Read Samba Leko GBANTUMSӘ̀ BƏD TÙSÁ 14 Bible Online

GBANTUMSӘ̀ BƏD TÙSÁ 14 - Samba Leko bible

GBANTUMSӘ̀ BƏD TÙSÁ 14

¹Ikonium bìlə́ rə, Pol kə̀ Barnabas tá, bə̀ mà' in luùm nə́ŋ̀ní, kìínmbə̀ Antakiya bìlə́ rə kíin. Bə̀ ɛ̀m *Yahudu bəd wúlwáàlbə̀ rú, dá bə̀ bàà Vɛnɛ́b nwɔŋá. Nɛɛ̀n aa bə̀ bàà Vɛnɛ́b nwɔŋ dú yérə, *Yahudu bəd zùúm kə̀ Grɛg bəd tá, ìì bàg Báátììkpɛ̀ŋ Yéésù yàá.

²Yahudu bəraa bə̀ bàg Yéésù síndə, yaà bə̀ tuùl nɛ́b aa bàg Vɛnɛ́b síndə nwɔŋ vaksá, bít bə̀ mà' bə̀ boò wéé tɛ́m kə̀ nɛ́b bagké bərá.

³Pol kə̀ Barnabas tá, ìì kùm sɛŋ zùúm, Ikonium bìlú. Bə̀ gám nwɔŋ kə̀ váàndoá, bə̀ zíg tɛ́m boò kóólé Báátììkpɛ̀ŋ naú. Báátììkpɛ̀ŋ ì' gə́, nwɔŋ aa bə̀ bàà pə̀dkè bəǹ yílə́ rə, tə́ vɛ́nà. Bít ì' bə̀ in aarə, kə̀ kpɛŋsɛ́l aa pii bə̀, boò mà' kə̀ inkɔrə bəraa, bít kə̀ in də́dǹ bə̀ tó'ǹ bəd doó.

⁴Nɛ́b aa Ikonium bìlə́ rə, bə̀ pɛɛ̀l bəd kúnú, nɛ́b kam kè' Yahudu bəd nwɔŋá, bít nɛ́b ɔ̀d kambəd kɔ̀ bə̀ kè' *Yéésù gbantumsə̀ bəd nwɔŋá.

⁵*Yahudu bərá, nɛ́b aa bàg Vɛnɛ́b síndoó, kə̀ gààd boò bəd tá, ìì wúú nwɔŋá, bɔbm̀ í'ǹmbə̀ Pol kə̀ Barnabas tá búúrá, bít boò bə̀ laàl lodǹmbə̀ kə̀ bəŋ bərá.

⁶Zɔ̀ŋ aa Pol kə̀ Barnabas tá, ìì gàb in aa kàangə́, nùù ìì ɛ̀m Listra bìlú, kə̀ Derbe bìlú, bìl bəraa Likaoniya yɛ́b bərə rú, bít kə̀ yɛ́b bəraa kàrú rə tá.

⁷Wərə̀ kɔ̀, bə̀ pìì Vɛnɛ́b *Nwɔŋ Puu Sɔ̀ɔ̀nkè gəə̀l baànmbìá.

⁸Listra bìlə́ rə, nɛ́ŋ váàndo nə́ŋ̀ tə́ wərà, kùm sáá yɛ́b ba, dun oò bəd dun val bərá. Kùm nɛ́d dun lɛná, sɔ̀d sɛŋ aa nà'á oò lɛ̀b bə̀ bəroó. Bít ɛ̀m bèd kə̀ dun lɛgə́ sé.

⁹Nɛ́ŋ váàndo aarə, kùm yɛ́b ba, zɛ̀ŋ nwɔŋ aa Pol tə́ baàn doó. Pol ɛ̀g wárə̀ kúnú, bít bé' gə́, tə́ kə̀ tɛ́mbagké naú, bɔ̀b si' bəǹ oò gág kúnú.

¹⁰Kàanyée gə́, Pol bààù nwɔŋ kə̀ pə̀gə̀lib kpɛŋsɛ́l bìá: «Zá' ǹ dìì lɛgə́ kə̀ dun wɔ̀ɔ̀làá.» Nɛ́ŋə̀ tɔ̀dzá' sə́d dìì lɛgú, bít ɛ̀m kúnú.

¹¹Zɔ̀ŋ aa nɛ́b zùúm bé' in aa Pol mà' boò núùrú yée gə́, ìì kpàm nwɔŋ lɛgú, ìì bàà kə̀ Likaoniya nwɔŋú: «Vɛnɛ́b bəd ìì ɛ̀mà lɛgə́ kə̀ nɛ́b bəd sisá, sím ìì yaaì obə́ sunú.»

¹²Bít ìì dɛ̀d Barnabas *Zeus, Pol kɔ̀ ìì dɛ̀rə̀ *Hermes; kàandə, màìgə́ Pol gám sáá sə̀n nwɔŋá.

¹³*Nɛ́d láŋsə́ bə̀ ma'ǹ vɛnɛ́b Zeus bə̀ aa láŋsə́ wúl oò kùm kpaŋ̀ piìnmbə̀ kə̀ bìlə́ rə, àà nàà vɔ̀ɔ̀m bərá, kə̀ téélaan bərá, wúlwaàl ba. Bít oò kɔ̀ kə̀ nɛ́b zùúm bəd tá, bəǹ dá sadaka lo'ǹ piinàá.

¹⁴Zá zɔ̀ŋ aa Yéésù gbantumsə̀ bəraa iirə, Barnabas kə̀ Pol tá, bə̀ kìì sadaka aa nɛ́b bəd dá ma'ǹ də kàangə́, nɔ̀m mà' bə̀ yàá. Bə̀ sèl *gɔ̀' boò bərá, bít nùù bə̀ pìì nɛ́b zùúm tə́ŋú, kə̀ nwɔŋ kpaàmbə̀ lɛgú:

¹⁵«Aíra íí nɛ́b bərá, kə̀ níìbə̀ íí mà' taà kàan gú? Obə́ kɔ̀ bə́ nɛ́b luùm nə́ŋ̀ní kìínmbə̀ aí kíin. Bə́ ààiyà *Nwɔŋ Puu Sɔ̀ɔ̀nkèá. Bə́ tə́ ii kíìn nyɛmàá, lɛ́' ìì dàà in tɛdń bəraa yóo. Lìb ìì bí'à núù Vɛnɛ́b galə̀ nə́ŋ̀ní bagǹmbìá. Oòra séé sə̀n lɛgá, yɛ́bá, nwuu gbà'á, bít kə̀ in bəraa boò rú rə tə́ kóólé.

¹⁶Zèd bəraa nyàam taà rə, Vɛnɛ́b lɛ́' dàà nɛ́b aa bə̀ bàgə̀ síndə kóólé, bə̀ pɔ̀b in aa tɛ́m boò í' roó.

¹⁷Zá sɛŋ gə́ kóólé, ì' yíl oò bəǹ túrú, kə̀ sɔ̀ɔ̀nkè aa tə́ nɛ́b bəd ma'ǹ doó. Tə́ nwan piinàá, bít mà' pii iiyà in wuusə́ wuusə̀ ú' oò sɔ̀ɔ̀n kúnú, zèd gə́ kóólé. Pii ii inlíìnmbìá, bít nyí' ii tɛ́m kə̀ làmkèá.»

¹⁸Kóó *Yéésù gbantumsə̀ bəd ìì gám bə̀ nwɔŋ kàandə máá, gbò' kíìn nɛ́b zùúm bəd daŋ̀mbə̀, boò bə̀ sadaka piìnmbìá.

¹⁹*Yahudu bəd vúgə́là Antakiya bìlú, kə̀ Ikonium bìlú. Zá' bə̀ pà' nɛ́b zùúm tɛ́má, bə̀ làl Pol kə̀ bəŋ bərá, oò bə̀ lo'ǹmbìá, bít dìŋ bə̀ vúŋ̀ bìl bòórú. Kàandə, bə̀ sèl gə́, bə̀ bàà val kò'ù yàá.

²⁰Zá zɔ̀ŋ aa nɛ́b bagké bəd wál yaà bə̀ páù tə́ŋə́ gə́, tɔ̀dzá' lɛgú, bít pììà kíìn bìlú. Nwúndù oòrə, zá' ɛ̀m Derbe bìlú, kə̀ Barnabas tá.

²¹Pol kə̀ Barnabas tá, gəə̀l ìì bàà nɛ́b bəd *Nwɔŋ Puu Sɔ̀ɔ̀nkè gə́, bít ìì mà' nɛ́b zùúm bíl nɛ́b bagké Yéésù bə̀ bəd yàá. Bít kid ìì bíd kíìn Listra bìlú, Ikonium bìlú, kə̀ Antakiya bìlú.

²²Bə̀ kpɛ́ŋ nɛ́b bagké bəd tɛ́má, bít bə̀ pii bə̀ váàndoá, boò kùm və̀'kèá, tɛ́mbagké rú; bít bə̀ bàà bə̀: «Báá n búúd sína bé'ǹ gbàákù, báá n taà bɔbm̀ piìnmbə̀ *Vɛnɛ́b gààrú.»

²³*Eklisiya déè rú gə́ kóólé, Pol kə̀ Barnabas tá, sàà bə̀ vúŋ *dam bərá. Ìì nyɛ̀m Vɛnɛ́b kə̀ in gídǹmbə̀ tá. Bít bòórú gə́, bə̀ pii bə̀ Báátììkpɛ̀ŋ aa ìì tə́ bagǹ də nɛɛ̀n tɛ́mú.

²⁴Taà bə̀ dàà Pisidiya yɛ́bá, bít ɛ̀m dá bə̀ wə́ə́ Pamfiliya yɛ́b ba.

²⁵Bə̀ bàà nɛ́b bəd *Nwɔŋ Puu Sɔ̀ɔ̀nkè Perge bìlú, bít taà bə̀ ɛ̀m Ataliya yɛ́b ba.

²⁶Bə̀ zá' wərə̀ gə́, bə̀ ɛ̀m kə̀ kə̀ə̀d gbà'á, Antakiya bìlú. Zɔ̀ŋ aarə ba, nɛ́b bagké bəd bə̀ pii bə̀ Vɛnɛ́b nɛɛ̀n tɛ́mú, bɔ̀b oò nwán bə̀ kíìn sɔ̀ɔ̀nkè, bít tùm bə̀ zɔ̀ŋ bùúrá, bɔ̀b dá boò mà' tùsaa yéroó. Bít bə́ŋyée gə́, mà' bə̀ bɛ́' tùsaa rə yàá.

²⁷Zɔ̀ŋ aa dá bə̀ wə́ə́ Antakiya bìlə́ gə́, bə̀ wál nɛ́b bagké *Eklisiya bə̀ bərá, bít bə̀ ùd bə̀ in aa Vɛnɛ́b mà'à kə̀ boò roó; bít bə̀ ùd nɛɛ̀n aa kèrà nɛ́b aa bə̀ bàgə̀ síndə waàl, bɔ̀b boò bàg bəǹ kíìn doó.

²⁸Bít bə̀ kùm sɛŋ zùúm wərà, kə̀ nɛ́b bagké bəd tá.