Read Samba Leko Yohana 2 Bible Online

Yohana 2 - Samba Leko bible

Yohana 2

¹Sɛŋ iirə taà gə́, wálke kéèn pa'ǹmbə̀ ma'míìn Kana bìlú, Galili yɛ́b ba. Yéésù nuù kɔ̀ dáà wərà.

²Bít bə̀ dɛ̀d Yéésù wálke kéèn pa'ǹmbə̀ aarə rú, kə̀ *nɛ́b sáànmbə̀ oò bəd tá.

³Zɔ̀ŋ aa badn bɛ́d gə́, Yéésù nà'á oò yaà bààù: «Bə̀ kə̀ badn naà sɔ̀ŋ sé.»

⁴Zá Yéésù kè' í' gə́, bààù: «Nà'á, ń yaà níì zɔ̀ŋ máá səǹ gú? Sɛŋ mə́ wə́ə́ bə́ŋ̀ sé.»

⁵Kàanyée gə́, Yéésù nuù bàà nɛ́b tù' bə̀ ma'ǹ bəd: «Ìì mà' in aa dá ii baàn də kíìn kóólé.»

⁶Nyiŋə̀ bəraa ìì kùd kə̀ bəŋá, *Yahudu bəd nyìŋ bə̀ sáá kə̀ wəl, kìínmbə̀ láŋsə́ boò bəd bàà rə kíin də, ləə bəd wərə̀ nɔ̀ŋgɔ̀s. Nyiŋə̀ nə́ŋ̀ gə́ kóólé, dá ko'ǹ lítrə̀ laa naara, sínkɔ̀ laa núnà.

⁷Yéésù bàà nɛ́b tù' bə̀ ma'ǹ bəd: «Pɛ́n ìì nyíí nyiŋə̀ bəraa yée wəl lú.» Bít pɛ́n bə̀ nyíí nyiŋə̀ bəd wəl lú, yaà wə́ə́ gú' ba.

⁸Kàanyée gə́, Yéésù bàà bə̀: «Ìì tó' bə́ŋ̀ wəl aarə zɔ̀gɔ̀ ge, bít ìì àà nɛ́d gbàáro wálke bə̀ roó.» Bít tó' bə̀ ààù wəl kɔ̀.

⁹Nɛ́d gbàáro wálke bə̀ bèd wəl aa bíl badn yée gə́, gàb zɔ̀ŋ aa badn aarə vúgà bərə sé. Zá nɛ́b tù' bə̀ ma'ǹ bəraa bə̀ tó' wəl lə gə́, bə̀ gàbì sɔ̀ɔ̀nkè. Nɛ́d gbàáro wálke bə̀ dɛ̀rà wèéd váàndo gə́,

¹⁰bít bààù: «Kóó nɛ́ɛ̀réè, éèn pii nɛ́b bəd badn làmkè sína. Bít màìgə́ sɛ̀ɛ́n bəraa íí dɛ̀rà rə, bə̀ nyəəì gbàákù gə́, bə̀ pii taà badn aa sɔ̀ɔ̀n kùd síndoó. Zá ám gə́, káŋ ń zíg badn sɔ̀ɔ̀n aa yaà wə́ə́ bə́ŋyée zé!»

¹¹Ìì ɛ̀ga, kə̀ nɛɛ̀n aa yée kíin, Yéésù mà' taà inkɔrə éèn də̀gə̀ də̀gə̀ bə̀ Kana bìlú, Galili yɛ́b ba. Kə̀ aarə kíin, vúŋ ì' taà kaŋsɛ́l laa nyɛdkè oòra, bít *nɛ́b sáànmbə̀ oò bəd kɔ̀ bə̀ bàgə̀ taá.

¹²Zɔ̀ŋ aa in aa taà gə́, zá' ɛ̀m Kapɛrnaum bìlú, kə̀ nà'á oò tá, kudvɛɛ̀l oò bəd tá, bít kə̀ *nɛ́b sáànmbə̀ oò bəd tá. Bə̀ kùmà wərə̀ sɛŋ zɔ̀gɔ̀ní.

¹³*Yahudu bəd wálke aa bə̀ dɛ̀d *Paska rə, sɛŋ oò yaà tə́ wə́ə̀n kə́d bə yée gə́, Yéésù zá' ɛ̀m Urusalima bìlú.

¹⁴Zɔ̀ŋ aa dáá wə́ə́ láŋsə́ wúuú gə́, bɔ̀b nɛ́b nàà bə̀ gə́ə̀l bərá, nɛ́b bɛ̀rə̀ bə̀ gə́ə̀l bərá, kə̀ nɛ́b mìrə̀ bə̀ gə́ə̀l bəd tá. Dáá bɔ̀b nɛ́b ba' bə̀ pɛ́ɛ̀n bəd kɔ̀ bə̀ kùmì boò téébúrù bəd ba.

¹⁵Kàanyée gə́, Yéésù kùd nyɛ́gsə̀ kə̀ kaasə́ bərá, bít nìŋ vúŋ bə̀ taà láŋsə́ wúu boò kóólé, kə̀ bɛ̀rə̀ boò bəd tá, kə̀ nàà boò bəd tá. Kàanyée gə́, pú' zàd nɛ́b ba' bə̀ pɛ́ɛ̀n bəd ba' boò bəd yɛ́b ba, bít sùd lɛ́l téébúrù boò bəd də yɛ́b ba.

¹⁶Bít bàà nɛ́b mìrə̀ bə̀ gə́ə̀l bəd nwɔŋ aa yóo: «Pú' ìì zá' in bəraa kíìn zɔ̀ŋ aa ba! Pà' ìì bí' báá mə́ wúl aarə, kìínmbə̀ lumù kíin sí!»

¹⁷In aa taà kə̀ aakíin yée gə́, *nɛ́b sáànmbə̀ oò bəd sèl ìì zá' taà núúboòd bəd nwɔŋ bəraa yóo: «Báá Vɛnɛ́bá, í'sɛ̀l aa mə́ kə̀ wúl ámbə̀ rə, ko' tə́ máá tɛ́mú, kìínmbə̀ laa kíin.»

¹⁸Kàanyée gə́, Yahudu bəd nɛ́b yíl bə̀ bəd ìì dɛ̀rə̀: «Níì inkɔrə ń dá taà báàn ma'ǹmbìá, bít ń dá bə́ taà i'ǹ bəǹ tə́ kə̀ kpaŋ̀ naà, in ma'ǹmbə̀ kə̀ aakíin gú?»

¹⁹Yéésù kè' í' bə̀ gə́, bàà: «Zìb ìì wɔ̀b láŋsə́ wúl aa yée kúnú, bít sɛŋ toorə gə́, wə̀ə̀ máù kíìn dí'ǹ lɛgú.»

²⁰Bít Yahudu bəd nɛ́b yíl bə̀ bəd bə̀ dɛ̀rə̀: «Bə́ mà' zèd laa iira zè nɔ̀ŋgɔ̀s, láŋsə́ wúl aa yée wə'ǹmbìá. Bít ám gə́, ń dáù wə'ǹ dí'ǹ lɛgə́ sɛŋ toorə ní wa?»

²¹Zá láŋsə́ wúl aa Yéésù bàà yérə, bàà tə́ kə̀ si' oòra.

²²Sɛŋ aa Yéésù díím valə́ rə, *nɛ́b sáànmbə̀ oò bəd sèl bə̀ zá' taà nwɔŋ aa Yéésù bàà roó. Bə̀ bàg Núúboòd Gìdń nwɔŋ yàá, bít kə̀ nwɔŋ bəraa Yéésù bàà rə tá.

²³Sɛŋ aa bə́ŋ̀ Yéésù tóò Urusalima bìlú, *Paska sɛŋə́ rə, nɛ́b zùúm bàgə̀ sùnú, inkɔrə bəraa bə̀ bé' mà' rə bòórú.

²⁴Zá Yéésù gə́, pii yíl oò boò naà sé. Kàandə, gàb nɛ́b bəd kóólé tɛ́mì sɔ̀ɔ̀nkè.

²⁵Oò gə́, ɔ̀d nɛ́ŋə̀ nə́ŋ̀má oò bàà bəǹ nwɔŋ nɛ́b bəd yílə́ sé. Kə̀ aakíin də, kə̀ yíl oò bə̀ má, gàb in aa boò tɛ́mə́ rə yàá.