Read Samba Leko Luka 4 Bible Online

Luka 4 - Samba Leko bible

Luka 4

¹Yéésù nyììà kə̀ Nwul Gìdń gə́, zá'à Urdun nwuu kàd ba, bít Nwul Gìdń záá pà' ààù fɔ̀gú.

²Wə́ə́ wərə̀ gə́, sɛŋ laa iira, Sámbàŋyɛ́rə̀ dììù də́'ǹ ɛgǹmbìá. Sɛŋ aarə bərə, Yéésù líí inlíìnmbə̀ sé. Bít sɛŋ bəraa rə taà gə́, yaà kìì gulùm yàá.

³Sámbàŋyɛ́rə̀ yaà bààù kə̀ aakíin: «Ń tə́ Vɛnɛ́b wàà vɛ́nà gə́, m̀ bàà bəŋ aa yée oò bíl bə̀rɛ́d.»

⁴Yéésù kè' í'ù: «Bə̀ bád tə́ Núúboòd Gìdńnú kə̀ aakíin: ‹Nɛ́ŋə̀ dá gɔ̀ŋsə́ oò ko'ǹ kə̀ bə̀rɛ́d ní gá.› »

⁵Sámbàŋyɛ́rə̀ pà' ààù lɛgə́ poú, dá ì'ù gààd yɛ́b bəraa zɔ̀ŋə yɛ́b bərə kóólé, sɛŋ wàà zɔ̀gɔ̀ní,

⁶bít bààù: «Má n gààd bəraa yɛ́b bərə kpɛŋsɛ́l boò piìn kə̀ kaŋsɛ́l boò bəd tə́ kóólé, kàandə, bə̀ pii máà yàá. Máá kɔ̀ nɛ́ŋə̀ aa mə́ í' rə, máù kíìn báàn piìnmbìá.

⁷Ń káŋ mə́ì gə́, in bəraa rə kóólé dá kuùm ám bìá.»

⁸Yéésù kè' í'ù: «Núúboòd Gìdń bàà: ‹Ǹ káŋ Báá ḿ Tììkpɛ̀ŋ Vɛnɛ́b ḿ da, bít m̀ mà'ù tù' oò nə́ŋ̀ní tə́ŋtə́ŋ.› »

⁹Sámbàŋyɛ́rə̀ pà' àà Yéésù Urusalima bìlú, dá díù láŋsə́ wúl yílú, bít bààù: «Ń tə́ Vɛnɛ́b wàà gə́, ǹ sə́d zɔ̀ŋə, dá m̀ pí' yɛ́b ba!

¹⁰Kàandə, Núúboòd Gìdń bàà: ‹Vɛnɛ́b dá *malaika oò bəd tuùm boò nwán n kíìn sɔ̀ɔ̀nkè.›

¹¹Bítsɔ̀ŋ: ‹Bə̀ dá n pa'ǹ boò nɛɛ̀n tɛ́mú, bɔ̀b m̀ də̀' dun bəŋ bə sí.› »

¹²Yéésù kè' í'ù: «Núúboòd Gìdń bàà: ‹Də́' ǹ ɛ̀g Báátììkpɛ̀ŋ Vɛnɛ́b ḿ sí.› »

¹³Zɔ̀ŋ aa Sámbàŋyɛ́rə̀ də́' ɛ̀g bɛ́' Yéésù kə̀ kpaŋ̀ luùm gɔ̀ŋ gɔ̀ŋ gə́, zá' dààù kúnú, yaà wə́ə́ sɛŋ ɔ̀d sɔ̀ɔ̀n nə́ŋ̀ gɔ̀ŋ bə zé.

¹⁴Yéésù kidbírà taà Galili yɛ́b ba, nyììà kə̀ Nwul Gìdń kpɛŋsɛ́lá. Nwɔŋ oò sa' bɛ́' yɛ́b aarə bə kə̀ zɔ̀ŋtá.

¹⁵Yéésù sán nɛ́b bəd in *Yahudu bəd wúlwáàlbə̀ rú, bít nɛ́b bəd kóólé bə̀ káŋ̀ kúnú.

¹⁶Yéésù zá' ɛ̀m Nazaratu bìlú, zɔ̀ŋ aa kàŋà bəroó. *Nyàm nyi'ǹmbə̀ sɛŋú, dáá pìì *Yahudu bəd wúlwáàlbə̀ rú, kìínmbə̀ lɛɛ̀m sáá rə kíni. Zá' dìì lɛgú, Núúboòd Gìdń gádǹmbìá.

¹⁷Bít bə̀ piiù núúboòd kalké *Vɛnɛ́b gbantumsə̀ aa bə̀ dɛ̀rə̀ Esaya rə bìá. Tə́ núúboòd kalké rə biìn yée gə́, bɔ̀b zɔ̀ŋ nə́ŋ̀ bə̀ bád nwɔŋ aa yóo:

¹⁸«Báátììkpɛ̀ŋ Nwul tə́ máá yílú. Kàandə, sààvúŋ máà, bɔ̀b máà àà nɛ́b búúd bə̀ bəd Nwɔŋ Puu Sɔ̀ɔ̀nkèá. Tùm máà, yaà máà bàà nɛ́b aa tə́ wúltígə́l bə̀ rú rə, vú' bəǹ dá bə̀ kíìn lɛ́'nàá. Nyəd bəd kɔ̀ máà kèd bə̀ núùá, bìn máà lɛ́' nɛ́b aa bə̀ tə́ búúd í'ǹ doó.

¹⁹Bít yaà máà bàà nɛ́b bəd, zèd aa Báátììkpɛ̀ŋ dá bə̀ pə̀dkè oò i'ǹ bəroó.»

²⁰Bít Yéésù kàd núúboòrá, pii nɛ́d Vɛnɛ́b tù' bə̀ ma'ǹná, bít kùm yɛ́b ba. Nɛ́b bəraa *Yahudu bəd wúlwáàlbə̀ rú wərə̀ rə kóólé, bə̀ ɛ̀g núù oò ba.

²¹Kàanyée gə́, sɔ̀d bə̀ taà baànmbìá: «Nyà'aa yée, nwɔŋ aa Núúboòd Gìdń bàà rə ma'míìn yàá; vɛ́nà íí kìì yàá kə̀ túŋ aí bìá!»

²²Boò kóólé, bə̀ mà' sedako oò yílú. Bít nwɔŋ sɔ̀ɔ̀nkè bəraa tə́ vúgǹ oò gú' bərə, kò' bə̀ yíl yàá. Bə̀ dɛ̀d bəd: «Máàn aa Yusufu wààì?»

²³Yéésù bàà bə̀: «Vɛ́nà, íí dá mə́ zagəm nwɔŋ aa baanàá: ‹Nɛ́d ganté bìá, ǹ gáŋ yíl ń kə̀ yíl ám bə̀ ní.› Íí dá mə́ nwɔŋ ɔ̀d aa baàn kɔ̀: ‹Bə́ kìì in bəraa ḿ mà' Kapɛrnaum bìlə́ rəì kóólé, m̀ mà' in luùm nə́ŋ̀ní aarə zɔ̀ŋə bìl aa bə̀ lɛ̀b m dú rə kɔ̀.› »

²⁴Bítsɔ̀ŋ, Yéésù bàà zəg nwɔŋ aa yóo: «Mə́ tə́ ii nwɔŋ sɔ̀ɔ̀n baanàá. *Vɛnɛ́b gbantumsə̀ nə́ŋ̀má bə̀ kè'ù oò bìlə́ sɔ̀ɔ̀nkè gá.

²⁵Mə́ tə́ ii kíìn baanàá, aarə nwɔŋ sɔ̀ɔ̀n vɛ́nà; nyàamdoorú, *Vɛnɛ́b gbantumsə̀ aa bə̀ dɛ̀rə̀ *Eliya rə sɛŋú, val kɛ́ɛ́m bəd Israila yɛ́b bə zùúm. Sɛŋ aa zèd toora kə̀ tɔ̀rá nwan naŋ̀ síndə, gulùm gbà'á yaà pí' yɛ́b aarə bə kə̀ zɔ̀ŋtá.

²⁶Kə̀ aakíin də, Vɛnɛ́b tùm àà *Eliya val kéén Israila bə̀ səǹ sé. Zá tùm ààù val kéén nə́ŋ̀ kàrú ní, Sarɛpta bìlú, Sidon yɛ́b ba.

²⁷Gərə́ bəd Israila yɛ́b bə zùúm, *Vɛnɛ́b gbantumsə̀ aa bə̀ dɛ̀rə̀ Elize rə sɛŋə́ roó. Zá nɛ́ŋə̀ nə́ŋ̀má boò tə́ŋú, si' oò gág sé. Zá Naman nɛ́d Siriya yɛ́b bə bə̀ si' gág sə̀ní.»

²⁸Nɛ́b aa *Yahudu bəd wúlwáàlbə̀ rú wərə̀ rə kóólé, bə̀ nyìì bəd kə̀ nɔ̀má, zɔ̀ŋ aa bə̀ kìì nwɔŋ bəraa gə́ roó.

²⁹Bə̀ zá' bəd lɛgú, sùd bə̀ vú'ù gbaarú, bìl bòórú, bə̀ ààù kɔ̀l wàà aa bə̀ wə̀' bìl boò bərə yílú; bít sùd bə̀ dáù taà dáàn lɛ́'ǹ zɛɛ̀ lɔ̀ŋú.

³⁰Zá oò gə́, taà pìì boò tə́ŋú, bít ɛ̀m kúnú.

³¹Kàanyée gə́, Yéésù zá' ɛ̀m Kapɛrnaum bìlú, Galili yɛ́b ba. Yéésù dáá sán nɛ́b bəd in *nyàm nyi'ǹmbə̀ sɛŋú.

³²Nɛɛ̀n aa sán bə̀ in dú rə, kò' bə̀ yíl yàá. Kàandə, sán bə̀ nwɔŋ kə̀ kpɛŋsɛ́lá.

³³Nɛ́ŋ váàndo nə́ŋ̀ kə̀ nwul vaksə́ naú, kùm *Yahudu bəd wúlwáàlbə̀ rú wərà; zá' pí' kpə̀ə́ǹ kpɛŋké páànmbə̀ lɛgú:

³⁴«Yéésù Nazaratu bìlú bìá, ń í' bə́ níì ma'ǹmbə̀ gú? Ń yaà báà bɔ̀'ǹmbèì? Mə́ gàb yàá, ń kùmsə̀n nɛ́ŋə̀ gìdń aa Vɛnɛ́b tùmà roó!»

³⁵Yéésù pél nwul vaksə́ nwɔŋá, bààù: «Ǹ tɛb tɛ́ba! Ǹ vúg kíìn nɛ́ŋ váàndo aa sisú!» Nwul vaksə́ wə̀d lɛ́' nɛ́ŋ váàndo rə yɛ́b ba, nɛ́b bəd kóólé númú, bít vúg kíìn oò rú. Zá mà'ù in nwuukè nə́ŋ̀má sé.

³⁶Boò kóólé, in aa kò' bə̀ yíl yàá, bít bə̀ bàà ɔ̀dnə́ŋ̀ bəd boò bòdba: «Aarə níì nwɔŋ luùm kàan gú? Nɛ́ŋ Váàndo aa gám nwul vaksə́ bəd nwɔŋ kə̀ váàndoá bít kə̀ kpɛŋsɛ́lá, bít bə̀ vúgə́l kúnú.»

³⁷Bít bə̀ gám Yéésù nwɔŋ zɔ̀ŋ gə́ kóólé, yɛ́b aarə ba.

³⁸Yéésù vúg *Yahudu bəd wúlwáàlbə̀ rú gə́, ɛ̀m Simon yiilú. Simon gúùn kéèn kàdǹ mà'ù gbàákù. Bə̀ dɛ̀d Yéésù yaà oò gáŋ̀ sisá.

³⁹Yéésù yaà əb oò yílú kàangə́, pél kàdǹ nwɔŋ kə̀ váàndoá. Kàdǹ zá' dààù yàá. Sɛŋ də bə ní, zá' lɛgú, bít pìì bə̀ inlíìnmbə̀ ma'ǹmbìá.

⁴⁰Nyàm pìì gə́, nɛ́b bəraa bə̀ kə̀ nɛ́b si' nwuukè bə̀ bəd naú, mad luùm gɔ̀ŋ gɔ̀ŋ kò' bə̀ sə̀n də, pú' bə̀ àà bà Yéésù sunú. Yéésù zíg bə̀ nɛɛ̀n yílə́ nə́ŋ̀ nə́ŋ̀, bít gáŋ bə̀ sisá.

⁴¹Nwul vaksə́ bəd vúgə́l nɛ́b bəd zùúm sisú. Nwul vaksə́ bəd pál kpə̀ə́ǹ bəd bə̀ bàà: «Ámda ń kùmsə̀n Vɛnɛ́b wàá!» Zá Yéésù pél bə̀ nwɔŋ kə̀ kpɛŋsɛ́lá, bít dàŋ bə̀ nwɔŋ kíìn gámm̀bìá. Kàandə, bə̀ gàb yàá, oòra kùmsə̀n Krístù.

⁴²Zɔ̀ŋ aa nwúun tóò nyɛdǹnà naà gə́, Yéésù vúg kíìn bìlú, bít zá' ɛ̀m fɔ̀gú, zɔ̀ŋ mɛdkè nə́ŋ̀ ba. Nɛ́b bəd gùùbə̀ pììù saànmbìá. Zɔ̀ŋ aa sàà ìì bɔ̀bə̀ yée gə́, bə̀ í' oò kùm kə̀ obənə́ tá, zá' oò dàà bənə́ sí.

⁴³Zá Yéésù bàà bə̀: «Dá máà bàà *Nwɔŋ Puu Sɔ̀ɔ̀nkè *Vɛnɛ́b gààd yílú, bìl kam bərú kɔ̀. Kàandə, Vɛnɛ́b tùm máà taàbìá.»

⁴⁴Bít ùd nɛ́b bəd Vɛnɛ́b nwɔŋ *Yahudu bəd wúlwáàlbə̀ bəraa Yahudiya yɛ́b bərə rú.