Read Samba Leko Luka 21 Bible Online

Luka 21 - Samba Leko bible

Luka 21

¹Yéésù zá' núù lɛgə́ gə́, bé' nɛ́b gbaŋə̀ bə̀ bəd tə́ ba' páàn kɛ̀ɛ̀l aa páá bə̀ sáá Vɛnɛ́b ba' rú, láŋsə́ wúu rə rú.

²Yéésù bé' val kéén nə́ŋ̀ búúd bə̀ yaà páá ba' galə̀ yɛb aa kə̀ pɛ̀sə́ naà gbàákù sín də iira.

³Bít Yéésù bàà: «Mə́ tə́ ii vɛ́nà baanàá' Val kéén búúd bə̀ aa yée pii kànsə̀n nɛ́b kam bəraa yée kóólé.

⁴Nɛ́b aa kóólé, ìì pii nyɛ́d bə̀ tə́ zùúm. Zá oò gə́, pii aa wàà aa kə̀ naà, dá kə̀ yíl oò zaàn dəì kə̀ zɔ̀ŋtá.»

⁵Nɛ́b kam gám láŋsə́ wúl nwɔŋá, bə̀ bàà: «Vɛ́nà gə́, láŋsə́ wúl aa sɔ̀ɔ̀n yàá, kə̀ bəŋ sɔ̀ɔ̀nkè bərá, bít kə̀ in oò bəraa bə̀ pii, bɔ̀b Vɛnɛ́b káŋ̀mbə̀ roó.» Zɔ̀ŋ aa Yéésù kìì nwɔŋ bəraa gə́, bàà:

⁶«Íí ɛ̀g in bəraa yéeì kóólé sɔ̀ɔ̀nkè gə́, sɛŋ bəd dáà kíìn yaanàá, in bəraa íí bé' yérə kóólé, bə̀ dákíìn yi'nàá; bəŋ nə́ŋ̀má ləə bəŋ ɔ̀d yílə́ gá.»

⁷Nɛ́b aa tə́ù zɛŋ̀ də, bə̀ dɛ̀rə̀: «Nɛ̀ná, m̀ bàà bə́ kúnú, sɛŋ déè bə in aarə dá taà wə́ə̀n gú, bít níì dá sə̀n sɛŋ bəraa in bəraa dá wə́ə̀n bərə i'ǹ gú?»

⁸Yéésù bàà: «Ìì gú' yíl aí bìá, ìì dàà nɛ́b bəd boò záá ii sí. Kàandə, nɛ́b bəd zùúm, bə̀ dáà kíìn yaanàá, bə̀ dáà ɛɛ̀mmà kə̀ nə́gə́l máá bìá, bə̀ dá baàn: ‹Máára mə́ kùmsə̀n *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ roó!› bít bə̀ dá baàn: ‹Sɛŋ wə́ə́ yàá.› Zá ìì bàg bə̀ sí.

⁹Sɛŋ aa íí kìì bùm nwɔŋ yàá, bít nɛ́b bəd nə́' nə́gə̀d tə́ kə̀ gààd boò bəd də, də́dǹ oò mà' ii sí. Kàandə, in bəraa rə, éèn oò sɔ̀d sína, zá yɛ́b gə́, dùg kə̀ báŋ gá.»

¹⁰Kàanyée gə́, bàà bə̀: «Yɛ́b nə́ŋ̀ dá bùm nə́'ǹ kə̀ yɛ́b ɔ̀ɔ̀rá, bít gààd nə́ŋ̀ dáráàn bùm nə́'ǹ kə̀ gààd ɔ̀ɔ̀rá.

¹¹Yɛ́b dákíìn wáàn yɛ́b gɔ̀ŋ gɔ̀ŋ ba, bít gulùm dákíìn piìn yɛ́b ba. Bít bə̀ dá mad aa kò' nɛ́ŋə̀ nə́ŋ̀ì gə́, bít bàg nɛ́ŋə̀ ɔ̀d də bɔbàá. In bəraa mà' də́dǹ doó, kə̀ inkɔrə gbàád bəd tá, dáà vúgǹnà lɛgə́ poú.

¹²«Zá in bəraa rə sɔ̀d dá wə́ə̀n gə́, nɛ́b bəd dá ii kíìn koràá, bít bə̀ dá ii búúd í'nàá. Bə̀ dá ii piìn nɛ́b gbàád bəraa *Yahudu bəd wúlwáàlbə̀ bərú rə naú, bɔ̀b boò páá ii wúltígə́l bə̀ rú. Bə̀ dá ii aàn gààd yɛ́b bə̀ númú, bít kə̀ gɔ̀mnà bəd númú, máá nə́gə́lú.

¹³Sɛŋ də yaà wə́ə́ì gə́, íí dá taà bɔbm̀ sedako ma'ǹmbə̀ máá yílú.

¹⁴Tɛ́m gbád oò lɔbi kə̀ nwɔŋ bəraa bə̀ dá gáàm aí yílə́ rə sí.

¹⁵Kàandə, má ii nwɔŋ ingabké bə̀ piìn kə̀ yíl mə́ra, bɔ̀b ɔ̀dmáàn íí bəd boò bán nwɔŋ aarə ke'ǹ í'ǹmbə̀ sí, sínkɔ̀ diìnmbə̀ aí númú, kə̀ kpɛŋsɛ́l sí.

¹⁶Si' rə máá, báá íí bərá, nà' íí bərá, ɔ̀dkudvɛɛ̀l íí bərá, kun íí bərá, bít kə̀ ɔ̀dzéd íí bəd tá, kòd bə̀ dá ii lɛ́bm̀ nɛ́b gbàád bəd naú, bə̀ dá nɛ́b zùúm kambəd lodǹ aí tə́ŋú.

¹⁷Nɛ́b bəd kóólé, bə̀ dá ii kíìn zeenàá, máá nə́gə́lú.

¹⁸Zá yíl gí' aí bə̀ nə́ŋ̀má bɔ̀b gá.

¹⁹Ìì sìd kúnú' Kə̀ taàbìá, íí dá taà *gɔ̀ŋsə́ aa bɛ́d bə gá rə bɔbàá.»

²⁰«Sɛŋ aa íí bé' nɛ́b bùm bə̀ nə́'ǹ bəd, lə̀ŋ və̀d bə̀ páá Urusalima bìlì tə́ŋə́ rə, ìì gàb kíìn vɛ́nà, sɛŋ aa bə̀ dáù láàn dú rə, wə́ə́ì kə́d ba.

²¹Kàanyée gə́, nɛ́b aa dá bə̀ kùm Yahudiya yɛ́b bərə, nùù boò na' kɔ̀l yílú. Nɛ́b aa dá bə̀ kùm Urusalima bìlə́ rə, vúg nùù boò ɛ̀m zɔ̀ŋ bùúd ba, bít nɛ́b aa bə̀ tə́ bìl yɛb fɔ̀gúbə̀ rú rə kɔ̀, boò pìì Urusalima bìlə́ sí.

²²Kàandə, nyàm bəraa rə, Vɛnɛ́b dá nɛ́b Yahudiya bìlə́ bə̀ bəd búúd í'nàá, bɔ̀b nwɔŋ aa *Vɛnɛ́b gbantumsə̀ bəd bád ìì dàà boò núúboòrú rə, ma' oò zə́'míìn kúnú.

²³Níì búúd luùm də dá sə̀n wə́ə̀n nyàm aarə rú, nɛ́b kɛ́ɛ̀m bàgə̀l bə̀ bəd yílú, bít kə̀ aa bəraa tə́ yɛb vuùm úùm də yílə́ gú! Kàandə, búúd gbà'á dá kuùm nɛ́b aa yɛ́b bə̀ wərə̀ rə yílú, bít bòórú oòrə, Vɛnɛ́b nɔ̀m yaà dá taà pí'ǹ boò yílú.

²⁴Ɔ̀dmáàn boò bəd bə̀ dá nɛ́b aarə dubm̀ lodǹ kə̀ yɛ́rə̀ bùúrá, kò' bə̀ dá bə̀ aàn yɛ́b gə́ kóólé kə̀ kɔ̀' bəd kíin. Bít nɛ́b aa bàg Vɛnɛ́b síndə, bə̀ dá Urusalima náàn dunú, bɔ̀b sɛŋ boò yaà oò bɛ́d zé.»

²⁵«Bòórú oòrə, inkɔrə bəd dáà vúgǹnà sòò rú, nyàmú, bít kə̀ dùdù yɛbú. Nwuu gbà'á dìímsàá, bít kə̀ wááke oòra, dá sə̀n nɛ́b aa zɔ̀ŋə yɛ́b bərə də́dǹ tó'nàá. Kàanyée gə́, bə̀ bɔ̀b nwɔŋ nə́ŋ̀má gáàmbə̀ gá.

²⁶Nɛ́b bəd dá píìl yɛ́b bə kə̀ val kíin, kə̀ seèlǹmbə̀ in bəraa dá wə́ə̀n yɛb bəroó. Kàandə, Vɛnɛ́b dá in kpɛŋsɛ́l bə̀ bəraa lɛgə́ paà rə kíìn wá'nàá.

²⁷Bít nɛ́b bəd dá nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə bé'ǹ tóò yaànà mɔbú, lɛgə́ poú, kə̀ kpɛŋsɛ́lá, bít kə̀ Vɛnɛ́b kaŋsɛ́l laa nyɛdkè gbà'á tá.

²⁸Sɛŋ aa in bəraa dá sɔ̀dǹ wə́ə̀nmbə̀ rə, ìì zá' núù lɛgú, bít ìì dìì lɛgú, wɔ̀ɔ̀làá, kàandə, sɛŋ aa Vɛnɛ́b dá ii súùn dú rə, tə́ kíìn wə́ə́nàá!»

²⁹Bít Yéésù nàà zagəm aa yóo: «Ìì ɛ̀g gààm nyììá, bít kə̀ téé nyìì kambəd tə́ kóólé.

³⁰Bə́n gabm̀ yàá, kə̀ yíl obə́n bìá, sɛŋ aa yɛsə̀ boò sɔ̀rì u'ǹmbə̀ rə, bɔ̀b nwan sɛŋ gbad wə́ə́ì kə́d ba.

³¹Kə̀ aarə kíin ní, aí kɔ̀ íí bé' in bəraa rə tə́ wə́ə̀n gə́, ìì gàb kúnú, sɛŋ aa Vɛnɛ́b dá gààd ləə̀n dú rə, wə́ə́ì kə́d ba.

³²«Mə́ tə́ ii kíìn baanàá, aarə nwɔŋ sɔ̀ɔ̀ná' Nɛ́b bəraa bə́ŋyée rə, val kòd bɛ́d bə̀ gá, in aarə dákíìn wə́ə́nàá.

³³Lɛg kə̀ yɛ́b tá, dákíìn bɛ́ràá, zá nwɔŋ mə́ bəd gə́, bɛ́d gá.»

³⁴«Ìì gú' yíl aí bə̀ kə̀ in bəraa íí tə́ ma'ǹ doó! Ìì zíg tɛ́m íí badn nyəə̀n widǹmbə̀ bə̀ní, bít kə̀ in bəraa zɔ̀ŋə yɛ́b bərə í'ǹmbə̀ ní sí. Bít sɛŋ aa nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə dáà bídǹnà bərə, yaà dá ii kíìn nyííràá.

³⁵Kàandə, kìínmbə̀ nɛɛ̀n aa saad tə́ gɔ̀g ko'ǹ dú rə kíin, yaà dá wə́ə̀n nɛɛ̀n aarə rú, kə̀ nɛ́b aa zɔ̀ŋə yɛ́b bərə kóólé.

³⁶Zá ìì ləə ləəm sí, ìì nyɛ̀m Vɛnɛ́b sɛŋ gə́ kóólé, bɔ̀b ìì bɔ̀b kpɛŋsɛ́l nuùn súùnmbə̀ in aa dá ii wə́ə̀n də rú kóólé; bít íí dá taà kpaŋ̀ bɔbm̀, diìnmbə̀ nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə númú.»

³⁷Nyàámbərə̀ gə́, Yéésù sán nɛ́b bəd in láŋsə́ wúuú. Zá nyàmbídń gə́, zá' ɛ̀m kíìn ləə̀nmbə̀ dəŋsə́ aa téé nyìì aa bə̀ dɛ̀d Oliva rə dìì bəroó.

³⁸Bít kə̀ limtə́ pít kɔ̀, nɛ́b bəd lìì bə̀ yaà láŋsə́ wúuú, oò bə̀ zɛŋ̀mbìá.