Read Samba Leko Luka 22 Bible Online

Luka 22 - Samba Leko bible

Luka 22

¹Sɛŋ də rú rə, wálke aa nɛ́b bəd líí bə̀ sáá kə̀ bə̀rɛ́d aa bə̀ páá inváàndo rú gá, *Paska bə̀ bərə, gbad wə́ə́ì kə́d ba.

²*Láŋsə́ gààd bəd kə̀ *nɛ̀n indaŋ̀mbə̀ bəd tá, bə̀ sàà nɛɛ̀n aa bə̀ dá Yéésù ko'ǹ lo'ǹ dú roó. Zá bə̀ nùù də́dǹ kə̀ in aa nɛ́b bəd dá bə̀ ma'ǹ doó.

³Kàanyée gə́, *Satan pìì Yudas aa bə̀ dɛ̀rə̀ Iskariyot də tɛ́mú. Yudas də, Yéésù *nɛ́d sáànmbə̀ bəraa kób zè iirə rə nə́ŋ̀á.

⁴Yudas ɛ̀m dá gám nwɔŋ kə̀ *láŋsə́ gààd bərá, bít kə̀ sóózè bəraa tə́ láŋsə́ wúl nwáàn doó. Sàà nɛɛ̀n aa dá kpaŋ̀ bɔbm̀ dú, Yéésù ko'ǹ piìnmbə̀ boò naà roó.

⁵Bə̀ kùm kə̀ tɛ́m làmkèá, bə̀ bàà bənə́ dáàn nə́ù ba' piinàá.

⁶Yudas bàà: «Mə́ kè' yàá.» Bít sàà kpaŋ̀ aa dá kə̀ Yéésù ko'ǹ lɛ́bm̀, bɔ̀b nɛ́b zùúm bəd boò gàb sí roó.

⁷Nyàm aa bə̀ líí kə̀ bə̀rɛ́d aa bə̀ páá inváàndo rú síndə, yaà wə́ə́ yàá. Nyàm aarə bərə, bə̀ wél taà bɛ̀rə̀ yɛb *Paska bə̀ roó.

⁸Kàanyée gə́, Yéésù tùm Piyɛr kə̀ Yohana tá, bàà bə̀: «Ɛ̀m dá ìì wúú bə́ *Paska gbèrá.»

⁹Bít bə̀ dɛ̀rə̀: «Ń í' dá báà wúú *Paska gbèd də bínì gú?»

¹⁰Yéésù kè' í' bə̀: «Ìì ɛ̀ga! Sɛŋ aa íí dáráàn piìn bìlə́ rə, íí dá nɛ́ŋə̀ nə́ŋ̀ sáŋ̀ kpaŋú, pà' wəl nyiìŋ tə́ yílú. Ìì ɛ̀m kə̀ oò tá, bít dá ii pìì ligə̀ aa dá piìn dú rə rú.

¹¹Bít ìì bàà nɛ́d ligə̀ bə̀ rə: ‹Nɛ̀n bə́ bàà báà dɛdǹ: Wúl bàgə̀l déè rú, bəǹ dá taà *Paska gbèd líìn kə̀ *nɛ́b sáànmbə̀ bəǹ bəd tə́ gú?›

¹²Bít dá ii ráàn wúl bàgə̀l gbà'á i'ǹ tə́ wúl ɔ̀d nə́ŋ̀ yílú, lɛgə́ poú; bít in bəraa íí í' tù' ma'ǹmbə̀ kə̀ kùrú rə kóólé, íí dá bɔbm̀ túrú wərà. Ìì wúú *Paska gbèd də, zɔ̀ŋ aarə ba.»

¹³Kàanyée gə́, zá' bə̀ ɛ̀m, bít dá bə̀ bɔ̀b in gə́ kóólé kə̀ nɛɛ̀n aa Yéésù bàà bə̀ rə kíin, bít bə̀ wúú taà *Paska gbèd də wúl lə rú.

¹⁴Sɛŋ də́ŋ wálke gbèd bə̀ líìn gə́, Yéésù yaà kùm gbèd magə̀ bə̀ kə̀ *gbantumsə̀ oò bəd tá,

¹⁵bàà bə̀: «Mə́ í' báà líìn *Paska gbèd nə́ŋ̀ní, sɛŋ aa má búúd bé'ǹ dú rə yaà dá wə́ə̀n gə́ roó!

¹⁶Kàandə, mə́ tə́ ii kíìn baanàá, mə́ líí *Paska gbèd ɔ̀d sɔ̀ŋ gá, yaà dá wə́ə̀n sɛŋ aa Vɛnɛ́b dá nwɔŋ wàà lɛ̀ɛ́ŋə̀ oòrə vú'ǹ oò gààrú rə bə zé.»

¹⁷Kàanyée gə́, pà' badn magə̀wàá, bít mɔ̀' Vɛnɛ́bá, bàà: «Ìì kè' badn aa yóo, gàb ìì nyəə íí bòdba;

¹⁸kə̀ aakíin, mə́ tə́ ii kíìn baanàá, sɔ̀d bə́ŋyóo, mə́ nyəə badn aa sɔ̀ŋ gá, yaà dá wə́ə̀n sɛŋ aa Vɛnɛ́b dá gààd ləə̀n dú rə bə zé.»

¹⁹Bòórú pà' bə̀rɛ́d, bít mɔ̀' Vɛnɛ́b, wèè bít pii bə̀ gə́, bàà: «Aarə si' mə́ra, [mə́ pii tə́ aí bòórú, ìì mà' kə̀ aarə kíni, bɔ̀b sèl ìì zá' mə́ kə̀ kùrú.»

²⁰Bòórú bə̀ líí in gə́, pà' pii bə̀ badn magə̀wàá, bít bàà: «Badn magə̀wà aa yée kùmsə̀n *gú'dúgke puu kə̀ aíra. Nyɛ̀lə́m mə́ tab sə̀n gú'dúgke puu aa roó, bít za' tə́ aí bòórú.]

²¹Zá ìì ɛ̀ga' màn aa bàà ɔ̀dmáàn mə́ bəd boò kò' mə́ kíìn də, kùm tə́ zɔ̀ŋə gbèd magə̀ bə kə̀ máá tá!

²²Vɛ́nà, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, val dáù ko'ǹ kìínmbə̀ nɛɛ̀n aa Vɛnɛ́b zígà rə kíin. Zá búúd tə́ màn aa lɛ́bə̀ rə yílú.»

²³Bít bə̀ dɛ̀d ɔ̀dnə́ŋ̀ bəd boò bòdbə, nɛ́ɛ̀réè dá sə̀n in aarə ma'ǹ obənə́ tə́ŋə́ gú.

²⁴*Nɛ́b sáànmbə̀ bəd bə̀ sɔ̀d nwɔŋ nyá'ǹmbə̀ boò bòdba, bə̀ bàà nɛ́ɛ̀réè dá sə̀n kuùm nɛ́ŋ gbàáro yíl bə̀ obənə́ númú gú?

²⁵Yéésù bàà bə̀: «Gààd gbàád yɛ́b bə̀ bəd ləə gààd tə́ nɛ́b aa bàg Vɛnɛ́b síndə yílú, bít nɛ́b bəraa bə̀ kə̀ kpɛŋsɛ́l boò yílə́ rə kɔ̀, bə̀ bàà boò dɛ̀d bənə́ ‹Nɛ́b sɔ̀ɔ̀nkè bə̀ ma'ǹ bərá.›

²⁶Zá aí tə́ŋə́ gə́, ìì mà' ɔ̀dnə́ŋ̀ bəd kàan sí. Aa dá kaàn də, nɛ́ŋ gbàáro aa aí tə́ŋə́ rə, oò bí' yíl oò dùú, bít gààd aa tə́ bə̀ nwáàn də, oò kùm kə̀ nɛ́d tù' bə̀ ma'ǹ kíin.

²⁷Kə̀ baàn də́'ǹmbə̀ kíin, nɛ́ŋə̀ nə́ŋ̀ tə́ gbèd magə̀ ba, bít nɛ́ŋə̀ nə́ŋ̀ ɔ̀d kɔ̀ tə́ù tù' ma'nàá. Nɛ́b aa boò iirə yée, nɛ́ɛ̀réè kùmsə̀n nɛ́ŋ gbàáro boò tə́ŋə́ gú? Vɛ́nà gə́, màn aa kùm gbèd magə̀ bərə, sə̀n nɛ́d gbàároá! Máá gə́, mə́ tə́ kə̀ nɛ́d tù' bə̀ ma'ǹ kíin, aí tə́ŋú.

²⁸Sɛŋ aa mə́ tə́ búúd bé'ǹ də, nùù íí dàà mə́ sé, zá íí kùm kə̀ máá tá, sɛŋ gə́ kóólé.

²⁹Báá mə́ pii mə́ kpɛŋsɛ́l gààd bə̀ ləə̀nná, bít máá kɔ̀ mə́ pii ii taà kpɛŋsɛ́l aa roó, bɔ̀b ìì ləə gààrá.

³⁰Íí dákíìn líínàá, bít íí dá nyəə̀n kə̀ máá tá, sɛŋ aa má gààd ləə̀n dú roó, bít íí dá kuùm gààd mə̀ə̀d ba. Íí dá kun Israila bə̀ bəraa kób zè iirə rə fágàá.»

³¹Bít Báátììkpɛ̀ŋ bàà: «Simon, Simon! Ǹ zɛ̀ŋ túŋá' *Satan dɛ̀d Vɛnɛ́b gə́, də́' bəǹ dá ii kíìn ɛgàá, kə̀ ámbə̀ wədǹmbə̀ kìínmbə̀ wə̀d bə̀ pɛ̀d yɛd wàà tə́ kə̀ yɛd kpásàg kíni.

³²Zá mə́ nyɛ̀m m Vɛnɛ́b də, bɔ̀b tɛ́mbagké ń oò bɔ̀b sí. Bít sɛŋ aa ń dáà kidǹbídǹnà máá səǹ də, ǹ kpɛ́ŋ ɔ̀dkudvɛɛ̀l ḿ bagké bəd tɛ́mbagké rú.»

³³Piyɛr bààù: «Báátììkpɛ̀ŋá, kə̀ tɛ́m nə́ŋ̀ní, kóó dáà boò páá n wúltígə́l bə̀ rú máá, má ɛɛ̀m kə̀ ám tá, bít kóó dá boò lò' n kúnú, val dá mə́ ko'ǹ kə̀ ám tá.»

³⁴Yéésù kè' í'ù: «Mə́ tə́ən kíìn baanàá, Piyɛr, bə́ŋ̀ kòò dá sɔ̀dǹ nwɔɔ̀nmbə̀ nyà'aa tígə́l aa yée rú gə́, ń dá baàn sɛŋ toora, bəǹ gàb mə́ sé.»

³⁵Bòórú gə́, Yéésù dɛ̀d bə̀: «Sɛŋ aa mə́ tùmi zɔ̀ŋ bùúd bərə, íí pà' ba' naà sé, íí pà' dìg naà sé, bít íí páá tábə́ dunú síndə, in nə́ŋ̀ kpáni yèè?» Kè' bə̀ í'ù: «In nə́ŋ̀má kpán bə́ sé.»

³⁶Bít bàà zəg sɔ̀ŋ: «Zá bə́ŋyée gə́, màn aa tə́ kə̀ ba' naà rə, oò pà' kúnú, màn aa tə́ kə̀ dìg naà rə kɔ̀, oò pà' kúnú, bít màn aa kə̀ yɛ́rə̀ bùúd naà síndə gə́, pà' oò gə́l dàál oòra, bɔ̀b oò lɛ́b kə̀ yɛ́rə̀ bùúrá.

³⁷Kàandə, mə́ tə́ ii kíìn baanàá, núúboòd nwɔŋ aa bád dàà yée, ma' oò zə́'míìn máá yílú: ‹Gád bə̀ wálə̀ tə́ kə̀ nɛ́b yíl bə̀ lodǹ bəd tá.› Bít kə̀ aakíin, nwɔŋ aa Núúboòd Gìdń gám máá yílə́ rə, ma' dákíìn zə́'mínàá.»

³⁸*Nɛ́b sáànmbə̀ bəd bàà: «Báátììkpɛ̀ŋá, bə́ tə́ kə̀ yɛ́rə̀ bùúd naà iira.» Báátììkpɛ̀ŋ kè' í' bə̀: «Aarə də́ŋ yàá.»

³⁹Yéésù vúg dàà ligàá, ɛ̀m zɔ̀ŋ aa dáá sáá bərə ba, kɔ̀lwà aa Oliva nyìì bəd dìì bəroó. *Nɛ́b sáànmbə̀ oò bəd ɛ̀m kə̀ oò tá.

⁴⁰Zɔ̀ŋ aa dá bə̀ wə́ə́ wərə̀ gə́, bàà bə̀: «Ìì nyɛ̀m Vɛnɛ́b, bɔ̀b ìì pí' inzááke rú sí.»

⁴¹Bít zá' ɛ̀m zɔ̀ŋ bùúd kìínmbə̀ nɛɛ̀n aa nɛ́ŋə̀ làà bəŋ dá pí' rú rə kíin. Zá pí' kùm kə̀ dunlígə̀rá, bít nyɛ̀m Vɛnɛ́b kə̀ aakíin:

⁴²«Báá, dáà ń í'ì gə́, pà' ǹ àà búúd dəgə̀wà aa máá səǹ yée zɔ̀ŋ bùúrá, bɔ̀b máà nyəəù sí. Oò kùm in aa tɛ́m mə́ í' rə sí, zá aa tɛ́m ḿ í' roó.» [

⁴³Kàanyée gə́, Vɛnɛ́b tùmà *malaika nə́ŋ̀ lɛgə́ poú, yaà oò kpɛ́ŋ̀ tɛ́má.

⁴⁴Zɔ̀ŋ aa tɛ́m tə́ù nwuùn gbàákù yée gə́, Yéésù nyɛ̀m Vɛnɛ́b sɔ̀ŋ, kə̀ kpɛŋsɛ́l gbàákù. Wə̀ə̀d oò sɔ̀d təgǹmbə̀ yɛ́b ba, kìínmbə̀ nyɛ̀lə́m tə́ sə̀n təgǹ kíin.]

⁴⁵Bòórú nyɛ̀m bɛ́' Vɛnɛ́b gə́, zá' dìì lɛgú, kidbírà *nɛ́b sáànmbə̀ oò bəd sunú. Yaà bɔ̀b bə̀ ìì ləəì kə̀ mú'sɛ̀l tɛ́m nwuukè bìá.

⁴⁶Yéésù bàà bə̀: «Kə̀ níìbə̀ íí tə́ taà ləəm ləə̀n gú? Ìì zá' lɛgú, bít ìì nyɛ̀m Vɛnɛ́bá, bɔ̀b ìì pí' inzááke rú sí.»

⁴⁷Zɔ̀ŋ aa bə́ŋ̀ Yéésù tə́ nwɔŋ gáàm kàangə́, nɛ́b zùúm bəd yaà bə̀ wə́ə́ yàá. Yéésù *nɛ́b sáànmbə̀ bəraa kób zè iirə rə, nə́ŋ̀ boò tə́ŋú, bə̀ dɛ̀rə̀ Yudas, oòra ké' bà sə̀n kpaŋ̀á. Ɛ̀m gbarà Yéésù sunú, bɔ̀b oò bə̀ yaàn kú'ǹmbìá.

⁴⁸Zá Yéésù bààù: «Yudas, nɛɛ̀n aa ń í' mə́ dɔ̀ɔ̀mbə̀ kə̀ máá bə̀ kú'ǹmbə̀ rə, ń í' máá mə́ nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə lɛ́bm̀bə̀ ɔ̀dmáàn mə́ bəd naì?»

⁴⁹Zɔ̀ŋ aa nɛ́b bəraa bə̀ ɛ̀m kə̀ oò tə́ rə, bə̀ bé' in aa dá bə̀ wə́ə̀n də gə́, bə̀ dɛ̀d Yéésù: «Báátììkpɛ̀ŋá, báà dùb nɛ́b bəraa yée kíìn kə̀ yɛ́rə̀ bùúd bə́ bərì?»

⁵⁰Bít nɛ́ŋə̀ nə́ŋ̀ boò tə́ŋú, dùb və̀d *láŋsə́ gààd gbà'á nɛ́d tù' bə̀ ma'ǹ túŋ nɛɛ̀n váànú bìá.

⁵¹Zá Yéésù bàà: «Ìì dàà kúnú, ìì mà' sɔ̀ŋ sí.» Yéésù pig nɛ́ŋə̀ rə túŋ zɔ̀ŋ aa vəd dàà rə bə gə́, bít gáŋ̀ kúnú.

⁵²*Láŋsə́ gààd bərá, *nɛ́b láŋsə́ wúl bə̀ nwáàn bəd gààd bəd kə̀ *dam bəd tá, bə̀ yaà sə̀n Yéésù ko'ǹmbìá. Yéésù bàà bə̀: «Íí ɛ̀mà kə̀ yɛ́rə̀ bùúd bərá, kə̀ gbà' bərá, bɔ̀b máá bə̀ yaàn ko'ǹmbə̀ kìínmbə̀ mə́ lííro kíniì?

⁵³Sɛŋ gə́ kóólé, mə́ kùm kə̀ aí tá, láŋsə́ wúuú, bít íí kò' máà sé. Zá bə́ŋyée Vɛnɛ́b pii ii kpaŋ̀ yàá, bít Sámbàŋyɛ́rə̀ tə́ sə̀n gààd ləə̀n tígə́lú.»

⁵⁴Zɔ̀ŋ aa bə̀ kò' Yéésù gə́, pà' bə̀ ààù *láŋsə́ gààd gbà'á yiilú. Piyɛr dìì zɔ̀ŋ bùúd ba, bàg bə̀ taá.

⁵⁵Nɛ́b bəd bə̀ kɔ̀ŋ laa zɔ̀ŋ gbaarú, ligə̀ tɛ́mú, bə̀ kùm ba. Piyɛr ɛ̀m dá kùm boò tə́ŋú.

⁵⁶Nɛ́d kéèndo nə́ŋ̀ tù' bə̀ ma'ǹ bé' Piyɛr kùm laa kàd bə wərə̀ kɔ̀ gə́, ɛ̀g kùrə̀ gə́, bít bàà: «Nɛ́ŋ váàndo aa yée kɔ̀ kùmà kə̀ oò tá!»

⁵⁷Piyɛr kè' í' nɛ́ŋ kéèndo aarə: «Aarə nwɔŋ sɔ̀ɔ̀n gá, mə́ gàbə̀ sé.»

⁵⁸Bòórú zɔ̀gɔ̀ gə́, nɛ́ŋ váàndo nə́ŋ̀ yaà bé'ù gə́, bàà: «Ám kɔ̀ ń kùmà kə̀ Yéésù tá!» Zá Piyɛr kè' í' nɛ́ŋ váàndo aarə: «Ə́ùwə́, máá kɔ̀ gá.»

⁵⁹Zɔ̀ŋ aa ba'wà taà nə́ŋ̀ gə́, nɛ́ŋə̀ nə́ŋ̀ yaà bàà kə̀ kpɛŋsɛ́lá: «Vɛ́nà gə́, nɛ́ŋ váàndo aa yée kùmà kə̀ oò tá. Kàandə, oòrə nɛ́d Galili yɛ́b bə bìá.»

⁶⁰Zá Piyɛr kè' í' nɛ́ŋ váàndo aarə: «Mə́ gàb nwɔŋ aa ń í' baànmbə̀ rə sé.» Sɛŋ aarə bəní, gám dá nwɔŋ bɛ́'ǹ gə́, kòòváàn nwɔ̀m yàá.

⁶¹Báátììkpɛ̀ŋ lìbbí' núù ɛ̀g Piyɛr ra. Kàanyée gə́, Piyɛr sèlzá' taà nwɔŋ aa Báátììkpɛ̀ŋ bààù: «Nyà'aa yóo, kòò dá nwɔɔ̀m gə́, ń dá sɔ̀ɔ̀n sɛŋ toora, bəǹ gàb mə́ sé» roó.

⁶²Bít Piyɛr vúg dáá kpə̀ə̀ kpə̀ə́ǹ tɛ́m yɛ̀ɛ́l bìá.

⁶³Nɛ́b aa ìì tə́ Yéésù nwáàn də, lò' bə̀ bí'ù kèérá, bít bə̀ zìbə̀ kúnú.

⁶⁴Tab bə̀ kágə̀ núù rú, bít bə̀ dɛ̀rə̀: «Nɛ́ɛ̀réè zìb m sə̀n gú? Sèl ǹ gàb kúnú!?»

⁶⁵Bít bə̀ gámə̀ nwɔŋ kambəd zùúm, kə̀ oò bə̀ dúùl bìá.

⁶⁶Zɔ̀ŋ aa nwúun nyɛd gə́, *dam bərá, *láŋsə́ gààd bərá, kə̀ *nɛ̀n indaŋ̀mbə̀ bəd gə̀b tá, bə̀ wál kúnú. Kò' bə̀ àà Yéésù *dam bəd wálke gbà'á rú,

⁶⁷bít ìì dɛ̀rə̀: «Ámda ń kùm tə́ sə̀n *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə gə́, m̀ bàà bə́ kúnú.» Yéésù kè' í' bə̀: «Dáà mə́ bàà iiyì gə́, íí kè' mə́ gá.

⁶⁸Bít dáà mə́ dɛ̀ri nwɔŋ nə́ŋ̀ì gə́, kè' íí í' mə́ gá.

⁶⁹Zá sɔ̀d bə́ŋyóo, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, dá kuùm Vɛnɛ́b kpɛŋsɛ́l bə̀ nɛɛ̀n váànú.»

⁷⁰Kàanyée gə́, boò kóólé bə̀ dɛ̀d: «Ogə́ ń Vɛnɛ́b Wàà toò?» Yéésù kè' í' bə̀: «Èè, kə̀ nɛɛ̀n aa íí bàà rú yérə kíin.»

⁷¹Kàanyée gə́, bə̀ bàà ɔ̀dnə́ŋ̀ bəd boò bòdba: «Bə́ ɔ̀d sedako ɔ̀d sɔ̀ŋ sé! Kə̀ aakíin, kə̀ yíl obə́ bìá, bə́ kìì nwɔŋ oò yàá!»