Read Samba Leko Luka 7 Bible Online

Luka 7 - Samba Leko bible

Luka 7

¹Sɛŋ aa Yéésù gám bɛ́' nwɔŋ bəraa kóólé, nɛ́b zùúm aa tə́ù zɛŋ̀ də tə́ŋə́ rə, zá' ɛ̀m Kapɛrnaum bìlú.

²Sóózè bəd gààd nə́ŋ̀ ləə Kapɛrnaum bìlú. Sóózè gààd aarə, kə̀ kɔ̀'váàn í'sɛ̀lbə̀ naú, ləə mará, nyɛ́d zɔ̀gɔ̀ní vadǹmbìá.

³Zɔ̀ŋ aa kìì bə̀ gám Yéésù nwɔŋ yée gə́, tùmà *Yahudu bəd *dam bəd Yéésù sunú. Sóózè bəd gààd í' *dam bəd dá boò dɛ̀d Yéésù yaà oò gáŋ kɔ̀'váàn bəǹ sisá.

⁴Yaà bə̀ wə́ə́ Yéésù sunú, bít ìì dììù nyɛɛ̀mbìá, ìì bààù: «Də́ŋì nɛ́ŋ váàndo aa yée láŋ̀mbə̀ ba.

⁵Kàandə, í' nɛ́b bə́n bəd tə́ sɔ̀ɔ̀n, bít oòra wə̀' bə́ sə̀n *Yahudu bəd wúlwáàlbə̀ bə́ aa bìlə́ yóo.»

⁶Kàanyée gə́, Yéésù zá' ɛ̀m kə̀ boò tá. Zɔ̀ŋ aa ìì tə́ dáàn wə́ə̀n ligə̀ rə bə gə́, sóózè bəd gààd tùm ɔ̀dzéd oò bəd dá boò bààù: «Báátììkpɛ̀ŋá, ǹ vɔ̀gə̀l yíl ámbə̀ sí, kàandə, mə́ də́ŋ ámbə̀ dɛdǹ páànmbə̀ máá yiìl sé.

⁷Kə̀ taàbìá, mə́ zíg yíl mə́, mə́ də́ŋ dáànmbə̀ ám səǹ kə̀ yíl máá bə̀ sé. Zá m̀ bàà nwɔŋ nə́ŋ̀ní tə́ŋtə́ŋ, bít nɛ́d tù' bə̀ ma'ǹ mə́ si' dákíìn gágàá.

⁸Kə̀ aakíin də, máá kɔ̀ mə́ tə́ kə̀ nɛ́b gbàád mə́ bəd máá yiilú, bít mə́ tə́ kə̀ sóózè bəd máá dùú. Mə́ bàà nə́ŋ̀ì: ‹Ǹ dáá zɔ̀ŋə› gə́, dákíìn dáánàá! Bít mə́ bàà sóózè nə́ŋ̀ ɔ̀ɔ̀rì: ‹Ǹ yaà kúnú› gə́, dáà kíìn yaanàá! Bít mə́ bàà kɔ̀' mə́ nə́ŋ̀ì: ‹M̀ mà' in aaú› gə́, oò kɔ̀ dá in də kíìn ma'nàá!»

⁹Zɔ̀ŋ aa Yéésù kìì nwɔŋ bəraa sóózè bəd gààd gám yée gə́, kò'ù yíl yàá. Lìb bí' núù, bít bàà nɛ́b zùúm aa tə́ù bagǹ bòórú rə: «Mə́ tə́ ii kíìn baanàá, bé' mə́ bèd tɛ́mbagké luùm aa kóó sɛŋ nə́ŋ̀má sé, kóó zɔ̀ŋə Israila yɛ́b ba.»

¹⁰Nɛ́b aa bə̀ tùmà rə, kid ìì bíd kíìn sóózè bəd gààd yiilú. Dá ìì wə́ə́ gə́, ìì bɔ̀b kɔ̀'váàn oò si' gág yàá.

¹¹Záàn zɔ̀gɔ̀ gə́, Yéésù zá' ɛ̀m bìl nə́ŋ̀ú, bə̀ dɛ̀d bìl lə Nain. *Nɛ́b sáànmbə̀ oò bəd kə̀ nɛ́b zùúm bəd tá, bə̀ ɛ̀m kə̀ oò tá.

¹²Sɛŋ aa ɛ̀m yaà ìì wə́ə́ waàl aa ìì dá piìn bə kə̀ bìlə́ rə bə gə́, nɛ́b bəd pà' val ìì tə́ aàn sàà ba. Aarə, val kéèn nə́ŋ̀ wàà nə́ŋgùmá. Nɛ́b zùúm bìlə́ bə̀ bəd bə̀ ɛ̀mà kə̀ oò tá.

¹³Zɔ̀ŋ aa Báátììkpɛ̀ŋ bé'ù gə́, búúd mà'ùwì kə̀ oòra, bít bààù: «Ǹ kpə̀ə̀ sí!»

¹⁴Bít ɛ̀m gbarà yaà pig val gəd tééá. Nɛ́b val bə̀ pa'ǹ bəd ìì dìì kúnú. Yéésù bàà: «Wàà váàndoá, mə́ tə́ən kíìn baanàá, ǹ zá' lɛgú!»

¹⁵Bít val zá' kùm lɛgú, pìì nwɔŋ gáàmbìá. Yéésù kɔ̀ bíd pii wàà rə nà'á oò naú.

¹⁶Nɛ́b bəd kóólé, də́dǹ mà' bə̀ yàá. Bə̀ sɔ̀d Vɛnɛ́b mɔ̀'ǹmbìá, bít ìì bàà: «*Vɛnɛ́b gbantumsə̀ gbà'á nə́ŋ̀ yaà vúgì obə́n tə́ŋú! Bít Vɛnɛ́b yaàì nɛ́b oò bəd láŋ̀mbə̀ ba!»

¹⁷Bít Yahudiya yɛ́b bə kóólé, kə̀ yɛ́b bəraa kàrə́ rə tá, ìì kìì in aa Yéésù mà' rə yàá.

¹⁸Yohana *nɛ́b sáànmbə̀ bəd yaà ìì ùrə̀ in bəraa kóólé. Yohana dɛ̀rà nɛ́b bəd iira boò tə́ŋú,

¹⁹bít tùm bə̀ Báátììkpɛ̀ŋ sunú, bɔ̀b dá boò dɛ̀rə̀: «Ámda ń kùmsə̀n màn aa dáà yaànà reè, síngə́ kùm báà nwán nɛ́ŋə̀ nə́ŋ̀ ɔ̀ɔ̀rì?»

²⁰Zɔ̀ŋ aa dá ìì wə́ə́ Yéésù səǹ gə́, bə̀ bààù: «Yohana nɛ́d baptisma bə̀ piìn tùm báà yaà báà dɛ̀d n: ‹Ámda ń kùmsə̀n màn aa dáà yaànà reè, síngə́, báà nwán nɛ́ŋə̀ nə́ŋ̀ ɔ̀ɔ̀rì?› »

²¹Sɛŋ aarə bərə, Yéésù gáŋ nɛ́b bəd zùúm mad boò bərú, mad nwuukè boò rú, bìnlɛ́' nɛ́b bəd zùúm nwul vaksə́ naú, bít kèd nyəd bəd zùúm núùá. Sɛŋ də, bɔ̀b nɛ́b vɔ̀ɔ̀m bəraa iirə yée bə̀ tə́ wərà.

²²Bít Yéésù kè' í' nɛ́b aa Yohana tùmà rə: «Ɛ̀m bàà dáá ìì bí' in aa íí bé' rə Yohana ra, kə̀ aa íí kìì roó' Nyəd bəd tə́ núù bé'nàá, nɛ́b tə́ŋke bəd dun tə́ kíìn wɔ̀ràá, gərə́ bəd si' tə́ kíìn nyɛràá, kpuŋə̀ bəd tə́ túŋ kiinàá, val bəd tə́ kíìn díímàá, bít nɛ́b búúd bə̀ bəd bánì *Nwɔŋ Puu Sɔ̀ɔ̀nkè kiìnmbìá.

²³Màn aa bɔ̀' tɛ́mbagké oò máá bòórú síndə, Vɛnɛ́b dáù nɛɛ̀n zígǹ yílú!»

²⁴Zɔ̀ŋ aa nɛ́b aa Yohana tùmà rə, bə̀ ɛ̀m gə́, Yéésù pìì nɛ́b zùúm bəd nwɔŋ baànmbə̀ Yohana yílú, kə̀ aakíin: «Íí dáá níì ɛgǹmbə̀ fɔ̀gú gú? Dɛ̀gə́l nyìì aa nwul pɛ̀p tə́ wá'ǹ deè? Ə́ùwə́!

²⁵Kàan síngə́, íí dáá níì bé'ǹmbə̀ gú? Nɛ́ŋə̀ aa páá gɔ̀' sɔ̀ɔ̀nkè bəd deè? Zá, nɛ́b aa pál gɔ̀' sɔ̀ɔ̀nkè bəd, bít ìì kùm gbaŋə̀ rú rə, bə̀ tə́ gààd gbàád bəd yiilú.

²⁶Dáá íí bé'à níì gú? *Vɛnɛ́b gbantumsə̀ì? Èè, mə́ tə́ ii kíìn baanàá, Yohana kànsə̀n *Vɛnɛ́b gbantumsàá.

²⁷Kə̀ aakíin də, Yohana kùmsə̀n màn aa Núúboòd Gìdń gám nwɔŋ oò yílú, bàà: ‹Máára mə́ Vɛnɛ́b da, mə́ tùm *gbantumsə̀ mə́ tə́ ám númú, dáá oò kùd n kpaŋ̀ númú roó.›

²⁸Yéésù bàà zəg sɔ̀ŋ: ‹Mə́ tə́ ii kíìn baanàá, nɛ́ŋə̀ nə́ŋ̀má bə̀ lɛ̀bə̀ zɔ̀ŋə yɛ́b ba, kàn Yohana kə̀ gbà'á sé. Bít kàandə máá, nɛ́ŋə̀ bɛ̀ŋ́sə̀wà aa *Vɛnɛ́b gààrə́ rə, kànsə̀n Yohana kə̀ gbà'á.› »

²⁹Nɛ́b aa bə̀ tə́ù zɛŋ̀ də kóólé, kə̀ nɛ́b ba'káám bə̀ ke'ǹ bəd tá, bə̀ kìì nwɔŋ aa Yohana gám yée gə́, bə̀ dɛ̀rə̀ oò pii bənə́ baptisma. Kə̀ aakíin, bə̀ ì' taà bənə́ ke'nnə́ yàá, nwɔŋ aa Vɛnɛ́b gám də tə́ wɔ̀ɔ̀làá.

³⁰Zá *Farisa bəd gə̀b kə̀ *nɛ̀n indaŋ̀mbə̀ bəd gə̀b tá, làà bə̀ lɛ́' in aa Vɛnɛ́b í' kə̀ boò roó. Bə̀ məə baptisma ke'ǹmbə̀ Yohana naà bée.

³¹Yéésù bàà sɔ̀ŋ: «Kə̀ níì má taà nɛ́b aa bə́ŋyée rə də́'ǹ gú? Bə̀ lúŋ tə́ níì gú?

³²Bə̀ lúŋ tə́ yɛb yɛb aa ìì kùm waàl gbà'á rú roó. Bə̀ dɛ̀d ɔ̀dnə́ŋ̀ bərá, ìì bàà: ‹Bə́ íl ii náb sɔ̀ɔ̀nkè bəd kə̀ lérú, íí nàà sé! Bə́ pàà ii val náb kɔ̀ bít íí kpə̀ə̀ in sé!›

³³«Kàandə, Yohana nɛ́d baptisma bə̀ piìn yaà yàá. Líí gbèd gá, nyəə badn gá. Zá íí bàà: ‹Tə́ kə̀ nwul vaksə́ naà sisú!›

³⁴Nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə, yaà yàá. Tə́ gbèd líínàá, bít tə́ badn nyəənàá, bít íí bàà: ‹Ìì ɛ̀ga, Nɛ́ŋ Váàndo aa yée gə́, nɛ́d líísɛ́l bìá, bít nɛ́d wìdkè bìá. Oò gə́, nɛ́b ba'káám bə̀ ke'ǹ bəd ɔ̀dzérá, bít nɛ́b invaksə́ bə̀ ma'ǹ bəd ɔ̀dzérá!›

³⁵Zá ingabké Vɛnɛ́b bə̀ gə́, ì' yíl oò tə́ wɔ̀ɔ̀làá, kə̀ tù' oò bəraa tə́ ma'ǹ doó.»

³⁶*Farisa váàn nə́ŋ̀ dɛ̀d Yéésù oò yiilú, yaà oò líí in kə̀ obəǹ tá. Yéésù zá' ɛ̀m nɛ́ŋ váàndo aarə kàrú, bít dáá kùm gbèd magə̀ ba.

³⁷Nɛ́ŋ kéèndo invaksə́ bə̀ ma'ǹ bìl aarə rú. Zɔ̀ŋ aa kììà Yéésù tə́ gbèd magə̀ bə *Farisa váàn yiìl gə́, ɛ̀mà kə̀ bùn aa bə̀ kùd kə̀ *Albatre bəŋ də naú, nyìì kə̀ urdi;

³⁸bít yaà dìì Yéésù bòórú, zɔ̀ŋ aa wɔ̀d bí' dun bəroó. Kpə̀ə̀ iná, bít mɛ́' Yéésù dun kə̀ nyímwəlá. Kàanyée gə́, tə̀d nyímwəl lə kə̀ yíl gí' oò bərá; kú' Yéésù dun naú, bít zàd urdi Yéésù dun ba.

³⁹Zɔ̀ŋ aa *Farisa váàn aa dɛ̀rà Yéésù oò yiìl lə, bé' in aa kàangə́, sèl bàà oò tɛ́mú: «Dáà Nɛ́ŋ Váàndo aa tə́ *Vɛnɛ́b gbantumsə̀ gə́, dá nɛ́ŋ kéèndo aa tə́ù pigǹ yée kíìn gabàá, nɛ́ŋ kéèndo invaksə́ bə̀ ma'ǹná.»

⁴⁰Kàanyée gə́, Yéésù bàà *Farisa váàn aarə: «Simon, mə́ tə́ kə̀ nwɔŋ nə́ŋ̀ naà ámbə̀ baànmbìá.» Simon kè' í'ù: «M̀ bàà kúnú, Nɛ̀ná.»

⁴¹Bít Yéésù bàà: «Nɛ́b vɔ̀ɔ̀m bəd iira nɛ́d ba'kpob bə̀ piìn nə́ŋ̀ bàg bə̀ ba kpobá. Bàg nɛ́ŋə̀ nə́ŋ̀ ba' lɛ̀ɛ́ŋə̀ laa núnà zɔ̀ŋ núnà, bít nɛ́ŋə̀ nə́ŋ̀ ɔ̀d kɔ̀, bàgə̀ ba' lɛ̀ɛ́ŋə̀ laa iira zè kób.

⁴²Zɔ̀ŋ aa boò iirə kóólé, bə̀ bán kpob aarə káàn bí'ǹmbə̀ sín yée gə́, lò' dàà bə̀ kpob də kúnú, boò iirə kóólé. Nɛ́b aa boò iirə yée, nɛ́ɛ̀réè í' dáù sə̀n nɛɛ̀n taàn gú?»

⁴³Simon kè' í', bàà: «Mə́ sèl lə gə́, dá kuùm nɛ́ŋə̀ aa lò' bə̀ dààù ba'kpob zùúm doó.» Yéésù bààù: «Ḿ bàà tə́ sɔ̀ɔ̀ní.»

⁴⁴Bítsɔ̀ŋ, lìb bí' núù nɛ́ŋ kéèndo naú, bít bàà Simon: «Ḿ bé' nɛ́ŋ kéèndo aa yèè? Mə́ pììà zɔ̀ŋə ám yiilú, ḿ pii máà wəl dun bə̀ sugǹ sé. Zá oò gə́, sùg mə́ dunì kə̀ nyímwəl oòra, bít tə̀d kə̀ yíl gí' oò bərá.

⁴⁵Ń kè' mə́ dun ń kú' mə́ naà sé. Zá oò gə́, sɛŋ aa mə́ pììà roó, yaà wə́ə́ bə́ŋyóo, dàà mə́ dun kú'ǹmbə̀ sé.

⁴⁶Ń zàd mə́ urdi yíləsə́ sé. Zá oò gə́, zàd mə́ kílə́m solbə̀ì dun ba.

⁴⁷Kə̀ taàbìá, mə́ tə́ən taà baanàá' invaksə́ zùúm bəraa nɛ́ŋ kéèndo aa mà' rə, Vɛnɛ́b lɛ́' dààù yàá. Kə̀ taàbìá, ì' taà í'sɛ̀l gbà'á oò naú. Zá màn aa mà' invaksə́ zɔ̀gɔ̀ní rə, lò' bə̀ dààùwì gə́, í'sɛ̀l oò bə̀ kɔ̀ dá kuùm zɔ̀gɔ̀ní.»

⁴⁸Kàanyée gə́, Yéésù bàà nɛ́ŋ kéèndo rə: «Invaksə́ ḿ bəd lo' daamíìn yàá.»

⁴⁹Nɛ́b bəraa kùm bəd gbèd magə̀ bə kə̀ oò tə́ rə, bə̀ sɔ̀d seèlǹmbə̀ boò tɛ́mú: «Aa gə́, nɛ́ɛ̀réè kàan gú? Màn aa sèl gə́, bəǹ dákíìn báàn nɛ́b bəd invaksə́ lo'ǹ daànmbə̀ yéroó?»

⁵⁰Yéésù bàà nɛ́ŋ kéèndo aarə: «Tɛ́mbagké ń súun yàá. Ǹ ɛ̀m kə̀ tɛbàá!»