Read Samba Leko Yohana 5 Bible Online

Yohana 5 - Samba Leko bible

Yohana 5

¹Sɛŋ taà zɔ̀gɔ̀ gə́, *Yahudu bəd bə̀ tə́ wálke *láŋsə́ bə̀ ma'ǹ Urusalima bìlú, bít Yéésù ɛ̀m wərà.

²Urusalima bìlə́ rə, wəl nyìgə̀l bɛ̀ŋ́sə̀wà nə́ŋ̀ wərà, kə̀ gbàg dun naà núnà. Wəl nyìgə̀l wàà aarə, bə̀ dɛ̀d kə̀ Ibraniŋko bəd nwɔŋú Betzata, pe' kə̀ zɔ̀ŋ aa bə̀ dɛ̀d Bɛ̀rə̀ wúl waàl lə tá.

³Nɛ́b mad bə̀ zùúm ləə dùù wərà' nyəd bərá, nɛ́b dun tə́ŋke bərá, nɛ́b si' val bərá. [Bə̀ nwán wəl oò sɔ̀d sína wá'ǹmbìá.

⁴Kàandə, sɛŋ kam gə́, Báátììkpɛ̀ŋ Vɛnɛ́b *malaika nə́ŋ̀ símà sɛŋ wàà nə́ŋ̀, yaà wá' wəlá. Nɛ́d mad bə̀ aa éèn gbád sím wəlú, sɛŋ aa wəl wá'míìnì rə, si' oò gág kúnú, kóó tə́ kə̀ mad luùm déè gə́ kóólé.]

⁵Sɛŋ də, nɛ́ŋ váàndo nə́ŋ̀ ləə mad wərà, zèd laa nə́ŋ̀ zè kób zè dàgwà.

⁶Zɔ̀ŋ aa Yéésù bé'ù ləə yɛ́b ba, bít gàb yàá ləəì wərə̀ kə̀ mará, zèd bəd ká'ke yée gə́, dɛ̀rə̀: «Ń í' si' ń oò gág kínì?»

⁷Nɛ́d mad bə̀ rə, kè' í'ù: «Báátììkpɛ̀ŋá, mə́ bɔ̀b nɛ́ŋə̀ nə́ŋ̀má máá bə̀ láŋ̀mbə̀ bə, pa'ǹ páànmbə̀ wəl nyìgə̀lú wərə̀ gá, *malaika yaà tə́ wəl wá'ǹ gə́ roó. Màìgə́, nɔ̀ŋ zá' mə́ tə́ dáàn gə́, nɛ́ŋə̀ nə́ŋ̀ gbád sím sə̀n kə̀ máára.»

⁸Yéésù bít bààù: «Ǹ zá' lɛgú, ǹ pà' kilə̀ ń da, bít ǹ ɛ̀m kúnú.»

⁹Kə̀ nwɔŋ aa nuù yée kíinní, nɛ́ŋ váàndo rə si' oò gág yàá. Zá' lɛgú, pà' kilə̀ oòra, bít ɛ̀m kúnú. Zá nɛ́ɛ̀m in aarə taà *nyàm nyi'ǹmbə̀ sɛŋə́ yée gə́,

¹⁰Yahudu bəd nɛ́b yíl bə̀ bəd bə̀ bàà nɛ́ŋə̀ aa si' oò gág də: «Nyà'aa nyàm nyi'ǹmbìá, bít indaŋ̀mbə̀ bə́n dàŋì kilə̀ ń pa'ǹmbìá.»

¹¹Nɛ́ŋ váàndo rə kè' í' bə̀: «Màn aa gáŋ máà si' rə, bàà máà' M̀ pà' kilə̀ ń da, ǹ ɛ̀m kúnú.»

¹²Kàanyée gə́, bə̀ dɛ̀rə̀: «Nɛ́ɛ̀réè baàn sə̀n ‹ǹ pà' kilə̀ ń da, ǹ ɛ̀m kíìn› » gú?

¹³Zá màn aa si' oò gág də, gàb nɛ́ŋə̀ aa gáŋ̀ si' rə sé. Kàandə, bɔ̀b Yéésù ɛ̀m bɔ̀bì nɛ́b zùúm bəraa rə tə́ŋə́ wərà.

¹⁴Sɛŋ bùúd zɔ̀gɔ̀ gə́, Yéésù yaà bɔ̀bə̀ láŋsə́ wúuú, bít bààù: «Ǹ zɛ̀ŋ túŋá, bə́ŋyée ń bɔ̀b gaŋsə́ yàá. Bídǹ mà' invaksə́ sɔ̀ŋ sí, bɔ̀b in aa kàn aarə oò wə́ə́ n bɔbm̀bə̀ sɔ̀ŋ sí.»

¹⁵Nɛ́ŋ váàndo aarə, ɛ̀m dáá bàà Yahudu bəd nɛ́b yíl bə̀ bəd gə́, Yéésù gáŋ bəǹ sə̀n si' marú.

¹⁶Kàanyée gə́, bə̀ sɔ̀d Yéésù búúd í'ǹmbìá, in aa mà' *nyàm nyi'ǹmbə̀ sɛŋə́ yérə bòórú.

¹⁷Zá Yéésù kè' í' bə̀: «Báá mə́ tə́ diìn tù' ma'ǹmbìá, bít máá kɔ̀ mə́ tə́ diìn tù' ma'ǹmbìá.»

¹⁸Nwɔŋ aa yée bòórú, Yahudu nɛ́b yíl bə̀ bəd bə̀ sàà bə̀ pɛ̀d taà Yéésù lo'ǹmbìá. Kàandə, Yéésù náá *nyàm nyi'ǹmbə̀ indaŋ̀mbə̀ ní gá, zá bàà zəg bə̀ gə́, Vɛnɛ́b kùmsə̀n Báá bəǹ da. Kə̀ aakíin də, zíg yíl oò, bə̀ bəǹ də́ŋ tə́ kə̀ Vɛnɛ́bá.

¹⁹Kàanyée gə́, Yéésù kèd gú' gə́, bít bàà bə̀: «Mə́ tə́ ii kíìn baanàá, aarə nwɔŋ sɔ̀ɔ̀ná, wàà mà' in nə́ŋ̀má kə̀ yíl oò bə̀ ní sé. In aa bé' Báá oò tə́ ma'ǹ də, mà' taá. In aa Báá oò mà' rə gə́ kóólé, wàà kɔ̀ mà' taá.

²⁰Báá í' Wàà oò tə́ kúnú, bít ì'ù in bəraa tə́ ma'ǹ də gə́ kóólé. Dáù tù' gbàád bəraa kàŋ kàn aa bəraa rə kíìn i'nàá, bít dá ii yíl ko'nàá.

²¹Kə̀ aakíin də, nɛɛ̀n aa Báá mà' díím val bəd, bít pii bə̀ gɔ̀ŋsə́ rə, Wàà kɔ̀, dá nɛ́b bəraa í' rə gɔ̀ŋsə́ piinàá.

²²Bít Báá fág nɛ́ŋə̀ nə́ŋ̀má gá, zá piià kpɛŋsɛ́l kóólé tə́ Wàà oò nɛɛ̀n tɛ́mú, fágə́n bə̀ ma'ǹná,

²³bɔ̀b nɛ́b bəd kóólé, boò káŋ Vɛnɛ́b Wàà kìínmbə̀ ìì káŋ Báá rə kíin. Màn aa káŋ Vɛnɛ́b Wàà síndə, káŋ Báá Vɛnɛ́b aa tùmə̀wà rə sé.

²⁴«Mə́ tə́ ii kíìn baanàá, aarə nwɔŋ sɔ̀ɔ̀ná, màn aa kè' nwɔŋ mə́ bəd yàá, bít bàg màn aa tùm máà rəì rə, bɔ̀b *gɔ̀ŋsə́ aa bɛ́d bə gá rə yàá. Fágə́n kò'ù gá, zá oò gə́, taàì valú, yaà pììyì gɔ̀ŋsə́ rú.

²⁵Mə́ tə́ ii kíìn baanàá, aarə nwɔŋ sɔ̀ɔ̀ná, sɛŋ tóò yaanàá, sɛŋ aa val bəd dá Vɛnɛ́b Wàà pə̀gə̀lib nwɔŋ kiìn bəroó. Nɛ́b aa bə̀ kìì pə̀gə̀lib nwɔŋ bəraa rəì rə, bə̀ dá kuùm kə̀ gɔ̀ŋsá. Bít sɛŋ aarə wə́ə́ì bə́ŋyée gbòód.

²⁶Gɔ̀ŋsə́ gə́, vúgà Báá naú. Nɛɛ̀n aarə rú, Báá pii Wàà oò kpɛŋsɛ́l, bɔ̀b gɔ̀ŋsə́ gə́, oò vúgà wàà naà kɔ̀.

²⁷Bít piiùwà kpɛŋsɛ́l fágə́n bə̀ ma'ǹná. Kàandə, oòra kùmsə̀n nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà roó.

²⁸Nwɔŋ aarə, oò kò' ii yíl sí. Kə̀ aakíin də, sɛŋ tóò kíìn yaanàá, sɛŋ aarə bə gə́, val bəraa sàà rú rə, bə̀ dá pə̀gə̀lib nwɔŋ oò kíìn kiinàá,

²⁹bít bə̀ dáà kíìn vúgə̀l sààrú. Nɛ́b aa ìì mà' bəd sɔ̀ɔ̀n, sɛŋ aa bə̀ kə̀ gɔ̀ŋsə́ rə, bə̀ dákíìn díímàá, gɔ̀ŋsə́ bə̀ bɔbm̀má. Zá nɛ́b aa sɛŋ aa bə̀ kə̀ gɔ̀ŋsá, bə̀ mà'à tə́ invaksə́ rə kɔ̀, bə̀ dáá kíìn díìm valú, bít fág bə̀ dá bə̀ kíìn koràá.»

³⁰«Mə́ bán in nə́ŋ̀má ma'ǹmbə̀ kə̀ yíl máá bə̀ ní gá. Mə́ fág kìínmbə̀ nɛɛ̀n aa mə́ kìì rú rə kíin, bít fágə́n máá bə̀ kɔ̀ tə́ wɔ̀ɔ̀làá. Mə́ sàà in aa mə́ í' rə ma'ǹmbə̀ gá. Zá mə́ mà' in aa nɛ́ŋə̀ aa tùm máà rə í' roó.

³¹Dáà mə́ mà' sedako tə́ máá yílú, kə̀ yíl máá bə̀ ní gə́, sedako aa mə́ mà' rə, kùm nyɛdkè gá.

³²Zá nɛ́ŋə̀ nə́ŋ̀ gɔ̀ŋ mà' sə̀n sedako máá yílú. Bít mə́ gàb yàá, sedako aa mà' máá yílə́ rə, nwɔŋ sɔ̀ɔ̀ná.

³³Íí tùm gbantumsə̀ bərì Yohana sunú. Bít oò kɔ̀, mà' sedakòì vɛ́nà yílú.

³⁴Mə́ ɔ̀d nɛ́ŋə̀ nə́ŋ̀ oò mà' sedako máá yílə́ sé. Zá mə́ bàà ii nwɔŋ aarə, bɔ̀b aí kɔ̀ ìì bɔ̀b súúkeá.

³⁵Yohana yaà kìínmbə̀ lampə̀ laa ko'kè bə̀ aa tə́ zɔ̀ŋ nyɛ́'ǹ də kíin. Bít íí kè' yàá sɛŋ zɔ̀gɔ̀, kuùmbə̀ kə̀ tɛ́m làmkè kə̀ laa nyɛdkè oò roó.

³⁶Zá máá gə́, mə́ tə́ kə̀ sedako nə́ŋ̀ naà ma'ǹmbə̀ máá yílú, sedako aa dá aa Yohana mà' máá yílə́ rə kàan doó. Tù' bəraa mə́ tə́ ma'ǹ də, aa bəraa Báá mə́ pii máà yaàn ma'ǹmbə̀ roó. Bə̀ mà' sə̀n sedako máá yílú, bít bə̀ ì' sə̀n nɛ́b bəd gə́, Báá mə́ tùm máà sùnú.

³⁷Bít Báá mə́ aa tùm máà rə, oòra kə̀ yíl oò bìá, mà' sə̀n sedako máá yílú kɔ̀. Kìì íí bèd pə̀gə̀lib nwɔŋ oò bə̀ sé, bít bé' íí bèd nɛɛ̀n aa kùm dú rə sé.

³⁸Íí kò' Vɛnɛ́b nwɔŋ aí tɛ́mú sé; kàandə, íí bàg nɛ́ŋə̀ aa tùm máà rə sé.

³⁹Íí sán Vɛnɛ́b nwɔŋ bəraa bə̀ bád Núúboòrú Gìdń bərə roó, íí í' *gɔ̀ŋsə́ aa bɛ́d bə gá rə bɔbm̀bə̀ kə̀ boò ra. Nwɔŋ bəraa rə, Vɛnɛ́b gám tə́ máá yílú.

⁴⁰Zá íí məə kíìn gɔ̀ŋsə́ yaàn bɔbm̀bə̀ máá naú.

⁴¹«Mə́ sàà kaŋsɛ́l bəraa dáà vúgǹnà nɛ́b bəd naà rə gá.

⁴²Zá máá gə́, mə́ gàb ii yàá, íí kə̀ í'sɛ̀l Vɛnɛ́b bə̀ naà aí tɛ́mú sé.

⁴³Mə́ yaà Báá mə́ nə́gə́lú, bít aí kɔ̀ íí məə mə́ kíìn ke'ǹmbìá. Zá dáà màn nə́ŋ̀ yaà tə́ kə̀ kpɛŋsɛ́l oò bə̀ gə́, íí dáù kíìn ke'nàá!

⁴⁴Íí sàà kaŋsɛ́l bəd bɔbm̀bə̀ ɔ̀dnə́ŋ̀ bəd naú, bít íí məə kaŋsɛ́l aa vúgà Vɛnɛ́b nə́ŋgùm naà rə saànmbə̀ bée. Kə̀ aakíin də, ééleè íí dá taà báàn bagǹmbə̀ gú?

⁴⁵«Zá ìì gú' seèlǹmbə̀ gə́, máá ii sə̀n dáàn luùn Báá mə́ númú. Musa dá ii ráàn sə̀n luunàá; Musa nɛ́ŋə̀ aa íí zíg tɛ́m íí oò bəroó.

⁴⁶Dáà íí kè' Musa nwɔŋì vɛ́nà gə́, íí dá nwɔŋ mə́ kíìn ke'ǹ kɔ̀. Kàandə, nwɔŋ bəraa bárà rə, tə́ máá yílú.

⁴⁷Zá nɛ́ɛ̀m íí kè' nwɔŋ bəraa Musa bárà oò núúboòrú rə sín yée gə́, ééleè íí dá taà báàn nwɔŋ mə́ bəd ke'ǹmbə̀ gú?»