Read Samba Leko Luka 24 Bible Online

Luka 24 - Samba Leko bible

Luka 24

¹Kozoli ba, kə̀ limtə́ súd, nɛ́b kɛ́ɛ̀m bəd bə̀ ɛ̀m sàà ba. Bə̀ pà' kílə́m bəraa bə̀ kùrà rə naú.

²Yaà bə̀ wə́ə́ gə́, bə̀ bɔ̀b bəŋ aa bə̀ kí' kə̀ sàà waàl lə, nɛ́ŋə̀ nə́ŋ̀ kèd zígì kàrú.

³Kàanyée gə́, bə̀ pìì sààrú, bít dá bə̀ bɔ̀b Báátììkpɛ̀ŋ Yéésù si' sé.

⁴Zɔ̀ŋ aa bə̀ bɔ̀b Yéésù si' sín yée gə́, tɛ́m nyágə́l bə̀ yàá. Bə̀ gàb nɛɛ̀n aa bə̀ dá ma'ǹ dú rə sé. Záàn gə́, bə̀ bé' nɛ́b vɔ̀ɔ̀m bəd iira, ìì pál gɔ̀' biíd tál tál sisú, yaà bə̀ vúgə́l boò səǹ zé bùúd.

⁵Nɛ́b kɛ́ɛ̀m bəraa rə, də́dǹ mà' bə̀ì gbàákù, bít bə̀ bág núù boò bəd yɛ́b ba. Zá nɛ́b vɔ̀ɔ̀m bəraa rə, ìì bàà bə̀: «Kə̀ níìbə̀ íí tə́ taà nɛ́d galə̀ saàn, zɔ̀ŋə val bəd tə́ŋə́ gú?

⁶Oò zɔ̀ŋə sàà rə́ sé, zá díímì valú! Sèl ìì zá' nwɔŋ aa bàà ii, sɛŋ aa tə́ Galili yɛ́b bəroó. Bàà:

⁷‹Kò' bə̀ dá nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə piìn nɛ́b invaksə́ bə̀ ma'ǹ bəd naú, bág bə̀ dáù kíìn lo'ǹ téélɛŋké ba, bít sɛŋ toorə bə gə́, dákíìn díìm valú.› »

⁸Kàanyée gə́, sèl bə̀ zá' nwɔŋ bəraa Yéésù bàà bə̀ roó.

⁹Zɔ̀ŋ aa nɛ́b kɛ́ɛ̀m bəraa kid bə̀ bírà sàà bə gə́, yaà bə̀ ùd in aa taà rə nɛ́b *sáànmbə̀ bəraa kób zè nə́ŋ̀ doó, bít kə̀ nɛ́b kam bəraa bàg bə̀ sáá Yéésù rə tá.

¹⁰Nɛ́b kɛ́ɛ̀m bəraa bé'à in bəraa kóólé rə' Mariyama nɛ́ŋə̀ Magdala bìlə́ bìá, Yowana ra, Mariyama Yakuba nà'á oòra, kə̀ nɛ́b kɛ́ɛ̀m kam bəraa bə̀ ɛ̀mà kə̀ boò tə́ roó. Nɛ́b kɛ́ɛ̀m bəraa rə, bə̀ ùd *Yéésù gbantumsə̀ bəd in aa taà sàà bərə gə́ kóólé.

¹¹Nɛ́ɛ̀m kàanyée gə́, Yéésù gbantumsə̀ bərì ɛ̀g nwɔŋ aarə kìínmbə̀ nwɔŋ tɛdń kíni, bə̀ bàg bə̀ sé.

¹²Zá Piyɛr gə́, zá' nùù ɛ̀m sàà ba. Dá wə́ə́ gə́, tə̀ŋ ɛ̀g núù sàà rú gə́, bé' in nə́ŋ̀má sé, val gɔ̀' bəd ləə sə̀ní yɛ́b ba. Bít kidbírà kíìn oò yiilú. In aa taà yérə, kò'ù yílì gbàákù.

¹³Nyàm aarə bəní, Yéésù *nɛ́b sáànmbə̀ bəd iira, bə̀ tə́ ɛɛ̀m bìl aa bə̀ dɛ̀d Ɛmmaus də rú. Bìl aarə, mà'ì kílomɛ́tà kób zè nə́ŋ̀, dáànmbə̀ kə̀ Urusalima bìlú.

¹⁴Bə̀ gám nwɔŋ bəd boò bòdba, in aa taà sɛŋ bəraa yérə yílú.

¹⁵Zɔ̀ŋ aa bə̀ tə́ nwɔŋ bəd gáàm, bít bə̀ tə́ pìrə̀ yi'ǹ boò bòdbə yée gə́, Yéésù ɛ̀m gbarà boò sunú, bít ɛ̀m wál kpaŋ̀ kə̀ boò tá.

¹⁶Bə̀ bé'ù yàá, bít bə̀ gàbə̀ sé. Kàandə, in nə́ŋ̀ dàŋ bə̀ kúnú.

¹⁷Yéésù dɛ̀d bə̀: «Níì nwɔŋ íí tə́ taà nyá'ǹ kpaŋə́ gú?» Kə̀ aakíin də, bə̀ dìì kúnú, bít tɛ́m nwuu bə̀ kúnú.

¹⁸Nɛ́ŋə̀ nə́ŋ̀ boò tə́ŋú, nə́gə́l oò Kleopas, kè' í'ù: «Ámda ń kùmsə̀n ám nə́ŋ̀ní zɔ̀ŋə Urusalima bìlú, màn aa gàb in bəraa taà sɛŋ bəraa rə sín deè?»

¹⁹Oò kɔ̀ bít dɛ̀d bə̀: «Níì taà sə̀n sɛŋ bəraa zɔ̀ŋə bìlə́ gú?» Kè' bə̀ í'ù: «In bəraa taà Yéésù Nazaratu bə̀ yílə́ roó. Oòrə, *Vɛnɛ́b gbantumsàá, mà' inwulubə̀ gbàád bərá, bít sán nɛ́b bəd in kə̀ kpɛŋsɛ́lá, Vɛnɛ́b númú, bít kə̀ nɛ́b bəd númú.

²⁰*Láŋsə́ gààd bəd kə̀ *dam bəd tá, dá bə̀ piiù Pilatu naú, bɔ̀b boò lò'ù kúnú, bít boò bágə̀ téélɛŋké ba.

²¹Zá obə́ gə́, bə́ zíg tɛ́m, bə́ bàà Vɛnɛ́b tùmə̀wà, bɔ̀b yaà oò súú nɛ́b Israila bə̀ bəd gààd Roma bə̀ nɛɛ̀n tɛ́mú. Zá sɛŋ aa in bəraa taà kə̀ kùrə rə, nyàm toorúb oòrə, nyà'aa yóo.

²²Bít nɛ́b kɛ́ɛ̀m kam obə́ tə́ŋú, yaà bə̀ bàà bə́ nwɔŋ nə́ŋ̀á, kò' bə́ yíl yàá. Kə̀ limtə́ pít, bə̀ dáá Yéésù sàà ba,

²³zá bə̀ bɔ̀b Yéésù si' wərə̀ sé. Nɛ́b kɛ́ɛ̀m bəraa rə, kidbíd yaà bə̀ bàà bə́ gə́, *malaika bəd yaà bə̀ vúg obənə́ sunú, bít ìì bàà bənə́ gə́, Yéésù díímì valú.

²⁴Nɛ́b vɔ̀ɔ̀m kam obə́ tə́ŋə́ bə̀ bəd bə̀ dáà sàà ba, dá bə̀ bɔ̀b kìínmbə̀ nɛɛ̀n aa nɛ́b kɛ́ɛ̀m bəraa yaà ìì bàà bə̀ rə kíin, zá ìì bé'ùwà sé.»

²⁵Kàanyée gə́, Yéésù bàà bə̀: «Íí nɛ́b vɔ̀ɔ̀m tɛ́m val bəraaú, gbò'i tə́ kíìn gabm̀bə̀ nwɔŋ aa *Vɛnɛ́b gbantumsə̀ bəd ìì bàà ii rə tə́ vɛ́nà!

²⁶Ogə́, Krístù oò bé' búúd sína kə̀ aakíin, Vɛnɛ́b dáù taà kaŋsɛ́l laa nyɛdkè oò piinàá!»

²⁷Bít Yéésù bàà ì' bə̀ nwɔŋ bəraa *Vɛnɛ́b gbantumsə̀ bəd bə̀ bád oò yílú, Núúboòd Gìdń boò bərú roó. Yéésù sɔ̀d kə̀ Musa núúboòrá, bít zəg kə̀ *Vɛnɛ́b gbantumsə̀ bəd núúboòd bəd gə́ kóólé.

²⁸Zɔ̀ŋ aa ɛ̀m dá bə̀ wə́ə́ bìl aa ìì tə́ dáàn dú rə kàd bə gə́, Yéésù mà' kìínmbə̀ í' taàn ɛɛ̀mbə̀ númú kíin.

²⁹Zá bə̀ nyɛ̀mə̀, bə̀ bààù: «Ǹ kùm zɔ̀ŋə kə̀ obə́ tá. Kə̀ aakíin də, nyàm mà' yàá, tígə́l tə́ kíìn ká'nàá.» Bít pìì yiilú, dáàn kuùmbə̀ kə̀ boò tá.

³⁰Zɔ̀ŋ aa kùm gbèd magə̀ bə kə̀ boò tə́ yée gə́, pà' bə̀rɛ́d, bít mɔ̀' Vɛnɛ́b gə́, wèè bít pii bə̀ kúnú.

³¹Kàanyée gə́, núù boò bəd bíd nyɛd yàá, bít bə̀ gàbə̀ yàá. Zá sɛŋ aarə bəní, bə̀ bánə̀ bé'ǹmbə̀ sɔ̀ŋ sé.

³²Bə̀ bàà boò bòdba: «Sɛŋ aa tə́ bə́ nwɔŋ gáàm kpaŋú, bít tə́ bə́ nwɔŋ aa Núúboòd Gìdń bərú rə baàn i'ǹ də, tɛ́m nyìì kə̀ làmkè sínì?»

³³Bə̀ zá' sɛŋ də bəní, bít kid bə̀ bírà kíìn Urusalima bìlú. Zɔ̀ŋ aa dá bə̀ wə́ə́ wərə̀ gə́, *nɛ́b sáànmbə̀ bəraa kób zè nə́ŋ̀ də, wál bə̀ kùm ɔ̀dbə kə̀ ɔ̀b boò bəd tá,

³⁴bə̀ tə́ baàn: «Aarə nwɔŋ sɔ̀ɔ̀n vɛ́nà! Báátììkpɛ̀ŋ díímì valú, yaà ì' yíl oò Simon númú!»

³⁵*Nɛ́b sáànmbə̀ bəraa iirə rə, bàà bə̀ ì' bə̀ in aa taà kpaŋə́ roó. Bə̀ bàà nɛɛ̀n aa ɛ̀g bə̀ gàb Yéésù rú, sɛŋ aa wèè tə́ bə̀ bə̀rɛ́d piìn bəroó.

³⁶Sɛŋ aa *nɛ́b sáànmbə̀ bəraa iirə, bə̀ tə́ nwɔŋ udǹ dú rə, Yéésù kə̀ yíl oò bìá, yaà vúg boò tə́ŋə́ zé bùúd, bít bàà bə̀: «Tɛbə̀ oò kùm kə̀ aí tá!»

³⁷Də́dǹ mà' bə̀ì gbàákù. Kàandə, bə̀ bàà nyà'aa bənə́ bé'nnə́ ginnazi.

³⁸Zá Yéésù bàà bə̀: «Kə̀ níìbə̀ tɛ́m nyágə́li taà gú? Kə̀ níìbə̀ íí zìb taà pìrə̀ in aa taà rə bə gú?

³⁹Ìì ɛ̀g nɛɛ̀n tɛ́m mə́ bərá, kə̀ dun mə́ bərá! Aarə máára! Ìì pig mə́ bə́ŋ̀ ge, bít ìì ɛ̀g núùá, ginnazi kə̀ gɔ̀g lúgúd naà sé, kə̀ níŋsə́ naà kìínmbə̀ íí bé' mə́ kə̀ naà yée kíin sé!»

⁴⁰Bàà bɛ́' nwɔŋ bəraa gə́, bít ì' bə̀ nɛɛ̀n oò bərá, zɔ̀ŋ aa ìì bágə̀ bəroó, kə̀ dun oò bərá.

⁴¹*Nɛ́b sáànmbə̀ bəd bə̀ kùm bəd kə̀ tɛ́m làmkèá, bít in aarə kò' bə̀ yílì gbàákù. Kə̀ taàbìá, bə̀ bán taà in aa taà rə ke'ǹmbə̀ sé. Kàanyée gə́, Yéésù dɛ̀d bə̀: «Íí tə́ kə̀ inlíìnmbə̀ naà zɔ̀ŋəì?»

⁴²Bə̀ piiù díb kuŋ luuké nə́ŋ̀.

⁴³Kè' díb də gə́, bít fù' boò númú wərà.

⁴⁴Bítsɔ̀ŋ, bàà bə̀: «Aa yée nwɔŋ bəraa mə́ bàà ii, sɛŋ aa mə́ tə́ kuùm kə̀ aí tə́ roó' Mə́ bàà ii' Nwɔŋ bəraa bə̀ bád máá yílə́ Musa Indaŋ̀mbə̀ rú roó, aa bəraa bə̀ bád *Vɛnɛ́b gbantumsə̀ bəd núúboòrú roó, kə̀ aa Dauda náb bərə́ rə tə́ kóólé, oò ma'míìn kúnú.»

⁴⁵Kàanyée gə́, kèd bə̀ taà yíləsá, bɔ̀b boò kìì nwɔŋ aa Núúboòd Gìdń bəd tə́ baàn doó.

⁴⁶Bít bàà bə̀: «Aa yée nwɔŋ aa bə̀ bád doó' Krístù oò bé' búúd bít val oò kò'ù sína. Bít bòórú sɛŋ toorə bə gə́, dákíìn díìm valú.

⁴⁷Íí kùmsə̀n sedako bərá. Ɛ̀m dá ìì bàà nɛ́b bəd boò pɛ́n tɛ́m boò bərá. Bə̀ mà'ì kàangə́, Vɛnɛ́b lɛ́' dá bə̀ invaksə́ boò bəd kíìn daanàá. Ìì bàà nwɔŋ aarə máá nə́gə́lú. Ìì sɔ̀d Urusalima bìlú, bít ìì dáá kə̀ nɛ́b bəraa bə̀ bàg Vɛnɛ́b síndə tə́ŋə́ kóólé.

⁴⁸

⁴⁹Ìì ɛ̀ga! Má ma'ǹ, bɔ̀b Nwul Gìdń aa Báá mə́ bàà dàà ii rə, oò yaà aí yílú. Zá Kùm ìì nwán Urusalima bìlú, sɛŋ aa íí dá kpɛŋsɛ́l aa vúgà Vɛnɛ́b naà rə bɔbm̀ bəroó.»

⁵⁰Bòórú gə́, Yéésù ɛ̀m kə̀ *nɛ́b sáànmbə̀ oò bəd tá, dáànmbə̀ kə̀ Betaniya bìlə́ bə̀ rú. Bít zɔ̀ŋ aarə ba, zá' nɛɛ̀n lɛgú, mà' bə̀ pə̀dkèá.

⁵¹Zɔ̀ŋ aa tə́ bə̀ nɛɛ̀n zígǹ yílə́ kàan ní, zá' ɛ̀m zɔ̀ŋ bùúd kə̀ boò ra, bít Vɛnɛ́b pà' ná'ù kíìn lɛgə́ poú.

⁵²Boò gə́, bə̀ káŋ̀ kúnú, bít kid bə̀ bírà kíìn Urusalima bìlú. Bə̀ nyìì bəd kə̀ tɛ́m làmkè gbà'á.

⁵³Bə̀ tá' sɛŋ boò kóólé láŋsə́ wúuú, bít bə̀ dìì Vɛnɛ́b káŋ̀mbìá.