Read Samba Leko Luka 20 Bible Online

Luka 20 - Samba Leko bible

Luka 20

¹Nyàm nə́ŋ̀ kàani, Yéésù tə́ nɛ́b bəd in sáàn láŋsə́ wúuú, bít tə́ nɛ́b bəd *Nwɔŋ Puu Sɔ̀ɔ̀nkè baàn yée gə́, *láŋsə́ gààd bərá, *nɛ̀n indaŋ̀mbə̀ bərá, kə̀ *dam bəd tá, bə̀ yaà oò sunú,

²bə̀ bààù: «M̀ bàà bə́ kúnú, ḿ bɔ̀b kpɛŋsɛ́l aa ń tə́ kə̀ in bəraa rə ma'ǹ yée bínì gú? Sínkɔ̀ nɛ́ɛ̀réè pii n sə̀n kpɛŋsɛ́l in aarə ma'ǹmbə̀ gú?»

³Yéésù kè' í' bàà bə̀: «Máá kɔ̀ má ii nwɔŋ nə́ŋ̀ dɛdǹ kɔ̀. Ìì bàà mə́ kúnú:

⁴Nɛ́ɛ̀réè tùmà sə̀n Yohana yaà oò pii nɛ́b bəd baptisma gú? Vɛnɛ́bì, sínkɔ̀ nɛ́b bərì?»

⁵Bít sèl bə̀ bɔ̀b boò bòd bə̀ gə́, bə̀ bàà: «Dáà kè' bə́n í'ǹnì: ‹Vɛnɛ́b tùmə̀wà sùnú› gə́, dá bə́n dɛdǹ: ‹Kə̀ níìbə̀ íí bagə̀ taà sín gú?›

⁶Zá dáà bə́n baànnì: ‹Nɛ́b bəd tùmə̀wà sùnú› gə́, nɛ́b bəd kóólé làl ìì dá bə́n kíìn lodǹ kə̀ bəŋá; kàandə, nɛ́b bəd kóólé ìì gàbì boò tɛ́mú, Yohana kùmsə̀n *Vɛnɛ́b gbantumsàá.»

⁷Kè' bə̀ í' kə̀ aakíin: «Obə́ gə́, bə́ gàb nɛ́ŋə̀ aa tùmə̀wà yaà oò pii nɛ́b bəd baptisma rə sé.»

⁸«Bít Yéésù bàà bə̀: ‹Tə́ kàangə́, máá kɔ̀ mə́ bàà ii zɔ̀ŋ aa mə́ bɔ̀bà kpɛŋsɛ́l bə mə́ mà' kə̀ in bəraa rə gá.› »

⁹Bítsɔ̀ŋ, Yéésù pìì nɛ́b bəd zagəm aa yée naànmbìá: «Nɛ́ŋ váàndo nə́ŋ̀ làm lɛsá, ləg téé bərá, bít zíg nɛ́b lɛ' bə̀ laàm bəd dú wərà, boò nwán kúnú. Bít zá' ɛ̀m sɛ̀ɛ́n sɛŋ bùúrá.

¹⁰Sɛŋ aa téé yɛb ú' rú rə, tùmà nɛ́d tù' bə̀ ma'ǹ oò nə́ŋ̀ nɛ́b lɛ' bə̀ laàm bəd sunú, yaà oò kè' bəǹ téé yɛb aa ìì yɛ̀b də obəǹ bìá. Zá nɛ́b lɛ' bə̀ laàm bəd kò' bə̀ zìb nɛ́d tù' bə̀ ma'ǹ də kúnú, bít nìŋ bə̀ bí'ù nɛɛ̀n tɛdńní.

¹¹Nɛ́d lɛ' bə̀ bíd sɔ̀d nɛɛ̀n də rú ní, tùmà nɛ́d tù' bə̀ ma'ǹ iirúbá. Zá nɛ́b lɛ' bə̀ laàm bəd kò' bə̀ zìb nɛ́d tù' bə̀ rə kúnú, bít nìŋ bə̀ bí'ù nɛɛ̀n tɛdńní sɔ̀ŋ, in nə́ŋ̀má bə̀ piiù sé.

¹²Nɛ́d lɛ' bə̀ tùmà nɛ́d tù' bə̀ ma'ǹ toorúb sɔ̀ŋ. Màn váàn aa yérə gə́, zìb bə̀ là'ù sisá, bít làà bə̀ lɛ́'ù lɛ' bòórú.

¹³Kàanyée gə́, nɛ́d lɛ' bə̀ bàà: ‹Má níì báàn ma'ǹmbə̀ gú? Má wàà í'sɛ̀lbə̀ mə́ tumàá. Oò gə́, nə́ŋ̀ gə́, bə̀ dáù kíìn ləənàá.›

¹⁴Zá sɛŋ aa nɛ́b lɛ' bə̀ laàm bəd bə̀ bé' wàà tóò yaànà rə, bə̀ dɛ̀d ɔ̀dnə́ŋ̀ bəd boò bòdba, bə̀ bàà: ‹Ìì ɛ̀ga, oòra dá sə̀n valligə̀ rə líínàá. Ìì yaà zìb báà lo'ǹnə̀ kúnú! Báan sə̀n valligə̀ rə líínàá.›

¹⁵Bít làà bə̀ lɛ́'ù lɛ' bòórú, bə̀ lò'ù kúnú. Kàanyée gə́, Yéésù bàà: «Íí sèl tə́ leè gú? Íí gàb in aa nɛ́d lɛ' bə̀ yaà dá bə̀ ma'ǹ dəì sɔ̀ɔ̀nkè.

¹⁶Nɛ́d lɛ' bə̀ dáà kíìn yaanàá, yaà dá nɛ́b tù' bə̀ ma'ǹ bəraa rə kíìn loràá, bít dá lɛ' oòrə piìn nɛ́b tù' bə̀ ma'ǹ kambəd naú.» Zɔ̀ŋ aa nɛ́b bəraa bə̀ kìì nwɔŋ bəraa gə́, bə̀ bàà: «Vɛnɛ́b Oò nwán bə́ kíìn in aa rú!»

¹⁷Zá Yéésù ɛ̀g wád bə̀ núùrú, bít bàà bə̀: «Bàà íí dá Núúboòd nwɔŋ aa i'ǹ leè gú? ‹Bəŋ aa nɛ́b wúl bə wəə̀n bəd làà bə̀ lɛ́' kàd bərə, bíd yaà bíl bəŋ yíl bə̀ yàá.›

¹⁸Kóó nɛ́ɛ̀réè, yi'ì bəŋ aarə yílə́ gə́, kɛɛ̀l dá dugǹ bəní. Bít bəŋ aarə pí'ì nɛ́ŋə̀ nə́ŋ̀ yílə́ gə́, dá nɛ́ŋə̀ rə bí'ǹ kə̀ yɛ́b məsə́g kíin.»

¹⁹*Nɛ̀n indaŋ̀mbə̀ bəd, kə̀ *láŋsə́ gààd bəd tá, də́dǹ mà' bə̀ kə̀ nɛ́b bərá. Bə̀ gàb yàá, Yéésù gám zagəm aarə kə̀ obənə́ ra, kə̀ taàbìá, bə̀ sàà Yéésù ko'ǹmbə̀ zɔ̀ŋ də rú ní.

²⁰Kàanyée gə́, bə̀ nwán Yéésù, bɔ̀b oò bə̀ ko'ǹ piìnmbə̀ nɛ́b gbàád yɛ́b bə̀ bəd naú. Kə̀ taàbìá, bə̀ tùm taà nɛ́b bərá, mə́' dá boò ì' yíl boò kìínmbə̀ nɛ́b sɔ̀ɔ̀n bəd kíin, Yéésù númú. Bə̀ í' in nə́ŋ̀ bɔbm̀bə̀ nwɔŋ aa tə́ gáàm də ba, bɔ̀b oò bə̀ kó'ǹmbə̀ gɔ̀'wà rú.

²¹Nɛ́b aarə, yaà bə̀ dɛ̀d Yéésù nwɔŋ nə́ŋ̀, bít bə̀ bàà: «Nɛ̀ná, bə́ gàb yàá, ń gám nwɔŋ, bít ń sán nɛ́b bəd in tə́ kə̀ wɔ̀ɔ̀làá. Ɛ̀g ḿ pɛ̀d nɛ́b bəd bə sé. Zá ń sán nɛ́b bəd Vɛnɛ́b kpaŋ̀ tə́ kə̀ vɛ́nà.

²²Vɛnɛ́b indaŋ̀mbə̀ bààì báà káá gààd gbà'á Roma bə̀ ba'káám kínì, kóó báà káá síì?»

²³Zá Yéésù gàb tɔ̀ɔ̀l in aa bə̀ tə́ ma'ǹ də gə́, bàà bə̀:

²⁴«Ìì ì' mə́ bə́ŋ̀ ba' lɛ̀ɛ́ŋə̀ nə́ŋ̀ ge. Nyìsə̀ aa bə wərə̀ kə̀ nə́gə́l aa ìì bád bə yée tá, nɛ́ɛ̀réè bə̀ gú?» Kè' bə̀ í', bə̀ bàà: «Roma bəd gààd gbà'á bìá.»

²⁵Kàanyée gə́, Yéésù bàà bə̀: «Tə́ kàangə́, in aa tə́ gààd gbà'á Roma bə̀ rə, ìì kááù kúnú, bít in aa tə́ Vɛnɛ́b bərə kɔ̀, ìì káá Vɛnɛ́bá.»

²⁶Nwɔŋ bəraa gám yérə, bə̀ bɔ̀b nwɔŋ vaksə́ nə́ŋ̀má rú wərə̀, dá də́ŋ̀ oò bə̀ ko'ǹmbə̀ nɛ́b bəd númú sé. Zá nwɔŋ oò bəraa kè' í' bə̀ rə, kò' bə̀ yíl yàá, bít ìì kùm bəd dìímsə̀ní.

²⁷Nɛ́b kam *Saduki bəd gə̀b tə́ŋú, bə̀ yaà Yéésù sunú. Saduki bəd gə̀b də, nɛ́b aa bə̀ bàà val bəd díím kɔ̀ gá roó. Nɛ́b aa bə̀ yaà rə, bə̀ dɛ̀d Yéésù nwɔŋ aa yóo:

²⁸«Nɛ̀ná», Musa pii báà indaŋ̀mbə̀ aa bád yóo: «Dáà nɛ́ŋə̀ nə́ŋ̀ vàd dàà kéèn yàá, kə̀ wàà naà síngə́, kudvɛɛ̀l oò oò pà' val kéèn də kúnú, bít lɛ̀b oò pii níí oò wàá.

²⁹Kə̀ aakíin də, nɛ́b vɔ̀ɔ̀m bəd boò nə́ŋsínà, báá nə́ŋ̀ní nà'á nə́ŋ̀ní. Wàà éèn də̀gə̀ də̀gə̀ bə̀ pà' kéèná, bít val kò'ù kúnú, dàà yɛb bəd sé.

³⁰Wàà aa zəgə̀ rə, yaà pà' val kéén aa níí oò dàà roó.

³¹Bítsɔ̀ŋ nɛ́d toorúb də yaà pà' val kéèn aarə kɔ̀. Kə̀ aakíin də, boò nə́ŋsínə̀ kóólé bə̀ pà' val kéèn aarə yàá, bít val kòd bə̀ kíìn boò kóólé, lɛ̀b bə̀ dàà yɛb bəd sé.

³²Yaà dá bɛ́dǹ kə̀ naà gə́, nɛ́ŋ kéèndo rə kɔ̀ val yaà kò'ù kúnú.

³³Sɛŋ aa díímke valə́ bə̀ bərə gə́, nɛ́ŋ kéèndo aa yée dá kuùm nɛ́ɛ̀réè kéèn gú? Kə̀ aakíin də, nɛ́b aa nə́ŋsínà yée kóólé bə̀ pà'ùwì yiìl yéroó!»

³⁴Yéésù kè' í' bə̀: «Nɛ́b vɔ̀ɔ̀m bəraa kə̀ nɛ́b kɛ́ɛ̀m bəraa bə̀ tə́ kuùm kə̀ gɔ̀ŋsə́ bə́ŋyée rə, bə̀ pàl ɔ̀dnə́ŋ̀ bəd tə́ kúnú.

³⁵Zá nɛ́b aa Vɛnɛ́b zíg bə̀, bə̀ də́ŋì díìmbə̀ valú, bít yaàn kuùmbə̀ kə̀ gɔ̀ŋsə́ yɛ́b aa dáà yaànà númú rə bərə, bə̀ pàl ɔ̀dnə́ŋ̀ bəd gá.

³⁶Val bán bə̀ kodǹmbə̀ sɔ̀ŋ gá, kàandə, bə̀ tə́ kìínmbə̀ *malaika bəd kíin. Vɛnɛ́b ɛ̀g bə̀ tə́ kìínmbə̀ yɛb oò bəd kíin. Kə̀ taàbìá, díím bə̀ taà valú.

³⁷Zɔ̀ŋ aa bád dàà téé walág nwɔŋ ba, núúboòrú rə, Musa bàà ì' nyɛdkè val bəd dákíìn díímàá. Musa dɛ̀d Báátììkpɛ̀ŋ də, ‹Abraham Vɛnɛ́bá, Isiyaku Vɛnɛ́bá, bít kə̀ Yakubu Vɛnɛ́bá.›

³⁸Vɛnɛ́b də, val bəd Vɛnɛ́b gá, zá nɛ́b galə̀ bəd Vɛnɛ́bá. Vɛnɛ́b naà gə́, nɛ́b bəd kóólé bə̀ tə́ kə̀ gɔ̀ŋsá.»

³⁹*Nɛ̀n indaŋ̀mbə̀ kam kè' bə̀ í' nwɔŋ, bə̀ bàà: «Nɛ̀ná, kè' ń í' nwɔŋ aarəì sɔ̀ɔ̀nkè.»

⁴⁰Kə̀ aakíin də, də́dǹ mà' nɛ́b bərì nwɔŋ ɔ̀d kambəd dɛdǹmbìá.

⁴¹Yéésù bàà bə̀: «Ééleè nɛ́b bəd dá taà báàn baànmbə̀ *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə, dá taà kuùm Dauda wàà gú?

⁴²Kə̀ aakíin də, gààd Dauda kə̀ yíl oò bə̀ máá, bààì oò nábú: ‹Báátììkpɛ̀ŋ Vɛnɛ́b bàà Báá mə́ Tììkpɛ̀ŋ: Yaà ǹ kùm zɔ̀ŋə máá nɛɛ̀n váànú,

⁴³bɔ̀b máà lə́' ɔ̀dmáàn ḿ bəd ám dun dùú, kìínmbə̀ kilə̀ dun bə̀ ná'ǹ ń kíni.›

⁴⁴Dauda dɛ̀d Krístù ‹Báátììkpɛ̀ŋá.› Kə̀ aakíin də, ééleè Krístù, *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə, dá taà kuùm Dauda wàà gú?»

⁴⁵Nɛ́b aa kùm wərə̀ rə kóólé, bə̀ tə́ù kíìn zɛŋàá. Yéésù bàà *nɛ́b sáànmbə̀ oò bəd:

⁴⁶«Ìì gú' yíl íí ra, ìì lúŋ *nɛ̀n indaŋ̀mbə̀ bəd sí. Boò gə́, bə̀ í' dàál bùúd bəd páàlǹmbìá. Bə̀ í' nɛ́b bəd boò dɔ̀m bənə́ lumùrú, nɛ́b zùúm tə́ŋú. Sàà bə̀ pà' nɛ́b gbàád zɔ̀ŋ aa númú roó, sɛŋ aa bə̀ tə́ *Yahudu bəd wúlwálke bərú roó. Bít sɛŋ aa bə̀ mà' wálke gbèd gbà'á bə̀ì rə, sàà bə̀ pà' zɔ̀ŋ bəraa pe' kə̀ *gannyàgə̀l tə́ roó.

⁴⁷Nyá'kè' bə̀ sáá sə̀n in bəraa val kɛ́ɛ̀m bəd kə̀ naà roó. Bə̀ í' Vɛnɛ́b bùúd nyɛɛ̀mbìá, bɔ̀b boò ɛ̀g bənə́ kìínmbə̀ nɛ́b sɔ̀ɔ̀n bəd kíin. Vɛnɛ́b fág dá bə̀ búúd nwuukè gbà'á piinàá!»