Read Samba Leko Yohana 15 Bible Online

Yohana 15 - Samba Leko bible

Yohana 15

¹«Máára mə́ kùmsə̀n badn téé nyìì sɔ̀ɔ̀n vɛ́nà, bít Báá mə́ kɔ̀ kùmsə̀n nɛ́d téé bìá.

²Téé nɛɛ̀n aa lɛ̀b wàà síndə gə́ kóólé, dùb bə̀ dáù kíìn vəràá. Bít téé nɛɛ̀n aa lɛ̀b wàà rə, kpɛ́l bə̀ dáù kíìn kuràá, bɔ̀b oò lɛ̀b yɛb bəd ká' oò taà nɛɛ̀n dú sɔ̀ŋ.

³Insánke aa mə́ pii rə, bí' iyì nyɛdkè gbòód.

⁴Ìì kùm máá rú, kìínmbə̀ máá kɔ̀ mə́ kùm aí rú rə kíin. Téé nɛɛ̀n bán wàà lɛbm̀bə̀ oò nə́ŋ̀ní gá, dáà wál kə̀ badn téé nyìì síngə́ roó. Nɛɛ̀n aarə rú, íí bán in nə́ŋ̀má ma'ǹmbə̀ dá Vɛnɛ́b sɔ̀ɔ̀n gá, íí kùm máá rú síngə́ roó.

⁵«Máára, mə́ kùmsə̀n badn téé nyìá, bít aí kɔ̀ íí badn téé nɛɛ̀n bərá. Màn aa kùmì máá rú, bít máá kɔ̀ mə́ kùmì oòrú rə, dá insɔ̀ɔ̀n ma'ǹ zùúm. Kàandə, íí bán in nə́ŋ̀má ma'ǹmbə̀ gá, dáà máá síngə́ roó.

⁶Màn aa kùm máá rú síndə, vú' làà bə̀ dáù lɛ́'ǹ gbaarú, kìínmbə̀ və̀rì lɛ́' téé nɛɛ̀n kíni, bít dákíìn waràá. Téé nɛɛ̀n wadké bəd gə́, bə̀ pú' kúnú, bít làà bə̀ lɛ́l bə̀ì laarú gə́, bə̀ duù kúnú.

⁷Dáà íí kùmì máá rú, bít nwɔŋ mə́ bəd kɔ̀ kùmì aí tɛ́mú gə́, ìì dɛ̀d in aa íí í' rə kúnú, íí dákíìn bɔbàá.

⁸Ìì mà' insɔ̀ɔ̀n zùúm, bít ìì ì' gə́, bənə́ *nɛ́b sáànmbə̀ mə́ bərá. In aarə, pii Báá mə́ kaŋsɛ́l tə́ kúnú.

⁹Mə́ í' ii tə́ kìínmbə̀ Báá mə́ í' mə́ rə kíin. Ìì kùm í'sɛ̀l mə́ rú.

¹⁰Dáà íí kè' indaŋ̀mbə̀ mə́ bərì gə́, íí dá kuùm í'sɛ̀l mə́ rú, kìínmbə̀ máá kɔ̀ mə́ kè' Báá mə́ indaŋ̀mbə̀ bərá, bít mə́ kùm oò í'sɛ̀lú yée kíin.

¹¹«Mə́ bàà ii nwɔŋ aarə, bɔ̀b tɛ́m làmkè máá bə̀ oò kùm aí rú, bít aí kɔ̀ ìì nyìì kə̀ tɛ́m làmkèá.

¹²Aa yée indaŋ̀mbə̀ mə́ra' ìì í' ɔ̀dnə́ŋ̀ bəd íí bòdba, kìínmbə̀ mə́ í' ii rə kíin.

¹³Í'sɛ̀l gbà'á aa nɛ́ŋə̀ dáá i'ǹ də, kùmsə̀n piìnmbə̀ gɔ̀ŋsə́ ɔ̀dzéd oò bəd bòórú.

¹⁴Íí kùmsə̀n ɔ̀dzéd mə́ bərá, dáà íí mà'ì kìínmbə̀ nɛɛ̀n aa indaŋ̀mbə̀ mə́ bàà rə kíin gə́ roó.

¹⁵Mə́ dɛ̀ri nɛ́b tù' bə̀ ma'ǹ bəd sɔ̀ŋ gá. Nɛ́d tù' bə̀ ma'ǹ gàb báá oò tììkpɛ̀ŋ inselké gá. Zá mə́ dɛ̀ri ɔ̀dzéd bərá; sáad də, mə́ mà' ii, íí gàb in aa mə́ kììà Báá naà rəì kóólé.

¹⁶Sàà íí vúŋ máà sə̀n gá, zá máára sàà mə́ vú' iyà sə̀n kə̀ nɛ́d sáànmbə̀ mə́ bəd kíin. Bə́ŋyée gə́, mà' mə́ bí' iyì *gbantumsə̀ mə́ bərá, ɛ̀m dá ìì mà' insɔ̀ɔ̀n aa yɛɛ̀l bə gá roó. Kə̀ aakíin də, Báá dá ii taà in aa íí dɛ̀d máá nə́gə́lə́ rə piinàá.

¹⁷In aa má ii baàn ìì màà rə gə́, í'ǹmbə̀ ɔ̀dnə́ŋ̀ bəd íí bòdba.»

¹⁸«Dáà nɛ́b zɔ̀ŋə yɛ́b bə bə̀ zèèiyì gə́, ìì gàb kúnú, éèn bə̀ zèè máára.

¹⁹Dáà íí tə́ nɛ́b zɔ̀ŋə yɛ́b bə bə̀ gə́, nɛ́b aa zɔ̀ŋə yɛ́b bərə bə̀ dáá ii kíìn í'nàá. Kàandə, íí nɛ́b boò bərá. Zá sàà mə́ vú'iyà sùnú, bít íí nɛ́b zɔ̀ŋə yɛ́b bə bə̀ sɔ̀ŋ gá. Kə̀ taàbìá, nɛ́b aa zɔ̀ŋə yɛ́b bərə bə̀ zèè ii taá.

²⁰Sèl ìì zá' nwɔŋ aa nyàam mə́ bàà ii roó: ‹Nɛ́d tù' bə̀ ma'ǹ nə́ŋ̀má kàn nɛ̀n oò kə̀ gbà'á gá.› Dáà bə̀ í' mə́ búúrì gə́, aí kɔ̀ bə̀ dá ii búúd í'ǹ kɔ̀. Dáà bə̀ kè'à insánke mə́ì gə́, bə̀ dá aí bə̀ ke'ǹ kɔ̀.

²¹Zá bə̀ dá ii in bəraa rə ma'ǹ kóólé, máá nə́gə́lú; kàandə, bə̀ gàb nɛ́ŋə̀ aa tùm máà rə sé.

²²Dáà yaà mə́ bàà bə̀ síngə́, bə̀ kùm taà kə̀ invaksə́ naà gá. Zá bə́ŋyée gə́, bə̀ bán nwɔŋ nə́ŋ̀má gáàmbə̀ invaksə́ boò yílə́ gá.

²³Màn aa zèè mə́ rə, zèè Báá mə́ì kɔ̀.

²⁴Dáà mə́ mà' tù' sɔ̀ɔ̀nkè bəraa nɛ́ŋə̀ nə́ŋ̀ bán ma'ǹmbə̀ gá rə boò tə́ŋə́ síngə́, bə̀ kùm nɛ́b invaksə́ bə̀ ma'ǹ bəd gá. Zá bə́ŋyée bə̀ bé' tù' mə́ bəd yàá, bít kóó kàandə máá, bə̀ zèè mə́ tə́ kíní kə̀ Báá tá.

²⁵Zá in aarə wə́ə́ kàandə, bɔ̀b nwɔŋ aa bád bə̀ dàà indaŋ̀mbə̀ núúboòrú ‹Bə̀ zèè mə́ tɛdńní.› rə, oò wə́ə́ kúnú.

²⁶«Nɛ́ŋə̀ aa yaà dá ii láŋ̀ bərə, dáà kíìn yaanàá. Oòrə, Nwul Gìdń aa vúgà Báá naà, tə́ ii vɛ́nà i'ǹ doó. Mə́ kùmì Báá mə́ səǹ gə́, tùm máùwà kíìn bí'ǹnà aí tə́ŋú, bít yaà dá ii sedako ma'ǹ máá yílú.

²⁷Bít aí kɔ̀ íí dá nɛ́b bəd sedako nyɛdkè ma'ǹ máá yílú. Kàandə, íí kùmà kə̀ máá tá, sɛŋ aa mə́ sɔ̀d nɛ́b bəd in sáànmbə̀ bəroó.»