Read Samba Leko Luka 23 Bible Online

Luka 23 - Samba Leko bible

Luka 23

¹Nɛ́b aa kùm fágə́n zɔ̀ŋə́ wərə̀ rə gə́ kóólé, bə̀ zá' lɛgú, bít bə̀ àà Yéésù Gɔ̀mnà Pilatu númú.

²Zɔ̀ŋ aarə ba, bə̀ sɔ̀d oò bə̀ pe'ǹmbə̀ kə̀ gúsuúm nwɔŋ bəraa yóo: «Bə́ bɔ̀bà nɛ́ŋə̀ aarə tə́ nɛ́b bə́ bəd gáŋàá' dàŋ nɛ́b bəd kúnú, boò káá Roma bəd gààd gbà'á ba'káám sí, bít bàà gə́, bəǹ *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ roó, bəǹ kùmsə̀n gààd gbà'á.»

³Gɔ̀mnà Pilatu dɛ̀rə̀ nwɔŋ aa yóo: «Ámda ń kùmsə̀n *Yahudu bəd gààrì?» Yéésù kè' í'ù: «Èè, kə̀ nɛɛ̀n aa ḿ bàà yérə kíin.»

⁴Kàanyée gə́, Pilatu bàà *láŋsə́ gààd bəd, kə̀ nɛ́b aa wál wərə̀ rə tá: «Aa mə́ bé' rə gə́, Nɛ́ŋ Váàndo aa yée mà' invaksə́ nə́ŋ̀má də́ŋ oò bə̀ fágǹ ko'ǹmbə̀ sé.»

⁵Zá ìì pè'ù nwɔŋ kə̀ kpɛŋsɛ́l sɔ̀ŋ: «Gáŋ nɛ́b bəd tə́ kíìn kə̀ in aa tə́ nɛ́b bəd sáàn doó. Sɔ̀rà nɛ́b bəd in sáànmbə̀ Galili yɛ́b ba, bít taà pìì Yahudiya yɛ́b bə kóólé, bít bə́ŋyée kɔ̀, yaà Urusalima bìlə́ yóo.»

⁶Zɔ̀ŋ aa Pilatu kìì nwɔŋ bəraa kàangə́, dɛ̀d bə̀: «Nɛ́ŋ Váàndo aa yée gə́, vúgà Galili yɛ́b beè?»

⁷Bít zɔ̀ŋ aa kìì gə́, Yéésù vúgà zɔ̀ŋ aa *Hirudus ləə gààd bərə gə́, tùm ààù *Hirudus sunú. Sɛŋ də bərə, oò kɔ̀ bɔ̀b tə́ Urusalima bìlə́ wərà.

⁸*Hirudus kìì tɛ́mlàmkè sɔ̀ɔ̀n, sáŋ̀mbə̀ kə̀ Yéésù ra. Kə̀ aakíin də, í'ù bé'ǹmbə̀ nyàam kpɔ̀ɔ̀m. Kàandə, kìì bə̀ gám nwɔŋ zùúm oò yílú, bít zíg tɛ́m oò bə̀ bé'ǹmbə̀, oò mà' inkɔrə nə́ŋ̀á.

⁹Dɛ̀rə̀ nwɔŋ zùúm. Zá Yéésù kè' í'ù nwɔŋ bəraa rə naà sé.

¹⁰*Láŋsə́ gààd bəd, kə̀ *nɛ̀n indaŋ̀mbə̀ bəd gə̀b tá, bə̀ kùm wərà, bít bə̀ pè' Yéésù kə̀ gúsuúm nwɔŋ wadké bərá.

¹¹*Hirudus kə̀ sóózè oò bəd tá, lò' bə̀ bí' Yéésù kèérá, bít bə̀ sɔ̀bə̀ kúnú. Bə̀ páù gɔ̀' nə́ŋ̀ sɔ̀ɔ̀nkè kàani, bít tùm bə̀ bí'ù Pilatu númú.

¹²Nyàam də, *Hirudus kə̀ Pilatu tá, bə̀ ɔ̀dmáàná. Zá nyàm aarə bə gə́, bə̀ bíl bəd ɔ̀dzérá.

¹³Pilatu dɛ̀d wál *láŋsə́ gààd bərá, kə̀ *Yahudu kambəd tá,

¹⁴bít bàà bə̀: «Íí àà Nɛ́ŋ Váàndo aa yée, íí bàà tə́ nɛ́b bəd gáŋàá. Mə́ dɛ̀rə̀ yàá, aí númú, bít mə́ bé' invaksə́ nə́ŋ̀má mà', wə́ə́ oò bə̀ ko'ǹmbə̀ gúsuúm nwɔŋ bəraa íí pè'ù kə̀ kùrú yérə bòórú sé.

¹⁵*Hirudus kə̀ yíl oò bə̀ máá, bɔ̀bà invaksə́ oò naà sé. Kə̀ aakíin də, kìdbíùwà taà obə́ sunú. Nwɔŋ vaksə́ bəraa íí vəd Nɛ́ŋ Váàndo aa yílə́ yée kóólé, mə́ bé' nwɔŋ nə́ŋ̀má də́ŋ oò bə̀ lo'ǹmbə̀ sé.

¹⁶Kə̀ taàbìá, máù búúd i'nàá, bít làà máù kíìn lɛ́'nàá.» [

¹⁷Sɛŋ aa bə̀ tə́ *Paska ma'ǹ də gə́ kóólé, Pilatu vúŋ lɛ́' sáá bə̀ nɛ́d wúltígə́lə́ bə̀ nə́ŋ̀.]

¹⁸Zá boò kóólé, bə̀ pál bəd kpə̀ə́ǹá, bə̀ bàà: «Ǹ lò' Yéésù kúnú! Bít bìn ǹ lɛ́' bə́ Barabas da.»

¹⁹(Barabas lò' nɛ́ŋə̀ nə́ŋ̀, sɛŋ aa nɛ́b bəd gbəŋ̀ kə̀ Urusalima bìlə́ roó. Kə̀ taàbìá, bə̀ pááù taà wúltígə́l bərú.)

²⁰Pilatu í' Yéésù biìn lɛ́'ǹmbìá. Kə̀ taàbìá, dɛ̀d taà nɛ́b zùúm bəd nwɔŋ aa yée sɔ̀ŋ.

²¹Bít ìì pál bəd kpə̀ə́ǹ lɛgú, ìì bàà: «Bág ǹ lò'ù kíìn téélɛŋké ba! Bág ǹ lò'ù kíìn téélɛŋké ba!»

²²Pilatu dɛ̀d bə̀ nwɔŋ gú' toorúb bə̀ gə́, bít bàà bə̀: «Kə̀ níìbə̀ íí bàà taà máà lò'ù kíìn gú? Níì invaksə́ Yéésù mà' taà gú? Mə́ bɔ̀b invaksə́ aa mà', dá də́ŋ̀ oò bə̀ lo'ǹmbə̀ rə sé. Zá máù búúd í'nàá, bít làà máù kíìn lɛ́'nàá.»

²³Zá bə̀ dìì nwɔŋ kpaàmbə̀ lɛgú, kə̀ kpɛŋsɛ́lá, bə̀ bàà Pilatu bág oò lò' Yéésù téélɛŋké ba. Bít nwɔŋ kpaàmbə̀ boò rə pɛ̀d Pilatu yàá.

²⁴Pilatu bàà gə́, in aa tɛ́m boò bə í' rə, bəǹ dá bə̀ taà ma'nàá.

²⁵Pilatu vúŋ lɛ́' Barabas aa bə̀ pááù wúltígə́l bə̀ rú roó. Bə̀ pááù wúltígə́l bə̀ rú, kàandə, lò' nɛ́ŋə̀ nə́ŋ̀, sɛŋ aa nɛ́b bəd gbəŋ̀ kə̀ Urusalima bìlú roó. Pilatu pà' pii bə̀ Yéésù ra, boò mà'ù in aa tɛ́m boò bə̀ í' roó.

²⁶Zɔ̀ŋ aa bə̀ tə́ Yéésù aàn bìl bòórú yée gə́, bə̀ sáŋ kə̀ nɛ́ŋ váàndo nə́ŋ̀á. Nɛ́ŋ váàndo aarə, vúgà fɔ̀gú, tóò kíìn bídǹnà bìlú, nə́gə́l oò Simon, bìl oò kɔ̀ Sirena. Sə̀d kò' bə̀ dəù téélɛŋké yílú, pà' oò bàg kə̀ Yéésù bòórú.

²⁷Nɛ́b zùúm bəd bàg Yéésù bòórú. Boò tə́ŋə́ rə, nɛ́b kɛ́ɛ̀m bəd zùúm bə̀ kpə̀ə̀ kúnú, bít bə̀ dàl bəd nwɔŋ Yéésù yílú.

²⁸Yéésù lìb bí' núù boò naú, bít bàà bə̀: «Aíra, íí nɛ́b kɛ́ɛ̀m Urusalima bìlə́ bə̀ bərá, ìì kpə̀ə̀ máá yílə́ sí! Zá aa dá kaàn də, ìì kpə̀ə̀ yíl aí bìá, bít kə̀ yɛb íí bəd bìá!

²⁹Kə̀ aakíin də, sɛŋ dáà kíìn yaanàá, nɛ́b bəd dá baàn: ‹Vɛnɛ́b dá ii nɛɛ̀n zígǹ yílú, íí nɛ́b kɛ́ɛ̀m ziid bərá, íí nɛ́b kɛ́ɛ̀m bəraa bàgə̀l aí bə̀ lɛ̀b bèd wàà síndoó, bít íí nɛ́b kɛ́ɛ̀m bəraa úm íí bèd yɛb bəd vuùm síndoó!›

³⁰Nɛ́b bəd dá baàn: ‹Aa dá sɔɔ̀n də gə́, kɔ̀l bəd boò sud obə́ yílú!› Bít bə̀ dá dəŋsə́ bəd kɔ̀ baàn: ‹Ìì kág bə́ kúnú!›

³¹Kàandə, máá mə́ téé bəə máá, bə̀ mà' mə́ì kə̀ aakíin, zá aí gə́, íí téé wadké yée, nɛ́b bəd dá ii ma'ǹ leè gú?»

³²Sɛŋ aarə bəní, bə̀ kò' Yéésù kə̀ nɛ́b invaksə́ bə̀ ma'ǹ bəd iirə tá, bɔ̀b bág dá boò lòd bə̀ kíin téélɛŋké ba.

³³Bít dá bə̀ wə́ə́ zɔ̀ŋ aa bə̀ dɛ̀d «Yílə Magə̀wà» bərə gə́, bə̀ bág Yéésù wərà, kə̀ nɛ́b invaksə́ bə̀ ma'ǹ bəraa iirə rə tá. Bə̀ bág nɛ́b invaksə́ bə̀ ma'ǹ bəraa iirə rə kóólé téélɛŋké ba, nə́ŋ̀ oò nɛɛ̀n váànú, bít nə́ŋ̀ ɔ̀d kɔ̀ oò nɛɛ̀n kéènú.

³⁴Kàanyée gə́, Yéésù bàà: «Báá, lɛ́' ǹ dàà bə̀ invaksə́ boò bəraa bə̀ mà' rə kúnú. Kàandə, bə̀ gàb in aa bə̀ tə́ ma'ǹ də sé.» Sóózè bəd bə̀ lɛ́' sáásá, pɛ̀l bə̀ gàb taà Yéésù gɔ̀' bərá.

³⁵Nɛ́b bəd dìì bə̀ ɛ̀g in aa tə́ taàn doó. Yahudu bəd nɛ́b gbàád bəd lò' bə̀ bí'ù kèérá, bə̀ bàà: «Súú nɛ́b kambəd yàá, oò súú yíl oò kɔ̀, tə́ *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə gə́ roó!»

³⁶Sóózè bəd kɔ̀ lòò bə̀ bí' Yéésù kèérá. Zɔ̀ŋ aa bə̀ gbarà oò səǹ gə́, bə̀ piiù badn yàkèá,

³⁷bít bə̀ bàà: «Dáà ń tə́ Yahudu bəd Gààd vɛ́nà gə́, ǹ súú yíl ń kə̀ yíl ám bìá!»

³⁸Téélɛŋké yílə́ rə, bə̀ bád nwɔŋ aa yóo: «NƐ́ŊӘ̀ AA YÉE KÙMSӘ̀N YAHUDU BƏD GÀÀD GBÀ'Á.»

³⁹Nɛ́b invaksə́ bə̀ ma'ǹ bəraa bə̀ bág téélɛŋké bərə, nə́ŋ̀ boò tə́ŋú, dúl Yéésù kúnú, bít bàà: «Máǹ ń bàà gə́, bəǹ Krístù, *Nɛ́d Nɛ́ŋə̀ bə̀ Súùnnì? Ǹ súú yíl ń da, bít ǹ súú bə́ kɔ̀!»

⁴⁰Zá ɔ̀d oò nə́ŋ̀ də álə̀ kúnú, bít bààù: «Ń nùù Vɛnɛ́b géè? Kə̀ aakíin də, ń tə́ búúd luùm nə́ŋ̀ní bé'nàá, kə̀ Nɛ́ŋ Váàndo aakíin.

⁴¹Obə́n gə́ tə́ wɔ̀ɔ̀làá, kàandə, bə́n bé'ǹ búúd tə́ invaksə́ aa bə́n ma'ǹ də bòórú. Zá oò gə́, mà' invaksə́ nə́ŋ̀má sé.»

⁴²Bòórú gə́, bít bàà Yéésù: «Yid m̀ bɔ̀' mə́ sí Yéésù, sɛŋ aa yaà ń dá Gààd ləə̀n bəroó.»

⁴³Yéésù kè' í'ù: «Mə́ tə́ən kíìn baanàá, aarə nwɔŋ sɔ̀ɔ̀ná' Nyà'aa yóo, ń dá kuùm kə̀ máá tá, *Vɛnɛ́b yiilú.»

⁴⁴Sɛŋ də nyàm yíl tə́ŋú, nyàmlaa və̀d dàà kíìn duùnmbìá: Tígə́l laà yɛ́b aarə bə kóólé, yaà wə́ə́ ba'wà toorə zé. Gɔ̀saa tab bə̀ və̀d kə̀ láŋsə́ wúl zɔ̀ŋ Gìdń də, *seè tə́ŋtəŋú.

⁴⁵

⁴⁶Yéésù páá kpə̀ə́ǹ lɛgú, bàà: «Báá, mə́ pii nyì' mə́ tə́ ám nɛɛ̀n tɛ́mú.» Zɔ̀ŋ aa gám bɛ́' nwɔŋ aa kàangə́, gɔ̀ŋsə́ oò bɛ́d yàá.

⁴⁷Sóózè bəd gààd bé' in aa yée ní, káŋ Vɛnɛ́bá, bít bàà: «Mə́ gàb yàá, Nɛ́ŋ Váàndo aa yée nɛ́ŋə̀ wɔ̀ɔ̀làá.»

⁴⁸Nɛ́b zùúm wərà, bɔbm̀ bé'ǹmbə̀ in aa tə́ taàn doó. Zɔ̀ŋ aa bə̀ bé' in aa taà rə gə́, kid bə̀ bíd bəd boò kàrú, kə̀ nɛɛ̀n zibm̀bə̀ gíìlú, kə̀ tɛ́m nwuukèá.

⁴⁹Zá nɛ́b aa gàb Yéésù rə gə́ kóólé, kə̀ nɛ́b kɛ́ɛ̀m bəraa bə̀ bàgə̀wà Galili yɛ́b bərə tá, bə̀ dìì zɔ̀ŋ bùúd ba, bə̀ ɛ̀g taà in aa tə́ taàn Yéésù yílə́ roó.

⁵⁰Kə̀ aakíin də, nɛ́ŋ váàndo nə́ŋ̀, nə́gə́l oò Yusufu. Oòrə, nɛ́ŋ váàndo *Yahudu bəd bìl aa bə̀ dɛ̀d Arimatiya rə rú bìá, bít oòrə, tə́ wálke nɛ́b gbàád Yahudu bəd bə̀ tə́ŋú. Oòrə nɛ́ŋə̀ sɔ̀ɔ̀ná, bít nɛ́ŋə̀ wɔ̀ɔ̀làá, kè' nwɔŋ bəraa nɛ́b gbàád wálke kam bəraa bə̀ bàà, boò lò' Yéésù kíìn də sé. Oò gə́, kùm nwán sɛŋ aa Vɛnɛ́b yaà dá gààd ləə̀n bə nɛ́b bəd yílə́ roó.

⁵¹

⁵²Nɛ́ŋ váàndo aarə, ɛ̀m Pilatu sunú, dá dɛ̀rə̀: «Mə́ tə́ən kíìn nyɛmàá, m̀ pii mə́ Yéésù sisá.»

⁵³Bít pà' sí'à Yéésù val aa téélɛŋké bəroó, dàbə̀ val gɔ̀sú, bít pà' dá lə̀ə̀ù sàà aa bə̀ gbə̀' bəŋə́ rə rú. Bít sàà aarə, nɛ́ŋə̀ nə́ŋ̀má lə̀ə̀ bə̀ bèd dú wərə̀ sé.

⁵⁴Sɛŋ aarə, nyàm aa nɛ́b bəd kùd si' *nyàm nyi'ǹmbə̀ bə̀ roó. Nyàm tə́ kíìn piinàá, bít *nyàm nyi'ǹmbə̀ dákíìn sɔ̀ràá.

⁵⁵Nɛ́b kɛ́ɛ̀m bəraa bə̀ ɛ̀mà kə̀ Yéésù tá, Galili yɛ́b bərə, bə̀ bàgà Yusufu bòórú. Bə̀ bé' sàà yàá, bít bə̀ ɛ̀g nɛɛ̀n aa Yusufu lə́' Yéésù si' rú roó.

⁵⁶Nɛ́b kɛ́ɛ̀m bəraa kid bə̀ bíd kíìn boò kàrú, kílə́m sool sɔ̀ɔ̀nkè bə̀ bəd dáàn kudǹmbə̀ kə̀ urdi tá, yaàn sáŋ̀mbə̀ Yéésù sisú. *Nyàm nyi'ǹmbə̀ wə́ə́ gə́, kùm bə̀ nyì' kúnú, kìínmbə̀ nɛɛ̀n aa Musa indaŋ̀mbə̀ bàà rú rə kíin.