Read Samba Leko Yohana 10 Bible Online

Yohana 10 - Samba Leko bible

Yohana 10

¹Yéésù bàà: «Mə́ tə́ ii kíìn baanàá, aarə nwɔŋ sɔ̀ɔ̀ná, nɛ́ŋə̀ aa pìì bɛ̀rə̀ wúu, bàg wúl waàl bə sé, zá bít dáá na' ság yílú, dáá pìì zɔ̀ŋ nə́ŋ̀ gɔ̀ŋ bərə, màn aarə lííroá, bít nɛ́ŋə̀ in bə̀ nyá'ǹ ke'ǹ nɛ́b bəd naú.

²Zá màn aa pìì bɛ̀rə̀ wúl waàl bərə, oòra kùmsə̀n bɛ̀rə̀ yibàá.

³Nɛ́b bɛ̀rə̀ wúl waàl bə̀ nwáàn dáù waàl keràá, bít bɛ̀rə̀ bəd kɔ̀ bə̀ dá pə̀gə̀lib nwɔŋ oò kíìn kiinàá. Dá bɛ̀rə̀ oò bəd dɛdǹ kóólé kə̀ nə́gə́l tá, bít dá bə̀ vúŋ̀ gbaarú.

⁴Màìgə́ vú' bə̀ì gbaarú gə́, dá bə̀ kpaŋ̀ ké'nàá, bɛ̀rə̀ bəd kɔ̀ bə̀ dáù kíìn bagàá. Kàandə, bə̀ gàb pə̀gə̀lib nwɔŋ oò yàá.

⁵Zá sɛ̀ɛ́n aa bɛ̀rə̀ bəd bə̀ gàbə̀ síndə gə́, bə̀ bàgə̀ gá. Bɛ̀rə̀ bəd nùù bə̀ dá ɛɛ̀m zɔ̀ŋ bùúd kə̀ oòra; kàandə, bə̀ gàb pə̀gə̀lib nwɔŋ oò sé.»

⁶Yéésù nàà bə̀ kə̀ zagəm aa yóo, zá bə̀ kìì nwɔŋ wàà aa tə́ baàn də sé.

⁷Yéésù bàà sɔ̀ŋ: «Mə́ tə́ ii kíìn baanàá, aarə nwɔŋ sɔ̀ɔ̀ná, mə́ bɛ̀rə̀ wúl waàlá.

⁸Nɛ́b aa éèn bə̀ yaà máá númú rə kóólé, bə̀ lííro bərá, bə̀ nɛ́b in bə̀ nyá'ǹ ke'ǹ bərá. Zá bɛ̀rə̀ bəd bə̀ kè' nwɔŋ boò sé.

⁹Máára mə́ kùmsə̀n wúl waàlá. Màn aa pìì bàg máá səǹ də, dákíìn súúnàá. Dákíìn báàn piìnmbìá, dákíìn báàn vúgǹmbìá, bít dá inlíìnmbə̀ kíìn bɔbàá.

¹⁰Lííro gə́, yaà bɔɔ̀n pa'ǹmbìá, lo'ǹmbìá, bít yɛɛ̀lǹmbìá. Zá máá gə́, mə́ yaà rə, bɔ̀b nɛ́b bəd boò bɔ̀b gɔ̀ŋsá, bít boò bɔ̀b gɔ̀ŋsə́ rə gbà'ákù.

¹¹«Máára mə́ kùmsə̀n bɛ̀rə̀ yibə̀ sɔ̀ɔ̀ná. Bɛ̀rə̀ yibə̀ sɔ̀ɔ̀n tə́ gɔ̀ŋsə́ oò piìn bɛ̀rə̀ oò bəd bòórú.

¹²Nɛ́ŋə̀ aa mà' tù' ba' bə̀ saàn də, bɛ̀rə̀ yibə̀ gá, bít kə̀ bɛ̀rə̀ naà sé. Nɛ́ŋə̀ aarə, bé' gbàál lɛ̀gsɛ́rə̀ tóò yaànnà oò səǹ gə́, nùù dá bɛ̀rə̀ bəd kíìn daanàá. Gbàál lɛ̀gsɛ́rə̀ kɔ̀, dá bɛ̀rə̀ bəd kíìn koràá, bít dá bə̀ kíìn niŋ̀ sa'nàá.

¹³Nùù rə, tə́ ba' tù' ma'nàá, kə̀ taàbìá, sèl taà bɛ̀rə̀ bəd sé.

¹⁴Máára mə́ kùmsə̀n bɛ̀rə̀ yibə̀ sɔ̀ɔ̀ná. Mə́ gàb bɛ̀rə̀ mə́ bəd yàá, bít bɛ̀rə̀ mə́ bəd kɔ̀, ìì gàb mə́ yàá,

¹⁵kìínmbə̀ nɛɛ̀n aa Báá mə́ gàb mə́ rú, máá kɔ̀ mə́ gàb Báá mə́ rú rə kíin. Bít mə́ tə́ gɔ̀ŋsə́ mə́ piìn, bɛ̀rə̀ mə́ bəd bòórú.

¹⁶Mə́ tə́ kə̀ bɛ̀rə̀ ɔ̀d bəd naú, boò zɔ̀ŋə bɛ̀rə̀ wúl aa rú sé. Máá bàà kíìn aanàá, bə̀ dá nwɔŋ mə́ kíìn ke'nàá. Bít bɛ̀rə̀ gə̀b dá kuùm nə́ŋ̀ní, kə̀ bɛ̀rə̀ yibə̀ nə́ŋ̀ní.

¹⁷«Báá mə́ í' mə́ rə, mə́ tə́ gɔ̀ŋsə́ mə́ piinàá, bɔ̀b bít máà bɔ̀b taà sɔ̀ŋ.

¹⁸Nɛ́ŋə̀ nə́ŋ̀má pà' mə́ gɔ̀ŋsə́ gá. Zá mə́ pii gɔ̀ŋsə́ mə́ kə̀ tɛ́m máá bìá, mə́ tə́ kə̀ kpɛŋsɛ́l naà piìnmbìá; bít mə́ tə́ kə̀ kpɛŋsɛ́l naà, gɔ̀ŋsə́ ke'ǹmbə̀ sɔ̀ŋ. Aa yérə, in aa Báá mə́ bàà máà mà' roó.»

¹⁹Nwɔŋ bəraa yée bòórú, *Yahudu bərì pɛɛ̀l taà sɔ̀ŋ.

²⁰Nɛ́b zùúm boò tə́ŋú, ìì bàà: «Tə́ kə̀ nwul vaksə́ naú! Oòrə kèérá! Kə̀ níìbə̀ íí kè'ù taà nwɔŋ gú?»

²¹Zá Nɛ́b ɔ̀d kam bàà: «Nɛ́ŋə̀ aa kə̀ nwul vaksə́ naà rə, bán nwɔŋ gáàmbə̀ sɔ̀ɔ̀nkè kə̀ aakíin gá. Nɛ́d nwul vaksə́ bə̀ nə́ŋ̀ dá bée báàn nyəd bəd núù kedǹ bèì?»

²²Sɛŋ də, nwùm sɛŋú, bə̀ tə́ wálke ma'ǹ Urusalima bìlú. Wálke aarə, seèl záànmbə̀ kedké láŋsə́ wúl bìá.

²³Yéésù ɛ̀m gəə̀l láŋsə́ wúuú, Salomon gbàg dùú.

²⁴Kàanyée gə́, *Yahudu kambəd wál yaà bə̀ páù tə́ŋú, bít ìì dɛ̀rə̀: «Ń dá bə daàn kə̀ pìrə̀ tɛ́mú, dá wə́ə̀n sɛŋ déè bə gú? Ń tə́ sə̀n Krístù gə́, bàà ǹ nyɛ́' bə́ biní.»

²⁵Yéésù kè' í' bə̀: «Mə́ bàà iiyà yàá, zá íí í' mə́ nwɔŋ ke'ǹmbə̀ sé. Tù' bəraa mə́ tə́ ma'ǹ Báá mə́ nə́gə́lə́ rə, mà' sedako tə́ máá yílú.

²⁶Zá íí bàg mə́ sé; kàandə, íí bɛ̀rə̀ gə̀b mə́ bəd tə́ŋə́ sé.

²⁷Bɛ̀rə̀ mə́ bəd bə̀ kè' mə́ nwɔŋ tə́ kúnú. Mə́ gàb bə̀ yàá, bít bə̀ bàg mə́ tə́ kúnú.

²⁸Mə́ tə́ bə̀ *gɔ̀ŋsə́ aa bɛ́d bə̀ gá rə piinàá. Val kòd bə̀ bə gá, bít nɛ́ŋə̀ nə́ŋ̀má bán bə̀ nyá'ǹ ke'ǹmbə̀ máá nɛɛ̀n tɛ́mə́ gá.

²⁹Báá mə́ pii mə́ sə̀n bɛ̀rə̀ mə́ bərá. Oòra kànsə̀n in gə́ kóólé. Nɛ́ŋə̀ nə́ŋ̀má bán bɛ̀rə̀ bəd nyá'ǹ ke'ǹmbə̀ Báá mə́ nɛɛ̀n tɛ́mə́ gá.

³⁰Mə́ kə̀ Báá mə́ tá, bə́ tə́ nə́ŋ̀ní.»

³¹Yahudu bəd nɛ́b yíl bə̀ bəd bə̀ pú' bəŋ bəd sɔ̀ŋ, bɔbm̀ laàlǹmbə̀ oò bə̀ kə̀ kùrú.

³²Kàanyée gə́, Yéésù bàà bə̀ taá: «Mə́ mà' tù' sɔ̀ɔ̀nkè bəd zùúm aí númú, kə̀ Báá mə́ kpɛŋsɛ́lá. Tù' déè bòórú, íí í' mə́ taà laàn lo'ǹmbə̀ kə̀ bəŋ gú?»

³³*Yahudu bəd kè' bə̀ í'ù gə́, bə̀ bàà: «Bə́ í' n laàn lo'ǹmbə̀ kə̀ bəŋ, tù' sɔ̀ɔ̀nkè bòórú gá. Zá ń gám nwɔŋ vaksə́ tə́ Vɛnɛ́b yílú. Ám gə́, ń nɛ́ŋàá, bít ń í' yíl ń zígǹmbə̀ bəǹ Vɛnɛ́bá!»

³⁴Yéésù kè' í' bə̀: «Bə̀ bád tə́ aí núúboòd indaŋ̀mbə̀ rú gə́, Vɛnɛ́b bàà: ‹Aíra íí kùmsə̀n vɛnɛ́b bərá.›

³⁵Bə́n gabm̀ yàá, bə́n báan nwɔŋ aa Núúboòd Gìdń aa bàà rə dúŋ̀mbə̀ gá. Nɛ́b bəraa Vɛnɛ́b dɛ̀d bə̀ vɛnɛ́b bəd də, nɛ́b bəraa tə́ nwɔŋ gáàm kə̀ boò roó.

³⁶Máá kɔ̀, Vɛnɛ́b sààvúŋ máà sùnú, bít tùm máà zɔ̀ŋə yɛ́b ba. Ééleè íí bàà taà, mə́ *gám nwɔŋ vaksə́ tə́ Vɛnɛ́b yílú, nwɔŋ aa mə́ bàà mə́ Vɛnɛ́b Wàà rə bə gú?

³⁷Dáà mə́ mà' Báá Vɛnɛ́b tù' síngə́, ìì bàg mə́ sí.

³⁸Zá mə́ mà' tù' bəraa rəì gə́, kóó íí bàg mə́ sé, ìì bàg tù' bəraa mə́ tə́ ma'ǹ də kúnú, bɔ̀b ìì sán bít ìì gàb kúnú, Báá tə́ máá rú, bít máá kɔ̀ mə́ tə́ Báá rú.»

³⁹Bít nɔ̀ŋ bə̀ sàà sɔ̀ŋ, oò bə̀ ko'ǹmbìá. Zá nùù súú kíìn boò nɛɛ̀n tɛ́mú.

⁴⁰Yéésù zá' ɛ̀m Urdun nwuu naà gúu sɔ̀ŋ, zɔ̀ŋ aa Yohana sɔ̀d pii nɛ́b bəd baptisma sɔ̀gke bə̀ bəroó, bít dáá kùm wərà.

⁴¹Nɛ́b bəd zùúm, bə̀ yaà oò sunú, bə̀ bàà: «Yohana mà' inkɔrə nə́ŋ̀má sé. Zá nwɔŋ aa gám Nɛ́ŋ Váàndo aa yílə́ rə gə́ kóólé, nwɔŋ sɔ̀ɔ̀ná.»

⁴²Bít zɔ̀ŋ aarə ba, nɛ́b bəd zùúm, bàg Yéésù yàá.