Read Samba Leko Yohana 3 Bible Online

Yohana 3 - Samba Leko bible

Yohana 3

¹Nɛ́ŋə̀ nə́ŋ̀ *Farisa bəd gə̀b tə́ŋú, nə́gə́l oò Nikodemus. Oòra kùmsə̀n *Yahudu bəd gààrá.

²Tígə́l nə́ŋ̀ kàani, yaà Yéésù sunú, yaà bààù: «Nɛ̀ná, bə́ gàb yàá, Vɛnɛ́b tùmmmà yaàn sán bə́ iná. Kàandə, inkɔrə aa ń mà' rə, nɛ́ŋə̀ nə́ŋ̀má bán ma'ǹmbə̀ gá, sìná nɛ́ŋə̀ aa Vɛnɛ́b tə́ kə̀ oò tə́ roó.»

³Yéésù kè' í'ù: «Mə́ tə́ən kíìn baanàá, aarə nwɔŋ sɔ̀ɔ̀ná, nɛ́ŋə̀ nə́ŋ̀má bán *Vɛnɛ́b gààd bé'ǹmbə̀ gá, bíd bə̀ lɛ̀bə̀ sɔ̀ŋ síngə́ roó.»

⁴Nikodemus dɛ̀rə̀: «Ééleè nɛ́ŋə̀ aa dooì rə, bít bə̀ dáù taà lɛbm̀ sɔ̀ŋ gú? Bít dá bée báàn bídǹ piìnmbə̀ nà'á oò bàgəlú, bɔ̀b oò lɛ̀bə̀ sɔ̀ŋì?»

⁵Yéésù kè' í'ù: «Mə́ tə́ən kíìn baanàá, aarə nwɔŋ sɔ̀ɔ̀ná, dáà nɛ́ŋə̀ lɛbmíìn kə̀ wəlá, bít kə̀ Nwul Gìdń síngə́, bán piìnmbə̀ *Vɛnɛ́b gààrú gá.

⁶Nɛ́ŋə̀ gə́, lɛ̀b nɛ́ŋàá. Zá Nwul Gìdń gə́, lɛ̀b nwulá.

⁷Nwɔŋ aa mə́ bàà ii: ‹Aa dá sɔ̀ɔ̀n də gə́, bíd boò lɛ̀bi sɔ̀ŋ íí kóólé yérə, oò kò' ii yíl sí.›

⁸Nwul pɛ̀b ɛ̀m zɔ̀ŋ aa í' bərə ba. Ń kìì dìímsə̀ aa tə́ ma'ǹ də tə́ kúnú, zá ń gàb zɔ̀ŋ aa vúgà bà, bít ń gàb zɔ̀ŋ aa tə́ ɛɛ̀m bərə gá. Nɛ́ŋə̀ aa Nwul Gìdń lɛ̀bə̀ rə, dá kuùm kə̀ aakíin.»

⁹Kàanyée gə́, Nikodemus dɛ̀rə̀: «Ééleè in aarə dá taà báàn ma'míìn bə̀ gú?»

¹⁰Yéésù kè' í'ù: «Ámda ń kùmsə̀n nɛ́b Israila bə̀ bəd nɛ̀n gbà'á, bít ń gàb in bəraa rə sín wa?

¹¹Mə́ tə́ən kíìn baanàá, aarə nwɔŋ sɔ̀ɔ̀ná, obə́ gə́, bə́ mà' sedako tə́ in aa bə́ gàb də yílú, bít bə́ tə́ ii in aa bə́ bé' kə̀ núù bə́ rə baàn nyɛ́'nàá. Zá íí í' sedako aa bə́ mà' ii rə ke'ǹmbə̀ sé.

¹²Mə́ gámi nwɔŋ in bəraa taà zɔ̀ŋə yɛ́b bərə yílú, íí kè' sé. Bít ééleè íí dá taà ke'nì, dáà mə́ bàà ii tə́ in aa *Vɛnɛ́b yiìl lə nwɔŋ gə́ roó?

¹³Kóó nɛ́ŋə̀ nə́ŋ̀má na' bèd lɛgə́ paà sé, sìná màn aa vúgà lɛgə́ paà roó; aarə nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà roó!

¹⁴Kìínmbə̀ nɛɛ̀n aa Musa zá' bi' lɛgú, fɔ̀gú rə kíin sɔ̀ŋ, bə̀ dá nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə dáàn ma'ǹ kàani.

¹⁵Kàandə, nɛ́ŋə̀ aa bàgə̀wì rə, dákíìn báàn *gɔ̀ŋsə́ aa bɛ́d bə gá rə bɔbm̀bìá.

¹⁶«Vɛnɛ́b í' nɛ́b aa zɔ̀ŋə yɛ́b bə yée sɔ̀ɔ̀n; kə̀ taàbìá, piià taà Wàà nə́ŋgùm oòra. Nɛ́ŋə̀ aa bàg Wàà aarə, bɔ̀b gá, zá dá *gɔ̀ŋsə́ aa bɛ́d bə gá rə bɔbàá.

¹⁷Vɛnɛ́b tùmà wàà oò zɔ̀ŋə yɛ́b bə, bɔ̀b oò fág nɛ́b bəd gá. Zá bɔ̀b nɛ́b aa zɔ̀ŋə yɛ́b bərə, boò bɔ̀b súúke kə̀ oòra.

¹⁸Kóó nɛ́ɛ̀réè, bàg wàà aarəì gə́, fágə́n kò'ù gá. Zá nɛ́ŋə̀ aa bàgə̀ síndə, fágə́n kò'ùwì gbòód. Kàandə, bàg Vɛnɛ́b Wàà nə́ŋgùm sé.

¹⁹Aa yée nɛɛ̀n aa fágə́n vúgà rú roó' Laa nyɛdkè yaà zɔ̀ŋə yɛ́b ba, zá nɛ́b aa zɔ̀ŋə yɛ́b bərə, í' bə̀ kàn tígə́lá. Bə̀ í' laa nyɛdkè sé. Kàandə, in bəraa bə̀ tə́ ma'ǹ də, sɔ̀ɔ̀n sé.

²⁰Nɛ́b aa bə̀ tə́ invaksə́ ma'ǹ də gə́ kóólé, bə̀ dá laa nyɛdkè kíìn zeenàá, bə̀ yaà laa nyɛdkè bə gá. Kàandə, laa dá invaksə́ boò bəd kíìn i'nàá.

²¹Nɛ́b aa bə̀ tə́ in aa tə́ vɛ́nà rə ma'ǹ də, bə̀ yaà laa nyɛdkè ba, bɔ̀b laa nyɛdkè oò ì' kúnú, in aa bə̀ tə́ ma'ǹ də, tə́ kə̀ Vɛnɛ́b kpɛŋsɛ́lá.»

²²Bít bòórú gə́, Yéésù ɛ̀m Yahudiya yɛ́b ba, kə̀ *nɛ́b sáànmbə̀ oò bəd tá. Ləə tá' sɛŋ zɔ̀gɔ̀ Yahudiya yɛ́b ba, kə̀ *nɛ́b sáànmbə̀ oò bəd tá, bít pii nɛ́b bəd baptisma.

²³Yohana kɔ̀ pii nɛ́b bəd baptisma Ainon, Salim bìl kàd ba; kàandə, wəl ká'ì zɔ̀ŋ aarə ba. Nɛ́b bəd bə̀ yaà oò sunú, tə́ bə̀ baptisma piinàá.

²⁴Sɛŋ də, bə́ŋ̀ kò' bə̀ páá Yohana wúltígə́l bə̀ rú sé.

²⁵Yohana *nɛ́b sáànmbə̀ kambəd ìì sɔ̀d pìrə̀ zibm̀bə̀ kə̀ Yahudu nə́ŋ̀á, nɛɛ̀n aa láŋsə́ boò bàg dú, nɛ́ŋə̀ dá wəl nyiŋ̀ dú, bɔbm̀ kuùmbə̀ nyɛdkè Vɛnɛ́b númú roó.

²⁶Zá' bə̀ ɛ̀m Yohana sunú, bít bə̀ bààù: «Nɛ̀ná, sèl ń zá' nɛ́ŋə̀ aa nyàam kùmà kə̀ ám tə́ Urdun nwuu naà gúu rəì wa, màn aa ń gám báà nwɔŋ oò roó? Oò kɔ̀ tə́ nɛ́b bəd baptisma piinàá, nɛ́b bəd zùúm dáá tə́ oò sunú!»

²⁷Yohana kè' í' bə̀: «Kóó nɛ́ŋə̀ nə́ŋ̀má bán in nə́ŋ̀ bɔbm̀bə̀ gá, Vɛnɛ́b piiù síngə́ roó.

²⁸Aíra kə̀ yíl aí bìá, íí dá sə̀n báàn sedako ma'ǹmbə̀ máá yílú, kìínmbə̀ mə́ bààiyà rə kíin: ‹Máára mə́ kùmsə̀n Krístù gá, zá Vɛnɛ́b tùm máà sə̀n oò númú.›

²⁹Kéèn gə́, nɛ́ŋə̀ aa pà' kéèn də bìá. Zá nɛ́ŋə̀ aa kùm wèéd váàndo ɔ̀dzéd də, dìì oò kàrú, zɛ̀ŋ nwɔŋ oòra, bít kìì tɛ́m làmkè kə̀ wèéd váàndo pə̀gə̀lib nwɔŋ aa tə́ kiìn doó. Tɛ́m làmkè aarə kùmsə̀n aa mə́ tə́ kiìn doó. Kə̀ taàbìá, bə́ŋyée mə́ kìì làmkè kàn mə́ taà nɛɛ̀ná.

³⁰Gbà'á oò bə̀ gə́, kàŋ oò dáá kə̀ númú ní, bít gbà'á mə́ gə́, oò bíd bòórú.»

³¹«Màn aa vúgà *Vɛnɛ́b yiìl lə, tə́ in gə́ kóólé yílú. Nɛ́ŋə̀ aa vúgà tə́ zɔ̀ŋə yɛ́b bərə gə́, nɛ́ŋə̀ zɔ̀ŋə yɛ́b bə bìá. Oò gə́, dá in bəraa yɛ́b bərə nwɔŋ boò gámàá. Zá màn aa vúgà Vɛnɛ́b yiìl lə, tə́ in bəd kóólé yílú.

³²Oò gə́, mà' sedako in aa bé'à, bít kììà rə yílú. Zá kóó nɛ́ŋə̀ nə́ŋ̀má kè' sedako oò aa mà' rə sé.

³³Màn aa kè' sedako oò aa mà' rəì rə, ì' gə́, nwɔŋ aa Vɛnɛ́b bàà rə, nwɔŋ sɔ̀ɔ̀ná.

³⁴Màn aa Vɛnɛ́b tùmə̀wà sə̀n də, dá Vɛnɛ́b nwɔŋ baanàá. Kàandə, Vɛnɛ́b nyííùwàì kə̀ Nwul Gìdńná.

³⁵Báá í' Wàà oòra, pii taà in gə́ kóólé oò nɛɛ̀n tɛ́mú.

³⁶Kóó nɛ́ɛ̀réè, bàg Vɛnɛ́b Wààì gə́, bɔ̀b *gɔ̀ŋsə́ aa bɛ́d bə gá rə yàá. Zá màn aa ləə Vɛnɛ́b Wàà síndə gə́, bɔ̀b gɔ̀ŋsə́ aarə gá. Nɛ́ŋə̀ aarə, Vɛnɛ́b nɔ̀m gbà'á dá kuùm oò yílú, zèd kə̀ zèrá.»