Read Samba Leko Yohana 12 Bible Online

Yohana 12 - Samba Leko bible

Yohana 12

¹Dàà sɛŋ nɔ̀ŋgɔ̀s, *Paska bə̀ ma'ǹná. Yéésù zá' ɛ̀m Betaniya, bìl aa Lazarus ləə rú roó. Lazarus də, nɛ́ŋə̀ aa Yéésù díímà valə́ roó.

²Dáá wə́ə́ wərə̀ gə́, bə̀ mà'ù inlíìnmbìá, nyàmbírə́má. Marta gàb tə́ù sə̀n inlíìnmbə̀ rə piinàá. Yéésù kùm gbèd magə̀ bə kə̀ Lazarus tá, kə̀ nɛ́b kambəd tá.

³Mariyama pà' urdi lítrə̀ tɔ̀d nə́ŋ̀. Urdi rə, Urdi dùm nwuukèá. Bə̀ kùd kə̀ *téé nyìì aa bə̀ dɛ̀d nard roó, bít yaà zà' taà Yéésù dun ba, tə̀d kə̀ yíl gí' oò bərá. Wúl kə̀ zɔ̀ŋtá, nyìì kə̀ urdi soolá.

⁴Nɛ́ŋə̀ nə́ŋ̀ *nɛ́b sáànmbə̀ bəd tə́ŋú, nə́gə́l oò Yudas Iskariyot, màn aa dá Yéésù lɛ́bm̀ doó, bàà kə̀ aakíin:

⁵«Kə̀ níìbə̀ bə̀ gə́l taà urdi aa ba' yáàm laa núnà zɔ̀ŋ toora bít bə̀ pii taà ba' rə nɛ́b búúd bə̀ bəd sín gú?»

⁶Bàà kàandə, sèl nɛ́b búúd bə̀ nwɔŋ gá, zá oòrə, lííroá. Kò' sáá sə̀n ba' nə́əd naú, pà' sáá in aa bə̀ páá rú wərə̀ rə kúnú.

⁷Zá Yéésù bàà: «Ǹ vɔ̀gə̀l Mariyama sí! Ǹ dààù oò zíg in aa kə̀ naà rə, nyàm aa bə̀ dá mə́ ləə̀n bə sààrú rə bìá.

⁸Nɛ́b búúd bə̀ bəd dá kuùm kə̀ aí tá, sɛŋ gə́ kóólé. Zá máá gə́, mə́ kùm kə̀ aí tə́ sɛŋ gə́ kóólé gá.»

⁹*Yahudu bəd gùùbə̀, bə̀ kìì Yéésù tə́ Betaniya. Bə̀ ɛ̀m wərə̀ Yéésù nwɔŋ bòórú ní gá, zá bə̀ ɛ̀m Lazarus aa Yéésù díímə̀ valə́ rə dáàn bé'ǹmbə̀ kɔ̀.

¹⁰Kàanyée gə́, *láŋsə́ gààd bəd kɔ̀ bə̀ dúg gúsá, Lazarus lo'ǹmbìá.

¹¹Lazarus bòórú, Yahudu bəd zùúm, zá' ìì dàà bə̀ tə́ kúnú, bít dá ìì bàg tə́ Yéésù ra.

¹²Nwúndù oòrə, nɛ́b gùùbə̀ bəraa bə̀ yaà *Paska ma'ǹmbə̀ rə, bə̀ kìì gə́, Yéésù yaà tə́ wə́ə̀n Urusalima bìlú.

¹³Bə̀ dùb bəd gbùŋ yɛsàá, bít vúg yaà bə̀ sáŋ kə̀ Yéésù kpaŋ̀ tɛ́mú. Ìì páá kpə̀ə́ǹá, ìì bàà: «Kaŋsɛ́l oò kùm Vɛnɛ́b naú! Vɛnɛ́b oò zíg màn aa tóò yaànnà Báátììkpɛ̀ŋ nə́gə́lə́ rə nɛɛ̀n yílú! Vɛnɛ́b oò zíg nɛɛ̀n oò, gààd gbà'á Israila bə̀ yílú!»

¹⁴Yéésù na' kùm vɔɔmlə̀ wàà yílú, kìínmbə̀ Núúboòd Gìdń bàà rə kíin:

¹⁵«Ǹ nùù də́dǹ sí, nɛ́d Siyona bìá. Ǹ ɛ̀g núùá, gààd ń tóò yaanàá, kùm tə́ vɔɔmlə̀ wàà yílú.»

¹⁶Sɛŋ aarə bərə, *nɛ́b sáànmbə̀ oò bəd bə̀ gàb in bəraa bə́ŋ̀ sé. Zá sɛŋ aa Yéésù na' Vɛnɛ́b kaŋsɛ́lú rə, sèl bə̀ zá' taà nwɔŋ aa Núúboòd Gìdń bàà oò yílə́ roó; bít in gə́ kóólé, taà kìínmbə̀ nɛɛ̀n aa Núúboòd Gìdń bàà bə̀ rə kíin.

¹⁷Nɛ́b bəd zùúm, bə̀ kùmà kə̀ Yéésù tá, sɛŋ aa bàà Lazarus gə́, oò vúgà kíìn sàà rú, bít díímə̀wà valú roó. Nɛ́b aarə, bə̀ tə́ in aa bə̀ bé'à rə uràá.

¹⁸Nɛ́b zùúm kììà Yéésù mà' inkɔrə aa yée gə́, bə̀ yaà taà sáŋ̀mbə̀ kə̀ oòra.

¹⁹Kàanyée gə́, *Farisa bəd bə̀ gám boò bòdbə kə̀ aakíin: «Ìì ɛ̀g núùá, bə́n báàn in nə́ŋ̀má ma'ǹmbə̀ gá. Nɛ́b bəd kóólé, bə̀ ɛ̀m tə́ kə̀ Yéésù tá.»

²⁰Grɛg kam kùm nɛ́b zùúm aa bə̀ yaà Vɛnɛ́b pɔ̀bm̀bə̀ Urusalima bìlú, *Paska sɛŋú rə tə́ŋú.

²¹Bə̀ gbarà Filip sunú (Filip kɔ̀ nɛ́b Bɛdsaida bìlú, Galili yɛ́b bə bìá) bít bə̀ bààù: «Gbàároá, bə́ í' Yéésù bé'ǹmbìá.»

²²Filip ɛ̀m dáá bàà Andre ra, bít boò iirə kóólé, wál ɛ̀m dáá bə̀ bàà Yéésù ra.

²³Yéésù kè' í' bə̀: «Bə́ŋyée, sɛŋ aa nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə dá kaŋsɛ́l bɔbm̀ bərə, wə́ə́ yàá.

²⁴Mə́ tə́ ii kíìn baanàá, aarə nwɔŋ sɔ̀ɔ̀ná' Inlíìnmbə̀ aa bə̀ dɛ̀d blé rə, bə̀ wùù luùm oòrəì yɛ́b ba, vàd síngə́, dáá kùm oò nə́ŋ̀ní. Zá vàrì gə́, lɛ̀b yɛb zùúm.

²⁵Màn aa í' gɔ̀ŋsə́ oòì zɔ̀ŋə yɛ́b bərə, dáù kíìn bɔ̀'nàá. Zá màn aa zèè gɔ̀ŋsə́ oòì zɔ̀ŋə yɛ́b bərə, dá gɔ̀ŋsə́ aa bɛ́d bə gá rə bɔbàá.

²⁶Dáà nɛ́ŋə̀ nə́ŋ̀ í' mə́ tùsì ma'ǹmbə̀ gə́, oò bàg mə́ kúnú. Kə̀ aakíin də, nɛ́d tù' bə̀ ma'ǹ mə́ kɔ̀, dá kuùm zɔ̀ŋ aa mə́ kùm bəroó. Kóó nɛ́ɛ̀réè, í' mə́ tùsì ma'ǹmbə̀ gə́, Báá mə́ dáù kíìn káŋàá.»

²⁷«Bə́ŋyée tɛ́m nyágə́l mə́ yàá. Má leè baàn gú? Má bée baàn: Báá, ǹ súú mə́ búúd sɛŋ aa yée rúì? Ə́ùwə́, zá in aa àà máà zɔ̀ŋə yɛ́b bə bə́ŋyée rə taá.

²⁸Báá, ǹ káŋ nə́gə́l ń da!» Pə̀gə̀lib nwɔŋ vúgà lɛgə́ poú, bàà: «Mə́ káŋ̀ yàá. Zá bít máù káŋ̀ puuní sɔ̀ŋ.»

²⁹Nɛ́b zùúm aa dìì wərə̀, bít bə̀ kìì pə̀gə̀lib nwɔŋ aarə, bə̀ bàà: «Aarə kɔ̀myɛ́bsə̀ péé sùnú!» Nɛ́b kam bàà: «*Malaika nə́ŋ̀ gámà sə̀n nwɔŋá!»

³⁰Zá Yéésù bàà bə̀: «Pə̀gə̀lib nwɔŋ aa yérə, ɛ̀g mə́ sé, zá ɛ̀g tə́ aíra.

³¹Sɛŋ aa bə́ŋyée, kùmsə̀n sɛŋ aa bə̀ dá yɛ́b aa yée fágǹ bəroó. Bə́ŋyée, bə̀ dá gààd zɔ̀ŋə yɛ́b bə bə̀ kíìn niŋàá.

³²Bít máá gə́, bə̀ ná' mə́ì lɛgə́ gə́, máá nɛ́b bəd kóólé gubm̀ aànnà máá sunú.»

³³(Kə̀ nwɔŋ bəraa yóo, bàà ì' taà nɛɛ̀n aa val dáù ko'ǹ dú roó.)

³⁴Nɛ́b zùúm bəd kè' bə̀ í'ù: «Bə́ kììà indaŋ̀mbə̀ bəd núúboòrú, Krístù gə́, val kò'ù bə gá. Kàanyée gə́, ééleè ń dá taà bán baànmbə̀, pà' boò ná' nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə sína lɛgə́ gú? Nɛ́ɛ̀réè kùmsə̀n nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə gú?»

³⁵Yéésù bàà bə̀: «Bə́ŋ̀ laa nyɛdkè tə́ aí tə́ŋú, zá sɛŋ zɔ̀gɔ̀ní bìá. Ìì ɛ̀m kúnú, sɛŋ aa bə́ŋ̀ íí tə́ kə̀ laa nyɛdkè naà roó, bɔ̀b tígə́l nìb yaà oò bɔ̀bi sí. Kə̀ aakíin də, nɛ́ŋə̀ aa ɛ̀m tígə́lə́ rə, gàb zɔ̀ŋ aa tə́ dáàn bərə sé.

³⁶Sɛŋ aa bə́ŋ̀ íí tə́ kə̀ laa nyɛdkè naà yée, ìì bàg laa nyɛdkè aa roó, bɔ̀b ìì kùm laa nyɛdkè yɛb bərá.» Yéésù bàà bɛ́' nwɔŋ bəraa gə́, zá' ɛ̀m dá mə́' kúnú.

³⁷Kə̀ inkɔrə zùúm bəraa mà' boò núùrú rə tə́ kóólé, ìì bàgə̀ sé,

³⁸bɔ̀b nwɔŋ aa *Vɛnɛ́b gbantumsə̀ aa bə̀ dɛ̀rə̀ Esaya rə bàà rə, oò ma'míìn kúnú: «Báátììkpɛ̀ŋá, nɛ́ɛ̀réè kè' sə̀n nwɔŋ bə́ gú? Bít nɛ́ɛ̀réè núùrú, Báátììkpɛ̀ŋ ì' taà kpɛŋsɛ́l oò gú?»

³⁹Esaya bàà zəg gə́, bə̀ bán bagǹmbə̀ gá rə:

⁴⁰«Vɛnɛ́b bí' bə̀ ìì nyəərá, kpɛ́ŋ bə̀ tɛ́m yàá. Mà' kə̀ aakíin də, bɔ̀b boò bé' núù sí, kìì boò gàb nwɔŋ sí, bít lìb boò bí' núù máá naà, bɔ̀b máà súú bə̀ kíin sí.»

⁴¹Esaya bàà nwɔŋ aarə kàandə, bé' Yéésù kaŋsɛ́l laa yàá, bít gám taà nwɔŋ oòra.

⁴²Kóó Yahudu bəd nɛ́b yíl bə̀ bəd tə́ŋə́ máá, nɛ́b zùúm bəd bə̀ bàg Yéésù yàá. Zá *Farisa bəd gə̀b bòórú, bə̀ məə taà baàn nyɛ́'ǹmbə̀ dág, nɛ́b bəd númú. Bə̀ nùù də́dǹ, nìŋ bə̀ dá bənə́ kíìn vú'ǹ *Yahudu bəd wúlwáàlbə̀ boò rú.

⁴³Í' bə̀ pɛ̀d nɛ́b bəd boò káŋ bənə́ sùnú, kə̀ kaŋsɛ́l aa vúgà Vɛnɛ́b naà rə gə́ roó.

⁴⁴Yéésù gám nwɔŋ lɛgú, bàà: «Màn aa bàg mə́ rə, bàg máá ní gá, zá bàg màn aa tùm máà rəì kɔ̀.

⁴⁵Nɛ́ŋə̀ aa bé' mə́ rə, bé' nɛ́ŋə̀ aa tùm máà rəì kɔ̀.

⁴⁶Máá gə́, mə́ yaà zɔ̀ŋə yɛ́b bə kìínmbə̀ laa nyɛdkè kíin, bɔ̀b kóó nɛ́ɛ̀réè, bàg mə́ì gə́, oò kùm tígə́lə́ sí.

⁴⁷Dáà nɛ́ŋə̀ nə́ŋ̀ kìì nwɔŋ mə́ bəd yàá, bít mà' tù' kə̀ kùrú síngə́, máára fág máù sə̀n ko'ǹ gá. Kə̀ aakíin də, mə́ yaà zɔ̀ŋə yɛ́b bərə, bɔ̀b nɛ́b bəd súùnmbìá, zá mə́ yaà bə̀ fágǹ ko'ǹmbə̀ gá.

⁴⁸Nɛ́ŋə̀ aa məə dàà mə́, bít kè' nwɔŋ mə́ bəd síndə, Vɛnɛ́b fág dáù kíìn ko'nàá. Insánke aa mə́ pii rə, fág dáù sə̀n ko'ǹ nyàm aa yɛ́b dá bɛ́dǹ bəroó.

⁴⁹Kàandə, nwɔŋ bəraa rə, mə́ gám kə̀ kpɛŋsɛ́l máá bə̀ ní sé. Zá Báá tùm máà sə̀n kə̀ yíl oòra, bàà máà sə̀n nwɔŋ aa máá baàn doó, bít kə̀ nwɔŋ aa máá nɛ́b bəd sáàn doó.

⁵⁰Bít mə́ gàb yàá, indaŋ̀mbə̀ oò pii sə̀n *gɔ̀ŋsə́ aa bɛ́d bə gá roó. Kə̀ aakíin də, nwɔŋ aa mə́ bàà rə, mə́ bàà tə́ kìínmbə̀ Báá mə́ bàà máà rə kíin.»