Read Samba Leko Luka 3 Bible Online

Luka 3 - Samba Leko bible

Luka 3

¹Sɛŋ aa gààd gbà'á Roma bə̀ aa bə̀ dɛ̀rə̀ Tibɛr rə, ləə gààd wə́ə́ zèd kób zè núnə̀ rə, nɛ́b aa yée ìì ləə sə̀n gààd Tibɛr Sezare dùú' Pontu Pilatu kùmsə̀n gɔ̀mnà Yahudiya yɛ́b ba. *Hirudus kɔ̀, ləə gààd Galili yɛ́b ba. *Hirudus kudvɛɛ̀l Filip kɔ̀, ləə gààd Ituria kə̀ Trakonitus yɛ́b ba. Bít Lizania kɔ̀, ləə gààd Abilɛna yɛ́b ba.

²Annas kə̀ Kaifa tá, ìì kùmsə̀n láŋsə́ gààd gbàád bərá. Sɛŋ aarə ba, Vɛnɛ́b gám nwɔŋ fɔ̀gú, kə̀ Yohana, Zakariya wàá.

³Yohana dìì gəə̀l líbm̀bə̀ yɛ́b bəraa Urdun nwuu kàd bərə bə kóólé, dɛ̀d nɛ́b bəd nwɔŋá, bàà: «Ìì pɛ́n tɛ́má, ìì sɔ̀g kúnú, ìì kè' boò pii ii baptisma. Bít kə̀ aakíin də, Vɛnɛ́b dá ii invaksə́ íí bəd kíìn lɛ́'ǹ daanàá.»

⁴Kə̀ aakíin də, in aa *Vɛnɛ́b gbantumsə̀ aa bə̀ dɛ̀rə̀ Esaya rə bád dàà oò núúboòrú rə, wə́ə́ sùnú. *Vɛnɛ́b gbantumsə̀ aarə, bàà: «Nɛ́ŋə̀ nə́ŋ̀ páá kpə̀ə́ǹ tə́ fɔ̀gú, bàà tə́: ‹Làm ìì kùd Báátììkpɛ̀ŋ kpaŋ̀á. Ìì mà'ù kpaŋ̀ bəd kíìn wɔ̀ɔ̀lə̀ sɔ̀ɔ̀nkè!

⁵Kɔ̀l wəd bəd gə́ kóólé, dákíìn nibmínàá. Kɔ̀l kə̀ dəŋsə́ yíl tə́ kóólé, boò láámíìn kúnú. Kpaŋ̀ aa tɔ̀d də gə́ kóólé, oò bíl wɔ̀ɔ̀làá, kpaŋ̀ lɔ̀ŋ bə̀ bəd oò pugmíìn kúnú.

⁶Bít nɛ́ɛ̀réè kóólé, dá súúke aa Vɛnɛ́b piià rə kíìn bé'nàá.› »

⁷Nɛ́b zùúm yaà Yohana sunú, bɔ̀b oò pii bənə́ baptisma. Yohana bàà bə̀: «Íí pàì kun bəraa yóo! Nɛ́ɛ̀réè bààiyà sə̀n ìì nùù Vɛnɛ́b fágə́n aa dáà yaànnà aí yílə́ rə kíìn gú?

⁸Bə́ŋyée gə́, mà' ìì zə́' tùsaa dá i'ǹ gə́, íí sɔ̀gì roó, bít ìì dìì baànmbə̀ kə̀ yíl aí bə̀: ‹Obə́ gə́, bə́ Abraham yɛb› ní sí! Kàandə, mə́ tə́ ii kíìn baanàá, ìì ɛ̀g bəŋ bəraa yóo, Vɛnɛ́b dá bə̀ kíìn báàn bí'ǹmbə̀ boò kùm Abraham yɛb bərá.

⁹Vɛnɛ́b pà' bə̀rə́ì nɛɛ̀n tɛ́mú gbòód. Téé aa lɛ̀b wàà sɔ̀ɔ̀n síndə gə́ kóólé, bə̀ dáù kíìn dubàá, bít bə̀ dáù pá'ǹ laarú.»

¹⁰Nɛ́b zùúm bəd dɛ̀rə̀ kə̀ aakíin: «Báà mà' leè gú?»

¹¹Yohana kè' í' bə̀, bàà: «Nɛ́ŋə̀ aa tə́ kə̀ gɔ̀' sisú bə̀ naà iirə rə, oò pà' nə́ŋ̀, oò pii màn aa kə̀ naà síndoó, bít nɛ́ŋə̀ aa tə́ kə̀ inlíí naà rə, pɛ̀d oò gàb kə̀ nɛ́b aa kə̀ naà síndoó.»

¹²Nɛ́b ba'káám bə̀ ke'ǹ bərì yaà, boò pii bənə́ baptisma kɔ̀, bít ìì dɛ̀d Yohana, ìì bàà: «Nɛ̀ná, obə́ gə́, báà mà' níì gú?»

¹³Kè' í' bə̀, bàà: «Ìì pè' nɛ́b bəd boò káá in oò kàn aa indaŋ̀mbə̀ dɛ̀d də sí.»

¹⁴Sóózè bəd bə̀ dɛ̀rə̀ kɔ̀: «Bít obə́ gə́, báà mà' níì gú?» Kè' í' bə̀, bàà: «Ìì kè' nɛ́ŋə̀ ba' kə̀ núù pú'ǹmbə̀ sí, sínkɔ̀ kə̀ gúsuúm vədǹmbə̀ sí, zá ìì kìì làmkè kə̀ sòò basaa bə̀ tə́ ii káàn də ní.»

¹⁵Sɛŋ də, nɛ́b bəd kóólé, ìì nwán kə̀ tɛ́m zígǹmbìá' Kóó nɛ́ɛ̀réè, sèl bàà nyà'aa nə́ŋ̀ gə́, Yohana kùmsə̀n *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ roó.

¹⁶Yohana bàà ì' bə̀ boò kóólé kə̀ aakíin: «Máá gə́, mə́ tə́ ii baptisma piìn kə̀ wəl dìíŋ̀á. Zá nɛ́ŋə̀ nə́ŋ̀ dáà kíìn yaànà máá bòórú. Oòra kàn mə́ sə̀n kə̀ gbà'á. Máá gə́, mə́ də́ŋ oò bə̀ tábə́ kaasə́ biìnmbə̀ dunú sé. Oò gə́, dá ii baptisma piìn kə̀ Nwul Gìdńná, bít kə̀ laá.

¹⁷Kò' magə̀ oò tə́ nɛɛ̀n tɛ́mú, dá pɛ́gə̀ oò tədǹ nyɛ́'nàá, dá yɛd lɛ̀ɛ́ŋə̀ wədǹ pɛdǹ kə̀ yɛd kpásàgá. Dá yɛd wàà lɛ̀ɛ́ŋə̀ wáàl kə́dǹ oò bɔ̀ɔ̀nú. Zá yɛd kpásàg gə́, dá dú'ǹ laa aa fə́' bə gá rə rú.»

¹⁸Kə̀ aakíin, Yohana bàà taà nɛ́b bəd Vɛnɛ́b *Nwɔŋ Puu Sɔ̀ɔ̀nkèá, bít ùd bə̀ nwɔŋ zùúm kambəd sɔ̀ŋ.

¹⁹Bít nɛɛ̀n aarə rú, Yohana ál taà gààd gbà'á *Hirudus da, sɛŋ aa pà' kə̀ kudvɛɛ̀l oò Filip kéèn aa bə̀ dɛ̀rə̀ *Hirudia roó. Bít Yohana ál *Hirudus tù' vaksə́ ɔ̀d kam bəraa mà' rə bòórú.

²⁰Kàanyée gə́, *Hirudus yaà mà' invaksə́ ɔ̀d sɔ̀ŋ, kə̀ Yohana ko'ǹ pá'ǹmbə̀ wúltígə́l bə̀ rú.

²¹Bòórú Yohana pii nɛ́b bəd kóólé baptisma gə́, bít yaà pii Yéésù kɔ̀. Sɛŋ aa Yéésù tə́ Vɛnɛ́b nyɛɛ̀m dú rə, lɛg ked kúnú,

²²bít Nwul Gìdń símà oò yílú, kìínmbə̀ mìrə̀ gə́blə̀ kíni. Pə̀gə̀lib nwɔŋ nə́ŋ̀ vúgà lɛgə́ poú, bàà: «Ámda ń kùmsə̀n wàà mə́ra, mə́ í'ǹ tə́ gbàákù. Mə́ zíg tɛ́m làmkè mə́ kóólé tə́ ám ba.»

²³Sɛŋ aa Yéésù sɔ̀d kə̀ tù' oòrə, kə̀ zèd laa nə́ŋ̀ zè kób. Kə̀ nɛɛ̀n aa nɛ́b bəd sèl lə kíin gə́, ìì bàà Yéésù kùmsə̀n Yusufu wàá; Yusufu kɔ̀, Heli wàá.

²⁴Heli kɔ̀, Matat wàá. Matat kɔ̀, Levi wàá. Levi kɔ̀, Melki wàá. Melki kɔ̀, Yanai wàá. Yanai kɔ̀, Yusufu wàá.

²⁵Yusufu kɔ̀, Matatiya wàá. Matatiya kɔ̀, Amos wàá. Amos kɔ̀, Naum wàá. Naum kɔ̀, Esli wàá. Esli kɔ̀, Nagai wàá.

²⁶Nagai kɔ̀, Maat wàá. Maat kɔ̀, Matatiya wàá. Matatiya kɔ̀, Semeyin wàá. Semeyin kɔ̀, Yosef wàá. Yosef kɔ̀, Yoda wàá.

²⁷Yoda kɔ̀, Yoanan wàá. Yoanan kɔ̀, Resa wàá. Resa kɔ̀, Zorobabɛl wàá. Zorobabɛl kɔ̀, Salatiyɛl wàá. Salatiyɛl kɔ̀, Neri wàá.

²⁸Neri kɔ̀, Melki wàá. Melki kɔ̀, Adi wàá. Adi kɔ̀, Kosam wàá. Kosam kɔ̀, Ɛlmadan wàá. Ɛlmadan kɔ̀, Ɛri wàá.

²⁹Ɛri kɔ̀, Yéésù wàá. Yéésù kɔ̀, Eliezer wàá. Eliezer kɔ̀, Yorim wàá. Yorim kɔ̀, Matat wàá. Matat kɔ̀, Levi wàá.

³⁰Levi kɔ̀, Simeon wàá. Simeon kɔ̀, Yuda wàá. Yuda kɔ̀, Yusufu wàá. Yusufu kɔ̀, Yonam wàá.

³¹Yonam kɔ̀, Eliakim wàá. Eliakim kɔ̀, Melea wàá. Melea kɔ̀, Mena wàá. Mena kɔ̀, Matat wàá. Matat kɔ̀, Natan wàá. Natan kɔ̀, *Dauda wàá.

³²Dauda kɔ̀, Zesse wàá. Zesse kɔ̀, Obed wàá. Obed kɔ̀, Booz wàá. Booz kɔ̀, Salmon wàá. Salmon kɔ̀, Naason wàá.

³³Naason kɔ̀, Aminadab wàá. Aminadab kɔ̀, Adminu wàá. Adminu kɔ̀, Arni wàá. Arni kɔ̀, Esrom wàá. Esrom kɔ̀, Fares wàá. Fares kɔ̀, Yuda wàá.

³⁴Yuda kɔ̀, Yakubu wàá. Yakubu kɔ̀, Isiyaku wàá. Isiyaku kɔ̀, Abraham wàá. Abraham kɔ̀, Tara wàá. Tara kɔ̀, Nakor wàá.

³⁵Nakor kɔ̀, Seruk wàá. Seruk kɔ̀, Rago wàá. Rago kɔ̀, Falɛk wàá. Falɛk kɔ̀, Eber wàá. Eber kɔ̀, Sala wàá. Sala kɔ̀, Kainam wàá.

³⁶Kainam kɔ̀, Arfasada wàá. Arfasada kɔ̀, Sɛm wàá. Sɛm kɔ̀, Nuhu wàá. Nuhu kɔ̀, Lamek wàá.

³⁷Lamek kɔ̀, Matusala wàá. Matusala kɔ̀, Enɔk wàá. Enɔk kɔ̀, Yaret wàá. Yaret kɔ̀, Maleliyɛl wàá. Maleliyɛl kɔ̀, Kainam wàá.

³⁸Kainam kɔ̀, Enos wàá. Enos kɔ̀, Set wàá. Set kɔ̀, Adamu wàá. Adamu kɔ̀, Vɛnɛ́b Wàá.