Read Samba Leko Yohana 4 Bible Online

Yohana 4 - Samba Leko bible

Yohana 4

¹Sɛŋ aarə ba, *Farisa bəd bə̀ kìì gə́, Yéésù mà' tə́ nɛ́b zùúm bəd bí'ǹ *nɛ́b sáànmbə̀ oò bərá, bít tə́ bə̀ baptisma piinàá, kànsə̀n Yohana ra. Vɛ́nà bə̀ gə́, Yéésù kə̀ yíl oò bə̀ má, pii nɛ́b bəd baptisma sé. Zá *nɛ́b sáànmbə̀ oò bəd pii sùnú. Zɔ̀ŋ aa Yéésù gàb *Farisa bəd bə̀ kìì nwɔŋ aarəì yée gə́, záá dàà Yahudiya yɛ́bá, bít kidbírà kíìn Galili yɛ́b ba.

⁴Dá ɛɛ̀m wərə̀ gə́, bə́ŋ̀ dá sína Samariya yɛ́b taàn daanàá.

⁵Kàanyée gə́, ɛ̀m yaà wə́ə́ zɔ̀ŋ nə́ŋ̀ Samariya bìl kàd ba, bə̀ dɛ̀d zɔ̀ŋ aarə Sikar, pe' tə́ kə̀ yɛ́b aa Yakubu pii wàà váàndo oò Yusufu rə tá.

⁶Zɔ̀ŋ aarə, Yakubu gbə̀' wəl wərà. Yéésù ɛ̀m mú'à kə̀ kpaŋ̀ yée gə́, yaà kùm wəl gbə'ké gú' ba. Sɛŋ də, tə́ nyàm yíl tə́ŋú.

⁷Nɛ́ŋ kéèndo nə́ŋ̀ Samariya bə̀ yaà wəl kɔbm̀bìá. Yéésù bé'ù gə́, bààù: «M̀ pii mə́ wəl nyəə̀nmbìá.»

⁸(*Nɛ́b sáànmbə̀ oò bəd bə̀ ɛ̀mì bìlú, inlíínmbə̀ lɛ́bm̀bìá.)

⁹Nɛ́ŋ kéèndo Samariya bə̀ rə, bàà Yéésù: «Zá ám gə́, ń *Yahudu! Ééleè ń dɛ̀d taà wəl nyəə̀nmbə̀, máá mə́ nɛ́d Samariya bə̀ naà gú?» (Kàandə, Yahudu bəd bə̀ saŋ̀ nɛ́b Samariya bə̀ bəd gá.)

¹⁰Yéésù kè' í'ù: «Dáà ń gàb in aa Vɛnɛ́b pii rə yàá, bít ń gàb màn aa nyɛ̀m m wəl nyəə̀nmbə̀ yérəì gə́, éèn ń dáù sə̀n nyɛmàá, bít oò kɔ̀, dáàn wəl gɔ̀ŋsə́ bə̀ piinàá.»

¹¹Nɛ́ŋ kéèndo rə bààù: «Gbàároá, ń kə̀ kpɔ̀b wəl bə̀ kɔbm̀ naà sé, bít wəl gbə'ké aa yée kɔ̀, dɛ́l pí' yàá. Ń dá leè ma'nì, ń dá taà wəl gɔ̀ŋsə́ bə̀ bɔbm̀ gú?

¹²Doo bə́ Yakubu, gbə̀' dàà bə́ sə̀n wəl aa yée nyàamdoorú. Oò kə̀ yíl oò bə̀ má, nyəə wəl aa yée yàá, yɛb vɔ̀ɔ̀m oò bərá, kə̀ inzanzáàn gə̀b oò bəd tá, boò kɔ̀ bə̀ nyəəì kɔ̀. Ám gə́, ń sèl, ń bàà bəǹ kànsə̀n Yakubu kə̀ gbà'áì?»

¹³Yéésù kè' í'ù: «Kóó nɛ́ɛ̀réè, nyəə wəl aa yéeì gə́, bít dá wəlsúud kíìn kiìn sɔ̀ŋ.

¹⁴Zá màn aa nyəə wəl aa máù piìn dəì rə gə́ kóólé, wəlsúud nwuù sɔ̀ŋ gá. Kàandə, wəl aa máù piìn də, dá wəl ə'kè bíìl oò tɛ́mú, dáù *gɔ̀ŋsə́ aa bɛ́d bə gá rə piinàá.»

¹⁵Nɛ́ŋ kéèndo rə, bààù: «Gbàároá, ǹ pii mə́ wəl aa roó, bɔ̀b máà kìì wəlsúud sɔ̀ŋ sí, bít máà bírà wəl yaàn kɔbm̀bə̀ zɔ̀ŋə wəl gbə'ké aa rú sɔ̀ŋ sí.»

¹⁶Yéésù bààù: «Ɛ̀m dáá ǹ dɛ̀rà váàn ń da, bít kidbíd ǹ yaà zɔ̀ŋə.»

¹⁷Wàà kéèn kè' í'ù: «Mə́ kə̀ váàn naà sé.» Bít Yéésù bààù: «Ámbə̀ sə̀n vɛ́nà, kə̀ baànmbə̀ bəǹ kə̀ váàn naà sé.

¹⁸Kàandə, ń paàl vɔ̀ɔ̀m núnà. Bít Nɛ́ŋ Váàndo aa ń tə́ kuùm kə̀ oò tə́ bə́ŋyée rə má, váàn ń gá. Ḿ bàà mə́ nwɔŋ sɔ̀ɔ̀n yàá.»

¹⁹Kàanyée gə́, nɛ́ŋ kéèndo rə bààù: «Gbàároá, mə́ gàb yàá, ám yée, ń *Vɛnɛ́b gbantumsə̀ nə́ŋ̀á.

²⁰Doo bə́ Samariya nɛ́b bəd, pɔ̀b bə̀ sáá Vɛnɛ́b, kɔ̀l aa yée ba. Zá aí, íí *Yahudu bəd gə́, íí bàà zɔ̀ŋ aa bə̀ dá Vɛnɛ́b pɔ̀bm̀ bərə gə́, tə́ Urusalima bìlə́ ní.»

²¹Yéésù kè' í'ù: «M̀ bàg nwɔŋ máá bìá, wàà kéèná. Sɛŋ tóò yaanàá, íí pɔ̀b Báá Vɛnɛ́b kɔ̀l aa bə gá, sínkɔ̀ Urusalima bìlə́ gá.

²²Aíra, íí nɛ́b Samariya bə̀ gə́, íí gàb in aa íí tə́ pɔ̀bm̀ də sé. Zá obə́ bə́ *Yahudu bəd gə́, bə́ gàb in aa bə́ tə́ pɔ̀bm̀ də yàá. Kə̀ aakíin də, kpaŋ̀ súúke bə̀ gə́, vúgà Yahudu bəd naú.

²³Zá sɛŋ tóò kíìn yaanàá, sɛŋ aa nɛ́b Báá Vɛnɛ́b bə̀ pɔ̀bm̀ vɛ́nà bə̀ bəd bə̀ dáù pɔ̀bm̀ kə̀ kpaŋ̀ sɔ̀ɔ̀ná, kə̀ nɛɛ̀n aa Nwul Gìdń ì' bə̀ rə kíin doo. Sɛŋ də yaà wə́ə́ì bə́ŋyóo. Kàandə, Báá Vɛnɛ́b í' nɛ́b bəraa bə̀ tə́ù pɔ̀bm̀ nɛɛ̀n aarə rú roó.

²⁴Vɛnɛ́b gə́, nwuulá, bít nɛ́b aa bə̀ dáù pɔ̀bm̀ də kɔ̀, boò pɔ̀bə̀ kə̀ kpaŋ̀ vɛ́nà bìá, bít kə̀ nɛɛ̀n aa Nwul Gìdń ì' bə̀ rə kíin.»

²⁵Nɛ́ŋ kéèndo rə bààù: «Mə́ gàb yàá, *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə dáà kíìn yaanàá. Sɛŋ aa yaà wə́ə́ì rə, dá bə́ in bəd kóólé kíìn baàn i'nàá.» *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ rə, taà kùmsə̀n baànmbə̀ Krístù.

²⁶Yéésù kè' í'ù: «Aarə máára, nɛ́ŋə̀ aa mə́ tə́ən nwɔŋ gáàm yéroó.»

²⁷Sɛŋ aarə ba, Yéésù *nɛ́b sáànmbə̀ bəd kid bə̀ bírà taá. Zɔ̀ŋ aa bə̀ bé'ù tə́ nwɔŋ gáàm kə̀ nɛ́ŋ kéèndo rə, kò' bə̀ yíl yàá. Zá kóó nɛ́ŋə̀ nə́ŋ̀má boò tə́ŋú, sèl dɛdǹmbə̀: «Ń í' níì kə̀ oòì?» Sínkɔ̀: «Kə̀ níìbə̀ ń tə́ taà nwɔŋ gáàm kə̀ oòì?» sé.

²⁸Kàanyée gə́, wàà kéèn lɛ́' dàà wəl nyiŋə̀ wərà, bít nùù kidbírà bìlú. Yaà wə́ə́ gə́, bàà nɛ́b bəd:

²⁹«Yaà ìì ɛ̀g Nɛ́ŋ Váàndo nə́ŋ̀ tə́ zɔ̀ŋə. Bàà mə́ in bəraa mə́ mà' nyàam númú rə kóólé. Kam nə́ŋ̀ gə́, oòra kùmsə̀n Krístù reè gə́?»

³⁰Bít bə̀ vúgə́là bəd taà bìlú, bə̀ yaà bəd taà Yéésù sunú.

³¹Zɔ̀ŋ aa nɛ́ŋ kéèndo aa ɛ̀m gə́, *nɛ́b sáànmbə̀ bəd bə̀ tə́ Yéésù nyɛɛ̀m, oò líí inlíìnmbìá. Bə̀ bààù: «Nɛ̀ná, ǹ líí inlíìnmbìá!»

³²Zá Yéésù kè' í' gə́, bàà bə̀: «Mə́ tə́ kə̀ inlíìnmbə̀ aa íí gàb síndə naú.»

³³Kàanyée gə́, *nɛ́b sáànmbə̀ bəd ìì dɛ̀d ɔ̀dnə́ŋ̀ bəd boò bòdba: «Kamgə́, nɛ́ŋə̀ nə́ŋ̀ ààùwà sə̀n inlíìnmbèì gə́?»

³⁴«Yéésù bàà bə̀' Inlíìnmbə̀ máá bə̀ gə́, ləə̀nmbə̀ màn aa tùm máà rə nwɔŋá, bít ma'ǹ bɛ́'ǹmbə̀ tùsaa pii máà mà' roó.

³⁵Aí gə́, íí bàà: ‹Sòò naarə sɔ̀ŋ gə́, yɛd kɛdǹ sɛŋ dákíìn wə́ə́nàá.› Zá máá gə́, mə́ bàà ii yàá, ìì ɛ̀g núù lɛ' bəd bə sɔ̀ɔ̀nkè' yɛd wàà nuù bə̀ ú' yàá, bít də́ŋì kɛdǹmbìá!

³⁶Màn aa tə́ yɛd kɛdǹ də, tə́ mú'sɛ̀l dùm oò bɔbm̀ naú, bít tə́ yɛd wàà *gɔ̀ŋsə́ aa bɛ́d bə gá rə bə̀ wálàá. Kàanyée gə́, màn aa wùù rə, kə̀ màn aa kɛ̀d də tá, wál ìì dá tɛ́m làmkè kiìn nə́ŋ̀ní.

³⁷Kàandə, vɛ́nà bə̀ nàà zagəm, bə̀ bàà: ‹Nɛ́ŋ váàndo nə́ŋ̀ wùù kúnú, bít nɛ́ŋ váàndo nə́ŋ̀ ɔ̀d yaà kɛ̀d sunú.›

³⁸Tùm mə́ àà ii, dáá ìì kɛ̀d yɛd, lɛsaa íí làm sə̀n gá rə rú. Nɛ́b gɔ̀ŋ bərì làm sùnú, bít aí kɔ̀, bɔ̀b íí líí taà boò bòórú.»

³⁹Nɛ́b Samariya bìlú bə̀ bəd zùúm, bə̀ bàg Yéésù kə̀ nwɔŋ aa nɛ́ŋ kéèndo aa bàà: «Bàà mə́ in bəraa mə́ mà'à nyàam númú rəì kóólé» roó.

⁴⁰Kə̀ taàbìá, zɔ̀ŋ aa nɛ́b Samariya bə̀ bəd ɛ̀m yaà bə̀ wə́ə́ Yéésù səǹ gə́, bə̀ nyɛ̀mə̀ oò kùm kə̀ obənə́ tá. Bít Yéésù kùm taà wərə̀ kə̀ boò tá, sɛŋ iira.

⁴¹Bít nɛ́b zùúm bəd yaà bə̀ bàg sə̀n Yéésù sɔ̀ŋ, kə̀ nwɔŋ bəraa tə́ bə̀ baàn kə̀ yíl oò bə̀ ní roó.

⁴²Bít bə̀ bàà nɛ́ŋ kéèndo aarə: «Bə́ŋyée gə́, bə́ bàg də, nwɔŋ aa ń bàà rə bòórú gá. Zá bə́ kììùwì kə̀ yíl obə́ bìá, bít bə́ gàb yàá vɛ́nà, oòra kùmsə̀n Nɛ́d Nɛ́ŋə̀ bə̀ Súùn yɛ́b bə bìá.»

⁴³Bòórú Yéésù ləə Sirar bìlú sɛŋ iirə gə́, bít záá ɛ̀m taà Galili yɛ́b ba.

⁴⁴Yéésù kə̀ yíl oò bə̀ máá, bàà yàá: «*Vɛnɛ́b gbantumsə̀ bɔ̀b kaŋsɛ́l bìl aa bə̀ lɛ̀bə̀ rú rə kɔ̀ gá.»

⁴⁵Nɛ́b Galili yɛ́b bə bə̀ bəd bə̀ dáà Urusalima bìlú kɔ̀, *Wálke vúgǹmbə̀ Misra yɛ́b bə bə̀ ba. Bə̀ bé' in aa Yéésù mà' wərə̀ rəì kóólé. Kə̀ taàbìá, nɛ́b bəd kè'ù taà dun sɔ̀ɔ̀nkè, sɛŋ aa yaà Galili yɛ́b bəroó.

⁴⁶Kàanyée gə́, Yéésù kidbírà taà Kana bìlú sɔ̀ŋ, Galili yɛ́b ba, zɔ̀ŋ aa pɛ́n wəl bíl badn bəroó. Nɛ́ŋ váàndo nə́ŋ̀ wərà, nɛ́d gbàáro gɔ̀mnà tùsú bìá. Nɛ́ŋ váàndo aarə, kə̀ wàà váàndo nə́ŋ̀ naú, si' nwuù kúnú, Kapɛrnaum bìlú.

⁴⁷Zɔ̀ŋ aa kìì bə̀ Yéésù vúgà Yahudiya yɛ́b ba, yaà wə́ə́ì Galili yɛ́b bə yée gə́, zá' ɛ̀m oò sunú, bít yaà nyɛ̀mə̀ kúnú, bààù gə́, oò ɛ̀m Kapɛrnaum bìlú, dá oò gáŋ wàà váàndo bəǹ aa val tə́ù ko'ǹ də sisá.

⁴⁸Yéésù bààù: «Sɛŋ gə́ kóólé, íí bán bagǹmbə̀ gá, íí bé' inkɔrə bəd kə̀ in də́dǹ bə̀ tó'ǹ bəd tə́ síngə́ roó.»

⁴⁹Nɛ́d gbàáro gɔ̀mnà tùsú bə̀ kè' í'ù: «Báátììkpɛ̀ŋá, ǹ yaà máá yiilú, bɔ̀b bə́ŋ̀ val oò ko' wàà váàndo mə́ sí.»

⁵⁰Yéésù bààù: «Ǹ ɛ̀m kíìn ám kàrú, wàà váàndo ń dá kuùm kə̀ gɔ̀ŋsá.» Nɛ́ŋ váàndo aarə, kè' Yéésù nwɔŋ aa bààù rə yàá, bít kidbíd kúnú.

⁵¹Bə́ŋ̀ sím tə́ ɛɛ̀m kpaŋ̀ tɛ́mú oò kàrú yée gə́, nɛ́b tù' bə̀ ma'ǹ oò bəd yaà bə̀ sáŋ kə̀ oò kpaŋú, bít bə̀ bààù: «Wàà váàndo ń tə́ kə̀ gɔ̀ŋsá!»

⁵²Dɛ̀d bə̀ gə́, sɛŋ déèrú wàà váàndo bəǹ si' gág taà gú? Bít kè' bə̀ í'ù, bə̀ bàà: «Sɛŋ aa níin nyàm nyɛ́g dú, ba' nə́ŋ̀ mà' roó, kàdǹ lɛ' dààù taá.»

⁵³Kàanyée gə́, wàà bóò sèl bé' gə́, bàà sɛŋ aarə bəní, Yéésù bàà bəǹ taà: «Wàà váàndo ń dá kuùm kə̀ gɔ̀ŋsá.» Bít oòra kə̀ nɛ́b oò yiìl bə̀ tə́ kóólé, bə̀ bàg Yéésù yàá.

⁵⁴Aarə, kùmsə̀n inkɔrə iirúb aa Yéésù mà'à, sɛŋ aa zá'à Yahudiya yɛ́b ba, kidbírà Galili yɛ́b bəroó.