Read Samba Leko GBANTUMSӘ̀ BƏD TÙSÁ 12 Bible Online

GBANTUMSӘ̀ BƏD TÙSÁ 12 - Samba Leko bible

GBANTUMSӘ̀ BƏD TÙSÁ 12

¹Sɛŋ aarə ba, Gààd gbà'á *Hirudus zá' pìì nɛ́b bagké Eklisiya bə̀ kambəd búúd í'ǹmbìá.

²Kàanyée gə́, dùb lò' Yakuba, Yohana kudvɛɛ̀l kə̀ yɛ́rə̀ bùúrá.

³Nɛ́ɛ̀m bé' in aarə sɔ̀ɔ̀n *Yahudu bəd tə́ kíìn yée gə́, bít kò' Piyɛr sɔ̀ŋ. Aarə ma'míìn sɛŋ aa wálke aa bə̀ líí kə̀ bə̀rɛ́d aa inváàndo rú gá rə ba.

⁴Bòórú kò'ù, bít pááù wúltígə́l bə̀ rú gə́, bə̀ zíg sóózè gə̀b naara, boò nwánə̀ kúnú. Sóózè gə̀b déè gə́ kóólé, kò' sóózè naara. Sèl gə́, bəǹ dáù fágǹ taà nɛ́b zùúm númú, *Paska taàì gə́ roó.

⁵Kə̀ aakíin, bə̀ kúm taà Piyɛr wúltígə́l bə̀ rú. Zá nɛ́b bagké Eklisiya bə̀ bəd bə̀ dìì Vɛnɛ́b nyɛɛ̀mbə̀ oò yílə́ kə̀ kpɛŋsɛ́lá.

⁶Tígə́l aa nwúndù oò gə́, *Hirudus dá Piyɛr vúŋ̀ fágǹ nɛ́b bəd númú rə, bə̀ tab Piyɛr kə̀ sɛ̀gsɛ́g iira. Ləə ləəm sóózè bəd iirə tə́ŋú, bít Sóózè waàl bə̀ nwáàn bəd kɔ̀, dìì bə̀ nwán wúltígə́l bə̀ waàlá.

⁷Kə̀ nwɔŋ aa nuù yée kíinní, Báátììkpɛ̀ŋ *malaika nə́ŋ̀ yaà dìì oò yílú, bít laa yaà nyɛd wúltígə́l bə̀ rú wərə̀ zé dág. Malaika pig Piyɛr tàŋtéé ba, lɛ́mə̀ gə́, bít bàà: «Ǹ zá' lɛgú, kə̀ báŋ báŋ!» Kàanyée gə́, sɛ̀gsɛ́g bəraa bə̀ tabə̀ kə̀ kùrú rə, biìn oò nɛɛ̀nú, píl yɛ́b ba.

⁸*Malaika bàà: «Ǹ tab yɛ́rə̀ gɔ̀' ń sə́gú, bít m̀ páá tábə́ ń dunú.» Bít Piyɛr mà' kàani. Malaika bààù sɔ̀ŋ: «Pà' ǹ páá dàál ń da, bít ǹ bàg mə́ kúnú.»

⁹Piyɛr vúg wúltígə́l bə̀ rú gə́, bít bàg malaika bòórú. Gabm̀bə̀ in aa malaika tə́ ma'ǹ yérə nwɔŋ sɔ̀ɔ̀n də, gàb sé, zá sèl bàà nyà'aa Vɛnɛ́b kèd bəǹ núùá.

¹⁰Zɔ̀ŋ aa taà bə̀ dàà sóózè gə̀b də̀gə̀ də̀gə̀ bìá, bít taà yaà bə̀ dàà sóózè gə̀b iirúb də gə́, yaà bə̀ wə́ə́ taà wúl waàl ba' bə̀ aa bə̀ vúg kə̀ bìlə́ rə ba. Bít wúlwaàl keèd sə̀ní kə̀ yíl oòra, boò númú. Bə̀ vúg kúnú, ɛ̀m yaà bə̀ və̀d kpaŋ̀ nə́ŋ̀á; bít kə̀ nwɔŋ aa nuù yée kíinní, malaika zá' dàà Piyɛr kúnú.

¹¹«Bə́ŋyée gə́, Piyɛr gàb in aa taà rə yàá, bàà: ‹Ɛ̀g mə́ bé' yàá, vɛ́nà nwɔŋ sɔ̀ɔ̀ná, Báátììkpɛ̀ŋ tùmà sə̀n malaika oòra, bít vúŋ yaà lɛ́' mə́ì *Hirudus nɛɛ̀n tɛ́mú, bít kə̀ invaksə́ bəraa *Yahudu bəd nwán mə́ ma'ǹmbə̀ rə tə́ kóólé rú.› »

¹²Bòórú dìì sèl gə́, zá' ɛ̀m bíd Mariyama yiilú, Yohana aa bə̀ dɛ̀rə̀ Markus də nà'á oòra. Nɛ́b bəd zùúm wál yiìl wərà bə̀ nyɛ̀m Vɛnɛ́bá.

¹³Piyɛr yaà wə́ə́ gə́, tɔ̀m wúlwaàlá. Bít kɔ̀'kíìn nə́ŋ̀ nə́gə́l oò Roda, yaà nɛ́ŋə̀ aa dɛ̀d nwɔŋ waàl bərə nwɔŋ ke'ǹ í'ǹmbìá.

¹⁴Yaà zɛ̀ŋ kìì Piyɛr pə̀gə̀lib nwɔŋ gə́, tɛ́m oò nyìì kə̀ làmkèá, dàà waàl keèdǹmbə̀ gə́, nùù dáá bàà bə́ŋ̀ nɛ́b bəd sína wúu nuú, Piyɛr dìì tə́ waàl ba, gbaarú.

¹⁵Kè' bə̀ í'ù: «Ń kèérá!» Zá Roda dìì baànmbə̀ gə́, aarə vɛ́nà nwɔŋ sɔ̀ɔ̀ná. Kàanyée gə́, bít ìì bàà: «Aarə *malaika oòra.»

¹⁶Zá Piyɛr gə́, dìì waàl tɔɔ̀mbìá. Zɔ̀ŋ aa yaà bə̀ kèrə̀ waàl gə́, bə̀ bé'ù yàá, bít kò' bə̀ yíl yàá.

¹⁷Yàl nɛ́b bəd nɛɛ̀ná, boò tɛb nwɔŋá, bít ùd bə̀ taà nɛɛ̀n aa Báátììkpɛ̀ŋ Vɛnɛ́b yaà vúŋ̀ rə́ wúltígə́l bə̀ rú roó. Bít bàà bə̀: «Ìì bàà Yakuba kíìn kə̀ ɔ̀dkudvɛɛ̀l kambəd tá.» Bít vúg gə́, zá' ɛ̀m zɔ̀ŋ gɔ̀ŋ ba.

¹⁸Zɔ̀ŋ aa nwúun nyɛd gə́, sóózè bəd nìŋ bə̀ dùg kàaní, sàà bə̀ dɛ̀d in aa taà kə̀ Piyɛr roó.

¹⁹*Hirudus tùm bə̀ boò sààù kúnú. Zá sàà bə̀ bɔ̀bə̀ sé. Dɛ̀d sóózè bəd nwɔŋ bərá, bít bàà boò lòd bə̀ kúnú. Bòórú gə́, *Hirudus zá' dàà Yahudiya yɛ́bá, bít ɛ̀m Kaisara bìlú, ləə dáá tá' sɛŋ wərə̀ zɔ̀gɔ̀.

²⁰*Hirudus mà' nɔ̀m gbà'á kə̀ nɛ́b Tirus bìlə́ bə̀ bərá, kə̀ nɛ́b Sidon bìlə́ bə̀ bərá. Nɛ́b aa yée wál ìì dúgà gúsá, yaànmbə̀ oò númú. Yaà bə̀ dúg gú' kə̀ Blastus sóózè gbà'á gààd wúl bàgələ́ bìá. Bít ɛ̀m dá ìì nyɛ̀m gààd gbà'á gə́, bənə́ saŋnə́ kíìn kə̀ oòra, kàandə, nɛ́b boò bəd lɛ́b bə̀ sáá inlíìnmbə̀ gààd gbà'á *Hirudus yɛ́b ba.

²¹Nyàm aa *Hirudus və̀d bərə yaà wə́ə́ gə́, páà gààd gɔ̀' oòra, yaà kùm oò mə̀ə̀d ba, bít gám taà nwɔŋ nɛ́b bəd númú.

²²Nɛ́b bəd kò' kpə̀ə́ǹ páàlǹmbə̀ lɛgú, ìì bàà: «Aa gə́, vɛnɛ́b nə́ŋ̀ tə́ sə̀n nwɔŋ gámàá, aarə nɛ́ŋə̀ gá!»

²³Zá sɛŋ də bəní, Báátììkpɛ̀ŋ *malaika mà'ù mará; kàandə, kaŋsɛ́l aa dá Vɛnɛ́b piìn də, piiù sé' sobéè bəd lííù gə́, bít val kò'ù taá.

²⁴Zá Vɛnɛ́b nwɔŋ sa' ɛ̀m númú, bít nɛ́b zùúm bəd yaà bə̀ zəg yàá.

²⁵Zɔ̀ŋ aa Barnabas kə̀ Sol tá yaà bə̀ pii basaa ìì tùm bà kə̀ kùrú rə Antakiya bìlə́ gə́, bít kid bə̀ bíd kíin Urusalima bìlú, pà' bə̀ ɛ̀mà Yohana aa bə̀ dɛ̀rə̀ Markus də kə̀ naú.