Read Samba Leko Luka 17 Bible Online

Luka 17 - Samba Leko bible

Luka 17

¹Yéésù bàà *nɛ́b sáànmbə̀ oò bəd: «In kam dá kuùm sɛŋ gə́ kóólé, nɛ́b bəd bə̀ aàn invaksə́ ma'ǹmbìá. Zá búúd dá kuùm màn aa tə́ nɛ́b bəd aàn invaksə́ ma'ǹmbìá, bít boò bɔ̀m tɛ́mbagké boò rə yílú!

²Nɛ́ŋə̀ aarə, aa dá sɔɔ̀n də gə́, boò tabə̀ nagə̀l bəŋ gbà'á gàálú, bít pà' boò lɛ́'ù nwuu gbà'á rú, kə̀ oò bə̀ yɛb bɛ̀ŋ́sə̀ bəraa bə̀ tə́ mə́ bagǹ yée aànmbə̀ invaksə́ ma'ǹmbìá, bít bɔ̀'ǹmbə̀ tɛ́mbagké boò gə́ roó.

³Ìì gú' yíl aí bìá! «Ɔ̀dkudvɛɛ̀l í'sɛ̀lbə̀ ń mà' invaksə́ì gə́, ál ǹ kùrə̀ kíìn sɔ̀ɔ̀nkè. Zá sɔ̀gì gə́, lòò ǹ dààù invaksə́ oòrə kúnú.

⁴Mà' invaksə́ì sɛŋ zùúm nyàm nə́ŋ̀ní ba, bít sɛŋ aa mà' rə gə́ kóólé, kid tə́ì kíìn bídǹnà ám sunú, bít yaà tə́ n baàn: ‹Mə́ sɔ̀g yàá› gə́, lò' ǹ dààù invaksə́ aa mà' n də kúnú.»

⁵*Yéésù gbantumsə̀ bərì bàà Báátììkpɛ̀ŋ: «M̀ mà' tɛ́mbagké bə́ oò kùm gbà'á.»

⁶Báátììkpɛ̀ŋ kè' í', bàà: «Dáà íí tə́ kə̀ tɛ́mbagké naà kìínmbə̀ kpànwà lɛ̀ɛ́ŋə̀ kíin gə́, íí dá kpùkulə́ nyìì baàn: ‹Ǹ bə̀' kúnú, ɛ̀m dá ǹ dìì wəl nyìgə̀lú.› Bít oò kɔ̀ dá nwɔŋ aa íí bàà rə kíìn ləənàá.»

⁷«Bàà báà də́'ǹ bə́ŋ̀ nwɔŋ aa yée ge' Nɛ́ŋə̀ nə́ŋ̀ aí tə́ŋú, kə̀ kɔ̀'váàn naú, tə́ù lɛ' lamàá, sínkɔ̀ tə́ù bɛ̀rə̀ nwánàá. Màìgə́, bé'ù tə́ì bídǹnà lɛsə́ gə́, dáù béení baàn: ‹Ǹ ɛ̀mà kə̀ báŋ, yaà ǹ líí gbèráì?›

⁸Ə́ùwə́, bààù gá. Zá bə́ŋ̀ dáù baàn: ‹Ǹ wúú mə́ gbèrá, bítsɔ̀ŋ ǹ pɛ́n gɔ̀sá, pà' ǹ àà máà gbèrá. Líí mə́ bɛ́' gbèd yàá, bít mə́ nyəə wəlì gə́, ám kɔ̀ ń dá taà gbèd ámbə̀ líínàá, bít ń dá taà wəl ámbə̀ nyəənàá.›

⁹Dá bée kɔ̀' oò mɔ̀'ǹ, tùsaa piiù mà' yérə bòórúì? Mɔ̀'ù gá.

¹⁰Kə̀ aakíin, aí kɔ̀, màìgə́ íí mà' tùsaa Vɛnɛ́b bàà ii rəì kóólé gə́, ìì bàà: ‹Obə́ gə́, bə́ kɔ̀' tɛdń bərá. Bə́ mà' tùsaa Vɛnɛ́b pii bə́ roó.› »

¹¹Yéésù tə́ ɛɛ̀m Urusalima bìlú yée gə́, taà pìì tə́ŋtəŋ Samariya yɛ́b kə̀ Galili yɛ́bá.

¹²Zɔ̀ŋ aa Yéésù ɛ̀m yaà tə́ piìn bìl nə́ŋ̀ú gə́, gərə́ bəd boò kób, ɛ̀m yaà bə̀ sáŋ kə̀ oòra. Bə̀ dìì zɔ̀ŋ bùúd kə̀ oòra,

¹³bít ìì pìì kpə̀ə́ǹ páànmbə̀ kə̀ Yéésù dɛdǹmbə̀ kə̀ aakíin: «Nɛ̀ná, ɛ̀g ǹ bé' bə́ búúrá!»

¹⁴Yéésù bé' bə̀ gə́, bít bàà bə̀: «Ɛ̀m dáá ìì ì' si' íí *nɛ́d láŋsə́ bə̀ ma'ǹ bəd númú.» Bít sɛŋ aa ìì tə́ ɛɛ̀m kpaŋə́ rə, ìì ɛ̀g núù gə́, si' boò bəd nyɛd yàá.

¹⁵Nɛ́ŋə̀ nə́ŋ̀ boò tə́ŋú, zɔ̀ŋ aa bé' si' oò nyɛd yée gə́, kidbírà Yéésù sunú, yaà káŋ Vɛnɛ́b kə̀ pə̀gə̀lib kpɛŋsɛ́l bìá.

¹⁶Yaà pí' yɛ́b bə Yéésù númə́ kə̀ dunlígə̀rá, bít mɔ̀'ù kúnú. Nɛ́ŋə̀ aarə má, nɛ́d Samariya yɛ́b bə bìá.

¹⁷Kàanyée gə́, Yéésù bàà: «Mə́ gáŋ nɛ́b bəd kób sisá, nɛ́ŋə̀ nə́ŋ̀ boò tə́ŋú, kidbírà yàá. Zá nɛ́b dàànə́ŋ̀ní kambəd də gə́, boò tə́ bá?

¹⁸Nɛ́ŋə̀ nə́ŋ̀má sèlà kidǹ bídǹmbà bə̀ Vɛnɛ́b yaàn káŋ̀mbə̀ sínì? Nɛ́ŋə̀ sɛ̀ɛ́n aa yaà káŋ̀ sə̀ní oò nə́ŋ̀ní wa?»

¹⁹Bítsɔ̀ŋ, Yéésù bààù: «Ǹ zá' lɛgú, ǹ ɛ̀m kúnú; tɛ́mbagké ń gáŋ n yàá.»

²⁰*Farisa bəd dɛ̀d Yéésù: «*Vɛnɛ́b Gààd dáà yaànà nɛ́mbá.» Yéésù kè' í' bə̀, bàà: «Vɛnɛ́b Gààd dáà yaànà kìínmbə̀ nɛɛ̀n aa nɛ́b bəd dá bé'ǹ kə̀ núù rə kíìn gá.

²¹Kə̀ aakíin də, nɛ́ŋə̀ bán baànmbə̀: ‹Ìì ɛ̀g núùá, oò tə́ zɔ̀ŋə!› sínkɔ̀: ‹Oò tə́ wərà!› gá. Kə̀ aakíin də, ìì gàb kúnú, Vɛnɛ́b ləə gààd tə́ aí tə́ŋú.»

²²Bítsɔ̀ŋ, bàà nɛ́b sáànmbə̀ oò bəd: «Sɛŋ dáà kíìn yaanàá, íí dá í'ǹ sɛŋ aa nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə dáà bídǹnà bərə bé'ǹmbìá, zá íí bé' gá.

²³Bə̀ dá ii baàn: ‹Oò tə́ zɔ̀ŋə!› Sínkɔ̀: ‹Oò tə́ wərà!› Ìì dáá wərə̀ sí. Ìì bàg nɛ́b aarə sí.

²⁴Nyàm aa nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, dáà kidǹbídǹnà bərə, dá kuùm kìínmbə̀ nɛɛ̀n aa yɛ́bsə̀ ib nyɛ́' lɛg dú kə̀ zɔ̀ŋtə́ rə kíni.

²⁵Zá bə́ŋ̀ nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə dá búúd sína bé'ǹ gbàákù. Bít nɛ́b bəraa bə̀ tə́ kə̀ gɔ̀ŋsə́ bə́ŋyée rə, məə bə̀ dáù kíìn daanàá.

²⁶«Nɛɛ̀n aa nɛ́b bəd kùm dú Nuhu sɛŋə́ rə, sɛŋ aa nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə dáà yaànà bərə, nɛ́b bəd dá kuùm nɛɛ̀n aarə rú.

²⁷Nuhu sɛŋə́ rə, nɛ́b bəd tə́ in líínàá, bít bə̀ tə́ ǹ nyəənàá, nɛ́b vɔ̀ɔ̀m bəd tə́ kɛ́ɛ̀m palàá, kɛ́ɛ̀m bəd kɔ̀ bə̀ tə́ vɔ̀ɔ̀m palàá, yaà wə́ə́ nyàm aa Nuhu pìì bə kə̀ə̀d gbà'á rú rə zé. Kàanyée gə́, nwan wəl gbà'á yaà nyìì yɛ́b ba, bít lòd dúŋ bə̀ boò kóólé.

²⁸«Sɛŋ aa nɛ́ŋ váàndo wàà dáà bídǹnà bərə, dá kuùm kìínmbə̀ Ludu sɛŋə́ kíni' nɛ́b bəd tə́ in líínàá, bít ìì tə́ ǹ nyəənàá. Ìì tə́ dùm bəd lɛ́bàá, bít ìì tə́ ǹ gə́làá. Ìì tə́ inluùm bəd wuunàá, bít ìì tə́ wúl bəd wə'nàá.

²⁹Zá nyàm aa Ludu vúg dàà *Sodoma bìl kíinní, laa kə̀ laa zəəm tá, naŋà lɛgə́ poú, bít yaà lòd dúŋ bə̀ boò kóólé.

³⁰«Dá taàn kə̀ aarə kíin, nyàm aa nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, yaà dá yíl oò i'ǹ bəroó.

³¹Nyàm aarə bərə, màn aa kùm tə́ wúl yílə́ rə, sím oò yaà wúu nuù in oò bəd yaàn pú'ǹmbə̀ sí. Kə̀ aarə kíin ní sɔ̀ŋ, màn aa dá kuùm tə́ lɛsə́ rə, kid oò bírà oò yiìl sí.

³²Sèl ìì zá' in aa mà' Ludu kéèn doó.

³³Màn aa sàà gɔ̀ŋsə́ oò súùnmbə̀ rə, dáù kíìn bɔ̀'nàá. Zá màn aa í' gɔ̀ŋsə́ oò bɔ̀'ǹmbə̀ rə, dáù kíìn súúnàá.

³⁴Mə́ tə́ ii kíìn baanàá, tígə́l aarə rú, nɛ́b bəd iira bə̀ dá ləə̀n kilə̀ nə́ŋ̀ní ba; nɛ́ŋə̀ nə́ŋ̀ gə́, bə̀ dáù kíìn pa'nàá, bít nɛ́ŋə̀ ɔ̀d nə́ŋ̀ də kɔ̀, bə̀ dáù kíìn daanàá.

³⁵Nɛ́b kɛ́ɛ̀m bəd iira wál bə̀ dá in naàm ɔ̀dba; nɛ́ŋə̀ nə́ŋ̀ gə́, bə̀ dáù kíìn pa'nàá, bít nɛ́ŋə̀ ɔ̀d nə́ŋ̀ də kɔ̀, bə̀ dáù kíìn daanàá. [

³⁶Nɛ́b vɔ̀ɔ̀m bəd dá in laàm lɛsə́ boò iira; nɛ́ŋə̀ nə́ŋ̀ gə́, bə̀ dáù kíìn pa'nàá, nɛ́ŋə̀ ɔ̀d nə́ŋ̀ kɔ̀, bə̀ dáù kíìn daanàá.]»

³⁷*Nɛ́b sáànmbə̀ oò bəd kè' bə̀ í' nwɔŋ aa Yéésù bàà bə̀ roó, bít bə̀ dɛ̀rə̀: «In bəraa rə, ìì dá taàn bínì gú, Báátììkpɛ̀ŋá?» Bít kè' í' bə̀, bàà: «Zɔ̀ŋ aa in val kùm bərə, dúmə́ bəd kɔ̀ ìì dá wáàl tə́ zɔ̀ŋ aarə ba.»