Read Samba Leko Luka 16 Bible Online

Luka 16 - Samba Leko bible

Luka 16

¹Yéésù bàà *nɛ́b sáànmbə̀ oò bəd: «Nɛ́d gbaŋə̀ bə̀ nə́ŋ̀ kə̀ nɛ́ŋə̀ nə́ŋ̀ naú, nwán sááù sə̀n gbaŋə̀ oò bərá. Bít nɛ́b bəd yaà bə̀ bààù: ‹Nɛ́d gbaŋə̀ bə̀ nwáàn aarə, yɛ̀l gbaŋə̀ ḿ bəd də tə́ kúnú.›

²Nɛ̀n oò dɛ̀rə̀ gə́, bít bààù: ‹Mə́ kìì nɛ́b bəd gám nwɔŋ vaksə́ tə́ ám yílú, ba' nwɔŋ bòórú. Ǹ gád mə́ basaa gə́l ḿ bɔ̀b doó, bít kə̀ aa ḿ bɔ̀' roó. Bə́ŋyée ń bán kuùmbə̀ nɛ́d tù' bə̀ ma'ǹ mə́ sɔ̀ŋ gá, nìŋ máá n kíìn vú'ǹ tùsú.›

³«Nɛ́d gbaŋə̀ bə̀ nwáàn sèl bàà oò tɛ́mú: ‹Nɛ̀n mə́ dá mə́ kíìn vúŋ̀ tùsú. Má ma'ǹ leè gú? Mə́ kə̀ kpɛŋsɛ́l naà lɛ' tù' bə̀ ma'ǹ sé, bít in gəə̀l nyɛɛ̀m bə̀ kɔ̀, mə́ nùù sə́ə́mnúùá.

⁴Mə́ gàb in aa má ma'ǹ də yàá! Bít nɛ̀n mə́ vúŋ mə́ì tùsú gə́, nɛ́b bəd dá mə́ kíìn ke'ǹ boò yiilú!›

⁵«Kàanyée gə́, tùm dɛ̀rà nɛ́b aa nɛ̀n oò bàg bə̀ kpob də gə́ kóólé nə́ŋ̀ nə́ŋ̀. Bàà nɛ́ŋə̀ aa éèn wə́ə́ rə: ‹Nɛ̀n mə́ bàg n tə́ leè gú?›

⁶«Kè' í', bààù: ‹Kílə́m gɔ̀ŋ gɔ̀ŋ laa núnà.› «Nɛ́d gbaŋə̀ bə̀ nwáàn bààù: ‹Ǹ ɛ̀g núùá, kpob ń də yóo' Ǹ kùm yɛ́b bə kə̀ báŋ, bít m̀ bád ám núúboòrú, kílə́m gɔ̀ŋgɔ̀ŋ laa iira zè kób.›

⁷«Bít dɛ̀d nɛ́ŋə̀ nə́ŋ̀ ɔ̀ɔ̀rá: ‹Ám gə́, nɛ̀n mə́ bàg n leè gú?› Kè' í', bààù: ‹Inlíìnmbə̀ aa bə̀ dɛ̀d blé rə dìg laa núnà.› Nɛ́d gbaŋə̀ bə̀ nwáàn bààù: ‹Ǹ ɛ̀g núùá, kpob ń də yóo: Ǹ kùm yɛ́b bə kə̀ báŋ, ḿ bád ám núúboòrú' laa naara.›

⁸«Nɛ̀n gám nwɔŋ sɔ̀ɔ̀nkè nɛ́d gbaŋə̀ bə nwáàn tɔ̀ɔ̀l bə̀ aa yée yílə́ rə, tùsaa mà' kə̀ tɔ̀ɔ̀l kíin yérə bòórú. Kàandə, nɛ́b aa zɔ̀ŋə yɛ́b bərə, ìì mà' tɔ̀ɔ̀l kànsə̀n Vɛnɛ́b nɛ́b bərá, nɛɛ̀n aa bə̀ tə́ tù' ma'ǹ dú boò tə́ŋə́ roó.»

⁹Yéésù bàà zəg sɔ̀ŋ: «Bít máá gə́, mə́ tə́ ii kíìn baanàá: ‹Báà ko'ǹ ɔ̀dzéd bəd kə̀ tù' ma'ǹmbə̀ kə̀ gbaŋə̀ bəraa zɔ̀ŋə yɛ́b bəroó. Kə̀ aakíin də, bɔ̀b sɛŋ bəraa in bəraa dá bɛ́dǹ bərə, Vɛnɛ́b oò kè' ii oò yiilú, zèd kə̀ zèrá.›

¹⁰«Dáà báan kíìn báàn tɛ́m zígǹmbə̀ nɛ́ŋə̀ nə́ŋ̀ ba, in bɛ̀ŋ́sə̀ yɛb bòórú gə́, báan kíìn báàn tɛ́m zígǹmbə̀ nɛ́ŋə̀ aarə ba, in gbàád bəd bòórú. Bít nɛ́ŋə̀ aa bə̀ bán tɛ́m zígǹmbə̀ oò bə in bɛ̀ŋ́sə̀ yɛb bə síndə, bə̀ bán tɛ́m zígǹmbə̀ oò bə in gbàád bəd bə gá kɔ̀.

¹¹Dáà nɛ́ŋə̀ bán tɛ́m zígǹmbə̀ aí bə, gbaŋə̀ bəraa zɔ̀ŋə yɛ́b bərə bə síngə́, Vɛnɛ́b kɔ̀ bán tɛ́m zígǹmbə̀ aí bə, gbaŋə̀ sɔ̀ɔ̀n bəd bə gá.

¹²Bít dáà nɛ́ŋə̀ bán tɛ́m zígǹmbə̀ aí bə, gbaŋə̀ aa aí bə̀ síndə bə sɔ̀ɔ̀nkè síngə́, Vɛnɛ́b kɔ̀ pii ii in aa zígi rə gá.

¹³«Nɛ́d tù' bə̀ ma'ǹ nə́ŋ̀má bán nɛ̀n iirə tù' ma'ǹmbə̀ gá. Kə̀ aakíin də, dá nə́ŋ̀ zeenàá, bít dá ɔ̀d nə́ŋ̀ də í'nàá. Sínkɔ̀ dáráàn pe'ǹ kə̀ nə́ŋ̀ tá, bít dá ɔ̀d nə́ŋ̀ də náánàá. Íí bán Vɛnɛ́b tù' ma'ǹ wáàlǹmbə̀ sɛŋ nə́ŋ̀ní kə̀ ba' tù' tə́ gá.»

¹⁴*Farisa ba' bə̀ í'ǹ bəd kɔ̀ bə̀ kìì nwɔŋ bəraa Yéésù tə́ gáàm dəì kóólé, bít lòò bə̀ fòmə̀ kúnú.

¹⁵Yéésù bàà bə̀: «Aí gə́, íí í' nɛ́b bəd boò ɛ̀gi kìínmbə̀ nɛ́b wɔ̀ɔ̀lə̀ bəd kíin. Zá Vɛnɛ́b gàb tɛ́m íí bəd yàá. Kàandə, in aa tə́ gbà'á nɛ́b bəd núùrú rə, Vɛnɛ́b núùrú gə́, in tɛdńná.

¹⁶«Vɛnɛ́b í' nɛ́b bəd boò kùm kə̀ nɛɛ̀n aa Musa indaŋ̀mbə̀ bàà rú rə kíin, bít kə̀ nɛɛ̀n aa *Vɛnɛ́b gbantumsə̀ bəd núúboòd bàà rú rə kíin, yaà oò wə́ə́ Yohana nɛ́d baptisma bə̀ piìn sɛŋə́ zé. Bə̀ tə́ nɛ́b bəd *Nwɔŋ Puu Sɔ̀ɔ̀nkè baanàá, Vɛnɛ́b ləə Gààd tə́ boò yílú. Bít nɛ́b bəd kóólé, bə̀ nɔ̀ŋ tə́ piìnmbə̀ kə̀ kpɛŋsɛ́lá, zɔ̀ŋ aa Vɛnɛ́b ləə Gààd bərə ba.

¹⁷Lɛg kə̀ yɛ́b tə́ gə́, taà bə̀ dá dugǹ ɔ̀gkení, zá in bádke wàà nə́ŋ̀má taà dùg Vɛnɛ́b indaŋ̀mbə̀ bərú gá.

¹⁸«Nɛ́ŋə̀ aa nìŋ vúŋ kéèn oò yàá, bít pa' kéèn ɔ̀ɔ̀rì rə gə́, mà' labsə̀ yàá; bít màn aa pà' kéèn aa váàn nìŋ vúŋ dəì kɔ̀, mà' labsə̀ yàá.»

¹⁹Yéésù bàà bə̀ nwɔŋ aa yée sɔ̀ŋ: «Sɛŋ nə́ŋ̀ kàani, nɛ́d gbaŋə̀ bə̀ nə́ŋ̀ páá sáá gɔ̀' ɔ̀gke sɔ̀ɔ̀nkè dùm nwuukè bə̀ bərá. Bít oòrə, nyàm gə́ kóólé, líí sáá inlíìnmbə̀ dùm nwuukè bə̀ oò yiilú.

²⁰Nɛ́ŋ váàndo nə́ŋ̀ búúd bə̀ kɔ̀, nə́gə́l oò Lazarus. Nɛ́ŋə̀ aarə, si' oò pug kə̀ núgə́l bərá; ləə nɛ́d gbaŋə̀ bə̀ ligə̀ waàl ba.

²¹Í' dáà gbèd welké bəraa tə́ píìl nɛ́d gbaŋə̀ bə̀ gbèd magə̀ dùù rə líìnmbìá. Bít yagəd bəd yaà ìì kpè'èl núgə́l bəraa oò sisə́ rə kúnú.

²²«Lazarus nɛ́d búúd bə̀ val kò'ù kúnú, bít *malaika bəd pà' bə̀ ààù lɛgə́ poú, Abraham sunú. Nɛ́d gbaŋə̀ bə̀ kɔ̀ val kò'ù gə́, bít pa' bə̀ lə̀ə̀ù kúnú.

²³Nɛ́d gbaŋə̀ bə̀ ɛ̀m zɔ̀ŋ aa val bəd ləə bərə ba; zɔ̀ŋ aarə bərə, bé' búúd gbàákù. Zá' núù lɛgú, bít bé' Abraham zɔ̀ŋ bùúd kə̀ oòra, Lazarus kɔ̀ kùm oò kàd ba.

²⁴Kàanyée gə́, páá kpə̀ə́ǹ dɛ̀d: ‹Báá mə́ Abraham, ɛ̀g m̀ bé' mə́ búúrá, bít ǹ tùm Lazarus, bɔ̀b yaà oò páá nɛɛ̀n wàà yíl oò wəlú, bít oò tɛ́' mə́ mɛ́ɛ́lá. Kàandə, mə́ bé' búúd tə́ laa aa yée rú gbàákù.›

²⁵«Zá Abraham kè' í' bàà: ‹Wàà mə́ra, sèl ǹ zá' kúnú, ḿ bɔ̀b insɔ̀ɔ̀n bəd zùúm, sɛŋ aa ń kə̀ gɔ̀ŋsə́ roó. Nɛ́ɛ̀m Lazarus gə́, bɔ̀bà búúd zùúm, sɛŋ aa kə̀ gɔ̀ŋsə́ roó. Bə́ŋyée gə́, Lazarus tə́ in aa tə́ù tɛ́m làmkè piìn də bɔbàá, nɛ́ɛ̀m ám gə́, ń tə́ búúd bé'nàá.

²⁶Bít aa kàn nɛɛ̀n də, bə̀ zíg lɔ̀ŋ yádke tə́ tə́ŋtəŋ aí kə̀ obə́ra. Kə̀ aakíin də, nɛ́b aa í' taàn dáànmbə̀ zɔ̀ŋ aa bə́ kùm bərə, bə̀ bán gá, bít nɛ́ŋə̀ nə́ŋ̀má bán lɔ̀ŋ aarə taàn daànmbə̀, bít ɛɛ̀mbə̀ zɔ̀ŋ aa íí kùm bə yérə bə gá.›

²⁷«Nɛ́d gbaŋə̀ bə̀ bàà: ‹Mə́ tə́ən kíìn nyɛɛmàá, báá Abraham, ǹ tùm Lazarus báá mə́ yiilú.

²⁸Ǹ ɛ̀ga, mə́ tə́ kə̀ kudvɛɛ̀l bəd naà núnə̀ wərà. Ɛ̀m dáá ǹ bàà bə̀ boò kùm kìínmbə̀ máá kíin sí, bɔ̀b boò kɔ̀ boò yaà búúd zɔ̀ŋ aa bə sí.›

²⁹«Abraham kè' í' bàà: ‹Kudvɛɛ̀l ḿ bəd gə́, ìì tə́ kə̀ núúboòraa Musa kə̀ *Vɛnɛ́b gbantumsə̀ bəd tá, bə̀ bád də naú; boò gád taá, bít boò gú' yíl boò kə̀ kùrú!›

³⁰«Nɛ́d gbaŋə̀ bə̀ bàà: ‹Aarə də́ŋ sé, báá Abraham. Zá nɛ́ŋə̀ nə́ŋ̀ dímà tə́ sə̀n valú, bít ɛ̀m dá bɔ̀b bə̀ tə́ taà gə́, bə̀ dá nwɔŋ oò kíìn ke'nàá, bít bə̀ dákíìn sɔ̀gàá.›

³¹«Zá Abraham bàà: ‹Bə̀ í' yíl boò gú'ǹmbə̀ kə̀ in aa Musa núúboòrú, bít kə̀ in aa *Vɛnɛ́b gbantumsə̀ bəd núúboòrú rə síngə́, kóó nɛ́ŋə̀ zá' val bəd tə́ŋú, ɛ̀m dáá boò səǹ máá, bə̀ kè'ù nwɔŋ gá!› »