Read Samba Leko Yohana 19 Bible Online

Yohana 19 - Samba Leko bible

Yohana 19

¹Kàanyée gə́, Pilatu pii bə̀ kpaŋ̀, bə̀ kò' boò zìb Yéésù kíin kə̀ nyɛ́gsàá.

²Sóózè bəd tèè ku' *mə̀làá, bə̀ páá Yéésù yíləsú, bít bə̀ páù gààd dàál yɛ̀ɛ́l kìkì sisú.

³Bə̀ gbarà oò sunú, bə̀ bàà: «Mə́ dɔ̀m m nwɔŋá, *Yahudu bəd gààrá!» Bít bə̀ pììù nɛɛ̀n kàd taŋ̀mbə̀ lám ba.

⁴Pilatu vúgà sɔ̀ŋ, bàà *Yahudu bəd: «Ìì zɛ̀ŋa, máù vú'ǹ zɔ̀ŋə aí səǹ gbaarú. Ìì kìì kúnú, mə́ bɔ̀b in nə́ŋ̀má oò bə̀ fágǹ ko'ǹmbə̀ sé.»

⁵Yéésù dá vúgǹ gə́, páá *mə̀lə̀ ku' bìá kə̀ dàál yɛ̀ɛ́l kìkìá. Pilatu bàà *Yahudu bəd: «Eere, Nɛ́ŋ Váàndo rə, oò yóo!»

⁶Zá *láŋsə́ gààd bəd kə̀ nɛ́b Vɛnɛ́b wúl bə̀ nwáàn bəd tá, bə̀ bé'ù gə́, bə̀ kpàm nwɔŋá, bə̀ bàà: «Ìì bágə̀ téélɛŋké ba! Ìì bágə̀ téélɛŋké ba!» Pilatu bàà bə̀: «Ìì pà'ù kúnú kə̀ yíl aí bìá, dáì bágə̀ sə̀n téélɛŋké ba. Máá gə́, sàà mə́ bɔ̀b invaksə́ nə́ŋ̀má oò bə̀ fágǹ lo'ǹmbə̀ sé.»

⁷*Yahudu bəd kè' bə̀ í'ù: «Obə́ gə́, bə́ tə́ kə̀ indaŋ̀mbə̀ nə́ŋ̀ naú. Nɛɛ̀n aa indaŋ̀mbə̀ bə́ bàà rə kíin gə́, val oò kò'ù kúnú. Kàandə, bàà kə̀ yíl oò bə̀ gə́, bəǹ Vɛnɛ́b Wàá.»

⁸Zɔ̀ŋ aa Pilatu kìì nwɔŋ aa gə́, də́dǹ mà'ùwì gbàákù.

⁹Pilatu kidbírà yiilú, yaà dɛ̀d Yéésù: «Ám gə́, ń vúgà bínì gú?» Zá Yéésù kè' í'ù nwɔŋ naà sé.

¹⁰Kàanyée gə́, Pilatu bààù: «Kè' ń í' mə́ nwɔŋ naà géè? Gabm̀bə̀ mə́ tə́ kə̀ kpɛŋsɛ́l naà ámbə̀ biìn lɛ́'ǹmbìá, bít mə́ tə́ kə̀ kpɛŋsɛ́l naà ámbə̀ bágǹmbə̀ téélɛŋké bərə, ń gàb sínì?»

¹¹Yéésù kè' í'ù, bàà: «Ń kə̀ kpɛŋsɛ́l kóó zɔ̀gɔ̀ má máá yílə́ sé, Vɛnɛ́b tùm piìnnà lɛgə́ paà síngə́ roó. Kə̀ taàbìá, nɛ́ŋə̀ aa kò' pii máà ám naà rə, oòra kàn n sə̀n kə̀ invaksə́ ma'ǹmbìá.»

¹²Sɛŋ də ba, Pilatu sàà taà kpaŋ̀ Yéésù biìn lɛ́'ǹmbìá. Zá *Yahudu bəd kpàm nwɔŋ, bə̀ bàà: «Bìn ń lɛ́' Nɛ́ŋ Váàndo aa ìì gə́, ń kùm *Sezar ɔ̀dzéd sɔ̀ŋ gá. Nɛ́ŋə̀ nə́ŋ̀ bààì bəǹ gààd gə́, oò gə́, gààd *Sezar ɔ̀dmáàná.»

¹³Pilatu kìì nwɔŋ aa kàangə́, vúŋ Yéésù gbaarú, bít pìì yaà kùm fágə́n mə̀ə̀d ba, zɔ̀ŋ aa bə̀ dɛ̀d «zɔ̀ŋ aa bə̀ kùd kə̀ bəŋ» doó. Kə̀ Ibraniŋko nwɔŋú gə́, bə̀ dɛ̀d «Gabata.»

¹⁴Sɛŋ də, nyàm aa nwúndù oò gə́, bə̀ dá *Paska ma'ǹ bərə ba, nyàm yíl tə́ŋú. Pilatu bàà *Yahudu bəd: «Eere, gààrí rə, oò yóo!»

¹⁵Zá bə̀ kpàm nwɔŋ, bə̀ bàà: «Ìì lò'ù kúnú! Ìì lò'ù kúnú! Ìì bágə̀ téélɛŋké ba!» Pilatu bàà bə̀: «Íí í' máà bág gààrí rə kíìn téélɛŋké bèì?» *Láŋsə́ gààd bəd bə̀ bààù: «Obə́ gə́, bə́ kə̀ gààd nə́ŋ̀má naà sé; gààd bə́ gə́, Sezar ní.»

¹⁶Kàanyée gə́, Pilatu pii bə̀ Yéésù ra, boò bágə̀ kíìn téélɛŋké ba. Sóózè bəd kò' Yéésù yàá.

¹⁷Yéésù pà' téélɛŋké oò kə̀ yíl oò ní, bə̀ vúg bìl bòórú, bə̀ ɛ̀m zɔ̀ŋ aa bə̀ dɛ̀d «yílə magə̀wà zɔ̀ŋ» də ba (Zɔ̀ŋ aarə, bə̀ dɛ̀d kə̀ Ibraniŋko nwɔŋú «Golgota»).

¹⁸Zɔ̀ŋ aarə ba, bə̀ bág taà Yéésù téélɛŋké ba. Sɛŋ də bərə, bə̀ bág nɛ́b vɔ̀ɔ̀m bəd iira kə̀ Yéésù tá, nɛ́ŋə̀ nə́ŋ̀ Yéésù nɛɛ̀n váànú, nɛ́ŋə̀ nə́ŋ̀ ɔ̀d kɔ̀ oò nɛɛ̀n kéènú, Yéésù téélɛŋké kɔ̀ boò tə́ŋtəŋú.

¹⁹Pilatu bád pii bə̀ iná, dáá bə̀ pè' Yéésù téélɛŋké ba. In aa bád də yóo: «YÉÉSÙ NAZARATU BÌÁ, *YAHUDU BƏD GÀÀRÁ.»

²⁰*Yahudu bəd zùúm, bə̀ gád in aa bád ìì pè' Yéésù yíl bəroó. Kàandə, zɔ̀ŋ aa bə̀ bág Yéésù bərə, zɔ̀ŋ bùùd kə̀ bìl sé. In aa bád bə̀ pè' rə, kə̀ Ibraniŋko nwɔŋú, kə̀ Latina nwɔŋú, bít kə̀ Grɛg nwɔŋú.

²¹Zá Yahudu bəd *láŋsə́ gààd bəd bàà Pilatu: «M̀ bád ‹Yahudu bəd gààd sí› zá m̀ bád: ‹Nɛ́ŋ Váàndo aa yée bàà: «Máára mə́ kùmsə̀n Yahudu bəd gààrá.» › »

²²Pilatu kè' í' bə̀: «In aa mə́ bád yérə, oò ləə nɛɛ̀n aarə rú.»

²³Sɛŋ aa sóózè bəd dáá bə̀ bágà Yéésù téélɛŋké bərə, bə̀ pú' gɔ̀' oò bərá, bə̀ pɛ̀l gə̀b naara. Sóózè déè gə́ kóólé, kə̀ oò bìá. Bə̀ pà' dàál wàà dùù bə̀ oòrə kɔ̀. Dàál wàà dùù bə̀ rə, bə̀ tə́l naà sé. Bə̀ mà'ù teeké luùm nə́ŋ̀ní, sɔ̀d lɛgú, yaà wə́ə́ dùù díi zé.

²⁴Sóózè bəd bə̀ bàà ɔ̀dnə́ŋ̀ bəd boò bòdba: «Báà seèl dàál wàà dùù bə̀ aarə sí. Zá báà lɛ́'ǹ sáásá, bɔ̀b báan taà gabàá, màn aa dá líìn doó.» Kə̀ aakíin də, bɔ̀b nwɔŋ aa Núúboòd Gìdń bàà rə, oò ma'míìn kúnú: «Pɛ̀l bə̀ gàb gɔ̀' mə́ bəd boò tə́ŋú, bít dàál wàà dùù bə̀ mə́ gə́, bə̀ lɛ́' kə̀ sáásá.» Aarə in aa sóózè bəd bə̀ mà' roó.

²⁵Yéésù nuù ra, Yéésù nuù gíírá, Mariyama Klopas kéèná, bít kə̀ Mariyama nɛ́d Magdala bìlú bìá, bə̀ dìì bəd Yéésù téélɛŋké kàd ba.

²⁶Zɔ̀ŋ aa Yéésù bé' nà'á oò, bít *nɛ́d sánán oò í'sɛ̀lbə̀ kɔ̀ oò kàd bə yée gə́, bàà nà'á oò: «Nà'á, aa yée wàà ń da.»

²⁷Bít Yéésù bàà nɛ́d sánán də: «Aa yée nà'ám da.» Bít sɔ̀d sɛŋ də ba, nɛ́d sánán aarə, pà' Mariyama, ɛ̀m bəní kə̀ oò yiilú.

²⁸Bòórú in aa taà gə́, Yéésù gàb yàá, bə́ŋyée gə́, in gə́ kóólé bɛ́d yàá. In aa bádmíìn Núúboòd Gìdńnú rə, oò wə́ə́ kúnú. Kə̀ taàbìá, Yéésù bàà taà: «Wəlsúud nwuu mə́ tə́ kúnú.»

²⁹Nyiŋə̀ nə́ŋ̀ wərà, nyìì kə̀ badn gbà'kèá. Sóózè bəd pàà bə̀ pá' sòsó badn gbà'kè aarə rú, bə̀ sɔ̀d sòsó rə téé aa bə̀ dɛ̀d isop də ba, bít pà' bə̀ àà Yéésù gú' ba.

³⁰Kàanyée gə́, Yéésù bèd badn gbà'kè aa gə́, bít bàà: «In gə́ kóólé bɛ́d yàá.» Bít bág yílə yɛ́b ba, bí' gɔ̀ŋsá.

³¹Nyàm aarə, nyàm si' bə̀ kudǹná. Nwúndù oòrə, nyàm aa bə̀ zíg nyàm nyi'ǹmbə̀ roó. Yahudu bəd nɛ́b yíl bə̀ bəd bə̀ í' gə́, nɛ́b aa bə̀ bág bə̀ téélɛŋké bərə, si' boò oò ləə wərə̀ téélɛŋké bə, *nyàm nyi'ǹmbə̀ sɛŋú sí. Nyàm nyi'ǹmbə̀ aarə, nyàm gbà'á. Kə̀ taàbìá, bə̀ nyɛ̀m taà Pilatu ra, oò kɛ̀l nɛ́b aa bə̀ bágə́l bə̀ téélɛŋké bərə dun bərá, bít pú' oò àà si' boò bəd də zɔ̀ŋ nə́ŋ̀ gɔ̀ŋ ba.

³²Kàanyée gə́, sóózè bəd yaà bə̀ kɛ̀d nɛ́ŋə̀ éèn də̀gə̀ də̀gə̀ bə̀ duná, yaà zəg nɛ́ŋə̀ iirúb ba, nɛ́b aa bə̀ bág bə̀ kə̀ Yéésù tə́ roó.

³³Bít bə̀ wə́ə́ Yéésù bə gə́, bə̀ bɔ̀b Yéésù val kò'ù yàá. Kə̀ taàbìá, bə̀ kɛ̀lə̀ taà dun bəd sé.

³⁴Zá sóózè nə́ŋ̀ boò tə́ŋú, yaà sàb Yéésù kə̀ díŋyɛ́rə̀ tàŋtéé rú, nyɛ̀lə́m kə̀ wəl tá, vúgə́l sə̀n zɔ̀ŋ də ba.

³⁵Nɛ́ŋə̀ aa tə́ ii nwɔŋ aa baàn nyɛ́'ǹ yérə, bé'à in aa taà rə yàá. Bít sedako aa mà' rə, tə́ vɛ́nà. Gàb yàá bəǹ tə́ nwɔŋ sɔ̀ɔ̀n baanàá, bɔ̀b aí kɔ̀ ìì kè' nwɔŋ aarə kúnú.

³⁶In bəraa taà kàandə, bɔ̀b ma'ǹ bɛ́'ǹmbə̀ nwɔŋ aa Núúboòd Gìdń bàà roó: «Níŋsə́ oò nə́ŋ̀má kɛdmíìn gá.»

³⁷Bítsɔ̀ŋ, bə̀ bàà tə́ Núúboòd Gìdń zɔ̀ŋ nə́ŋ̀ú: «Bə̀ dáù kíìn ɛgàá, nɛ́ŋə̀ aa bə̀ sàbə̀ roó.»

³⁸Bít bòórú in aa taà gə́, Yusufu nɛ́b Arimatiya bə̀, yaà nyɛ̀m Pilatu, oò pii bəǹ Yéésù sisá (Yusufu kɔ̀ sɛŋ də, *nɛ́d sánán Yéésù bìá, zá mə́' naú, nùù Yahudu bəd nɛ́b yíl bə̀ bərá.) Pilatu piiù kpaŋ̀ yàá. Yusufu ɛ̀m dá pàà Yéésù sisá.

³⁹Nikodemus dáá kɔ̀. Nikodemus də, nɛ́ŋə̀ aa sɔ̀d dáà Yéésù səǹ tígə́lú roó. Àà Urdi aa bə̀ dɛ̀d myrrhe roó, kə̀ in aa bə̀ dɛ̀d aloes də tá. Aarə in sol sɔ̀ɔ̀nkè bə̀ bərá. Pi'kè oòrə, mà'ì kílo laa nə́ŋ̀ zè kób.

⁴⁰Yusufu kə̀ Nikodemus tá, bə̀ pà' Yéésù si' yàá, bə̀ dàbə̀ val gɔ̀sú, bə̀ zà' in sol sɔ̀ɔ̀nkè bə̀ bəraa rə ba, kìínmbə̀ nɛɛ̀n aa *Yahudu bəd mà' bə̀ sáá val bərə kíin.

⁴¹Zɔ̀ŋ aa bə̀ bág Yéésù bərə, lɛ' wərà. Lɛsaa rə, sàà puu wərà. Sàà puu rə, lə̀ə̀ bə̀ bèd nɛ́ŋə̀ rú wərə̀ sé.

⁴²Sɛŋ aarə bərə, nɛ́b bəd bə̀ tə́ si' kudǹ nyàm nyi'ké bìá. Kə̀ taàbìá, Yusufu kə̀ Nikodemus tá, dá bə̀ lə̀ə̀ taà Yéésù sàà aarə rú.