Read Samba Leko Yohana 21 Bible Online

Yohana 21 - Samba Leko bible

Yohana 21

¹Bòórú oòrə, Yéésù ì' yíl oò *nɛ́b sáànmbə̀ oò bəd númú sɔ̀ŋ, *Tiberiya wəl nyìgə̀l kàd ba. Ìì ɛ̀g nɛɛ̀n aa yaà ì' bə̀ yíl oò rú roó:

²Simon Piyɛr ra, Tomas (nɛ́ŋə̀ aa bə̀ dɛ̀rə̀ wàà bàrə̀b doó), Natanayɛl (nɛ́ŋə̀ Kana bìlú, Galili yɛ́b bə bìá), Zebede yɛb vɔ̀ɔ̀m bərá, bít kə̀ Yéésù *nɛ́b sáànmbə̀ bəd iira, wál bə̀ kùm ɔ̀dba.

³Simon Piyɛr bàà bə̀: «Máá gə́, máá ɛɛ̀m díb ko'ǹmbìá.» Kè' bə̀ í'ù: «Obə́ kɔ̀, bá ɛɛ̀m kə̀ ám tá.» Bít ɛ̀m dá bə̀ pìì kə̀ə̀rú. Zá tígə́l aarə rú rə, bə̀ kò' díb sé.

⁴Kàanyée gə́, nwúun tə́ kíìn sɔ̀dǹ nyɛdǹmbìá, Yéésù dìì wəl nyìgə̀l kàd ba. Zá *nɛ́b sáànmbə̀ bəd gabm̀bə̀ Yéésù rə, bə̀ gàb sé.

⁵Yéésù dɛ̀d bə̀: «Yɛb bərá, íí kòd díbì wa?» Kè' bə̀ í'ù: «Ə́ùwə́.»

⁶Bít bàà bə̀: «Ìì lɛ́' lìbə̀ gbàád íí bəd də kə̀ə̀d nɛɛ̀n váànú bə̀ rú, íí dá díb kíìn koràá.» Làà bə̀ lɛ́' lìbə̀ gə́, pɛ̀d bə̀ kíìn diŋ̀ pá'ǹmbə̀ kə̀ə̀rú; kàandə, bə̀ kòd díb zùúm yàá.

⁷*Nɛ́d sánán aa Yéésù í' rə, bàà Piyɛr: «Aarə Báátììkpɛ̀ŋ da!» Simon Piyɛr kìì nɛ́d sánán aarə bàà: «Aarə Báátììkpɛ̀ŋ da!» gə́, pà' páá gɔ̀' oòra (sɛŋ də, bɔ̀b bə́ŋ̀ páá gɔ̀' sisú bə̀ sé), kìd tab gɔ̀' gú' rə oò sə́gú, bít sə́d píí wəlú.

⁸*Nɛ́b sáànmbə̀ kambəd bírà kə̀ kə̀ə̀rá, bə̀ tə́ lìbə̀ gbà'á aa díb nyìì rú rə diŋàá, zɔ̀ŋ bùùd kə̀ dəŋsə́ gú' sé; budǹmbə̀ oòrə, mà' mɛ́tà laa núnə̀ sé.

⁹Bít bə̀ na'à dəŋsə́ bə gə́, bə̀ bé' laa nyàgə̀lá; díb ləə laa nyàgə̀l yílə́ wərə̀ kə̀ bə̀rɛ́d tá.

¹⁰Yéésù bàà bə̀: «Ìì àà díb aa íí kò' bə́ŋyée rə zɔ̀gɔ̀.»

¹¹Simon Piyɛr na' pìì kə̀ə̀rú, dìŋ vúŋà lìbə̀ rə dəŋsə́ ba. Lìbə̀ gbà'á rə, nyìì kə̀ díb gbàád bəd laa nə́ŋsínà zè kób zè toora. Lìbə̀ gbà'á rə, seè sé, kə̀ díb zùúm aa nyìì rú wərə̀ yée tə́ kóólé.

¹²Yéésù bàà *nɛ́b sáànmbə̀ bəd: «Yaaì líí inlíìnmbìá.» Kóó nɛ́d sánán oò nə́ŋ̀má dɛ̀d: «Ámgə́, ń nɛ́ɛ̀réè gú?» sé. Kàandə, bə̀ gàbì sɔ̀ɔ̀nkè, aarə Báátììkpɛ̀ŋá.

¹³Yéésù gbarà *nɛ́b sáànmbə̀ bəd sunú, pà' bə̀rɛ́d, pii bə̀ kúnú, bít pà' pii bə̀ díb də kɔ̀.

¹⁴Bə́ŋyée gə̀b toorə oò roó, Yéésù tə́ taà yíl oò i'ǹ *nɛ́b sáànmbə̀ oò bəd númú, sɛŋ aa val kò'ù bít díímà kə̀ valə́ roó.

¹⁵Líí bə̀ bɛ́' inlíìnmbə̀ gə́, Yéésù dɛ̀d Simon Piyɛr: «Simon, Yohana wàá, í'sɛ̀l ń aa kə̀ máá rə, kànsə̀n nɛ́b aa yée bèì?» Kè' í'ù: «Èè, Báátììkpɛ̀ŋá, ń gàb yàá, mə́ í' n tə́ kúnú.» Bít Yéésù bààù: «Ǹ zàn bɛ̀rə̀ yɛb mə́ bərá.»

¹⁶Bít Yéésù gámə̀ nwɔŋ sɛŋ iirə oò roó, dɛ̀rə̀: «Simon, Yohana wàá, ń í' mə́ yèè?» Kè' í'ù: «Èè Báátììkpɛ̀ŋá, ń gàb yàá, mə́ í' n tə́ kúnú.» Bít Yéésù bààù: «Ǹ nwán bɛ̀rə̀ mə́ bərá.»

¹⁷Yéésù gámə̀ nwɔŋ aa gə̀b toorə sɔ̀ŋ: «Simon, Yohana wàá, ń í' mə́ yèè?» Simon tɛ́m sabə̀ yàá, Yéésù dɛ̀rə̀ sɛŋ toorə: «Ń í' mə́ yèè?» roó. Bít kè' í' Yéésù: «Báátììkpɛ̀ŋá, ń gàb in gə́ ìì kóólé, ń gàb yàá sɔ̀ɔ̀nkè, mə́ í'ǹ tə́ kúnú.» Yéésù bààù: «Ǹ zàn bɛ̀rə̀ mə́ bərá.

¹⁸Mə́ tə́ən kíìn baanàá, aarə nwɔŋ sɔ̀ɔ̀ná' sɛŋ aa bə́ŋ̀ ń tə́ də̀b də, ń páá sìní gɔ̀' ń kə̀ yíl ń da, ń ɛ̀m zɔ̀ŋ aa ń í' bəroó. Zá sɛŋ aa ń dooì rə, ń dá nɛɛ̀n wɔràá, bít nɛ́ŋə̀ nə́ŋ̀ gɔ̀ŋ dáan sə̀n gɔ̀' páánàá, ko' dá n aàn zɔ̀ŋ aa ń í' dáànmbə̀ bə síndə ba.»

¹⁹(Kə̀ nwɔŋ bəraa yóo, Yéésù tə́ nɛɛ̀n aa val dá Piyɛr ko'ǹ dú rə baanàá, bít dá Vɛnɛ́b kaŋsɛ́l pi'nàá.) Yéésù gám bɛ́' nwɔŋ aa gə́, bàà Piyɛr: «Ǹ bàg mə́ kúnú.»

²⁰Piyɛr lìb bí' núù bòórú gə́, bé' Yéésù *nɛ́d sánán í'sɛ̀lbə̀ rə tóò yaànà boò bòórú. Oòrə, nɛ́ŋə̀ aa ləə bírà Yéésù naà, sɛŋ aa bə̀ tə́ in líìn dú, bít dɛ̀rə̀: «Báátììkpɛ̀ŋá, nɛ́ɛ̀réè dá n sə̀n ko'ǹ lɛbm̀ gú?» roó.

²¹Zɔ̀ŋ aa Piyɛr bé' nɛ́d sánán aa gə́, dɛ̀d Yéésù: «Báátììkpɛ̀ŋá, màn aa yée gə́, níì dáù sə̀n wə́ə̀n gú?»

²²Yéésù kè' í' bààù: «Dáà mə́ í' tə́ oò kùm kə̀ gɔ̀ŋsá, máà bírà zé gə́, in aa wáal lə ní? Ámgə́, ǹ bàg mə́ kúnú!»

²³Kàanyée gə́, nwɔŋ aa yée sa'ì nɛ́b bagké bəd tə́ŋú. Bə̀ bàà gə́, nɛ́d sánán aa yée gə́, val kò'ù gá. Zá Yéésù gə́, bàà kàan sé, baànmbə̀ val kò'ù gá roó. Zá bààù: «Dáà mə́ í' tə́ oò kùm kə̀ gɔ̀ŋsá, máà bírà zé gə́, in aa wáal lə ní?»

²⁴Nɛ́d sánán aa yée, mà' sə̀n sedako in bəraa rə kóólé yílú, bít bád sə̀ní núúboòraa kə̀ nɛɛ̀n oòra. Bít bə́n gabm̀ yàá, sedako aa mà' rə, sedako sɔ̀ɔ̀ná.

²⁵Yéésù mà' in ɔ̀d kam bərì zùúm sɔ̀ŋ. Dáà nɛ́ŋə̀ bád in bəraa rə tə́ kíìn nə́ŋ̀ nə́ŋ̀ kóólé gə́, mə́ sèl lə, yɛ́b kə̀ zɔ̀ŋtá, bán núúboòd bəraa bə̀ dá bádǹ də ko'ǹmbə̀ gá.