Read Samba Leko Yohana 14 Bible Online

Yohana 14 - Samba Leko bible

Yohana 14

¹Yéésù bàà *nɛ́b sáànmbə̀ oò bəd: «Tɛ́m oò nyágə́li sí. Ìì zíg tɛ́m Vɛnɛ́b naú, bít ìì zíg tɛ́m máá naà kɔ̀.

²Zɔ̀ŋ ləə̀nmbə̀ tə́ zùúm Báá *Vɛnɛ́b yiilú. Dáà aarə nwɔŋ sɔ̀ɔ̀n síngə́, mə́ bàà ii gá. Kə̀ taàbìá, máá kíìn ɛmàá, máá ii dáàn zɔ̀ŋ ləə̀nmbə̀ kuràá.

³Bít ɛ̀m dá mə́ kùriyà zɔ̀ŋ ləə̀nmbə̀ì gə́, kid máà kíìn bíràá, bít yaà máá ii kíìn pa'nàá. Kə̀ aakíin də, íí dáá ɛɛ̀m kə̀ máá tá, bɔ̀b zɔ̀ŋ aa mə́ ləə bərə, aí kɔ̀ dáì ləə wərə̀ kɔ̀.

⁴Zɔ̀ŋ aa mə́ tə́ dáàn bərə, íí gàb kpaŋ̀ oòrə yàá.»

⁵Tomas bààù: «Báátììkpɛ̀ŋá, bə́ gàb zɔ̀ŋ aa ń tə́ dáàn bərə sé. Ééleè bá taà báàn kpaŋ̀ də gabm̀bə̀ gú?»

⁶Yéésù kè' í'ù: «Máára mə́ kùmsə̀n kpaŋ̀ aa tə́ vɛ́nà i'ǹ Vɛnɛ́b yílú, bít tə́ nɛ́b bəd gɔ̀ŋsə́ piìn doó. Nɛ́ŋə̀ nə́ŋ̀má bán dáànmbə̀ Báá sunú, bàg máá səǹ gá gə́ sé.

⁷Dáà íí gàb mə́ì gə́, íí dá Báá mə́ kíìn gabm̀ kɔ̀. Bít sɔ̀d bə́ŋyóo, íí gàbə̀ yàá, bít íí bé'ù yàá.»

⁸Filip bààù: «Báátììkpɛ̀ŋá, ǹ ì' bə́ Báá ra, in aa bə́ í' rə taà ní, dá bə́ sə̀ní də́ŋàá.»

⁹Yéésù kè' í'ù: «Nyàam kpɔ̀ɔ̀m, mə́ tə́ taà kə̀ aí tá, bít ń gàb mə́ sín ní sàà wa, Filip? Màn aa bé' mə́ rə, bé' Báá mə́ yàá. Kə̀ níìbə̀ ḿ bàà taà: ‹Ǹ ì' bə́ Báá› gú?

¹⁰Gabm̀bə̀ mə́ tə́ Báá rú, bít Báá kɔ̀ tə́ máá rú rə, ń gàb sínì? Nwɔŋ bəraa mə́ tə́ ii baàn də gə́ kóólé, vúgà máá naà gá. Báá aa kùm máá rú rə, mà' sə̀n tù' oò bəd máá rú.

¹¹Ìì kè' mə́ kúnú, màìgə́ mə́ bààì mə́ kùm tə́ Báá rú, bít Báá kɔ̀ kùm tə́ máá rú gə́ roó. Íí kè' nwɔŋ mə́ síngə́, ogə́ ìì kè' tù' bəraa mə́ tə́ ma'ǹ doó.

¹²Mə́ tə́ ii kíìn baanàá, aarə nwɔŋ sɔ̀ɔ̀ná, màn aa bàg mə́ rə, oò kɔ̀ dá tù' bəraa mə́ tə́ ma'ǹ də ma'ǹ kɔ̀. Dá tù' gbàád bəraa kàn nɛɛ̀n də ma'nàá. Kàandə, mə́ tə́ ɛɛ̀m Báá mə́ sunú.

¹³Bít in aa íí dɛ̀d máá nə́gə́lə́ rə gə́ kóólé, má ii kíìn ma'nàá, bɔ̀b Wàà oò ì' nɛɛ̀n aa Báá oò kaŋsɛ́l kùm dú roó.

¹⁴Íí nyɛ̀m in nə́ŋ̀ì máá nə́gə́lə́ gə́, máá ii in də kíìn ma'nàá.»

¹⁵«Dáà íí í' mə́ì gə́, íí dá indaŋ̀mbə̀ mə́ bəd kíìn ləənàá.

¹⁶Máá Báá dɛràá, oò pii iiyà nɛ́ŋə̀ nə́ŋ̀ ɔ̀ɔ̀rá, bɔ̀b yaà oò láŋ ii ba, oò kùm kə̀ aí tá, sɛŋ gə́ kóólé.

¹⁷Oòrə, nɛ́ŋə̀ aa bə̀ dɛ̀rə̀ Nwul Gìdń, tə́ ii vɛ́nà i'ǹ doó. Nɛ́b aa zɔ̀ŋə yɛ́b bərə, bə̀ bánə̀ ke'ǹmbə̀ gá; sáad də, bə̀ bánnə̀ bé'ǹmbə̀ gá, ìì bánnə̀ gabm̀bə̀ gá. Zá aí gə́, íí gàbə̀ yàá. Kàandə, kùm tə́ kə̀ aí tá, bít tə́ aí rú.

¹⁸«Mə́ dàà ii aí ní, kìínmbə̀ val yɛb kíin gá. Kid máà bídǹnà aí sunú.

¹⁹Sɛŋ zɔ̀ŋə zɔ̀gɔ̀ gə́, nɛ́b aa zɔ̀ŋə yɛ́b bərə, ìì bé' mə́ sɔ̀ŋ gá. Zá aí gə́, íí dá mə́ kíìn bé'nàá; sáad də, mə́ tə́ kə̀ gɔ̀ŋsá, bít aí kɔ̀ íí dáá kuùm kə̀ gɔ̀ŋsə́ kɔ̀.

²⁰Màìgə́, sɛŋ də yaà wə́ə́ì gə́, íí dá taà gabàá, mə́ tə́ Báá rú, Báá kɔ̀ tə́ máá rú, máá kɔ̀ mə́ tə́ aí rú.

²¹«Màn aa kò' kùd indaŋ̀mbə̀ mə́ bəd oò tɛ́mú, bít ləə nwɔŋ boò rə, í' mə́ sùnú. Bít nɛ́ŋə̀ aa í' mə́ rə, Báá mə́ dáù kíìn í'nàá. Máù kíìn í'nàá, bít máù nɛɛ̀n aa mə́ kùm dú rə i'nàá.»

²²Yuda (Yuda Iskariyot gá), bààù: «Báátììkpɛ̀ŋá, ééleè ń dá bə́ taà nɛɛ̀n aa ń kùm dú rə i'nàá, bít ń ì' taà nɛ́b bəraa zɔ̀ŋə yɛ́b bərə, nɛɛ̀n aa ń kùm dú rə gá gú?»

²³Yéésù kè' í'ù: «Màn aa í' mə́ rə, dá nwɔŋ mə́ kíìn ke'nàá. Báá mə́ dáù kíìn í'nàá, bít mə́ kə̀ Báá tá, báà yaànnà oò sunú, bít yaà bá kuùm kə̀ oò tá.

²⁴Màn aa í' mə́ síndə, kè' nwɔŋ mə́ bəd gá. Nwɔŋ aa íí kìì mə́ tə́ ii baàn yérə, vúgà máá naà gá, zá vúgà Báá máà tùm máà rə naú.

²⁵«Bə́ŋ̀ mə́ tə́ kuùm kə̀ aí tə́ yée, mə́ bàà ii taà nwɔŋ aa roó.

²⁶Màn aa dá ii láŋ̀ bərə, Nwul Gìdń aa Báá mə́ dáiyà tuùm piìnnà máá nə́gə́lə́ roó. Yaà dá ii in bəd sáàn kóólé, bít dá ii in bəraa mə́ bàà ii rə kíìn seèl záàn kóólé.

²⁷«Mə́ tə́ ii tɛbə̀ daanàá, bít mə́ tə́ ii tɛbə̀ mə́ piinàá. Mə́ pii ii kìínmbə̀ nɛɛ̀n aa nɛ́b zɔ̀ŋə yɛ́b bə bə̀ pii rə kíin gá. Tɛ́m oò nyágə́li sí, bít ìì nùù də́dǹ sí.

²⁸Íí kìì nɛɛ̀n aa mə́ bàà ii rú rə yàá: ‹Má kíìn ɛmàá, zá kid máà kíìn bídǹnà aí sunú.› Dáà íí í' mə́ì vɛ́nà gə́, íí dá tɛ́m làmkè kiìn, kə̀ gabm̀bə̀ mə́ tə́ kíìn ɛ̀m Báá mə́ sunú. Sáad də, Báá mə́ sə̀n gbà'á kə̀ máára.

²⁹Bə́ŋyée mə́ bàà ii yàá, bɔ̀b bə́ŋ̀ in bəraa dá wə́ə̀n gə́ roó. Yaà bə̀ dá wə́ə̀n gə́, ìì kè' kúnú, in aa mə́ bààiyà yée tə́ vɛ́nà.

³⁰Mə́ gám nwɔŋ zùúm kə̀ aí tə́ sɔ̀ŋ gá. Kàandə, gààd zɔ̀ŋə yɛ́b bə bə̀ tóò kíìn yaanàá. Kə̀ kpɛŋsɛ́l nə́ŋ̀má máá yílə́ sé.

³¹Zá nɛ́b aa zɔ̀ŋə yɛ́b bərə, boò gàb kúnú, mə́ í' Báá mə́ yàá, bít mə́ mà' tù' tə́ kìínmbə̀ nɛɛ̀n aa Báá mə́ bàà máà mà' rə kíni. Ìì zá' lɛgú, báà ɛɛ̀m kúnú!»