɛnɛ́b dá ii kíìn piinàá. Ìì dìì saànmbə̀ ní, íí dákíìn bɔbàá. Ìì dìì waàl tɔɔ̀mbə̀ ní, Vɛnɛ́b dáá ii kíìn keràá.

¹⁰«Kàandə, nɛ́ŋə̀ aa dìì dɛdǹmbə̀ rə gə́ kóólé, bə̀ piiù kúnú. Màn aa dìì saànmbə̀ rə kɔ̀, bɔ̀b kúnú, bít màn aa dìì waàl tɔɔ̀mbə̀ rə kɔ̀, bə̀ kèrə̀ waàl kúnú.

¹¹Bə́ŋyée nɛ́ŋə̀ nə́ŋ̀ aí tə́ŋú, kùmì wàà báá gə́, dáà wàà dɛ̀rə̀ díbì gə́, pà' dáù bée bi' piinì? Piiù gá.

¹²Sínkɔ̀, wàà dɛ̀rə̀ tə́ kòò boòd gə́, pà' dáù bée mii piinì? Piiù gá.

¹³Íí nɛ́b vaksə́ bə̀ bəd máá, íí gàbì yɛb íí bəd insɔ̀ɔ̀nkè bəd piìnmbìá. Ééleè Báá bə́n aa lɛgə́ paà rə, pii taà nɛ́b aa nyɛ̀mə̀ rə Nwul Gìdń gá gú!»

¹⁴Nyàm nə́ŋ̀ kàani, Yéésù tə́ nwul vaksə́ nə́ŋ̀ niŋàá. Nwul vaksə́ aarə, nìb nɛ́ŋ váàndo nə́ŋ̀ gú' nwɔŋ bə̀ gáàm bée. Zɔ̀ŋ aa nìŋ vúŋ nwul vaksə́ gə́, nɛ́ŋ váàndo gú' nibkè rə, pí' nwɔŋ gáàmbìá. Bít in aarə, kò' nɛ́b zùúm bəd yíl yàá.

¹⁵Zá nɛ́b kam bàà: «Aarə *Belzebul piiù sə̀n kpɛŋsɛ́l nwul vaksə́ bəd bə̀ niŋ̀á. *Belzebul lə, nwul vaksə́ bəd gààrá.»

¹⁶Nɛ́b ɔ̀d kambəd í'ù də́'ǹ ɛgǹmbìá. Bə̀ dɛ̀rə̀ oò mà' inkɔrə nə́ŋ̀ aa dá nɛ́b bəd i'ǹ gə́, kpɛŋsɛ́l oò bə̀ gə́, vúgà Vɛnɛ́b naà roó.

¹⁷Yéésù gàb inselké boò tɛ́mə́ bə̀ bəd yée gə́, bàà bə̀: «Yɛ́b aa nɛ́b oò bəd tə́ nə́'ǹ boò bòd bərə gə́ kóólé, dá dáàn númú gə́, dákíìn dugàá. Bít nɛ́b ligə̀ bə̀ bəd nə́' nə́gə̀rì boò bòd bə gə́, ligə̀ rə dáá númú gá, dákíìn sa'ǹ dugàá.

¹⁸Dáà *Satan nə́' nə́gə̀rì kə̀ yíl oò bəní gə́, ééleè gààd yɛ́b oò kùm dá taà dáàn kə̀ númú zɔ̀ŋə yɛ́b bə gú? Bít íí bàà gə́, mə́ nìŋ nwul vaksə́ bəd tə́ kə̀ kpɛŋsɛ́l aa *Belzebul pii mə́ roó.

¹⁹Zá dáà mə́ nìŋ nwul vaksə́ bəd tə́ kə̀ *Belzebul kpɛŋsɛ́l gə́, nɛ́b sáànmbə̀ íí bəd gə́, ìì nìŋ bə̀ tə́ kə̀ nɛ́ɛ̀réè kpɛŋsɛ́l gú? Kə̀ taàbìá, *nɛ́b sáànmbə̀ íí bəd ìì dá ii kíìn fágàá, ìì dá baàn íí bàg kpaŋ̀ wɔ̀ɔ̀lə̀ sé.

²⁰Zá dáà tə́ kə̀ Vɛnɛ́b kpɛŋsɛ́lá, mə́ nìŋ tə́ taà nwul vaksə́ bəd gə́, ogə́ Vɛnɛ́b sɔ̀rì gààd ləə̀nmbə̀ aí tə́ŋú.

²¹«Màìgə́, nɛ́ŋ váàndo kpɛŋsɛ́l bə̀ nə́ŋ̀ tab və̀d si'ì kə̀ yɛ́rə̀ gɔ̀sá, kə̀ in bùm bə̀ nə́'ǹ bəd tə́ kóólé, tə́ ligə̀ oò nwáàn gə́, in aa kə̀ naà rə kóólé dá kuùm kə̀ nɛɛ̀n tá.

²²Zá dáà nɛ́ŋ váàndo kpɛŋsɛ́l bə̀ aa kànə̀ rə yaà wə́ə́ì gə́, nyá' dá in bùm bə̀ nə́'ǹ oò bəraa zíg tɛ́m oò bərə ke'ǹ kóólé, kə̀ in bəraa kə̀ naà rə tá, bít dá nɛ́b kambəd gaamàá.

²³«Màn aa kùm kə̀ máá tə́ síndə, nə́' nə́gə̀d tə́ kə̀ máára. Bít màn aa láŋ pú' wál mə́ bə síndə, sàgə̀d tə́ kúnú.»

²⁴«Màìgə́, nwul vaksə́ vúgì nɛ́ŋə̀ sisə́ gə́, ɛ̀m dá gəə̀l sèm ba, zɔ̀ŋ nyi'ǹmbə̀ dáàn saànmbìá. Nɛ́ɛ̀m sàà bɔ̀b sín yée gə́, bàà yíl oò: ‹Má kíìn kidǹ bídǹ wúl mə́ aa mə́ vúgà rú rə rú.›

²⁵Kidbíd yaà wə́ə́ gə́, bɔ̀b wúl lə tədmíìn yàá, bít kudmíìnì sɔ̀ɔ̀nkè.

²⁶Kàanyée gə́, zá' ɛ̀m dá pú'à nwul vaksə́ ɔ̀d kambəd nə́ŋsínà, aa bəraa kànə̀ kə̀ vaksə́ roó. Bít kid bə̀ bírà zùmba, pìì yaà bə̀ ləə rú wərà. Bɛ́dke oòrə gə́, nɛ́ŋə̀ aarə si' yɛɛ̀l, bít kànsə̀n sɛŋ aa éèn sɔ̀d dú roó.»

²⁷Zɔ̀ŋ aa Yéésù yaà tə́ nwɔŋ gáàm kàangə́, nɛ́ŋ kéèndo nə́ŋ̀ dìì nɛ́b zùúm tə́ŋú, kpàm nwɔŋ lɛgú, bààù: «Nɛ́ŋ kéèndo aa pà' n bàgəlú, bít úum vuùm də, Vɛnɛ́b zígə̀ nɛɛ̀nì yílú.»

²⁸Zá Yéésù gə́, bàà: «Vɛ́nà bə̀ gə́, nɛ́b aa ìì tə́ diìn Vɛnɛ́b nwɔŋ kiìnmbìá, bít bə̀ tə́ in aa Vɛnɛ́b nwɔŋ bàà rə ma'ǹ də, boò ra bə̀ kùmsə̀n nɛ́b aa Vɛnɛ́b tə́ bə̀ nɛɛ̀n zígǹ yílə́ roó!»

²⁹Zɔ̀ŋ aa nɛ́b zùúm wál Yéésù kàrú yée gə́, Yéésù pìì baànmbə̀ kə̀ aakíin: «Nɛ́b bəraa bə́ŋyée rə gə́, bə̀ nɛ́b vaksə́ bərá. Bə̀ dɛ̀d inkɔrə nə́ŋ̀á, zá Vɛnɛ́b ì' bə̀ inkɔrə ɔ̀d nə́ŋ̀má gá. Vɛnɛ́b dá bə̀ *Vɛnɛ́b gbantumsə̀ oò aa bə̀ dɛ̀rə̀ Jonas də inkɔrə ní i'nàá.

³⁰Kə̀ aakíin, nɛɛ̀n aa Jonas kùm dú kə̀ inkɔrə kíin nɛ́b Niniwe bìlə́ bə̀ núùrú rə, nɛɛ̀n aarə rú ní, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə kɔ̀, dá kuùm kə̀ inkɔrə kíin, nɛ́b aa bə́ŋyée rə núùrú.

³¹Nyàm aa Vɛnɛ́b dá nɛ́b bəd fágǹ bərə, nɛ́ŋ kéèndo aa ləə gààd pɛ́rə̀ gúu rə, zá' dá diìn lɛgú, kə̀ nɛ́b aa bə́ŋyée rə tá. Zá dá bə̀ luùn Vɛnɛ́b númú. Kàandə, vúgà zɔ̀ŋ bùúd ba, yaà Salomon ingabké kiìnmbìá. Bít mə́ tə́ ii kíìn baanàá, nɛ́ŋə̀ nə́ŋ̀ tə́ zɔ̀ŋə, kànsə̀n Salomon da.

³²Nyàm aa Vɛnɛ́b dá nɛ́b bəd fágǹ bərə, nɛ́b Niniwe bìlə́ bə̀ bəd zá' bə̀ dá diìn lɛgú, kə̀ nɛ́b aa bə́ŋyée rə tá. Zá bə̀ dá bə̀ luùn Vɛnɛ́b númú. Kàandə, sɛŋ aa Jonas tə́ nɛ́b aarə Vɛnɛ́b nwɔŋ udǹ də, bə̀ sɔ̀g yàá, bít bə̀ kùmì kìínmbə̀ nɛɛ̀n aa Vɛnɛ́b í' rú rə kíin. Bít mə́ tə́ ii kíìn baanàá, nɛ́ŋə̀ nə́ŋ̀ tə́ zɔ̀ŋə, kànsə̀n Jonas da.»

³³«Nɛ́ŋə̀ nə́ŋ̀má kó' lampə̀ì gə́, mə́'ù gá, sínkɔ̀ pááù kɛ̀l dùù gá. Kə̀ sɔ̀ɔ̀n kíin gə́, zígə̀ téé dàndunwà yílú, bɔ̀b nɛ́b aa pìì wúu rə, boò bé' núùá.

³⁴Núù ń tə́ kìínmbə̀ lampə̀ ám sisə́ bə̀ kíni. Sɛŋ aa núù ń tə́ gaŋsə́ní rə, si' ń kə̀ zɔ̀ŋtá, tə́ zɔ̀ŋ nyɛdkè rú. Zá sɛŋ aa núù ń gaŋsə́ sín də, si' ń kə̀ zɔ̀ŋtá, tə́ tígə́lú.

³⁵Kə̀ aakíin də, ǹ gú' yíl ń da, bɔ̀b laa nyɛdkè aa ám sisə́ rə, fə́' oò kùm tígə́lə́ sí.

³⁶Si' ń kə̀ zɔ̀ŋtá tə́ nyɛdkèá, zɔ̀ŋ nə́ŋ̀má tígə́lə́ síngə́, yíl ń kə̀ zɔ̀ŋtá dá kuùm zɔ̀ŋ nyɛdkè rú, kìínmbə̀ màìgə́, lampə̀ nyɛ́' n kə̀ laa nyɛdkè oòrə kíni.»

³⁷Zɔ̀ŋ aa Yéésù gám bé' nwɔŋ gə́, *Farisa váàn dɛ̀rə̀, dáá oò líí inlíìnmbə̀ obəǹ kàrú. Yéésù pìì *Farisa váàn də yiilú, bít dá kùm gbèd magə̀ ba.

³⁸Zɔ̀ŋ aa *Farisa váàn bé' Yéésù líí gbèd kàaní, sùg nɛɛ̀n sín yée gə́, kò'ù yíl yàá.

³⁹Kàanyée gə́, Báátììkpɛ̀ŋ bàà: «Ìì ɛ̀g nɛɛ̀n aa íí kùm dú roó, aíra íí *Farisa bərá. Íí sùg badn magə̀ wàà pɛŋá, kə̀ gbèd magə̀ pɛŋá. Zá tɛ́mə́ gə́, íí nyìì tə́ kə̀ í'sɛ̀l lííro bìá, kə̀ tɛ́m vaksá.

⁴⁰Íí kèéd bərá! Vɛnɛ́b aa kùd pɛŋ də, kùd tɛ́m tə́ kɔ̀.

⁴¹Ìì pii nɛ́b búúd bə̀ bəd in aa badn magə̀wà rú roó, kə̀ aa gbèd magə̀ rú roó. Íí mà'ì kaàn gə́, in gə́ kóólé dá taà kuùm nyɛdkè aí bìá.

⁴²«Búúd tə́ aí yílú, íí *Farisa bəd gə̀bá! Kə̀ aakíin də, íí bɔ̀b inì kób gə́, pà' íí pii Vɛnɛ́b nə́ŋ̀, kìínmbə̀ in yɛsə̀ solbə̀ aa páá ìì sáá nwɔgə̀ rú, bɔ̀b nwɔgə̀ oò sɔ̀ɔ̀n kə̀ kùrú rə kíin, kìínmbə̀ minti yɛsə̀ kíin, kə̀ wélə́ kíin, bít kə̀ nwɔgə̀ yɛsə̀ bəraa vúg lɛsə́ rə gə́ kóólé kíin. Lɛ́' íí dàà kuùmbə̀ wɔ̀ɔ̀lə̀ kə̀ nɛ́b bərá, bít íí məə Vɛnɛ́b í'ǹmbìá. Zá dáà in aa íí dá ma'ǹ də taá, bít yid ìì bɔ̀' in yɛsə̀ aa íí bɔ̀b kób də, Vɛnɛ́b piìnmbə̀ nə́ŋ̀ sí.

⁴³«Búúd tə́ aí yílú, íí *Farisa bərá! Íí í' kuùmbə̀ mə̀ə̀d gbàád bəd ba, númú, *Yahudu bəd wúlwáàlbə̀ bərú. Bít íí í' nɛ́b bəd boò dɔ̀m bənə́ kúnú, zɔ̀ŋ aa nɛ́b bəd wál bəroó, nɛ́b zùúm tə́ŋú.

⁴⁴Búúd tə́ aí yílú! Íí tə́ kìínmbə̀ sàà doo bəraa nɛ́ŋə̀ bé' gá rə kíni, bít nɛ́ŋə̀ ɛ̀m yílú, gàb gá rə kíni!»

⁴⁵*Nɛ̀n indaŋ̀mbə̀ nə́ŋ̀ bàà Yéésù: «Nɛ̀ná, ń gámì kaàn gə́, ń dúl bə́ tə́ kɔ̀.»

⁴⁶Yéésù kè' í', bàà: «Búúd tə́ aí yílə́ kɔ̀, íí *nɛ̀n indaŋ̀mbə̀ bərá; kàandə, íí pè' nɛ́b bəd kə̀ kpɛŋsɛ́lá, boò ləə indaŋ̀mbìá, bít kə̀ yíl aí bə̀ máá, íí í' indaŋ̀mbə̀ aarə ləə̀nmbə̀ sé.

⁴⁷«Búúd tə́ aí yílú. Aíra wə̀ə̀ íí sáá sə̀n *Vɛnɛ́b gbantumsə̀ bəd sàà bərá. Zá aarə *Vɛnɛ́b gbantumsə̀ bəraa doo íí bəd lòd doó!

⁴⁸Íí mà' kàandə, íí í' yàá, íí kè' doo íí bəd tù' bəd də yàá. Kə̀ aakíin, bə̀ lòd *Vɛnɛ́b gbantumsə̀ bərá; bít aí kɔ̀ íí kùd sàà boò bərá!

⁴⁹Kə̀ taàbìá, ingabké Vɛnɛ́b bə̀ bàà: ‹Má bə̀ *Vɛnɛ́b gbantumsə̀ bəd tumàá, bít kə̀ *Yéésù gbantumsə̀ bəd tá. Bə̀ dá kambəd kíìn lodǹ boò tə́ŋú, bít ìì dá kam kɔ̀ búúd í'nàá.›

⁵⁰Vɛnɛ́b mà' kə̀ aakíin də, nɛ́b bəraa bə́ŋyée rə, bə̀ dá búúd bɔbm̀ *Vɛnɛ́b gbantumsə̀ bəd bòórú, sɛŋ aa ìì lòd bə̀, sɔ̀d sɛŋ aa Vɛnɛ́b séé yɛ́b dú roó.

⁵¹Sɔ̀d Abɛl nyɛ̀lə́m ba, yaà dá wə́ə̀n Zakariya nyɛ̀lə́m ba. Zakariya nɛ́ŋə̀ aa bə̀ lò' tə́ŋtəŋ láŋsə́ wúl kə̀ *gannyàgə̀l loó. Èè, mə́ tə́ ii kíìn baanàá, nɛ́b aa bə́ŋyée rə ìì dá búúd bé'ǹ, nɛ́b bəd nyɛ̀lə́m aa doo boò bəd zà' rə bòórú!

⁵²«Búúd tə́ aí yílú, íí *nɛ̀n indaŋ̀mbə̀ bərá! Íí ke' waàl aa nɛ́b bəd dá piìn dú, bə̀ dá kə̀ Vɛnɛ́b nwɔŋ gabm̀ doó, bít kə̀ yíl aí bə̀ kɔ̀, íí pìì sé; bít nɛ́b bəraa í' piìnmbə̀ rə kɔ̀, íí dàŋ bə̀ kúnú.»

⁵³Zɔ̀ŋ aa Yéésù zá' wərə̀ gə́, *nɛ̀n indaŋ̀mbə̀ bəd gə̀b kə̀ *Farisa bəd gə̀b tá, bə̀ sɔ̀rə̀ tɔgə̀dǹmbə̀ kə̀ nwɔŋ tɛ́m yɛ̀ɛ́l bìá, bít bə̀ dɛ̀rə̀ nwɔŋ gɔ̀ŋ gɔ̀ŋ, in zùúm yílú.

⁵⁴Aarə bə̀ tə́ kpaŋ̀ saàn oò bə̀ gɔ̀'wà gúdǹmbìá, bɔ̀b oò bə̀ gúsuúm vədǹ laànmbə̀ yílú.