Read Samba Leko Yohana 9 Bible Online

Yohana 9 - Samba Leko bible

Yohana 9

¹Yéésù tə́ ɛɛ̀m kpaŋ̀ tɛ́mú yée gə́, bé' nɛ́ŋ váàndo nə́ŋ̀, bə̀ lɛ̀bə̀ nyəərá.

²*Nɛ́b sáànmbə̀ oò bəd dɛ̀rə̀: «Nɛ̀ná, kə̀ níìbə̀ nɛ́ŋ váàndo aa yée bə̀ lɛ̀bə̀ taà nyəərì? Invaksə́ oò bòórú náà, kóó sínkɔ̀, báá oò bəd invaksə́ bòórúì?»

³Yéésù kè' í' bə̀: «Invaksə́ oò bòórú gá, báá oò invaksə́ bòórú gá, sínkɔ̀ nà'á oò invaksə́ bòórú gá. Bə̀ lɛ̀bə̀ nyəd də, bɔ̀b Vɛnɛ́b yaà oò mà' tù' oò yílú, nɛ́b bəd núùrú.

⁴Bə́ŋ̀ sɛŋ aa tə́ nyàámbərə̀ rə, báà ma'ǹ nɛ́ŋə̀ aa tùmmáà rə tù' oò bərá. Tígə́l tóò kíìn gbadǹ yaanàá, sɛŋ də, kóó nɛ́ŋə̀ nə́ŋ̀má bán tù' ma'ǹmbə̀ sɔ̀ŋ gá.

⁵Bə́ŋ̀ mə́ tə́ zɔ̀ŋə yɛ́b bə ní gə́, máára mə́ kùmsə̀n laa nyɛdkè zɔ̀ŋə yɛ́b bə bìá.»

⁶Yéésù bàà bɛ́' nwɔŋ bəraa kàangə́, tó' sudn yɛ́b ba, bít nyɛ́g yɛ́b zɔ̀gɔ̀ kə̀ sudn oòra, yaà sáŋ nyəd váàn núùrú,

⁷bít bààù: «Ɛ̀m dáá ǹ sùg núù wəl nyìgə̀l bɛ̀ŋ́sə̀wà aa bə̀ dɛ̀d Silowe rə rú.» Nə́gə́l aarə, í' tə́ baànmbə̀ «tuùmbìá.» Nyəd váàn zá' ɛ̀m wərà, dáá sùg núù oòra. Bít zɔ̀ŋ aa kidbírà gə́, bé' núùì nyɛdkè.

⁸Ɔ̀dwaàl bə̀ oò bərá, kə̀ nɛ́b aa bé'ù tə́ in nyɛɛ̀m nyàam də tə́ kóólé, bə̀ bàà: «Máàn nɛ́ŋ váàndo aa yée, kùm sáá sə̀n kpaŋ̀ gú' ba, bít nyɛ̀m sáá sə̀n inì?»

⁹Nɛ́b kambəd bàà: «Aarə oòra.» Nɛ́b ɔ̀d kambəd kɔ̀ bə̀ bàà: «Oò gá, zá lúŋ tə́ oòra.» Bít nɛ́ŋ váàndo rə kɔ̀ kè' í' bə̀: «Vɛ́nà, aarə máára.»

¹⁰Bə̀ dɛ̀rə̀: «Ééleè núù ń ked taà gú?»

¹¹Nɛ́ŋə̀ aarə, kè' í' bə̀: «Nɛ́ŋ váàndo aa bə̀ dɛ̀rə̀ Yéésù rə, yaà nyɛ́g yɛ́b zɔ̀gɔ̀ kə̀ sudnná, sáŋ mə́ núùrú gə́, bàà: ‹Ɛ̀m dáá ǹ sùg núù wəl nyìgə̀l bɛ̀ŋ́sə̀wà aa bə̀ dɛ̀d Silowe rə rú.› Zá' mə́ ɛ̀m taá, dáá mə́ sùg núù gə́, mə́ bé' núù yàá.»

¹²Bít bə̀ dɛ̀rə̀: «Nɛ́ŋ váàndo aarə, oò tə́ bínì gú?» Kè' í' bə̀: «Mə́ gàb sé.»

¹³Kàanyée gə́, bə̀ àà nɛ́ŋ váàndo aa nyàam nyəd də *Farisa bəd sunú.

¹⁴Zá sɛŋ də, *nyàm nyi'ǹmbə̀ sɛŋú, Yéésù mà' taà yɛ́b bəəá, bít kèrə̀ taà kə̀ núùá.

¹⁵Kə̀ taàbìá, *Farisa bəd kɔ̀ ìì dɛ̀d taà nɛ́ŋ váàndo aarə, in aa taà, tə́ kə̀ núù bé'ǹ bə́ŋyée roó. Bàà bə̀: «Sáŋ mə́ yɛ́b bəə zɔ̀gɔ̀ núùrú, bít dáá mə́ sùg gə́, bə́ŋyée mə́ bé' taà núùá.»

¹⁶Nɛ́b kambəd *Farisa bəd tə́ŋú, ìì bàà: «Nɛ́ŋ váàndo aa mà' in aarə, bánà vúgǹmbə̀ Vɛnɛ́b səǹ gá. Kə̀ aakíin də, bàg indaŋ̀mbə̀ nwɔŋ aa *nyàm nyi'ǹmbə̀ yílə́ rə sé.» Zá nɛ́b kambəd bàà: «Ééleè nɛ́ŋə̀ invaksə́ bə̀ ma'ǹ dá taà inkɔrə bəd ma'ǹ kə̀ aakíin gú?» Bít boò kóólé, bə̀ pɛɛ̀l yàá boò bòdba.

¹⁷*Farisa bəd ìì dɛ̀d nɛ́ŋ váàndo aa nyàam nyəd də sɔ̀ŋ: «Bít ám gə́, ń bàà tə́ leè nɛ́ŋə̀ aa kèdnnà núù rə yílə́ gú?» Kè' í' bə̀: «Aarə, *Vɛnɛ́b gbantumsàá.»

¹⁸Nɛ́ɛ̀m Yahudu bəd nɛ́b yíl bə̀ bəd bə̀ í' ke'ǹmbə̀ bə̀ lɛ̀bə̀ nyəərá, bít tə́ taà núù bé'ǹ bə́ŋyée sé. Bənə́ dáánnə́ sína báá oò dɛdǹ kə̀ nà'á oò tá.

¹⁹Bə̀ dɛ̀d bə̀: «Vɛ́nà gə́, wàà aa yée, wàà aí bèì? Kè' ìì í' bə́ nwɔŋá, íí lɛ̀bə̀ nyəərì? Níì taà sə̀n bə́ŋyée, tə́ taà núù bé'ǹ sɔ̀ŋ gú?»

²⁰Báá oò bəd kè' bə̀ í': «Bə́ gàb yàá, aarə wàà bə́ ra. Sɛŋ aa bə́ lɛ̀bə̀ rə má, nyəərá!

²¹Zá bə́ gàb in aa taà kə̀ oò, bə́ŋyée tə́ kə̀ núù bé'ǹ yérə gə́ sé. Bít bə́ gàb nɛ́ŋə̀ aa kèrə̀ núù rə sé. Ìì dɛ̀rə̀ kúnú, bə́ŋyée gə́, kàŋ də́ŋì in aa taà oò yílə́ rə baànmbə̀ kə̀ yíl oò ní.»

²²Báá oò bəd bə̀ gám kàandə, bə̀ nùù Yahudu bəd nɛ́b yíl bə̀ bərá. Vɛ́nà gə́, Yahudu bəd nɛ́b yíl bə bəd gám bə̀ dúg nwɔŋ gə́, bə̀ bàà nɛ́ŋə̀ aa bààì Yéésù kùmsə̀n Krístù rə gə́ kóólé, bənə́ dáánnə́ù kíìn vú'ǹ *wúlwáàlbə̀ bənə́ rú.

²³Kə̀ taàbìá, báá oò bərì bàà taà: «Bə́ŋyée gə́, kàŋ də́ŋì nwɔŋ bə̀ ke'ǹ í'ǹná, ìì dɛ̀rə̀ kúnú!»

²⁴*Farisa bəd dɛ̀d bə̀ àà nɛ́ŋ váàndo nyəd də boò númú sɔ̀ŋ, bít bə̀ bààù: «Ǹ bàà vɛ́nà Vɛnɛ́b númú. Bə́ gàb yàá, nɛ́ŋ váàndo aa yée, nɛ́ŋə̀ invaksə́ bə̀ ma'ǹná.»

²⁵Kè' í' bàà bə̀: «Máá mə́ gàb sé, kóó tə́ nɛ́ŋə̀ invaksə́ bə̀ ma'ǹná, kóó nɛ́ŋə̀ invaksə́ bə̀ ma'ǹ gá. Zá máá gə́, mə́ gàb in nə́ŋ̀' Nyàam də, mə́ nyəərá, bít bə́ŋyée kɔ̀, mə́ bé' núù yàá.»

²⁶Bít bə̀ dɛ̀rə̀: «Ma'ǹnà níì gú? Ééleè kèd n taà núù gú?»

²⁷Kè' í' bə̀: «Mə́ bààiyà yàá, zá íí í' mə́ nwɔŋ kiìnmbə̀ sé. Kə̀ níìbə̀ íí í' taà nwɔŋ aarə zɛŋ̀mbə̀ sɔ̀ŋ gú? Nə́ŋ̀ gə́, aí kɔ̀ íí í' tə́ kuùmbə̀ *nɛ́b sáànmbə̀ oò bərì gə́?»

²⁸Bə̀ dúù kə̀ muurá, bít bə̀ bààù: «Ámda ń kùmsə̀n nɛ́ŋ váàndo aa yée nɛ́d sánáná! Zá obə́ gə́, bə́ Musa *nɛ́b sáànmbə̀ bərá.

²⁹Bə́ gàb yàá, Vɛnɛ́b gámà nwɔŋ kə̀ Musa ra. Zá oò gə́, bə́ gàb zɔ̀ŋ aa vúgà bərə sé.»

³⁰Nɛ́ŋ váàndo aarə, kè' í' bə̀: «Ìì ɛ̀ga, in aa yée kùmsə̀n in aa kò' nɛ́ŋə̀ yíl loó. Íí gàb zɔ̀ŋ aa vúgà bərə sé. Bít máá gə́, kèd mə́ núù yàá!

³¹Bə́n gabm̀ yàá, Vɛnɛ́b gə́, kìì nɛ́ŋə̀ aa tə́ invaksə́ ma'ǹ də nwɔŋ gá. Zá oò gə́, kìì nɛ́ŋə̀ aa tə́ù káŋ̀, bít tə́ù in aa í' rə ma'ǹ doó.

³²Kìì bə́ bèd nɛ́ŋə̀ nə́ŋ̀ kèd tə́ nɛ́ŋə̀ aa bə̀ lɛ̀bə̀ nyəd də núù bedǹ, bɔ̀b oò bé' kíin sé.

³³Dáà nɛ́ŋ váàndo aa yée vúgà Vɛnɛ́b səǹ síngə́, bán in nə́ŋ̀má ma'ǹmbə̀ kə̀ aakíin gá.»

³⁴Kè' bə̀ í'ù: «Ám gə́, si' ń kə̀ zɔ̀ŋtá, tə́ invaksə́ rú, sɔ̀d sɛŋ aa bə̀ lɛ̀b m bəroó, bít ń í' bə́ in sáànmbə̀ wa?» Bít nìŋ bə̀ vúŋ̀ kíìn *Yahudu bəd wúlwáàlbə̀ rú.

³⁵Yéésù kìì gə́, bə̀ nìŋ̀ yàá. Dá bɔ̀bə̀ kúnú, bít bààù: «Ń bàg nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə yèè?»

³⁶Nɛ́ŋ váàndo rə, kè' í': «Gbàároá, oòrə nɛ́ɛ̀réè gú? Ǹ bàà mə́ kúnú, bɔ̀b máà bàgə̀ kúnú.»

³⁷Yéésù bààù: «Bə́ŋyée gə́, ń bé'ù yàá, oòra tə́ sə̀n nwɔŋ gáàm kə̀ ám da.»

³⁸Nɛ́ŋ váàndo rə kè' í', bàà: «Mə́ bàg yàá, Báátììkpɛ̀ŋá.» Bít pí' kùm kə̀ dunlígə̀d Yéésù númú, oò bə̀ káŋ̀mbìá.

³⁹Kàanyée gə́, Yéésù bàà: «Mə́ yaà zɔ̀ŋə yɛ́b bə, bɔ̀b fágə́n oò ma'míìn kúnú' nɛ́b aa núù nyəd də, boò bé' núù kúnú, bít nɛ́b aa bə̀ tə́ núù bé'ǹ də kɔ̀, boò bíl nyəərá.»

⁴⁰*Farisa kam bəraa bə̀ kùm wərə̀ kə̀ oò tə́ rə, bə̀ kìì nwɔŋ bəraa yée gə́, bə̀ dɛ̀rə̀: «Obə́ kɔ̀ bə́ nɛ́b núù nyəd bəd kɔ̀ì?»

⁴¹Yéésù kè' í' bə̀: «Dáà íí tə́ nɛ́b núù nyəd bəd gə́, íí kùm nɛ́b invaksə́ bə̀ ma'ǹ bəd gá. Zá íí bàà: ‹Bə́ bé' núù tə́ nyɛdkè kɔ̀› yée gə́, íí kùm taà sɛŋ gə́ kóólé, nɛ́b invaksə́ bə̀ ma'ǹ bərá.»