Read Samba Leko Luka 5 Bible Online

Luka 5 - Samba Leko bible

Luka 5

¹Nyàm nə́ŋ̀ kàani, Yéésù dìì *Genezarɛt wəl nyìgə̀l kàd ba. Bít nɛ́b zùúm bəd tì' bəd ɔ̀dŋə́ŋ̀ zɔ̀ŋ aa Yéésù kùm bəroó. Bə̀ í' Vɛnɛ́b nwɔŋ kiìnmbìá.

²Yéésù bé' kə̀ə̀d bəd iira də̀ə̀d kàd ba. Nɛ́b díb bə̀ kodǹ bəd bə̀ símà rú wərà, bít yaà bə̀ sùg lìbə̀ boò bərá.

³Yéésù na' pìì kə̀ə̀d nə́ŋ̀ú wərà, kə̀ə̀d də Simon bìá; bít dɛ̀d Simon oò gbad kíìn kə̀ wəl kàd zɔ̀gɔ̀. Yéésù kùm kə̀ə̀rú, bít pìì nɛ́b zùúm bəd in sáànmbìá.

⁴Zɔ̀ŋ aa gám bɛ́' nwɔŋ gə́, bàà Simon: «Ǹ gbá' kə̀ə̀d də zɔ̀ŋ aa wəl dɛ́l kùm bəroó, bít ń kə̀ ɔ̀b ḿ bəd tá, ìì lɛ́l lìbə̀ íí bərá, bɔ̀b ìì kòd díbá.»

⁵Simon kè' í'ù, bàà: «Nɛ̀ná, bə́ mà' tù' nwúun yɛd zé, in nə́ŋ̀má bə́ kò' sé. Zá ḿ bàà mə́ máà mà' kíìn yée gə́, má lìbə̀ kíìn gúràá.»

⁶Zɔ̀ŋ aa bə̀ gúd lìbə̀ gə́, bə̀ kòd díb zùúmá, lìbə̀ bəd sɔ̀d gbaàlm̀bìá.

⁷Bə̀ yàlà ɔ̀b boò bəraa kə̀ə̀d nə́ŋ̀ ɔ̀ɔ̀rú rə nɛɛ̀ná, yaà boò láŋ bənə́ ba. Bə̀ yaà, bít bə̀ nyí' kə̀ə̀d bəraa iirə rə kóólé kə̀ díb zùúmá. Nyɛ́d zɔ̀gɔ̀ní, kə̀ə̀d ímì wəlú.

⁸Zɔ̀ŋ aa Simon Piyɛr bé' in aa kàangə́, yaà pí' yɛ́b ba kə̀ dunlígə̀d Yéésù númú, bít bàà: «Ǹ gbad kíìn máá sunú, Báátììkpɛ̀ŋá. Máá gə́, mə́ nɛ́ŋə̀ invaksə́ bə̀ ma'ǹná!»

⁹In aarə, kò' Simon kə̀ nɛ́b aa kùm kə̀ oò tə́ rə kóólé yíl yàá, díb zùúm aa bə̀ kòd də bòórú.

¹⁰Kə̀ aarə kíin, Zebede yɛb Yakuba kə̀ Yohana tá, in aarə, kò' bə̀ yílì kɔ̀. Yakuba kə̀ Yohana tá, kòd bə̀ sáá sə̀n díb kə̀ Simon tá. Zá Yéésù bàà Simon: «Ǹ nùù də́dǹ sí. Sɔ̀d bə́ŋyóo, ń kò' díb sɔ̀ŋ gá, ń dá nɛ́b bəd dɛdǹ wálàá.»

¹¹Kàanyée gə́, sàb ìì àà kə̀ə̀d boò bəd wəl kàd ba. Zá' ìì dàà in boò bəd kíìn kóólé, bít ìì bàg Yéésù ra.

¹²Nyàm nə́ŋ̀ Yéésù tə́ bìl nə́ŋ̀ə́ yée gə́, nɛ́ŋ váàndo nə́ŋ̀ si' oò pug kə̀ gərá, yaà wə́ə́ oò sunú. Zɔ̀ŋ aa bé' Yéésù kàangə́, yaà pí' wúb núù yɛ́b ba, oò númú, bít nyɛ̀m bààù kə̀ aakíin: «Báátììkpɛ̀ŋá, ń í'ì gə́, ń dá mə́ kíìn báàn si' nyɛ́'ǹmbìá.»

¹³Yéésù nàb nɛɛ̀n pigə̀ gə́, bít bàà: «Mə́ í' yàá, si' ń oò nyɛd kúnú!» Bít kə̀ nwɔŋ aa nuù yée kíinní, gərə́ oò nyɛd yàá.

¹⁴Yéésù bààù nwɔŋ aa yóo, kə̀ kpɛŋsɛ́lá: «In aa taà yérə, m̀ bàà nɛ́ŋə̀ nə́ŋ̀má sí. Zá dá ǹ ì' si' ń *láŋsə́ gààd bəd númú, nɛɛ̀n aa ń kùm dú roó, bít m̀ pii in tɛdńní bə̀ si' bə̀ nyɛ́'ǹ aa Musa bàà dàà boò pii roó. Aarə, bɔbm̀ sedako ma'ǹmbə̀ nɛ́b bəd kóólé númú, si' ń nyɛd yàá.»

¹⁵Kàanyée ní, Yéésù nwɔŋ sa' ɛ̀m númú númú. Nɛ́b zùúm bəd yaà bə̀ wál oò sunú, oò bə̀ zɛŋ̀mbìá, bít oò mà' bənə́ gágnnə́ kúnú.

¹⁶Zá Yéésù gə́, zá' ɛ̀m fɔ̀gú, dá nyɛ̀m Vɛnɛ́bá, kə̀ nɛɛ̀n aa mà' sáá rú rə kíni.

¹⁷Nyàm nə́ŋ̀ kàani, Yéésù tə́ nɛ́b bəd nwɔŋ sánàá. *Farisa bəd gə̀b kə̀ *nɛ̀n indaŋ̀mbə̀ bəd gə̀b tá, ìì kùm bəd wərə̀ kɔ̀. Bə̀ vúgə́là bìl gɔ̀ŋ gɔ̀ŋ bəraa Galili yɛ́b bərə rú, Yahudiya yɛ́b bərə rú, bít kə̀ Urusalima bìlú. Báátììkpɛ̀ŋ kpɛŋsɛ́l kùm kə̀ Yéésù tá, bít mà'ù, gáŋ taà nɛ́b bəd si' marú.

¹⁸Nɛ́b kam yaà wə́ə́ sùnú, bə̀ pà'à nɛ́ŋ váàndo nə́ŋ̀ si' val kilə̀ rú. Bə̀ sàà kpaŋ̀ oò bə̀ páànmbə̀ wúuú, yaàn lə́'ǹmbə̀ oò bə̀ Yéésù númú.

¹⁹Zá nɛ́b zùúm wərə̀ yée gə́, ìì gàb kpaŋ̀ aa ìì dáù tá'ǹ dú rə sé. Kàanyée gə́, pà' bə̀ ná'ù wúl yílú. Dá bə̀ vɛ̀ŋ libá, bə̀ páùwà rú wərə̀ kə̀ kaasá; yaà bə̀ zígə̀ nɛ́b zùúm tə́ŋú, Yéésù númú.

²⁰Zɔ̀ŋ aa Yéésù bé' tɛ́mbagké boò gə́, bàà nɛ́d mad bə̀ rə: «Ɔ̀dzéd mə́ra, invaksə́ ḿ bəd lo' daamíìn yàá.»

²¹*Nɛ̀n indaŋ̀mbə̀ bəd gə̀b kə̀ *Farisa bəd gə̀b tá, bə̀ pìì seèlǹmbə̀ boò bòd bə kə̀ aakíin: «Nɛ́ŋ váàndo aa tə́ Vɛnɛ́b yíl yɛɛ̀l yée gə́ nɛ́ɛ̀ré? Nɛ́ɛ̀réè dá sə̀n báàn nɛ́ŋə̀ invaksə́ lo'ǹ daànmbə̀ gú? Vɛnɛ́b oò nə́ŋ̀ní dá sə̀n báàn invaksə́ lo'ǹ daànmbə̀ gá roó!»

²²Yéésù gàb inselké boò bəd yàá, bít bàà bə̀: «Kə̀ níìbə̀ íí sèl taà in luùm bəd aí tɛ́mə́ kàan gú?

²³Baànmbə̀: ‹Invaksə́ ḿ bəd lo' daamíìn yàá›, sínkɔ̀: ‹Ǹ zá' lɛgú, ǹ ɛ̀m kíìn gə́›, déè sə̀n ɔ̀gke gú?

²⁴Zá mə́ í' ìì gàb kúnú, nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, tə́ kə̀ kpɛŋsɛ́l naà invaksə́ bə̀ lo'ǹ daàn zɔ̀ŋə yɛ́b ba.» Bàà nɛ́ŋ váàndo si' val lə: «Mə́ tə́ən kíìn baanàá, ǹ zá' lɛgú! M̀ pà' kilə̀ ń da, ǹ ɛ̀m kíìn ám yiilú.»

²⁵Kə̀ nwɔŋ aa nuù yée kíinní, nɛ́ŋ váàndo rə tɔ̀d zá' lɛgú, nɛ́b zùúm númú, pà' kilə̀ oòra, bít ɛ̀m kíìn oò kàrú, kə̀ Vɛnɛ́b káŋ̀mbìá.

²⁶Nɛ́b bəd kóólé, in aarə kò' bə̀ yíl yàá. Bə̀ káŋ Vɛnɛ́bá, bə̀ nyìì bəd kə̀ də́dǹná, bə̀ bàà: «Nyà'aa bə́ bé' in aa bé' bə́ bèd síndə yàá!»

²⁷Bòórú in aa taà gə́, Yéésù vúg gə́, bít bé' nɛ́d ba'káám bə̀ ke'ǹ nə́ŋ̀, nə́gə́l oò Levi, kùmì ba'káám wúuú. Yéésù bààù: «M̀ bàg mə́ kúnú!»

²⁸Levi zá' lɛgú, dàà in bəraa kə̀ naà rə kóólé, bít bàgə̀ kúnú.

²⁹Levi mà' Yéésù inlíìnmbə̀ wálke gbà'á bə̀ oò yiilú. Nɛ́b ba'káám bə̀ ke'ǹ bəd zùúm kùm wərà, bít nɛ́b kambəd sɔ̀ŋ, ìì kùm gbèd magə̀ bə, kə̀ boò tá.

³⁰*Farisa bəd gə̀b kə̀ *nɛ̀n indaŋ̀mbə̀ bəd gə̀b tá, ìì zòl in bəd dùú, bít ìì bàà Yéésù nɛ́b sáànmbə̀ bəd: «Kə̀ níìbə̀ íí líí taà gbèd, bít íí nyəə bəd taà badn kə̀ nɛ́b ba'káám bə̀ ke'ǹ bəd tá, bít kə̀ nɛ́b invaksə́ bə̀ ma'ǹ bəd tə́ gú?»

³¹Yéésù kè' í' bə̀, bàà: «Nɛ́b si' gaŋsə́ bə̀ bəd sàà sə̀n nɛ́d ganté bə̀ gá, zá nɛ́b mad bə̀ bəd bə̀ sàà sə̀n nɛ́d ganté bìá.

³²Mə́ yaà nɛ́b wɔ̀ɔ̀lə̀ bəd dɛdǹmbə̀ gá, zá mə́ yaà rə, bɔ̀b nɛ́b invaksə́ bə̀ ma'ǹ bəd boò sɔ̀g kúnú.»

³³Nɛ́b bəd dɛ̀d Yéésù: «Yohana *nɛ́b sáànmbə̀ bəd gə́, màìgə́ bə̀ gíd iná, bə̀ nyɛ̀m Vɛnɛ́bá. *Farisa bəd gə̀b *nɛ́b sáànmbə̀ bəd kɔ̀, bə̀ mà' tə́ nɛɛ̀n aarə rú; zá *nɛ́b sáànmbə̀ ḿ bəd gə́, ìì tə́ in líínàá, bít ìì tə́ wəl nyəənàá, sɛŋ gə́ kóólé.»

³⁴Yéésù kè' í' bə̀, bàà: «Íí sèl, íí bàà bəní dáánní nɛ́b aa ìì dɛ̀d bà wèéd gbèd bərə pe'ǹ, boò gíd in sɛŋ aa bə́ŋ̀ wèéd váàndo tə́ kə̀ boò tə́ ní reè? Ə́ùwə́, bə̀ gíd in gá.

³⁵Sɛŋ tóò yaànà númú, pà' bə̀ dá wèéd váàndo rə kíìn zá'nàá. Sɛŋ bəraa rə bə gə́, bə̀ dá taà *in gíràá.»

³⁶Yéésù nàà bə̀ zagəm aa yóo sɔ̀ŋ: «Nɛ́ŋə̀ nə́ŋ̀má sèè *gɔ̀' puu bɛ̀ŋ́sə̀wà, dáá làà kə̀ gɔ̀' doo gá. Zá *gɔ̀' puu seè yɛɛ̀l yàá, bít *gɔ̀' seeké puu bɛ̀ŋ́sə̀wà rə kɔ̀, sɔ̀ɔ̀n wál kə̀ gɔ̀' doo rə gá.

³⁷Bít nɛ́ŋə̀ nə́ŋ̀má pɛ́n badn visə̀ nə́əd doo rú gá. Síngə́, badn visə̀ pììyì dɔbm̀ ú'ǹmbə̀ gə́, dá nə́əd də kíìn péǹ wɔbàá, bít badn kɔ̀ dákíìn za'nàá.

³⁸Zá aa dá sɔɔ̀n də gə́, m̀ pɛ́n badn visə̀ nə́əd puu rú!

³⁹Bít nɛ́ŋə̀ nyəə badn ú'keì gə́, í' badn pɛ́nke nyəə̀nmbə̀ gá. Kàandə, bàà bə̀ sáá: ‹Badn ú'ke làm kànsə̀n badn pɛ́nkeá.› »