Read Samba Leko Yohana 17 Bible Online

Yohana 17 - Samba Leko bible

Yohana 17

¹Zɔ̀ŋ aa Yéésù gám bɛ́' nwɔŋ aa kàangə́, zá' núù lɛgə́ poú, bít bàà: «Báá, sɛŋ wə́ə́ì Wàà ń kaŋsɛ́l piìnmbìá, bɔ̀b Wàà ń kɔ̀, oò pii n kaŋsɛ́lá.

²Kàandə, ń piiù kpɛŋsɛ́lì nɛ́b bəd yílə́ kóólé, bɔ̀b oò kɔ̀ oò pii nɛ́b bəraa ḿ piiù rə, *gɔ̀ŋsə́ aa bɛ́d bə gá roó.

³*Gɔ̀ŋsə́ aa bɛ́d bə gá rə, aa yóo' nɛ́b bəd boò gàb kúnú, ámda ń kùmsə̀n Vɛnɛ́b vɛ́nà bìá, ám nə́ŋ̀ní, bít boò gàb Yéésù Krístù, nɛ́ŋə̀ aa ń tùmà roó.

⁴Mə́ ì' kaŋsɛ́l ámbə̀ì zɔ̀ŋə yɛ́b ba, kə̀ ma'ǹ bɛ́'ǹmbə̀ tùsaa ń pii máà, máà mà' roó.

⁵Bə́ŋyée gə́, Báá, ǹ káŋ mə́ kíìn ám númú, kə̀ kaŋsɛ́l laa nyɛdkè aa mə́ bɔ̀bà ám naà, bɔ̀b bə́ŋ̀ yɛ́b séé síndoó.

⁶«Ń pii mə́ nɛ́b kam zɔ̀ŋə yɛ́b bə bə̀ bərá, mə́ ì' bə̀ nɛɛ̀n aa ń kùm dú roó. Nɛ́b aarə, bə̀ kùmà nɛ́b ḿ bərá, bít ń pii bə̀ sə̀n máá nɛɛ̀n tɛ́mú. Bə̀ ləə insánke ń yàá.

⁷Bə́ŋyée bə̀ gàb yàá, in aa ń pii máà rə gə́ kóólé, vúgà ám naà vɛ́nà.

⁸Kàandə, nwɔŋ bəraa ń pii máà rə, mə́ sán bə̀ yàá, bít bə̀ kè' yàá. Bə̀ kè' yàá vɛ́nà, mə́ vúgà ám sunú, bít bə̀ kè' yàá, ámda ń tùm máà sùnú.

⁹«Mə́ tə́ən nyɛɛ̀m kə̀ boò ra. Mə́ nyɛ̀m m yɛ́b bə̀ gá, zá mə́ tə́ən nyɛɛ̀m nɛ́b bəraa ḿ pii máà rə bìá. Kàandə, nɛ́b aarə, nɛ́b ḿ bərá.

¹⁰In aa mə́ kə̀ naà rə gə́ kóólé, ám bìá. Bít in aa ń kə̀ naà rə gə́ kóólé, máá bìá. Kaŋsɛ́l mə́ i'míìn tə́ boò rú.

¹¹Máá mə́ kùm zɔ̀ŋə yɛ́b bə sɔ̀ŋ sé. Zá boò gə́, bə̀ tə́ zɔ̀ŋə yɛ́b ba. Bə́ŋyée mə́ tə́ ɛɛ̀m ám sunú. Báá *Gìdńná, ǹ nwán bə̀ kə̀ kpɛŋsɛ́l ám nɛ́gə́lə́ bìá. Kpɛŋsɛ́l ám nɛ́gə́lə́ bə̀ aa ḿ pii máà roó, bɔ̀b boò kùm nə́ŋ̀ní, kìínmbə̀ máá kə̀ ám tá, bə́n kuùm nə́ŋ̀ní rə kíin.

¹²Sɛŋ aa mə́ kùm kə̀ boò tə́ rə, mə́ nwán bə̀ kə̀ Kpɛŋsɛ́l ám nɛ́gə́lə́ bə̀ aa ń pii máà roó. Kóó nɛ́ŋə̀ nə́ŋ̀má bɔ̀b sé, sìná nɛ́ŋə̀ aa dá bɔ̀bm̀, bɔ̀b nwɔŋ aa bádmíìn Núúboòd Gìdńnú rə, oò ma'míìn kíìn vɛ́nà roó.

¹³Zá bə́ŋyée mə́ tə́ ɛɛ̀m ám sunú. Bə́ŋ̀ mə́ tə́ zɔ̀ŋə, mə́ gám taà nwɔŋ aa kàani, bɔ̀b tɛ́m boò oò nyìì kə̀ làmkè mə́ra.

¹⁴Mə́ sán bə̀ nwɔŋ ń da, bít nɛ́b zɔ̀ŋə yɛ́b bə bə̀ zèè bə̀ kúnú. Kàandə, bə̀ nɛ́b zɔ̀ŋə yɛ́b bə bə̀ gá, kìínmbə̀ máá kɔ̀ mə́ nɛ́d zɔ̀ŋə yɛ́b bə bə̀ gá rə kíin.

¹⁵Mə́ nyɛ̀m m də, bɔ̀b ǹ vú' bə̀ kíìn zɔ̀ŋə yɛ́b bə gá, zá mə́ í' ǹ súú bə̀ Nɛ́ŋə̀ Vaksə́ nɛɛ̀n tɛ́mú.

¹⁶Bə̀ nɛ́b zɔ̀ŋə yɛ́b bə bə̀ gá, kìínmbə̀ máá kɔ̀ mə́ nɛ́d zɔ̀ŋə yɛ́b bə bə̀ gá rə kíin.

¹⁷Ǹ mà' vɛ́nà ń oò mà' tù' boò rú, bɔ̀b boò bíl nɛ́b ḿ bərá. Nwɔŋ ń tə́ vɛ́nà.

¹⁸Mə́ tùm bə̀ zɔ̀ŋə yɛ́b ba, kìínmbə̀ ám kɔ̀ ń tùm máà zɔ̀ŋə yɛ́b bərə kíin.

¹⁹Mə́ pii yíl mə́ tə́ boò bòórú, bɔ̀b vɛ́nà ń oò bí' bə̀ nɛ́b ḿ bərá.

²⁰«Mə́ nyɛ̀m m *nɛ́b sáànmbə̀ bəraa yée yílə́ ní sé. Zá mə́ nyɛ̀m m kə̀ nɛ́b aa bə̀ dá mə́ bagǹ, nwɔŋ bəraa *nɛ́b sáànmbə̀ bəd bə̀ tə́ baàn də bòórú roó.

²¹Mə́ tə́ən nyɛɛ̀m, bɔ̀b nɛ́b bəd kóólé, boò kùm nə́ŋ̀ní. Báá, boò wál kə̀ obə́n tá, kìínmbə̀ ám kɔ̀ ń wál kə̀ máá tá, máá kɔ̀ mə́ wál kə̀ ám tə́ rə kíin. Mə́ tə́ən nyɛɛ̀m boò kùm nə́ŋ̀ní, bɔ̀b nɛ́b zɔ̀ŋə yɛ́b bə bə̀ bəd boò gàb kúnú, ámda ń tùm máà sùnú.

²²Mə́ pii bə̀ kaŋsɛ́l aa ḿ pii máà roó, bɔ̀b boò kùm nə́ŋ̀ní, kìínmbə̀ ń kə̀ máá tá, bə́n kuùm nə́ŋ̀ní rə kíin.

²³Mə́ tə́ boò rú, kìínmbə̀ ámkɔ̀ ń tə́ máá rú rə kíin. Kə̀ aakíin də, bə̀ dá taà kuùm nə́ŋ̀ní vɛ́nà. Kàanyée gə́, nɛ́b zɔ̀ŋə yɛ́b bə bə̀ dá taà gabàá, ń tùm máà sùnú. Bə̀ dá gabm̀ gə́, ń í' bə̀ tə́ kúnú, kìínmbə̀ nɛɛ̀n aa ń í' mə́ rú rə kíin.

²⁴«Báá, ń pii mə́ bə̀ yàá, mə́ í' rə, boò kùm kə̀ máá tá, zɔ̀ŋ aa má kuùm bərə ba. Mə́ í' boò bé' kaŋsɛ́l laa nyɛkè aa mə́ kə̀ naà roó. Ń í' mə́ kúnú, ḿ pii máà taà kaŋsɛ́l laa nyɛdkè aa roó, bɔ̀b bə́ŋ̀ yɛ́b séé sé.

²⁵Báá wɔ̀ɔ̀làá, nɛ́b zɔ̀ŋə yɛ́b bə bə̀ gàb m sé. Zá máá gə́, mə́ gàb m yàá, bít boò kɔ̀ bə̀ gàb yàá, ń tùm máà sùnú.

²⁶Mə́ mà' boò gàb nə́gə́l ń da, nɛɛ̀n aa ń kùm dú roó, bít má diìn boò bə̀ baàn bə̀ ní sɔ̀ŋ, nɛɛ̀n aa ń kùm dú roó. Kə̀ aakíin də, í'sɛ̀l lùm nə́ŋ̀ní bə̀ dá taà bɔbàá, í'sɛ̀l aa ń kə̀ máá roó; bít má kuùm boò rú.»