Read Samba Leko Luka 15 Bible Online

Luka 15 - Samba Leko bible

Luka 15

¹Nyàm nə́ŋ̀ kàani, nɛ́b ba'káám bə̀ ke'ǹ bəd kə̀ nɛ́b invaksə́ bə̀ ma'ǹ bəd tá, ìì gbarà Yéésù sunú, oò bə̀ zɛŋ̀mbìá.

²*Farisa bəd gə̀b kə̀ *nɛ̀n indaŋ̀mbə̀ bəd gə̀b tá, bə̀ zòl iná, bít ìì bàà: «Ìì ɛ̀ga! Nɛ́ŋ Váàndo aa yée kè' nɛ́b invaksə́ bə̀ ma'ǹ bəd tə́ kúnú, bít líí in tə́ kə̀ boò tá!»

³Kàanyée gə́, Yéésù nàà bə̀ zagəm aa yóo:

⁴«Nɛ́ɛ̀réè aí tə́ŋú, kə̀ bɛ̀rə̀ bəd naà laa núnà, bít nə́ŋ̀ oò bɔ̀b kúnú, zá' dàà taà bɛ̀rə̀ laa naara zè kób zè dàànə́ŋ̀ní kam aa fɔ̀gú, ɛ̀m taà nə́ŋ̀ní aa bɔ̀b yée saànmbìá, oò bə̀ bɔbm̀bə̀ sína gá gú?

⁵Bít màìgə́, sàà bɔ̀bə̀wì gə́, tɛ́m oò kóólé nyìì kə̀ làmkèá. Pà' lɛ́'à bɛ̀rə̀ oò gààl ba.

⁶Kidbírà oò yiìl gə́, dɛ̀d yaà wál ɔ̀dzéd oò bəd kə̀ ɔ̀dwaàlbə̀ oò bəd tá, bít bàà bə̀: ‹Ìì kìì tɛ́m làmkè kə̀ máá tá, kàandə, bíd sàà mə́ bɔ̀bà bɛ̀rə̀ mə́ aa bɔ̀b də yàá.›

⁷Kə̀ aarə kíni, mə́ tə́ ii kíìn baanàá, tɛ́m làmkè gbà'á dá kuùm lɛgə́ poú kə̀ nɛ́d invaksə́ bə̀ ma'ǹ nə́ŋ̀ aa sɔ̀g, lɛ́' dàà invaksə́ oò roó. Tɛ́m làmkè nɛ́ŋə̀ nə́ŋ̀ní bə̀ aarə, dá sə̀n nɛ́b wɔ̀ɔ̀lə̀ kam bəraa laa naara zè kób zè dàànə́ŋ̀ní ìì ɔ̀d sɔ̀gǹmbə̀ sín yée kanàá.»

⁸«Kə̀ baàn də́'ǹmbə̀ kíin, dáà nɛ́ŋ kéèndo nə́ŋ̀ kə̀ ba' lɛ̀ɛ́ŋə̀ yɛb kób, bít nə́ŋ̀ oò bɔ̀b kúnú. Dá lampə̀ dáàn kó'nàá, bít dá wúl təràá. Dá saàn zɔ̀gɔ̀ zɔ̀gɔ̀, sàà dáù bɔbm̀ zé.

⁹Bít màìgə́ sàà bɔ̀bə̀ì gə́, dɛ̀d dá ɔ̀dzéd oò bəd kə̀ ɔ̀dwaàlbə̀ oò bəd tá wálàá, bít dá baàn: ‹Ìì kìì tɛ́m làmkè kə̀ máá tá, kàandə, ba' lɛ̀ɛ́ŋə̀ máa bɔ̀b də, sàà mə́ bɔ̀b yàá!›

¹⁰Kə̀ aarə kíin sɔ̀ŋ, mə́ tə́ ii kíìn baanàá, tɛ́m làmkè dá kuùm Vɛnɛ́b *malaika bəd tə́ŋú, kə̀ nɛ́d invaksə́ bə̀ nə́ŋ̀ aa sɔ̀g nùù dàà invaksə́ ma'ǹmbə̀ yéroó.»

¹¹Yéésù bàà sɔ̀ŋ: «Nɛ́ŋ váàndo nə́ŋ̀ kə̀ yɛb vɔ̀ɔ̀m bəd naà iira.

¹²Wàà váàndo bɛ̀ŋ́sə̀wà bàà báá oò: ‹Báá, m̀ pii mə́ gbaŋə̀ bəraa ń dá mə́ piìn də máá bìá.› Kàanyée gə́, báá boò gààm bə̀ taà gbaŋə̀ oò bərá, boò iirə kóólé.

¹³«Sɛŋ zɔ̀gɔ̀ gə́, wàà váàndo bɛ̀ŋ́sə̀wà pú' gə́l gbaŋə̀ oò bìá, bít zá' ɛ̀m kə̀ ba' oòrə naà, yɛ́b nə́ŋ̀ú, zɔ̀ŋ bùúd ba. Dá wə́ə́ gə́, dá pìì dáàn kuùmbə̀ zìŋzíŋú, kə̀ ba' sagə̀dǹmbìá.

¹⁴Zɔ̀ŋ aa yɛ̀l bɛ́' basaa kə̀ naà rə kóólé gə́, gulùm gbà'á yaà pí' yɛ́b aarə ba. Kàanyée gə́, bɔ̀b inlíìnmbə̀ sɔ̀ŋ sé.

¹⁵Ɛ̀m dáá pìì tùsú, nɛ́b bəraa yɛ́b bə wərə̀ rə nə́ŋ̀ kàrú, oò kɔ̀ pà' tùmə̀ lɛsú, fɔ̀gú, dá oò nwán sìírə̀ bərá.

¹⁶Gulùm nwuùì gbàákù, ɔ̀d inlíìnmbə̀ aa sìírə̀ bəd tə́ líìn də líìnmbə̀ kɔ̀. Zá kóó nɛ́ŋə̀ nə́ŋ̀má piiù inlíìnmbə̀ sé.

¹⁷«Kàanyée gə́, zá' pìì in seèlǹmbə̀ oò yílú, bít dɛ̀d yíl oò: ‹Nɛ́b bəraa tə́ tù' ma'ǹ báá mə́ naà rə gə́ kóólé, ìì tə́ kə̀ inlíìnmbə̀ aa bə̀ í' líìnmbə̀ rə naà zùúm, bít líí bə̀ nyɛ́d dú. Zá máá gə́, mə́ tə́ vadǹ kə̀ gulùm zɔ̀ŋə wa!

¹⁸Zá' kid má kíìn bídǹ báá mə́ yiilú, bít máù ráàn baàn' Báá mə́ra, mə́ mà' invaksə́ yàá kə̀ Vɛnɛ́bá, bít kə̀ ám da.

¹⁹Mə́ də́ŋ dɛdǹmbə̀ wàà váàndo ń sɔ̀ŋ sé. Mə́ tə́ən kíìn nyɛɛmàá, m̀ pà' mə́ kìínmbə̀ nɛ́d tù' bə̀ ma'ǹ ń nə́ŋ̀ kíni.›

²⁰Bít zá' kid tə́ì kíìn bídǹ báá oò yiilú. «Zɔ̀ŋ aa bə́ŋ̀ tóò zɔ̀ŋ bùúd bə kə̀ báá oò ligə̀ yée gə́, báá oò bé'ùwà yàá, bít búúd mà'ù sɔ̀ɔ̀n. Zá' nùù ɛ̀m dá sáŋ̀ kpaŋú, yaà kú' və́'ù naú.

²¹«Kàanyée gə́, wàà bààù: ‹Báá mə́ra, mə́ mà' invaksə́ì kə̀ Vɛnɛ́bá, bít kə̀ ám da, mə́ də́ŋ dɛdǹmbə̀ wàà váàndo ń sɔ̀ŋ sé.›

²²«Zá wàà bóò bàà nɛ́b tù' bə̀ ma'ǹ oò bəd: ‹Ìì ɛ̀mà kə̀ báŋ! Ìì àà dàál aa sɔ̀ɔ̀n kàn nɛɛ̀n doó! Ìì pááù kúnú, ìì pááù kɛ̀ɛ́ŋ nɛɛ̀n wàà yíl ba, bít ìì pááù tábə́ dunú.

²³Ìì àà nàà wàà kìmkè núúd bìá, bít ìì lò'ù kúnú. Báà líìn kúnú, bít báà ma'ǹ wálke gbà'á.

²⁴Kàandə, wàà váàndo máà íí bé' yérə, val kò'ù kúnú, bít bə́ŋyée gə́, tə́ kə̀ gɔ̀ŋsá. Sɛŋ də bɔ̀b kúnú, bə́ŋyée gə́, bíràì máá yiilú.› Bít wálke gbà'á làmkè bə̀ sɔ̀d sə̀n ma'míìn bìá.

²⁵«Sɛŋ aarə bərə, nɛ́ŋ váàndo aarə wàà váàndo gbà'á tə́ì in laàmmà lɛsú. Zɔ̀ŋ aa tóò bídǹnà lɛsú, gbad yaà wə́ə́ ligə̀ səǹ gə́, kìì suu mɛɛ̀lnmbə̀ bəd kə̀ léd náb bəd tá.

²⁶Dɛ̀d gbá'à nɛ́ŋə̀ nə́ŋ̀, nɛ́b tù' bə̀ ma'ǹ bəd tə́ŋú, bít dɛ̀rə̀ in aa taà roó.

²⁷Nɛ́d tù' bə̀ ma'ǹ kè' í'ù: ‹Kudvɛɛ̀l ń yaà wə́ə́ sùnú, bít báá ḿ bə̀ báà wéé nàà wàà kìmkè núúd bəroó. Kàandə, wàà váàndo oò bíràì kə̀ si' gaŋsá.›

²⁸«Kàanyée gə́, wàà váàndo gbà'á oòrə zá' mà' nɔ̀má, bít í' piìnmbə̀ yiìl wərə̀ sé. Báá oò vúg yaà nyɛ̀mə̀ oò pìì yiilú.

²⁹Zá wàà váàndo kè' í' báá oò: ‹Ǹ zɛ̀ŋ túŋá, báá mə́ra, zèd zùúm mə́ tə́ taà tù' ma'ǹ kə̀ ám tá, kìínmbə̀ nɛ́d tù' bə̀ ma'ǹ ń kíin, bít məə mə́ bèd n nwɔŋ nə́ŋ̀má sé. Bít máá gə́, pii ḿ bèd mə́ kóó vəə wàà nə́ŋ̀, bɔ̀b máà mà' wálke tɛ́m làmkè bə̀ kə̀ ɔ̀b mə́ bəd tə́ sé.

³⁰Zá nɛ́ɛ̀m wàà váàndo ń aa yée kidbírà sɛ̀ɛ́n bìlú, oòra yɛ̀l bɛ́' n sə̀n gbaŋə̀ bəd kə̀ kɛ́ɛ̀m labsə̀ bə̀ bərá, kò' ń wééù nàà wàà kìmkè núúd bìá!›

³¹«Báá oò bààù: ‹Wàà mə́ra, sɛŋ gə́ kóólé ń tə́ zɔ̀ŋə kə̀ máá tá, bít in aa mə́ kə̀ naà rə gə́ kóólé, ám bìá.

³²Aa dá sɔɔ̀n də, báà ma'ǹ wálke kə̀ tɛ́m làmkèá, bít báà kuùm kə̀ lóórá. Kàandə, kudvɛɛ̀l ń aa ḿ bé' yée, val kò'ùwà kúnú, bít bə́ŋyée kɔ̀ tə́ kə̀ gɔ̀ŋsá. Oòrə, bɔ̀b kúnú, bít bə́ŋyée gə́, bíràì máá yiilú.› »