Read Samba Leko Luka 12 Bible Online

Luka 12 - Samba Leko bible

Luka 12

¹Sɛŋ də rú rə, nɛ́b bəd zùúm wál sə̀n Yéésù sunú. Bə̀ nád ɔ̀dnə́ŋ̀ dun ba, kàandə, nɛ́b bəd ká' taà nɛɛ̀n yàá. Yéésù sɔ̀d nɛ́b sáànmbə̀ oò bəd baànmbə̀: «Ìì gú' yíl íí kə̀ *Farisa bəd gə̀b inváàndoá! Ìì kùm nɛ́b gú' bàrə̀b bə̀ bəd kə̀ boò kíin sí.

²In aa mə́' mə́ bààì bə́ŋyée rə, kpàm yaà ìì bàà nɛ́b zùúm númú; bít in aa tə́ mə́'ke rə gə́ kóólé, ìì mà' bɔ̀b nɛ́b bəd boò gàb kúnú.

³Kə̀ taàbìá, nwɔŋ aa íí tə́ gáàm tígə́lə́ rə gə́ kóólé, dá kiimíìn zɔ̀ŋ nyɛdkè nyàámbərə̀ bə̀ ba; bít nwɔŋ aa bɔ̀n íí tɔ̀b kə̀ laàmú, nɛ́ŋə̀ túŋwà rú, wúl bàgələ́ rə gə́ kóólé, na' kpàm bə dá baàn gbàg ba.»

⁴«Mə́ tə́ ii kíìn baanàá, íí ɔ̀dzéd mə́ bərá' ìì nùù nɛ́b yíl bə̀ lodǹ bəraa màìgə́, ìì lò' nɛ́ŋə̀ sisá, bít bòórú gə́, ìì bán in ɔ̀d nə́ŋ̀ ma'ǹmbə̀ sɔ̀ŋ gá rə sí.

⁵Má ii nɛ́ŋə̀ aa íí dá nuùn də mɔmàá' ìì nùù Vɛnɛ́b, màn aa oò gə́, lò' nɛ́ŋə̀ sisì gə́, tə́ kə̀ kpɛŋsɛ́l naà nyì' oò pa'ǹ lɛ́'ǹmbə̀ laa aa fə́' bə gá rə rú roó. Èè, mə́ tə́ ii kíìn baanàá, aarə màn aa íí dá nuùn doó.

⁶«Bə̀ gə́l saasa yɛb núnà ba' lɛ̀ɛ́ŋə̀ yɛb iirə sínì? Kóó kàani, Vɛnɛ́b yid bɔ̀' kóó nə́ŋ̀má boò tə́ŋə́ sé.

⁷Bít yíl gí' íí bəd kə̀ zɔ̀ŋtá, Vɛnɛ́b gád tə́ kúnú. Kə̀ aakíin də, ìì nùù də́dǹ sí' íí kànsə̀n saasa yɛb zùúm kə̀ pɛ̀sá.»

⁸«Mə́ tə́ ii kíìn baanàá, dáà nɛ́ŋə̀ nə́ŋ̀ bààì nyɛdkè dág, nɛ́b bəd númú, bəǹ bàg mə́ì gə́, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə kɔ̀, dá baàn nyɛdkè dág, *malaika bəd númú, oò nɛ́ŋə̀ bəǹ da.

⁹Zá kóó nɛ́ɛ̀réè, dìì ìì nɛ́b kambəd númú, bít bààì bəǹ bàg mə́ síngə́, oò kɔ̀ máùráàn baàn Vɛnɛ́b *malaika bəd númú, oò nɛ́ŋə̀ mə́ gá.

¹⁰«Kóó nɛ́ɛ̀réè, *gám nwɔŋ vaksə́ì nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə yílə́ gə́, Vɛnɛ́b lɛ́' dáù invaksə́ oò kíìn daanàá. Zá màn aa *gám nwɔŋ vaksə́ Nwul Gìdń yílə́ rə, Vɛnɛ́b lɛ́' dààù invaksə́ oò aarə gá.

¹¹«Sɛŋ aa kòd bə̀ tə́ ii aàn fágǹmbə̀ *Yahudu bəd wúlwáàlbə̀ bərú, nɛ́b gbàád bəd númú, sínkɔ̀ gɔ̀mnà númú rə, ìì lɔ̀b tɛ́m kə̀ nɛɛ̀n aa íí dá yíl íí ke'ǹ dú rə sí, sínkɔ̀ ìì lɔ̀b tɛ́m kə̀ nwɔŋ aa íí dá baàn də sí.

¹²Kàandə, nwɔŋ aa íí dá baàn sɛŋ aarə rú rə, Nwul Gìdń dá ii sə̀n sánàá.»

¹³Nɛ́ŋ váàndo nə́ŋ̀ dìì nɛ́b zùúm tə́ŋú, dɛ̀d bàà Yéésù: «Nɛ̀ná, m̀ bàà níí mə́ pɛ̀d oò pii mə́ valligə̀ aa báá bə́ dàà bə́ rə máá bìá.»

¹⁴Yéésù kè' í', bààù: «Nɛ́ɛ̀réè zíg mə́ sə̀n máà kùm nɛ́d fágə́n bə̀ ma'ǹ aí tə́ŋú, bít pɛ̀d máà gàbì taà gbaŋə̀ íí bəd nɛ́ŋə̀ íí iirə gú?»

¹⁵Bítsɔ̀ŋ, bàà nɛ́b bəd kóólé: «Ìì dòò túŋá, ìì gú' yíl íí kə̀ gbaŋə̀ bəd í'ǹmbìá. Kàandə, kóó dáà nɛ́ŋə̀ tə́ kə̀ gbaŋə̀ zùúm naà máá, bán gɔ̀ŋsə́ oò ko'ǹmbə̀ gá.»

¹⁶Kàanyée gə́, bít nàà bə̀ zagəm aa yóo: «Nɛ́ŋ váàndo gbaŋə̀ bə̀ nə́ŋ̀ kə̀ lɛ' bəd naú, in bəraa làm lɛ' bəraa rə rú rə, lɛ̀b sɔ̀ɔ̀n.

¹⁷Sèl gə́, bít bàà oò tɛ́m ba: ‹Máá níì ma'ǹ gú? Mə́ kə̀ zɔ̀ŋ aa má inlíí zùúm mə́ bəraa zígǹ bərə naà sé.›

¹⁸«Bítsɔ̀ŋ bàà yíl oò kə̀ aakíin: ‹Mə́ gàb in aa má ma'ǹ də yàá. Má bɔ̀n mə́ bəd kíìn zibm̀ wɔbəlàá, má gbàád bəd bídǹ wə'nàá! Má yɛd mə́ bəd, kə̀ inlíìnmbə̀ mə́ kam bəraa kóólé, wáàl zígǹ dú wərà.›

¹⁹Bít má yíl mə́ baàn: ‹Ń tə́ kə̀ gbaŋə̀ zùúm bəd naà zèd zùúm bìá. Kùm ǹ nyì' kúnú, líí ǹ wùb kúnú, ǹ nyəə kúnú, bít ǹ kùm kə̀ tɛ́m làmkèá.›

²⁰«Zá Vɛnɛ́b bààù: ‹Ám gə́, ń kèérá. Nyà'aa tígə́l aa yée rú ní, val dáan kíìn ko'nàá. Bít kàandə, gbaŋə̀ zùúm aa wál ń zíg yíl ámbə̀ yée kóólé, dá kuùm nɛ́ɛ̀réè bə̀ gú?› »

²¹Yéésù bàà zəg sɔ̀ŋ: «Kə̀ aarə kíin, dá kuùm taà kə̀ màn aa pú'wál gbaŋə̀ oò bə̀ ní roó. Zá Vɛnɛ́b númú gə́, kə̀ gbaŋə̀ naà sé.»

²²Bítsɔ̀ŋ, Yéésù bàà *nɛ́b sáànmbə̀ oò bəd: «Kə̀ taàbìá, mə́ tə́ì taà baanàá: ‹Ìì lɔ̀b tɛ́m inlíìnmbə̀ aa íí ɔ̀d gɔ̀ŋsə́ bə̀ ko'ǹ də bə sí, sínkɔ̀ ìì lɔ̀b tɛ́m gɔ̀' bəraa íí dá páàn sisú rə bə sí.

²³Kàandə, gɔ̀ŋsə́ kànsə̀n inlíìnmbə̀ kə̀ pɛ̀sá, bít si' kɔ̀ kànsə̀n gɔ̀' bəd kə̀ pɛ̀sá.

²⁴Ìì ɛ̀g núú bərá. Bə̀ wùù in luùm gá, sínkɔ̀ bə̀ kɛ̀d gá. Bə̀ kə̀ zɔ̀ŋ aa ìì dá inlíìnmbə̀ bəd zígǹ bərə naà sé, ìì kə̀ bɔ̀n naà sé. Zá Vɛnɛ́b zàn bə̀ sùnú! Íí kànsə̀n núú yɛb gbàákù kə̀ pɛ̀sá!

²⁵Bít nɛ́ɛ̀réè aí tə́ŋú, kə̀ tɛ́m lɔbkè oòra, dá taà báàn gɔ̀ŋsə́ oò búdǹmbə̀ zɔ̀gɔ̀ gú? Nɛ́ŋə̀ nə́ŋ̀má sé.

²⁶Dáà kə̀ aakíin də, íí bán in bɛ̀ŋ́sə̀wà nə́ŋ̀má ma'ǹmbə̀ síngə́, kə̀ níìbə̀ íí lɔ̀b taà tɛ́m in ɔ̀d kam bəraa nyɛ́d də bə gú?

²⁷«Ìì ɛ̀g bə́ŋ̀ téélaan bəraa lad də ge. Bə̀ mà' tù' gá, bít bə̀ tèè gɔ̀' bəd kɔ̀ gá. Bít mə́ tə́ ii kíìn baanàá, kóó Salomon kə̀ kaŋsɛ́l oò gààrə́ bə̀ tə́ kóólé máá, páá gɔ̀' sɔ̀ɔ̀nkè nə́ŋ̀má də́ŋ kə̀ téélaan bəraa sé.

²⁸Fɔ̀g aa nyà'aa yée tə́ lɛsú, nwúndù kɔ̀ dá duùn laa rú rə máá, Vɛnɛ́b pááù gɔ̀' yàá. Nɛ́ɛ̀m ééleè aí gə́, páá ii taà gɔ̀' gá gú? Íí nɛ́b aa íí kə̀ tɛ́m bagké naà zɔ̀gɔ̀ní yóo!

²⁹Ìì dàà in aa íí dá líìn, sínkɔ̀ in aa íí dá nyəə̀n də kíìn seèlǹmbìá, bít tɛ́m oò nyágə́li sí.

³⁰Kàandə, in bəraa rə kóólé, nɛ́b bəraa ìì bàg Vɛnɛ́b síndə, ìì tə́ sə̀n diìn líbm̀ saànmbìá. Zá aí gə́, íí tə́ kə̀ Báá íí naú, gàb in aa íí í' rə yàá.

³¹Ìì mà' kàan sí, zá éèn ìì sàà *Vɛnɛ́b Gààd oò kùmsə̀n aí rú. Bít Vɛnɛ́b kɔ̀ dá ii taà in aa íí ɔ̀d də piinàá.»

³²«Ìì nùù də́dǹ sí, nɛ́b mə́ bəraa íí ká' sín yóo! Kàandə, sɔ̀ɔ̀n Báá íí Vɛnɛ́bì aí bə̀ páànmbə̀ *oò Gààrú.

³³Ìì gə́l in bəraa íí naà roó, bít ìì pii basaa íí bɔ̀b də, nɛ́b búúd bə̀ bərá. Ìì kùd dìg bəraa nɔgə̀d gá roó. Pú' ìì wál gbaŋə̀ íí bəd lɛgə́ poú, zɔ̀ŋ aa ìì bɔ̀b bə gá sə́g sə́g, lííro bəd bán wə́ə̀nmbə̀ bə gá, bít barə̀ bəd líí bán bə gá roó.

³⁴Kàandə, zɔ̀ŋ aa gbaŋə̀ ń ləə bərə, tɛ́m ámbə̀ kɔ̀ ləə tə́ zɔ̀ŋ aarə ba.»

³⁵«Tab ìì və̀d si' kə̀ yɛ́rə̀ gɔ̀sá, tù' bə̀ ma'ǹná, bít ìì dàà lampə̀ íí bəd boò ləə ko'kèá.

³⁶Ìì mà' kìínmbə̀ nɛ́d tù' bə̀ ma'ǹ bəraa ìì tə́ nɛ̀n boò nwáàn də kíin. Sɛŋ aa dáà bídǹnà wálke kéèn bə̀ pa'ǹ bərə, yaà zìb nɛɛ̀nì waàl bə gə́, bə̀ dáù kedǹ kə̀ báŋ.

³⁷Nɛ́b tù' bə̀ ma'ǹ bəraa nɛ̀n boò yaà wə́ə́ì oò yiìl gə́, dá bə̀ bɔbm̀ galə̀ní rə, bə̀ dá kuùm kə̀ tɛ́m làmkèá! Mə́ tə́ ii kíìn baanàá, aarə nwɔŋ sɔ̀ɔ̀ná, dá si' tabm̀ vədǹ kə̀ yɛ́rə̀ gɔ̀' oòra, bɔ̀b tù' bə̀ ma'ǹná, dá baàn boò kùm yɛ́b ba, boò líí iná, bít yaà dá bə̀ kíìn ma'ǹ piinàá.

³⁸Dáà bíràì sibə̀ wàà rú, sínkɔ̀ bòórú zɔ̀gɔ̀ gə́, bít yaà bɔ̀b bə̀ì galə̀ní gə́, nɛ́b aarə, bə̀ dá kuùm kə̀ tɛ́m làmkèá!

³⁹Íí gàb yàá' Dáà nɛ́d ligə̀ bə̀ gàb sɛŋ aa lííro dáà yaànà bərəì gə́, dá ligə̀ oò kíìn nwánàá, dààù pìì wúu gá.

⁴⁰Bít aí kɔ̀, kùm ìì nwán kúnú! Kàandə, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, dáà yaànà sɛŋ aa íí sèl wə́ə́ bə gá rə ba.»

⁴¹Kàanyée gə́, Piyɛr bàà: «Báátììkpɛ̀ŋá, zagəm aa ń nàà yérə, tə́ kə̀ obə́ níì, sínkɔ̀ nɛ́b bəd kóóléì?»

⁴²Báátììkpɛ̀ŋ kè' í' bàà: «Nɛ́ɛ̀réè kùmsə̀n nɛ́d tù' bə̀ ma'ǹ sɔ̀ɔ̀ná, bít nɛ́d in bə̀ gabm̀ gú? Aarə kùmsə̀n nɛ́d tù' bə̀ ma'ǹ aa nɛ̀n oò sààvúŋ̀ kìínmbə̀ nɛ́d yíl bə̀ kíin, oò yiilú, oò pii nɛ́b tù' bə̀ ma'ǹ kam bəraa yiìl lə inlíìnmbə̀, sɛŋ wə́ə́ì gə́ roó. Aarə sàà pà' nɛ́d tù' bə̀ ma'ǹ aa gàb inì ma'ǹmbìá, bít nɛ̀n oò zíg tɛ́m oò naà rə géè? Èè kàani.

⁴³Nɛ́d tù' bə̀ ma'ǹ aa, nɛ̀n oò bíràì yiìl gə́, yaà bɔ̀bə̀ tə́ tù' rə ma'ǹ naà rə, dá kuùm kə̀ tɛ́m làmkèá!

⁴⁴Mə́ tə́ ii kíìn baanàá, aarə nwɔŋ sɔ̀ɔ̀n vɛ́nà. Nɛ̀n oò dáù gbaŋə̀ oò bəd kóólé piìn oò nwán kúnú.

⁴⁵Zá dáà nɛ́d tù' bə̀ ma'ǹ aarə bààì oò tɛ́mú kə̀ aakíin: ‹Nɛ̀n mə́ náŋà tə́ kíìn yaànmbìá.› Bít dá píìn nɛ́b tù' bə̀ ma'ǹ kam bəraa zibə̀l bìá, vɔ̀ɔ̀m kə̀ kɛ́ɛ̀m tá. Dáàn líínàá, dáàn nyəənàá, bít dáàn wiràá.

⁴⁶Kàanyée gə́, nɛ̀n dáà bídǹnà nyàm aa nɛ́d tù' bə̀ ma'ǹ sèl wə́ə́ bə gá rə ba, bít sɛŋ aa gàb síndə ba. Nɛ̀n dá nɛ́d tù' bə̀ ma'ǹ búúd val bə̀ í'nàá. Bít bə̀ dáù búúd í'ǹ, kìínmbə̀ nɛ́b aa məə Vɛnɛ́b ləə̀nmbə̀ rə kíin.

⁴⁷«Dáà nɛ́d tù' bə̀ ma'ǹ aa gàb in aa nɛ̀n oò í' rə yàá, zá dìì kùd si' nwánə̀ sé, bít mà' in aa nɛ̀n oò í' rə síngə́, ìì dáù búúd í'ǹ kə̀ oò bə̀ zibm̀bə̀ kə̀ gbà' nɛɛ̀n zùúmá.

⁴⁸Zá nɛ́d tù' bə̀ ma'ǹ aa gàb in aa nɛ̀n oò í' rə sé, bít mà' tù' bəraa dá də́ŋ̀ oò bə̀ zibm̀bə̀ rə, bə̀ dáù gbà' nɛɛ̀n zibm̀ zɔ̀gɔ̀ní. Màn aa Vɛnɛ́b piiù gbàákù rə, Vɛnɛ́b dáù dɛdǹ oò pii gbàákù, bít màn aa Vɛnɛ́b zíg oò naà zùúm də kɔ̀, dáù dɛdǹ oò piià zùúm.»

⁴⁹«Mə́ yaà laa lɛ́'ǹmbə̀ zɔ̀ŋə yɛ́b ba, bít mə́ í' laa rə oò ko' kíìn kə̀ báŋ.

⁵⁰Mə́ sɔ̀rì piìnmbə̀ búúrú, kə̀ nwuukè gbà'á rú, yaà dá wə́ə̀n sɛŋ aa dá bɛ́dǹ dú rə zé.

⁵¹Íí sèl gə́, íí bàà mə́ yaà tɛbə̀ aànmbə̀ zɔ̀ŋə yɛ́b bə reè? Ə́ùwə́! Mə́ tə́ ii kíìn baanàá, zá mə́ yaà nɛ́b bəd pɛɛ̀l bìá.

⁵²Sɔ̀d bə́ŋyóo, nɛ́b bəd tə́ yiìl boò núnə̀ gə́, bə̀ dákíìn pɛlàá. Nɛ́b bəd toora bə̀ dá nə́'ǹ kə̀ nɛ́b bəd iira, bít nɛ́b bəd iira dá nə́'ǹ kə̀ nɛ́b bəd toora.

⁵³Báá dá nə́'ǹ kə̀ Wàà Váàndo oòra, Wàà Váàndo kɔ̀ dá nə́'ǹ kə̀ báá oòra. Wàà nà'á dá nə́'ǹ kə̀ wàà kéèndo oòra, wàà kéèndo kɔ̀, dá nə́'ǹ kə̀ nà'á oòra. Gúùn kéèn dá nə́'ǹ kə̀ wàà oò kéèná, wàà kéèn kɔ̀ dá nə́'ǹ kə̀ gúùn kéèn oòra.»

⁵⁴Yéésù bàà nɛ́b zùúm sɔ̀ŋ: «Màìgə́, íí bé' mɔb nə́ŋ̀ zá'àì nyàm pìì bə gə́, íí bàà: ‹Nwan dákíìn naŋàá.› Bít aarə kɔ̀ ma'míìn kúnú.

⁵⁵Bít màìgə́, íí bé' nwul pɛ̀b vúgàì pɛ́rə̀ gúu gə́, íí bàà: ‹In pí' dá kíìn pibàá.› Bít aarə kɔ̀ ma'míìn kúnú.

⁵⁶Íí nɛ́b gú' bàrə̀b bə̀ bəraa yóo! Íí gàbì in bəraa taà zɔ̀ŋə yɛ́b bə kə̀ lɛgə́ paà rə, nwɔŋ wàà boò baàn bí'ǹmbìá, bít ééleè íí gàb taà in bəraa tə́ taàn bə́ŋyée rə nwɔŋ wàà boò gá gú?»

⁵⁷«Kə̀ níìbə̀ íí fág taà yíl íí in aa wɔ̀ɔ̀lə̀ rə bə sín gú?

⁵⁸Dáà nɛ́ŋə̀ nə́ŋ̀ luu n tə́ kíìn gə́, ǹ sàà saŋ̀mbə̀ kə̀ oò kə̀ báŋ, sɛŋ aa ń tə́ ɛɛ̀m kpaŋ̀ tɛ́mú kə̀ oò tə́ roó, bɔ̀b oò gú' n dáàn ko'ǹ piìnmbə̀ nɛ́d fágə́n bə̀ naú, nɛ́d fágə́n bə̀ kɔ̀ oò gú' n dáàn piìnmbə̀ sóózè bəd naú, bít sóózè bəd kɔ̀ boò gú'n dáàn ko'ǹ páànmbə̀ wúltígə́l bə̀ rú.

⁵⁹Mə́ tə́ ǹ kíìn baanàá, ń dá vúgǹ wərə̀ gə́, ń dá sína kpob ń də káàn bɛ́'ǹ, kə̀ ba'wà lɛ̀ɛ́ŋə̀ aa dùg kə̀ bòd də tá; síngə́, ḿ bɔ̀b vúgǹmbə̀ rú wərə̀ gá sə́g sə́g.»