Read Samba Leko Yohana 16 Bible Online

Yohana 16 - Samba Leko bible

Yohana 16

¹«Mə́ bàà ii nwɔŋ aarə, bɔ̀b lɛ́' ìì dàà tɛ́mbagké íí sí.

²Bə̀ dá ii kíìn niŋ̀ *Yahudu bəd wúlwáàlbə̀ bərú, bít simá, sɛŋ nə́ŋ̀ dáà kíìn yaanàá, nɛ́b aa bə̀ dáá ii lo'ǹ də, bə̀ sèl gə́, kə̀ aakíin də, bənə́ tə́ənnə́ Vɛnɛ́b tù' ma'nàá.

³Bə̀ dá ma'ǹ kàandə, gàb bə̀ bèd Báá mə́ sé, gàb bə̀ bèd mə́ sín kɔ̀.

⁴Zá mə́ bàà ii nwɔŋ aarə, bɔ̀b sɛŋ boò yaà wə́ə́ì gə́, sèl ìì zá' kúnú, mə́ bàà bənə́ yàá.» «Mə́ bààiyà nwɔŋ aa sɛŋ aa mə́ sɔ̀d tù' rú síndə, kàandə, bɔ̀b mə́ tə́ kə̀ aí tá.

⁵Zá bə́ŋyée gə́, mə́ tə́ ɛɛ̀m nɛ́ŋə̀ aa tùm máà rə sunú. Bít nɛ́ŋə̀ nə́ŋ̀má aí tə́ŋú, dɛ̀d mə́: ‹Ń tə́ dáàn bínì gú?› sé.

⁶Zá bə́ŋyée tɛ́m íí nyìì tə́ kə̀ nwuukèá, kə̀ nwɔŋ aa mə́ bàà ii yéroó.

⁷Zá mə́ tə́ ii nwɔŋ sɔ̀ɔ̀n baanàá, aí gə́, aa dá sɔɔ̀n də, máà ɛ̀m kúnú. Kàandə, mə́ ɛ̀m síngə́, nɛ́ŋə̀ aa dá ii láŋ̀ bərə, yaà aí səǹ gá. Zá mə́ ɛ̀mì gə́, máùwà kíìn tuùm aànnà aí sunú.

⁸Bít sɛŋ aa dáà yaànà bərə, dá nɛ́b zɔ̀ŋə yɛ́b bə bə̀ i'ǹ gə́, bə̀ záá yíl boò tə́ invaksə́ yílú, wɔ̀ɔ̀lə̀ Vɛnɛ́b bə̀ yílú, bít kə̀ fágə́n Vɛnɛ́b bə̀ yílú.

⁹Nwul Gìdń dá bə̀ i'ǹ gə́, bə̀ záá yíl boò tə́ invaksə́ yílú. Bə̀ məə mə́ kíìn bagǹmbìá, kə̀ taàbìá, bə̀ tə́ taà invaksə́ ma'nàá.

¹⁰Bə̀ záá yíl boò tə́ in aa tə́ wɔ̀ɔ̀lə̀ rə yílú. Kàandə, mə́ tə́ ɛɛ̀m Báá sunú, bít íí bé' mə́ sɔ̀ŋ gá.

¹¹Fágə́n bòórú gə́, bə̀ záá yíl boò tə́ kúnú, kàandə, gààd wàà zɔ̀ŋə yɛ́b bə bə̀ gə́, Vɛnɛ́b fágə̀wì gbòód.

¹²«Mə́ tə́ kə̀ nwɔŋ naà zùúm aí bə̀ baànmbə̀ sɔ̀ŋ. Zá íí bán bə̀ ko'ǹmbə̀ yíləsə́ bə́ŋyée gá.

¹³Nwul Gìdń aa tə́ vɛ́nà i'ǹ də wə́ə́ì gə́, íí dá nyiìn kə̀ vɛ́nà. Gám nwɔŋ kə̀ yíl oò bə̀ ní gá. Zá dá ii in bəraa kììà rə ní uràá, bít dá ii in bəraa dáà yaànà rə baanàá.

¹⁴Dá kaŋsɛ́l mə́ i'nàá. In bəraa kììà máá naà rə, dá ii taà baanàá.

¹⁵In aa Báá mə́ kə̀ naà rə gə́ kóólé, máá bìá. Kə̀ taàbìá, mə́ bàà taà in aa Nwul Gìdń kììà máá naà rə, yaà dá ii taà baanàá.»

¹⁶«Záàn zɔ̀gɔ̀ gə́, íí bé' mə́ sɔ̀ŋ gá. Bít záàn zɔ̀gɔ̀ gə́, íí dá mə́ kíìn bídǹ bé'nàá.»

¹⁷*Nɛ́b sáànmbə̀ oò kambəd, bə̀ bàà ɔ̀dnə́ŋ̀ bəd boò bòdba: «Nwɔŋ aarə, í' tə́ baànmbə̀ leè gú? Bàà bə́n: ‹Záàn zɔ̀gɔ̀ gə́, íí bé' mə́ sɔ̀ŋ gá, bít záàn zɔ̀gɔ̀ gə́, íí dá mə́ kíìn bídǹ bé'nàá› roó. Bít bàà sɔ̀ŋ: ‹Kàandə, mə́ tə́ ɛɛ̀m Báá mə́ sunú.› »

¹⁸*Nɛ́b sáànmbə̀ bəd bə̀ bàà sɔ̀ŋ: « ‹Záàn zɔ̀gɔ̀› aa tə́ baàn yérə, í' tə́ baànmbə̀ leè gú? Bə́n gabm̀ nɛɛ̀n aa í' baànmbə̀ rú rə sé.»

¹⁹Yéésù gàb yàá, bə̀ í' bəǹ nwɔŋ nə́ŋ̀ dɛdǹmbìá; bít bàà: «Mə́ bààiyà: ‹Záàn zɔ̀gɔ̀ gə́, íí bé' mə́ sɔ̀ŋ gá, bít záàn zɔ̀gɔ̀ gə́, íí dá mə́ kíìn bídǹ bé'nàá.› Nwɔŋ aa yée bòórú, íí tə́ taà ɔ̀dnə́ŋ̀ bəd nwɔŋ dɛdǹ íí bòd beì?

²⁰Mə́ tə́ ii kíìn baanàá, aarə nwɔŋ sɔ̀ɔ̀ná' íí dákíìn kpəənàá, bít íí dá nwɔŋ dalàá, zá nɛ́b zɔ̀ŋə yɛ́b bə bə̀ dá làmkè kiinàá. Aí kɔ̀ íí dá kuùm kə̀ tɛ́m nwuukèá, zá tɛ́m nwuukè aí bə̀ dá tɛ́m làmkè bílàá.

²¹Sɛŋ aa nɛ́ŋ kéèndo bàgə̀l bə̀ dá wàà lɛbm̀ bərə, dá nwuukè kiinàá. Zá lɛ̀b wààì gə́, yid bɔ̀' nwuukè rə kúnú. Yid bɔ̀' nwuukè rə, kàandə, tɛ́m làmə̀ì gbàákù kə̀ wàà aa yéroó.

²²Kə̀ aakíin də, aí kɔ̀ íí kìì tɛ́m nwuukèì bə́ŋyóo. Zá bíd yaà máá ii kíìn bé'nàá, bít tɛ́m íí dá kuùm kə̀ làmkèá; nɛ́ŋə̀ nə́ŋ̀má bán tɛ́m làmkè íí aarə nyá'ǹ ke'ǹmbə̀ gá.

²³«Sɛŋ aarə yaà wə́ə́ì gə́, íí dɛ̀d mə́ in nə́ŋ̀má sɔ̀ŋ gá. Mə́ tə́ ii kíìn baanàá, aarə nwɔŋ sɔ̀ɔ̀ná' in aa íí dɛ̀d máá nə́gə́lə́ rə gə́ kóólé, Báá mə́ dáá ii kíìn piinàá.

²⁴Yaà wə́ə́ bə́ŋyóo, íí nyɛ̀m in nə́ŋ̀má máá nə́gə́lə́ sé. Ìì dɛ̀d kúnú, íí dákíìn bɔbàá, bít kə̀ aakíin də, tɛ́m làmkè íí dá kuùm gbà'á.»

²⁵Yéésù bàà bə̀: «Mə́ nàà ii nwɔŋ aarə kóólé kə̀ zagəmú. Sɛŋ dáà kíìn yaanàá, mə́ nàà ii nwɔŋ kə̀ zagəmú sɔ̀ŋ gá. Zá máá ii nwɔŋ baàn nyɛdkè Báá yílú.

²⁶Sɛŋ aarə yaà wə́ə́ì gə́, íí dá Báá mə́ nyɛɛ̀m kə̀ nə́gə́l mə́ ra. Mə́ nyɛ̀m Báá mə́ aí yílə́ sín má, kè' dá nyɛmsɛ́lí kíìn í'nàá.

²⁷Kàandə, Báá mə́ kə̀ yíl oò bə̀ má, í' ii yàá. Báá mə́ í' ii rə, kàandə, íí í' mə́ yàá, bít íí kè' mə́ yàá, mə́ vúgà Vɛnɛ́b sunú.

²⁸Zá' mə́ dàà Báá mə́ra, mə́ yaà zɔ̀ŋə yɛ́b ba. Zá bə́ŋyée gə́, mə́ tə́ yɛ́b aa kíìn daanàá, bít kid mə́ tə́ kíìn bídǹ Báá sunú.»

²⁹*Nɛ́b sáànmbə̀ oò bəd bààù: «Bə́ŋyée gə́, ń gám nwɔŋ tə́ nyɛdkèá, ń nàà kə̀ zagəmú sé.

³⁰Bə́ŋyée gə́, bə́ gàb yàá, ń gàb in bərəì kóólé. Bə́ŋ̀ nɛ́ŋə̀ dɛ̀d n nwɔŋ sín má, ń dáù kíìn báàn ke'ǹ í'ǹmbìá. Bə́ŋyée gə́, bə́ kè' yàá, ń vúgà Vɛnɛ́b sunú.»

³¹Yéésù kè' í' bə̀: «Vɛ́nà gə́, bə́ŋyée íí kè' yèè?

³²Sɛŋ nə́ŋ̀ dáà kíìn yaanàá, sɛŋ də wə́ə́ì gbòód. Íí kóólé, íí dákíìn sa'nàá, kóó nɛ́ɛ̀réè dá ɛɛ̀m oò kàrú. Íí dá mə́ daàn máá nə́ŋ̀ní. Zá mə́ kùm máá nə́ŋ̀ní sé, vɛ́nà; kàandə, Báá mə́ kùm tə́ kə̀ máá tá.

³³Mə́ bàà ii nwɔŋ aarə, bɔ̀b ìì bɔ̀b tɛbàá, wálke íí kə̀ máára. Íí dá búúd bé'ǹ yɛ́b aa nyìì kə̀ invaksə́ yée ba. Zá ìì kùm kə̀ váàndoá. Máá gə́, mə́ kàn yɛ́b yàá!»