Read Samba Leko Yohana 18 Bible Online

Yohana 18 - Samba Leko bible

Yohana 18

¹Zɔ̀ŋ aa Yéésù gám bɛ́' nwɔŋ aa kàangə́, zá' ɛ̀m kíìn kə̀ *nɛ́b sáànmbə̀ oò bəd tá, Kedrona nwuu naà gúu. Zɔ̀ŋ aarə bərə, lɛ' nə́ŋ̀ wərà. Yéésù ɛ̀m pìì lɛsə́ wərə̀ kə̀ *nɛ́b sáànmbə̀ oò bəd tá.

²Yudas tə́ Yéésù lɛ́bm̀ də, gàb zɔ̀ŋ aarə yàá; kàandə, Yéésù kə̀ *nɛ́b sáànmbə̀ oò bəd tá, gəə̀l bə̀ sáá zɔ̀ŋ aarə ba.

³Kàanyée gə́, Yudas pú' àà sóózè bəd gə̀b kə̀ nɛ́b Vɛnɛ́b wúl bə̀ nwáàn bəd tá, lɛsə́ wərà. *Láŋsə́ gààd gbàád bəd kə̀ *Farisa bəd tá, bə̀ tùmà sə̀n sóózè bəd gə̀b aarə, kə̀ nɛ́b Vɛnɛ́b wúl bə̀ nwáàn bəd aarə tá. Bə̀ bè'à bəd laa naú, bə̀ ɛ̀mà kə̀ lampə̀ bəd naú, kə̀ in bùm bə̀ nə́'ǹ bəd tá.

⁴Kàanyée gə́, Yéésù gàb in aa dáù bɔbm̀ dəì kóólé. Kə̀ taàbìá, ɛ̀m dáá sáŋ taà kə̀ boò ra, bít dɛ̀d bə̀: «Íí tə́ nɛ́ɛ̀réè saàn gú?»

⁵Kè' bə̀ í'ù: «Bə́ tə́ Yéésù Nazaratu bə̀ saanàá.» Yéésù bàà bə̀: «Aarə máára.» Bít Yudas aa tə́ Yéésù lɛ́bm̀ də, dìì wərə̀ kə̀ boò tá.

⁶Zɔ̀ŋ aa Yéésù kè' í' bə̀ nwɔŋ, bàà: «Aarə máára» gə́, ìì bíd bəd bòórú kə̀ pɛŋ pɛŋá, ìì yi' bəd yɛ́b ba.

⁷Bít Yéésù dɛ̀d bə̀ nwɔŋ aarə sɔ̀ŋ: «Íí tə́ nɛ́ɛ̀réè saàn gú?» Kè' bə̀ í': «Bə́ tə́ Yéésù Nazaratu bə̀ saanàá.»

⁸Yéésù kè' í' bə̀: «Mə́ bààiyà yàá, aarə máára. Íí sàà tə́ máá gə́, ìì dàà nɛ́b kam bəraa boò ɛ̀m kúnú.»

⁹In aa wə́ə́míìn kàandə, bɔ̀b nwɔŋ aa Yéésù bàà rə, oò ma'míìn kúnú: «Báá, nɛ́b bəraa ḿ pii máà rə, mə́ bɔ̀' kóó nɛ́ŋə̀ nə́ŋ̀má sé.»

¹⁰Simon Piyɛr kə̀ yɛ́rə̀ bùúd naú. Sɔ̀m yɛ́rə̀ bùúd də, dùb və̀d láŋsə́ gààd gbà'á nɛ́d tù' bə̀ ma'ǹ nə́ŋ̀ túŋ nɛɛ̀n váànú bìá (Nɛ́d tù' bə̀ ma'ǹ aarə, nə́gə́l oò Malkus.)

¹¹Zá Yéésù bàà Piyɛr: «Ǹ páá yɛ́rə̀ bùúd də sɔ̀gú. Ń sèl lə, ḿ bàà mə́ nyəə búúd magə̀wà aa Báá mə́ pii mə́ yérə géè?»

¹²Kàanyée gə́, sóózè bəd gə̀b kə̀ nɛ́b gbàáro boò tá, bít kə̀ Yahudu bəd nɛ́b Vɛnɛ́b wúl bə̀ nwáàn bəd tá, kò' bə̀ tab Yéésù kúnú,

¹³bít éèn bə̀ ààù Annas númú. Annas rə, Kaifa gúùnváàná. Kaifa rə, sə̀n *láŋsə́ gààd gbà'á zèd də rú.

¹⁴Bít Kaifa bàà sə̀n Yahudu bəd nɛ́b yíl bə̀ bəd kə̀ aakíin: «Aa dá sɔɔ̀n də, val oò kò' nɛ́ŋə̀ nə́ŋ̀, nɛ́b zùúm bòórú.»

¹⁵Simon Piyɛr kə̀ *nɛ́d sánán nə́ŋ̀ tá, bə̀ bàg Yéésù bòórú. Nɛ́d sánán aarə, *láŋsə́ gààd gbà'á gàbə̀ yàá. Kə̀ taàbìá, bɔ̀b taà piìnmbə̀ yiìl wərə̀, sɛŋ aa Yéésù tə́ piìn *láŋsə́ gààd gbà'á yiìl wərə̀ roó.

¹⁶Zá Piyɛr dìì gbaarú, pe' kə̀ wúlwaàl tá. Kàanyée gə́, nɛ́d sánán aa *láŋsə́ gààd gbà'á gàbə̀ rə, vúg yaà gám nwɔŋ kə̀ nɛ́ŋ kéèndo aa tə́ waàl nwáàn doó, bít pà' páá Piyɛr yiìl wərà.

¹⁷Nɛ́ŋ kéèndo waàl bə̀ nwáàn də, dɛ̀d Piyɛr: «Máàn ám kɔ̀ ń *nɛ́d sánán Nɛ́ŋ Váàndo aa yée bèì?» Bít Piyɛr kè' í'ù: «Ə́ùwə́, mə́ nɛ́d sánán oò gá.»

¹⁸Sɛŋ də, nwùm sɛŋú. Kàanyée gə́, nɛ́d tù' bə̀ ma'ǹ bəd kə̀ nɛ́d láŋsə́ wúl bə̀ nwáàn bəd tá, bə̀ kɔ̀ŋ laá, kùm bə̀ tə́ kíìn uunàá. Piyɛr kɔ̀ kùm ùù laá kə̀ boò tá.

¹⁹*Láŋsə́ gààd gbà'á dɛ̀d Yéésù nwɔŋ *nɛ́b sáànmbə̀ oò bəd yílú, bít kə̀ insánke oò yílú.

²⁰Yéésù kè' í'ù: «Mə́ tə́ ii kíìn baàn nyɛdkè, nɛ́b bəd númú kóólé' Mə́ tə́ nɛ́b bəd Vɛnɛ́b nwɔŋ i'ǹ *Yahudu bəd wúlwáàlbə̀ rú, kə̀ láŋsə́ wúuú, zɔ̀ŋ aa *Yahudu bəd kóólé wál bəroó; mə́ gám nwɔŋ mə́'ke sé.

²¹Kə̀ níìbə̀ ń dɛ̀d mə́ taà nwɔŋ gú? Ǹ dɛ̀d nɛ́b aa bə̀ zɛ̀ŋ mə́ roó. Nwɔŋ aa mə́ bàà bə̀ rə, boò gə́, bə̀ gàbì sɔ̀ɔ̀nkè.»

²²Zɔ̀ŋ aa Yéésù gám nwɔŋ aa kàangə́, nɛ́ŋə̀ nə́ŋ̀, nɛ́d láŋsə́ wúl bə̀ nwáàn bəd tə́ŋú, yaà tàŋ Yéésù nɛɛ̀n kàd gə́, bít bààù: «Kə̀ aakíin, ń dá taà *láŋsə́ gààd gbà'á nwɔŋ ke'ǹ í'ǹ wa?»

²³Yéésù kè' í'ù: «Mə́ gám tə́ nwɔŋ vaksə́ gə́, ǹ ì' mə́ nɛɛ̀n aa mə́ gám nwɔŋ vaksə́ rú roó. Zá mə́ gám tə́ vɛ́nà gə́, kə̀ níìbə̀ ń tàŋ mə́ taà nɛɛ̀n kàd gú?»

²⁴Kàanyée gə́, Annas tùm àà Yéésù tabkéní, *láŋsə́ gààd gbà'á Kaifa sunú.

²⁵Sɛŋ də bərə, Simon aa bə̀ dɛ̀rə̀ Piyɛr rə, dìì wərà, tə́ laa uunàá. Nɛ́b kam wərà, bə̀ dɛ̀rə̀: «Máàn ám kɔ̀ ń tə́ nɛ́ŋ váàndo aa *nɛ́b sáànmbə̀ bəd tə́ŋúì?» Zá Piyɛr sɔ̀ɔ̀n kúnú, bàà bə̀: «Ə́ùwə́, máá kɔ̀ gá.»

²⁶Nɛ́ŋə̀ nə́ŋ̀, *láŋsə́ gààd gbà'á nɛ́b tù' bə̀ ma'ǹ bəd tə́ŋú, màn aa Piyɛr və̀rə̀ túŋ də kuná, yaà bàà Piyɛr: «Máàn mə́ bé'nnà zɔ̀ŋə lɛsú, kə̀ Nɛ́ŋ Váàndo aa tə́ì?»

²⁷Zá Piyɛr sɔ̀ɔ̀n sɛŋ toorúb oòrə sɔ̀ŋ. Bít sɛŋ aarə bəní, kòòváàn nwɔ̀m yàá.

²⁸Nwúndù oòrə, kə̀ limtə́ súd, pà' bə̀ àà Yéésù Kaifa yiilú, bít bə̀ ààù Roma bəd gɔ̀mnà yiilú. Zá Yahudu bəd nɛ́b yíl bə̀ bəd gə́, bə̀ pìì wərə̀ sé. Kàandə, bə̀ í' si' boò bəd yɛɛ̀lǹmbə̀ sé, kàandə, bə̀ í' *Paska gbèd bɔbm̀ líìnmbìá.

²⁹Kə̀ taàbìá, gɔ̀mnà Pilatu vúg yaà bɔ̀b bə̀ taà gbaarú, bít dɛ̀d bə̀: «Íí luu Nɛ́ŋ Váàndo aa yée, níì nwɔŋ bòórú gú?»

³⁰Kè' bə̀ í'ù: «Dáà Nɛ́ŋ Váàndo aa yée nɛ́d invaksə́ bə̀ ma'ǹ síngə́, pà' bə́ ààùwà zɔ̀ŋə ám númú gá.»

³¹Pilatu bàà bə̀: «Ìì pà'ù kúnú, kə̀ yíl aí bìá, bít dááì fágə̀ kúnú, kìínmbə̀ nɛɛ̀n aa indaŋ̀mbə̀ íí bàà rə kíin.» Yahudu bəd nɛ́b yíl bə̀ bəd kè' bə̀ í'ù: «Bə̀ pii bə́ kpaŋ̀, nɛ́ŋə̀ bə̀ fágǹ lo'ǹ sé.»

³²In aa wə́ə́ kàandə, bɔ̀b nwɔŋ aa Yéésù bàà, nɛɛ̀n aa val dáù ko'ǹ dú rə yílə́ rə, oò ma'míìn kúnú.

³³Pilatu kidbíd oò yiilú, bít dá dɛ̀d Yéésù gə́, bààù: «Ámda ń kùmsə̀n *Yahudu bəd gààrì?»

³⁴Bít Yéésù kɔ̀ kè' í'ù: «Ń bàà sə̀n nwɔŋ aarə kə̀ yíl ám bèì, sínkɔ̀ nɛ́b bəd bə̀ bàànnà sə̀n nwɔŋ aarə máá yílə́ì?»

³⁵Pilatu dɛ̀rə̀: «Máá rə mə́ Yahudu wa? Nɛ́b ḿ bəd kə̀ *láŋsə́ gààd bəd tá, bə̀ luu n sə̀n máá naú. Ń mà' bə̀ níì gú?»

³⁶Yéésù kè' í'ù: «Mə́ gààd zɔ̀ŋə yɛ́b bə bə̀ gá. Dáà mə́ tə́ gààd zɔ̀ŋə yɛ́b bə bə̀ gə́, nɛ́b tù' bə̀ ma'ǹ mə́ bəd dá nə́gə̀d kíìn ma'nàá, bɔ̀b daŋ̀mbə̀ máá bə̀ piìnmbə̀ Yahudu bəd nɛ́b yíl bə̀ bəd nɛɛ̀n tɛ́mú. Zá mə́ gààd zɔ̀ŋə yɛ́b bə bə̀ gá.»

³⁷Kàanyée gə́, Pilatu bààù: «Ogə́ ń gààrá!» Yéésù kè' í'ù: «Mə́ gààrá, kə̀ nɛɛ̀n aa ń bàà rə kíin. Bə̀ lɛ̀b mə́, bít mə́ yaà zɔ̀ŋə yɛ́b bərə, bɔ̀b sedako ma'ǹmbə̀ vɛ́nà yílú. Kóó nɛ́ɛ̀réè, tə́ kə̀ vɛ́nà naà gə́, dá pə̀gə̀lib nwɔŋ mə́ kíìn kiinàá.»

³⁸Pilatu dɛ̀rə̀: «Vɛ́nà rə, níì gú?» Bít Pilatu gám nwɔŋ aa kàangə́, vúg ɛ̀m *Yahudu bəd səǹ sɔ̀ŋ, dá bàà bə̀: «Mə́ bɔ̀b nwɔŋ vaksə́ nə́ŋ̀má Nɛ́ŋ Váàndo aa bə̀ fágǹ ko'ǹ sé.

³⁹Nɛɛ̀n aa lɛɛ̀m íí sáá rú rə, bìn lɛ́' mə́ sáá ii nɛ́d wúltígə́lú bə̀ nə́ŋ̀, *Paska sɛŋú gə́ roó. Íí í' bìn máà lɛ́' bənə́ *Yahudu bəd gààrì gə́?»

⁴⁰Kè' bə̀ í'ù kə̀ nwɔŋ kpaàm bìá, bə̀ bàà: «Ə́ùwə́, oò gá! Bə́ í' bìn ǹ lɛ́' bə́ Barabas da.» Barabas də, màn aa və̀d sáá nɛ́b bəd kpaŋú roó.