Read Samba Leko Luka 14 Bible Online

Luka 14 - Samba Leko bible

Luka 14

¹Nyàm Nyi'ǹmbə̀ nə́ŋ̀ kàani, Yéésù dáá *Farisa bəd gààd nə́ŋ̀ yiilú, in dáàn líìnmbìá. Nɛ́b aa wərə̀ rə ɛ̀g bə̀ wád Yéésù núù ba.

²Nɛ́ŋ váàndo nə́ŋ̀ mad nə́ŋ̀ wúbə̀ sisá. Nɛ́ŋ váàndo aarə, dìì Yéésù númú.

³Yéésù tò' gú' gə́, bít dɛ̀d *nɛ̀n indaŋ̀mbə̀ bəd kə̀ *Farisa bəd gə̀b tá, bàà bə̀: «Musa indaŋ̀mbə̀ dàà béení, sínkɔ̀ dàŋ béení nɛ́ŋə̀ si' gáŋ̀mbə̀ nyàm nyi'ǹmbə̀ sɛŋə́ì?»

⁴Zá ìì məə bée nwɔŋ ke'ǹ í'ǹmbìá. Kàanyée gə́, Yéésù lìb bí'à núù nɛ́d mad bə̀ sunú, bít gáŋə̀ sisá. Bít Yéésù bàà oò bíd kíìn oò yiilú.

⁵Bítsɔ̀ŋ, bàà bə̀: «Nɛ́ɛ̀réè aí tə́ŋú, wàà oòra, sínkɔ̀ nààváàn oòra, pí' wauro rú, kóó tə́ *nyàm nyi'ǹmbə̀ sɛŋú, pà' vúŋ̀ taà kə̀ báŋ gá gú?»

⁶Ìì bán nwɔŋ nə́ŋ̀má ke'ǹ í'ǹmbə̀ nwɔŋ aarə bə sé.

⁷Yéésù ɛ̀g bé' nɛɛ̀n aa nɛ́b bəd sàà ìì kò' zɔ̀ŋ kuùmbə̀ sɔ̀ɔ̀nkè bəd dú, kə̀ yíl boò roó. Kə̀ taàbìá, bàà bə̀ taà zagəm aa yóo:

⁸«Màìgə́ nɛ́ŋə̀ nə́ŋ̀ dɛ̀d n nì wèéd gbèd dáàn líìnmbə̀ oò kàrú gə́, dáá ǹ kùm zɔ̀ŋ sɔ̀ɔ̀n bə sí. Kam nə́ŋ̀ gə́, dɛ̀rà nɛ́ŋə̀ nə́ŋ̀ ɔ̀d tə́ kɔ̀, nɛ́ŋə̀ aarə, kàn n sə̀n kə̀ gbà'á.

⁹Kə̀ aakíin də, màn aa dɛ̀riyà kə̀ nɛ́ŋə̀ ɔ̀ɔ̀raa tə́ rə, yaà dáàn baàn: ‹Zá' ǹ dàà nɛ́ŋə̀ aa yée zɔ̀ŋá.› Kàandə, ám kɔ̀ zá' ń dáráàn taà kuùm kə̀ sə́ə́mnúùá, zɔ̀ŋ bòórú bə̀ ba.

¹⁰Aa dá sɔɔ̀n də gə́, màìgə́, ìì dɛ̀d n nì zɔ̀ŋ nə́ŋ̀ bə gə́, ɛ̀m dá ǹ kùm zɔ̀ŋ bòórú bə̀ ba, bɔ̀b màn aa dɛ̀dnnà rə, yaà wə́ə́ì gə́, oò bàà n: ‹Ɔ̀dzéd mə́ra, gbad na' yaà ǹ kùm zɔ̀ŋ sɔ̀ɔ̀nkè aa númú yée ba.› Kə̀ aakíin, ám kɔ̀ ń dá taà kaŋsɛ́l bɔbm̀ nɛ́b aa kùm gbèd magə̀ bə kə̀ ám tə́ rə númú kóólé.

¹¹Kə̀ aakíin də, kóó nɛ́ɛ̀réè, káŋ yíl oòì gə́, Vɛnɛ́b dáù bí'ǹ dùú; bít màn aa bí' yíl oò dùù rə kɔ̀, Vɛnɛ́b dáù ná'ǹ lɛgú.»

¹²Bít Yéésù bàà màn aa dɛ̀rə̀wà rə: «Màìgə́, ń dɛ̀d nɛ́b bərì wálke gbà'á gbèd ba, kə̀ limtá, sínkɔ̀ nyàmbídń gə́, ǹ dɛ̀rà ɔ̀dzéd ḿ bəd sí, níí ḿ bəd kə̀ kudvɛɛ̀l ḿ bəd tə́ sí, kun ḿ bəd sí, sínkɔ̀ ɔ̀dwaàlbə̀ ń gbaŋə̀ bə̀ bəd sí. Kàandə, boò kɔ̀ ìì dá n kíìn dɛdǹ kɔ̀, bít in aa ń pii bə̀ rə, káá ìì dá n kíìn bí'nàá.

¹³Zá màìgə́, ń tə́ nɛ́b bəd wálke gbèd dɛdǹ piìn gə́, ɛ̀m dá ǹ dɛ̀rà nɛ́b búúd bə̀ bərá, nɛ́b aa mad yɛ̀l bə̀ si' roó, nɛ́b dun tə́ŋke bərá, kə̀ nyəd bərá.

¹⁴Vɛnɛ́b dá n nɛɛ̀n zígǹ yílú, kàandə, boò gə́, ìì bɔ̀b m káàn bí'ǹmbə̀ gá. Vɛnɛ́b dá n sə̀n mú'sɛ̀l dùm ń də káánàá, sɛŋ aa nɛ́b aa ìì mà' sɔ̀ɔ̀n də, ìì dá díìm bə valə́ roó.»

¹⁵Zɔ̀ŋ aa nɛ́ŋə̀ nə́ŋ̀ nɛ́b aa bə̀ kùm gbèd magə̀ bərə tə́ŋú, kìì nwɔŋ bəraa kàangə́, bàà Yéésù: «Màn aa dá gbèd oò líìn *Vɛnɛ́b Gààrə́ rə, Vɛnɛ́b dáù nɛɛ̀n zígǹ yílú!»

¹⁶Yéésù bààù: «Nɛ́ŋ váàndo nə́ŋ̀ wúú gbèd gbà'á, bít dɛ̀d wál nɛ́b zùúm bəd wərà.

¹⁷Sɛŋ gbèd bə̀ líìn wə́ə́ gə́, tùm nɛ́d tù' bə̀ ma'ǹ oò nɛ́b bəraa dɛ̀d də sunú, oò bàà bə̀: ‹Ìì yaà kúnú, bə́ŋyée in gə́ kóólé wálmíìn yàá.›

¹⁸«Zá kóó nɛ́ɛ̀réè boò tə́ŋú, bàà in aa dàŋ̀ yaànmbə̀ roó: Nɛ́d éèn də̀gə̀ də̀gə̀ bə̀ bàà nɛ́d tù' bə̀ ma'ǹ: ‹Mə́ lɛ́bà lɛ' nə́ŋ̀ tə́ kúnú, mə́ ɛ̀m taà dáàn ɛgǹmbìá; mə́ nyɛ̀m m lò' ǹ dàà mə́ kúnú.›

¹⁹«Nɛ́ŋə̀ nə́ŋ̀ ɔ̀d bààù: ‹Mə́ lɛ́b nàà lɛ' bə̀ laàm kób, bít mə́ tə́ ɛɛ̀m taà də́'ǹ ɛgǹmbìá; mə́ tə́ən kíìn nyɛmàá, lò' ǹ dàà mə́ kúnú.›

²⁰«Nɛ́ŋə̀ nə́ŋ̀ ɔ̀d sɔ̀ŋ, bàà: ‹Mə́ pà' kéèn bə́ŋ̀ kíìn naú, bít kə̀ taàbìá, mə́ bán dáànmbə̀ gá.›

²¹«Nɛ́d tù' bə̀ ma'ǹ kidbíd nɛ̀n oò sunú, dá bààù nwɔŋ bəraa nɛ́b aa dɛ̀rà rə kè' í' bə̀ bí'ùwà roó. Nɛ̀n ligə̀ bə̀ zá' pí' nɔ̀m ma'ǹmbìá, bít bàà nɛ́d tù' bə̀ ma'ǹ oò kə̀ aakíin: ‹Ǹ ɛ̀m kə̀ báŋ, bìl bərú kóólé, kə̀ kpaŋ̀ bəraa bìlə́ rə ba, bít dɛ̀d ǹ àà nɛ́b búúd bə̀ bərá, nɛ́b aa mad yɛ̀l bə̀ si' roó, nyəd bərá, kə̀ nɛ́b dun tə́ŋke bəd tá, zɔ̀ŋə.›

²²«Zɔ̀ŋ aa nɛ́d tù' bə̀ ma'ǹ kidbírà gə́, yaà bàà: ‹Nɛ̀ná, nwɔŋ bəraa ḿ bàà rə ma'míìn yàá, zá zɔ̀ŋ nyɛ́d tə́ rú ní sɔ̀ŋ!›

²³«Nɛ̀n bàà nɛ́d tù' bə̀ ma'ǹ oò sɔ̀ŋ: ‹Ǹ ɛ̀m kpaŋ̀ bəraa bìl fɔ̀gə́ bə̀ bəd bərə ba. Gáŋ bəd dùú, bít pè' ǹ àà nɛ́b aa ń dá sáŋ̀ də gə́ kóólé, bɔ̀b wúl mə́ oò nyìì kúnú.

²⁴Máá gə́, mə́ tə́ ii kíìn baanàá, nɛ́b bəraa kíìn éèn ìì dɛ̀d bà yée kóólé, kóó nɛ́ŋə̀ nə́ŋ̀má líí gbèd máà gá!› »

²⁵Nyàm nə́ŋ̀ kàani, nɛ́b zùúm bəd tə́ sɛ̀ɛ́n kpaŋ̀ ɛɛ̀m kə̀ Yéésù tá. Yéésù lìb bí' núù boò naú, bít bàà bə̀:

²⁶«Nɛ́ŋə̀ aa dáà yaànà máá səǹ də, í' kàn nɛɛ̀n tə́ báá oòra, í' kàn nɛɛ̀n tə́ nà'á oòra, kéèn oòra, yɛb oò bərá, ɔ̀dkudvɛɛ̀l oò bərá, níí oò bərá, kun kɛ́ɛ̀m oò bərá, bít í' kàn nɛɛ̀n tə́ yíl oò bə̀ gə́, bán kuùmbə̀ nɛ́d sánán mə́ gá.

²⁷Màn aa pà' téélɛŋké oò bít bàg mə́ sə́n də, bán kuùmbə̀ nɛ́d sáànmbə̀ mə́ gá.

²⁸«Nɛ́ŋə̀ nə́ŋ̀ í'ì wúl gbà'á nə́ŋ̀ wə'ǹmbə̀ gə́, bə́ŋ̀ kùm yɛ́b ba, bít gád ɛ̀g nɛɛ̀n aa dá ba' pa'ǹ dú roó; bɔbm̀ ɛgǹmbìá, ba' túrú tùsaa rə bə̀ ma'ǹ bɛ́'ǹ gə́ roó.

²⁹Mà' kàan síngə́, dá wúl bèl páánàá, zá wə̀' zə́' wúl gbà'á rə gá. Bít nɛ́b aa ìì dá tùsaa rə bé'ǹ də kóólé, lòò bə̀ dáù kèéd bí'nàá.

³⁰Bə̀ dá baàn: ‹Nɛ́ŋ váàndo aa yée sɔ̀rì wúl wə'ǹmbìá, zá bán tù' oòrə ma'ǹ bɛ́'ǹmbə̀ sé!›

³¹«Kə̀ aarə kíni, dáà gààd nə́ŋ̀ í'ì ɛɛ̀mbə̀ bùm dáàn nə́'ǹmbə̀ kə̀ gààd nə́ŋ̀ ɔ̀d gə́, bə́ŋ̀ kùm yɛ́b ba, zìb ɛ̀g sína. Gààraa rə tə́ kə̀ nɛ́b bəd laa núnà zɔ̀ŋ laa núnə̀ gə́, dá bée báàn bùm dáàn nə́'ǹmbə̀ kə̀ gààd ɔ̀raa kə̀ nɛ́b bəd laa núnà zɔ̀ŋ laa kób deè?

³²Bán gá gə́, tùm gbantumsə̀ bəd gààd nə́ŋ̀ də sunú, sɛŋ aa bə́ŋ̀ tóò zɔ̀ŋ bùúd bəroó, bɔ̀b dá boò dɛ̀d nɛɛ̀n aa bənə́ dáánnə́ kuùm dú kə̀ tɛbə̀ roó.

³³Kə̀ aakíin, Yéésù bàà zəg sɔ̀ŋ: ‹Nɛ́ŋə̀ nə́ŋ̀má aí tə́ŋú, bán kuùmbə̀ nɛ́d sáànmbə̀ mə́ gá, məə dàà in aa kə̀ naà rə kóólé síngə́ roó.› »

³⁴«Nwuùm yɛ́b gə́, insɔ̀ɔ̀ná. Zá nwuùm yɛ́b bɔ̀' bùmkè oòì gə́, báan níì báàn ma'ǹmbə̀, bɔ̀b oò bə̀ bí'ǹmbə̀ bùmkè sɔ̀ŋ gú? In nə́ŋ̀má sé.

³⁵Kàandə, sɔ̀ɔ̀n yɛ́b bə gá, bíl in lììmkè gá kɔ̀. Nɛ́b bəd pà' bə̀ dáù za'ǹ gbaarú. Íí tə́ kə̀ túŋ naà kiìnmbə̀ gə́, ìì kìì kíìn sɔ̀ɔ̀nkè!»