Read Samba Leko GBANTUMSӘ̀ BƏD TÙSÁ 11 Bible Online

GBANTUMSӘ̀ BƏD TÙSÁ 11 - Samba Leko bible

GBANTUMSӘ̀ BƏD TÙSÁ 11

¹*Yéésù gbantumsə̀ bəd kə̀ nɛ́b bagké bəraa Yahudiya yɛ́b bərə tə́ kóólé, ìì kìì gə́, nɛ́b aa bàg Vɛnɛ́b síndə, boò kɔ̀ ìì kè' Vɛnɛ́b nwɔŋ yàá.

²Sɛŋ aa Piyɛr kidbírà Urusalima bìlə́ rə, nɛ́b bagké bəraa ìì *Yahudu bəd də, ìì nyá' nwɔŋ kə̀ Piyɛr ra.

³Nɛ́b bagké bəraa bə̀ Yahudu bəd də, ìì bàà Piyɛr: «Ḿ pììà nɛ́b aa bàg Vɛnɛ́b síndə kàrú. Nɛ́b aarə, ìì nàà gàb sé, bít ń lííà innì kə̀ boò tá.»

⁴Kàanyée gə́, Piyɛr bàà ì' bə̀ taà in bəraa taà rə nə́ŋ̀ nə́ŋ̀. Bàà bə̀:

⁵«Mə́ kùmà Yope bìlú, bít mə́ tə́ Vɛnɛ́b nyɛɛ̀m yée gə́, núù mə́ keèd kúnú. Mə́ bé' in nə́ŋ̀ símà lɛgú, lúŋ gɔ̀' gbà'á, sím yaà máá sunú. Bə̀ tabà kàd oò bəraa naarə rə kóólé lɛgú.

⁶Mə́ də́' núù in aarə bə gə́, bít mə́ bé' ingalə̀ bəraa zɔ̀ŋə yɛ́b bəroó, ingalə̀ bəraa kə̀ dun naarə roó, aa bəraa gub kə̀ bàgə̀l loó, bít kə̀ núú lɛgə́ paà bə̀ bərá.

⁷Bít mə́ kìì pə̀gə̀lib nwɔŋ nə́ŋ̀ tə́ mə́ baàn: ‹Ǹ zá' lɛgú, Piyɛr, lòd ǹ fù' bə̀ kúnú!›

⁸«Zá kè' mə́ í'ù, mə́ bàà: ‹Ə́ùwə́, Báátììkpɛ̀ŋá; kàandə, in aa bə̀ dàŋ də, kóó nə́ŋ̀má pìì bèd máá nuù sé, bít in aa ń ɛ̀g kə̀ in nyìb bə̀ kíin də, pìì bèd máá nuù sín kɔ̀.›

⁹«Bít mə́ kììà pə̀gə̀lib nwɔŋ vúgà lɛgə́ paà dun iirúb də sɔ̀ŋ: ‹In aa Vɛnɛ́b mà' tə́ nyɛdkè rə, m̀ bí'ù in nyìb bə̀ Vɛnɛ́b númú sí.›

¹⁰Vɛnɛ́b líb mà' in aarə kàani dun toora, bít in bəraa rə kóólé, na' bə̀ bíd kíìn lɛgə́ poú.

¹¹«Bít sɛŋ aarə ba, nɛ́b vɔ̀ɔ̀m bəd toora, bə̀ tùm bà Kaisara bìlú, bə̀ yaà máá sunú. Yaà bə̀ dìì ligə̀ aa mə́ kùm dú rə walú.

¹²Nwul Gìdń bàà mə́, sèè máà vúŋ nɛ́ŋə̀ bə sí, máà ɛ̀m kíìn kə̀ boò tá. Nɛ́b bagké bəraa íí bé' nɔ̀ŋgɔ̀s yée, bə̀ àà máà sùnú, yaà bə̀ pìì Korneliyus yiilú.

¹³Nɛ́ŋ váàndo aa yée, ùd bə́ taà nɛɛ̀n aa *malaika yaà dìì oò sunú, bít bààù nwɔŋ dú roó. Malaika bààù: ‹Ǹ tùm nɛ́b bəd Yope bìlú, dá boò dɛ̀rà Simon aa bə̀ dɛ̀rə̀ Piyɛr roó.

¹⁴Oòra dá n sə̀n in bəraa dá n súùn də baanàá, ámda kə̀ ligə̀ ń tə́ kóólé.›

¹⁵«Zɔ̀ŋ aa mə́ sɔ̀d nwɔŋ gáàmbə̀ gə́, Nwul Gìdń símà boò yílú, kìínmbə̀ nɛɛ̀n aa símà rú obə́ yílú, sɛŋ aa sɔ̀d dú rə kíin.

¹⁶Bít sèl mə́ zá' Báátììkpɛ̀ŋ nwɔŋ aa yóo: ‹Yohana pii nɛ́b bəd baptisma kə̀ wəlá. Zá aí gə́, Vɛnɛ́b dá ii baptisma piìn kə̀ Nwul Gìdńná.›

¹⁷Vɛnɛ́b pii nɛ́b aa bàgə̀ sín yérə Nwul Gìdń, kìínmbə̀ pii bə́nnà sɛŋ aa bə́n zígǹ tɛ́mbagké Báá bə́n Tììkpɛ̀ŋ Yéésù Krístù bərə kíin. Zá máá gə́, mə́ nɛ́ɛ̀réè, máá taà báàn Vɛnɛ́b daŋ̀mbə̀ gú?»

¹⁸Zɔ̀ŋ aa nɛ́b kam bəraa ìì kìì nwɔŋ bəraa yée gə́, ìì tɛb bəd taá, bít ìì káŋ taà Vɛnɛ́bá, kə̀ baànmbə̀: «Vɛnɛ́b pii nɛ́b aa ìì bàgə̀ síndə kpaŋ̀ sɔ̀gke bə̀ì kɔ̀, bɔ̀b boò bɔ̀b kə̀ gɔ̀ŋsá.»

¹⁹Zá nɛ́b bagké bəraa nùù bə̀ sa' kə̀ búúd í'ǹmbə̀, sɛŋ aa Etiyɛn bɔ̀b kə̀ val lə, ɛ̀m dá ìì wə́ə́ Finisiya yɛ́b ba, yɛ́b aa wəl tə́ŋú, bə̀ dɛ̀d Kiprus də ba, bít kə̀ Antakiya bìlú. Zá ìì bàà Vɛnɛ́b nwɔŋ də *Yahudu bəd ní.

²⁰Zá boò tə́ŋə́ wərə̀ rə, nɛ́b kam vúgà Kiprus yɛ́b ba, kə̀ Sirena yɛ́b ba, taà bə̀ ɛ̀m Antakiya bìlú. Dá bə̀ bàà Grɛg bəd Báátììkpɛ̀ŋ Yéésù *Nwɔŋ Puu Sɔ̀ɔ̀nkè kɔ̀.

²¹Báátììkpɛ̀ŋ kpɛŋsɛ́l kùm kə̀ boò tá, bít nɛ́b bəd zùúm, lìb ìì bí'à núù, bə̀ bàg Báátììkpɛ̀ŋ Yéésù yàá.

²²*Eklisiya aa Urusalima bìlə́ rə, kìì nwɔŋ aarə yàá, bít bə̀ tùm Barnabas Antakiya bìlú.

²³Zɔ̀ŋ aa ɛ̀m dáá wə́ə́ gə́, bít bé' pə̀dkè Vɛnɛ́b bə̀ tə́ tù' ma'ǹ kàangə́, kìì tɛ́m làmkè sɔ̀ɔ̀n. Páál bə̀ nwɔŋá, bàà bə̀ boò kùm tɛ́m nə́ŋ̀ní, kə̀ kpɛŋsɛ́l wáàlǹmbə̀ kə̀ Báátììkpɛ̀ŋá.

²⁴Barnabas də, nɛ́ŋə̀ sɔ̀ɔ̀nkè bə̀ ma'ǹná. Nyìì kə̀ Nwul Gìdńná, bít kə̀ tɛ́mbagkéá. Nɛ́b bəd zùúm, yaà bə̀ bàg Báátììkpɛ̀ŋ yàá.

²⁵Bòórú gə́, Barnabas zá' ɛ̀m Tarsus bìlú, Sol dáàn saànmbìá.

²⁶Zɔ̀ŋ aa sàà dá bɔ̀bə̀ gə́, pà' ààùwà Antakiya bìlú. Boò iirə kóólé, kùm ìì tá' zèd nə́ŋ̀ *Eklisiya aarə rú. Bít ìì sán nɛ́b bəd zùúm tɛ́mbagké ko'ǹmbìá. Antakiya bìlú, éèn bə̀ sɔ̀d taà *nɛ́b sáànmbə̀ bəd dɛdǹmbə̀: «*Nɛ́b bagké Yéésù bə̀ bərá.»

²⁷Sɛŋ aarə bərə, *Vɛnɛ́b gbantumsə̀ bəd bə̀ zá' Urusalima bìlú, bít ìì ɛ̀m Antakiya bìlú.

²⁸Nɛ́ŋə̀ nə́ŋ̀ boò tə́ŋú, nə́gə́l oò Agabus, zá' dìì lɛgú; kə̀ Nwul Gìdń kpɛŋsɛ́lá, bàà bə̀ gə́, gulùm gbà'á nə́ŋ̀ dá ma'ǹ yɛ́b bə kóólé (Gulùm də, yaà mà' gààd gbà'á Roma bìlə́ bə̀ aa nə́gə́l oò Klodiya rə nɛɛ̀n ba).

²⁹*Nɛ́b sáànmbə̀ bəd kóólé, kóó nɛ́ɛ̀réè, sèl zíg in aa dá báàn piìnmbə̀ roó. Kóó nɛ́ɛ̀réè, tùm oò àà láŋke aarə ɔ̀dkudvɛɛ̀l bəraa Yahudiya yɛ́b bəroó.

³⁰Kàanyée gə́, bə̀ tùm Barnabas kə̀ Sol tá, boò àà in bəraa nɛ́b bəd pii bəd də *dam bəraa Yahudiya yɛ́b bəroó.