Read Samba Leko Luka 18 Bible Online

Luka 18 - Samba Leko bible

Luka 18

¹Bòórú gə́, Yéésù sán bə̀ zagəm aa yóo, bɔ̀b boò dàà Vɛnɛ́b nyɛɛ̀mbə̀ sí, bít boò bɔ̀' váàndo boò sí, sə́g sə́g.

²Bàà bə̀: «Nɛ́d fágə́n bə̀ ma'ǹ nə́ŋ̀ kùm bìl nə́ŋ̀ú, nùù Vɛnɛ́b gá, bít ləə nɛ́ŋə̀ nə́ŋ̀má gá kɔ̀.

³Bìl aarə rú kɔ̀ valkéèn nə́ŋ̀ wərà, yaà sáá oò sunú, sɛŋ gə́ kóólé, bààù: ‹Ǹ fág mə́ nwɔŋ kə̀ ɔ̀dmáàn mə́ra.›

⁴«Sɛŋ zùúm, nɛ́d fágə́n bə̀ ma'ǹ məə bée. Bítsɔ̀ŋ, bàà yíl oò: ‹Vɛ́nà, mə́ nùù Vɛnɛ́b gá, bít mə́ ləə nɛ́ŋə̀ nə́ŋ̀má gá.

⁵Zá valkéèn aa yaà tə́ mə́ vɔgə̀l sáàn yée, máá nwɔŋ oò kíìn fágàá. Síngə́, dàà líbm̀ yaànmbə̀ gá, bít dá mə́ kíìn mú'ǹ gbàákù.› »

⁶Kàanyée gə́, Báátììkpɛ̀ŋ bàà nɛ́b tù' bə̀ ma'ǹ oò bəd: «Kìì ìì kùd kíìn sɔ̀ɔ̀nkè, nwɔŋ aa nɛ́d fágə́n bə̀ aa kə̀ wɔ̀ɔ̀lə̀ naà síndə tə́ baàn doó.

⁷Vɛnɛ́b nɛ́b bəd kpə̀ə̀ bə̀ tə́ Vɛnɛ́b dɛdǹ tígə́l kə̀ nyàámbərə̀ tá. Sɛŋ gə́ kóólé, Vɛnɛ́b dá bə̀ in aa tə́ wɔ̀ɔ̀lə̀ rə piinàá. Bít Vɛnɛ́b náŋ nwɔŋ boò bəd ke'ǹ í'ǹmbə̀ gá.

⁸Mə́ tə́ ii kíìn baanàá, Vɛnɛ́b dá bə̀ in wɔ̀ɔ̀lə̀ ma'nàá, bít dá bə̀ ma'ǹ kə̀ báŋ. Zá sɛŋ aa nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə yaaì rə, dá bée nɛ́b tɛ́mbagké bə̀ bəd bɔbm̀ zɔ̀ŋə yɛ́b beè?»

⁹Yéésù nàà zagəm nə́ŋ̀, kə̀ nɛ́b kam bəraa bə̀ zíg yíl boò bənə́ nɛ́b wɔ̀ɔ̀lə̀ bərá, bít bə̀ ɛ̀g nɛ́b kambəd kìínmbə̀ in tɛdń kíin doó. Bàà:

¹⁰«Nɛ́b vɔ̀ɔ̀m bəd iira, na' ìì ɛ̀m láŋsə́ wúuú, Vɛnɛ́b dáàn nyɛɛ̀mbìá. Nɛ́ŋə̀ nə́ŋ̀ gə́, *Farisa; nɛ́ŋə̀ ɔ̀d kɔ̀, nɛ́d ba'káám bə̀ ke'ǹná.

¹¹«*Farisa váàn dìì lɛgú, bít nyɛ̀m Vɛnɛ́b kə̀ aakíin: ‹Báá Vɛnɛ́bá, mə́ mɔ̀' n yàá, kə̀ nɛɛ̀n aa máá gə́, mə́ kùm kìínmbə̀ nɛ́b kam bəraa kíin sín yóo. Nɛ́b aarə, boò gə́, bə̀ lííro bərá, bə̀ nɛ́b invaksə́ bə̀ ma'ǹ bərá, bít nɛ́b labsə̀ bə̀ bərá. Mə́ mɔ̀' n yàá kə̀ nɛɛ̀n aa mə́ kùm kìínmbə̀ nɛ́b ba'káám bə̀ ke'ǹ aakíin sín yóo.

¹²Sɛŋ nə́ŋsínə̀ dá ma'ǹ gə́, mə́ gíd in sɛŋ iira. Bít mə́ mà' tù', mə́ bɔ̀b inì kób gə́, vúŋ mə́ pii n nə́ŋ̀.›

¹³«Nɛ́d ba'káám bə̀ ke'ǹ gə́, dìì zɔ̀ŋ bùúrá, bít bág yílə yɛ́b ba. Zá oò gə́, zìb nɛɛ̀n gíìlə́ kə̀ tɛ́m lɔbkèá, bít bàà: ‹Báá Vɛnɛ́bá, ɛ̀g ǹ bé' mə́ búúrá. Máára mə́ kùmsə̀n nɛ́d invaksə́ bə̀ ma'ǹná.› »

¹⁴Yéésù bàà zəg sɔ̀ŋ: «Mə́ tə́ ii kíìn baanàá, nɛ́ŋ váàndo aa yée, Vɛnɛ́b zígə̀ tə́ kìínmbə̀ nɛ́d wɔ̀ɔ̀lə̀ kíin, sɛŋ aa tə́ bídǹ oò yiìl loó. Zá *Farisa váàn aa gə́, Vɛnɛ́b zígə̀ kə̀ nɛ́d wɔ̀ɔ̀lə̀ kíin sé. Kàandə, kóó nɛ́ɛ̀réè, káŋ yíl oòì gə́, Vɛnɛ́b dáù bí'ǹ dùú, bít màn aa bí' yíl oò dùù rə kɔ̀, Vɛnɛ́b dáù ná'ǹ lɛgú.»

¹⁵Nɛ́b bəd àà yɛb bɛ̀ŋ́sə̀ bəd Yéésù sunú, bɔ̀b oò zíg bə̀ nɛɛ̀n yílú. *Nɛ́b sáànmbə̀ bəd bé' bə̀ gə́, bít ìì ál bə̀ kúnú.

¹⁶Zá Yéésù dɛ̀d àà yɛb bɛ̀ŋ́sə̀ bəd oò sunú, bít bàà nɛ́b sáànmbə̀ oò bəd: «Ìì dàà yɛb bɛ̀ŋ́sə̀ bəd boò yaà máá sunú! Ìì dàŋ bə̀ sí. Kàandə, *Vɛnɛ́b ləə gààd tə́ nɛ́b aa kìínmbə̀ yɛb bɛ̀ŋ́sə̀ bəraa kíin də yílú.

¹⁷Mə́ tə́ ii kíìn baanàá, aarə nwɔŋ sɔ̀ɔ̀ná' Màn aa kè' Vɛnɛ́b oò ləə gààd obəǹ yílú, kìínmbə̀ wàà bɛ̀ŋ́sə̀wà kè' rə kíin síndə, bán piìnmbə̀ *Vɛnɛ́b Gààrú gá.»

¹⁸Yahudu bəd gààd nə́ŋ̀ dɛ̀d Yéésù: «Nɛ̀n sɔ̀ɔ̀ná, má níì ma'n, má taà *gɔ̀ŋsə́ aa bɛ́d bə gá rə bɔbm̀ gú?»

¹⁹Yéésù bààù: «Kə̀ níìbə̀ ń dɛ̀d mə́ taà nɛ̀n sɔ̀ɔ̀n gú? Nɛ́ŋə̀ nə́ŋ̀má nɛ́ŋə̀ sɔ̀ɔ̀n sé, Vɛnɛ́b oò nə́ŋ̀ní tə́ŋtə́ŋ, kùmsə̀n nɛ́ŋə̀ sɔ̀ɔ̀ná!

²⁰Ń gàb Vɛnɛ́b indaŋ̀mbə̀ bəd yàá: ‹Ǹ mà' labsə̀ sí, ǹ lò' yíl sí, ǹ pa' lííro sí, ǹ mà' sedako gúsuúm bə̀ nɛ́ŋə̀ yílə́ sí, ǹ káŋ báá ḿ da, kə̀ nà'á ḿ da.› »

²¹Màn váàn kè' í' bàà: «Indaŋ̀mbə̀ bəraa kóólé, mə́ kò' yàá, bɔ̀b bə́ŋ̀ mə́ tə́ wàà də̀bá.»

²²Bòórú Yéésù kìì nwɔŋ aa kàangə́, bààù: «Nyɛ́d n tə́ in ɔ̀d nə́ŋ̀ ma'ǹmbə̀ sɔ̀ŋ' Pú' dá ǹ gə́l gbaŋə̀ bəraa ń kə̀ naà rə gə́ kóólé, ǹ gàm basaa ń bɔ̀b də nɛ́b búúd bə̀ bərá; kàandə, ń dá gbaŋə̀ bəd dáàn bɔbm̀ lɛgə́ poú; bít yaà ǹ bàg mə́ kúnú.»

²³Zá zɔ̀ŋ aa màn váàn də kìì nwɔŋ bəraa Yéésù bààù rə kàangə́, tɛ́m nwuù yàá; kàandə, màn váàn aarə, tə́ kə̀ gbaŋə̀ naà gbàákù.

²⁴Zɔ̀ŋ aa Yéésù bé' nɛ́ŋə̀ aarə tɛ́m nwuùì yée gə́, bít bàà: «Gbò'ì gbàákù, nɛ́b gbaŋə̀ bə̀ bəd dáàn piìnmbə̀ *Vɛnɛ́b gààrú.

²⁵Dá kuùm ɔ̀gkeá, gɛloba piìnmbə̀ zìlə̀wà nyíírú, kə̀ nɛ́d gbaŋə̀ bə̀ piìnmbə̀ *Vɛnɛ́b gààrú.»

²⁶Nɛ́b aa tə́ù zɛŋ̀ də, ìì bàà: «Zá tə́ kàangə́, nɛ́ɛ̀réè dá sə̀n báàn súùnmbə̀ gú?»

²⁷Yéésù kè' í': «In aa nɛ́b bəd bán ma'ǹmbə̀ gá rə, Vɛnɛ́b gə́, dá kíìn báàn ma'ǹmbìá.»

²⁸Kàanyée gə́, Piyɛr bàà: «Ǹ ɛ̀ga, zá' bə́ dàà in bəraa bə́ kə̀ naà rə yàá, bít bə́ í' kuùmbə̀ *nɛ́b sáànmbə̀ ḿ bərá.»

²⁹Yéésù bàà bə̀: «Mə́ tə́ ii kíìn baanàá, aarə nwɔŋ sɔ̀ɔ̀nà, dáà nɛ́ŋə̀ zá' dàà bìl oò yàá, sínkɔ̀ kéèn oò yàá, kudvɛɛ̀l oò bərì kə̀ níí oò bəd tá, báá oòì kə̀ nà'á oò tá, bít kə̀ yɛb oò bəd tá, *Vɛnɛ́b Gààd nwɔŋ bòórú gə́,

³⁰dá in aa kàn aa bəraa rə bɔbm̀ sɛŋ aa bə́ŋyée rú, bít dá *gɔ̀ŋsə́ aa bɛ́d gá rə bɔbm̀ sɛŋ aa dáà yaànà númú rə ba.»

³¹Yéésù ɛ̀m kə̀ *nɛ́b sáànmbə̀ oò bəraa kób zè iirə rə tá, bít bàà bə̀: «Ìì ɛ̀ga, bə́n tə́ən na'ǹ ɛɛ̀m Urusalima bìlú. *Vɛnɛ́b gbantumsə̀ bəd nwɔŋ bəraa bád bə̀ dàà boò núúboòrú, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə yílə́ rə, dákíìn wə́ə́nàá.

³²Kàandə, kò' bə̀ dá nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə piìn nɛ́b aa bàg Vɛnɛ́b síndə nɛɛ̀n tɛ́mú. Lò' bə̀ dáù kèéd bí'nàá, bə̀ dáù kíìn dúlàá, bít bə̀ dáù sudn tó'ǹ ba.

³³Bə̀ dáù kíìn zibàá, bòórú gə́, bə̀ dáù kíìn lo'nàá; bít sɛŋ toorə bə gə́, dákíìn díìm valú.»

³⁴Zá *nɛ́b sáànmbə̀ oò bəd gə́, Vɛnɛ́b mə́' bə̀ nwɔŋ wàà lɛ̀ɛ́ŋə̀ rə tə́ bée, bít bə̀ gàb nɛɛ̀n aa nwɔŋ bəraa rə í' baànmbə̀ rú rə sé.

³⁵Zɔ̀ŋ aa Yéésù ɛ̀m yaà wə́ə́ Yeriko bìl kàd bə gə́, nyəd nə́ŋ̀ kùm kpaŋ̀ kàd ba, bít tə́ in nyɛmàá.

³⁶Nyəd kìì nɛ́b zùúm dìímsə̀ tə́ taàn kpaŋə́ gə́, dɛ̀d nɛ́b kam aa wərə̀ rə, níì taà sìnì?

³⁷Nɛ́b bəd kè' bə̀ í'ù: «Yéésù Nazaratu bə̀ tə́ sə̀n taanàá.»

³⁸Kàanyée gə́, zá' páá kpə̀ə́ǹ lɛgú, dɛ̀d: «Yéésù, Dauda Wàá, ɛ̀g ǹ bé' mə́ búúrá!»

³⁹Nɛ́b bəraa ké' kpaŋ̀ Yéésù númú rə, ìì álə̀ kúnú, bɔ̀b oò tɛb nwɔŋá. Zá oò gə́, məə kíìn tɛbm̀bìá, kpàm nwɔŋ lɛgə́ gbàákù sɔ̀ŋ: «Dauda Wàá, ɛ̀g m̀ bé' mə́ búúrá!»

⁴⁰Yéésù dìì gə́, bít bàà nɛ́b aa bə̀ pe' kə̀ oò tə́ rə, boò ààùwà kúnú. Zɔ̀ŋ aa nyəd gbad yaà wə́ə́ gə́, Yéésù dɛ̀rə̀:

⁴¹«Ń í' máà mà' n níì gú?» Kè' í', bàà: «Báátììkpɛ̀ŋá, mə́ í' núù mə́ bəd boò keèd kúnú.»

⁴²Bít Yéésù bààù: «Núù ń bəd boò keèd kúnú! Tɛ́mbagké ń gáŋ n si' yàá.»

⁴³Kə̀ nwɔŋ aa nuù yée kíinní, núù oò bəd keèd yàá, bít bàg Yéésù kə̀ Vɛnɛ́b káŋ̀mbìá. Zɔ̀ŋ aa nɛ́b zùúm bé' nɛ́ŋə̀ aa núù keèd gə́, bə̀ pìì Yéésù bagǹmbə̀ bòórú, bít bə̀ pìì Vɛnɛ́b káŋ̀mbə̀ kɔ̀.