Read Samba Leko GBANTUMSӘ̀ BƏD TÙSÁ 18 Bible Online

GBANTUMSӘ̀ BƏD TÙSÁ 18 - Samba Leko bible

GBANTUMSӘ̀ BƏD TÙSÁ 18

¹Bòórú Pol gám nwɔŋ *Areopagus gə́, zá' Atena bìlú, ɛ̀m Korintu bìlú.

²Dáá sáŋ kə̀ *Yahudu nə́ŋ̀á, nə́gə́l oò Akilas, bə̀ lɛ̀bə̀ Pontus yɛ́b ba, vúgà bə́ŋ̀ kíìn Italiya yɛ́b ba, kə̀ kéèn oò Priskila tá; kàandə, gààd gbà'á Klodiya tùm nwɔŋ gə́, bàà Yahudu bəd kóólé, boò vúg kíìn Roma bìlú. Pol ɛ̀m dáá bɔ̀b bə̀ kúnú,

³bít boò kóólé bə̀ nɛ́b dìí bə̀ kudǹ bəd yée gə́, Pol kùm mà' taà tù' kə̀ boò tá.

⁴*Nyàm nyi'ǹmbə̀ sɛŋə́ gə́ kóólé, Pol ɛ̀m dáá gám nwɔŋ *Yahudu bəd wúlwáàlbə̀ rú, bít í' nwɔŋ nyá'ǹmbə̀ kə̀ *Yahudu bərá, kə̀ Grɛg bərá; í' boò bàg Yéésù nwɔŋá.

⁵Zɔ̀ŋ aa Silas kə̀ Timote tá, bə̀ vúgà Makedoniya yɛ́b bə gə́, Pol dìì tá' sɛŋ oò kóólé Vɛnɛ́b nwɔŋ udǹmbìá. Bàà *Yahudu bəd gə́, Yéésù kùmsə̀n *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ roó.

⁶Zá Yahudu bəd məəù bée ke'ǹmbìá, bít bə̀ dúlə̀ kə̀ muurá. Kàanyée gə́, Pol dì' yɛ́b məsə́g bəraa oò gɔ̀' bəroó, bít bàà bə̀: «Íí bɔ̀bì gə́, tɛ́mkpɛŋké íí bòórú, íí bɔ̀' taà yíl íí ra; nwɔŋ mə́ rú wərə̀ sɔ̀ŋ sé. Sɔ̀d Bə́ŋyóo, máráàn Vɛnɛ́b nwɔŋ baàn nɛ́b kun gɔ̀ŋ bəd sunú, nɛ́b aa bə̀ bàg Vɛnɛ́b síndə sunú.»

⁷Zɔ̀ŋ aa Pol zá' dàà *Yahudu bəd wúlwáàlbə̀ gə́, ɛ̀m nɛ́ŋ váàndo nə́ŋ̀ yiilú; nɛ́ŋ váàndo rə, nə́gə́l oò Titus Yustus, nɛ́d Vɛnɛ́b bə̀ pɔ̀bm̀má, bít ligə̀ oò kɔ̀ pe' tə́ kə̀ *Yahudu bəd wúlwáàlbə̀ tá.

⁸Kripus, nɛ́ŋ gbàáro *Yahudu bəd wúlwáàlbə̀ rú bə̀, bàg Báátììkpɛ̀ŋ yàá, kə̀ ligə̀ oò tə́ kóólé. Nɛ́b Korintu bìlú bə̀ zùúm, bə̀ kìì Vɛnɛ́b nwɔŋ aa Pol bàà rə gə́, bə̀ bàg yàá, bít pii bə̀ baptisma yàá.

⁹Tígə́l nə́ŋ̀ kàani, Vɛnɛ́b kèd Pol núùá, bé' Báátììkpɛ̀ŋ bààù: «Ǹ nùù də́dǹ sí! Zá ǹ dìì nwɔŋ gáàmbə̀ ní, ǹ tɛb sí.

¹⁰Kàandə, mə́ tə́ kə̀ ám tá. Nɛ́ŋə̀ nə́ŋ̀má bán ámbə̀ ko'ǹmbə̀ invaksə́ ma'ǹmbə̀ gá. Kàandə, nɛ́b mə́ bəd tə́ bìl aarə rú ká'ke.»

¹¹Pol kùm Korintu bìlú, zèd nə́ŋ̀ kə̀ tɔ̀rá, sán nɛ́b bəd Vɛnɛ́b nwɔŋá.

¹²Sɛŋ aa *Galiyon kùm gɔ̀mnà Roma bəd bə̀, Akaya yɛ́b bərə, *Yahudu bəd kò' bə̀ àà Pol fágə́nú.

¹³Bə̀ bàà *Galiyon: «Nɛ́ŋ váàndo aa yée, gáŋ nɛ́b bəd tə́ kúnú, bàà boò pɔ̀b Vɛnɛ́b kə̀ kpaŋ̀ luùm aa dáá kə̀ indaŋ̀mbə̀ síndoó.»

¹⁴Pol í' nwɔŋ gáàmbìá, zá *Galiyon bàà *Yahudu bəd: «Íí *Yahudu bərá! Dáà íí pè' nɛ́ŋə̀ aa tə́ kə̀ yíl lo'ké nwɔŋá, sínkɔ̀ nwɔŋ vé'ke nə́ŋ̀ gə́, má ii kíin zɛŋàá.

¹⁵Zá íí tə́ pìrə̀ ma'ǹ nwɔŋ bəd yílú, nɛ́b bəd nə́gə́l bəd yílú, kə̀ indaŋ̀mbə̀ íí bəd yílə́ yée gə́, aíra kə̀ yíl aí bìá, ìì fág sə̀ní. Máá gə́, mə́ fág nwɔŋ luùm bəraa rə gá.»

¹⁶Bít nìŋ zá' bə̀ kíìn fágə́n zɔ̀ŋú wərà.

¹⁷Boò kóólé, sə̀d bə̀ kò' Sostena ra. Sostena rə, nɛ́ŋ gbàáro *Yahudu bəd wúlwáàlbə̀ rú bìá. Bə̀ zìbə̀ nɛ́b zùúm númú, fágə́n zɔ̀ŋú wərà. Zá in nə́ŋ̀má wál *Galiyon sé.

¹⁸Pol ləə sɛŋ zùúm Korintu bìlú, kə̀ nɛ́b Yéésù bə̀ bagǹ bəd tá. Pol dɔ̀m bə̀ gə́, zá' ɛ̀m kúnú. Pìì kə̀ə̀d gbà'á aa tə́ ɛɛ̀m Siriya yɛ́b bərə rú; Priskila kə̀ Akilas tá, bə̀ ɛ̀m kə̀ oò tá. Zá bə́ŋ̀ dá piìn kə̀ə̀rú gə́, Pol kə̀' sína yílə Kɛnkeriya bìlú, bɔbm̀ i'ǹmbə̀ gə́, gám bəǹ dúg gúsì kə̀ Vɛnɛ́bá.

¹⁹Dáá bə̀ wə́ə́ Efesus bìlə́ gə́, Pol lɛ́' dàà Priskila kə̀ Akilas tá bìl aarə rú, zá' ɛ̀m *Yahudu bəd wúlwáàlbə̀ rú, dáá nyá' nwɔŋ kə̀ *Yahudu bərá.

²⁰Bə̀ nyɛ̀mə̀ oò kùm kə̀ obənə́ tə́ sɛŋ zùúm; zá oò gə́, í' sé.

²¹Sɛŋ aa zá' tə́ bə̀ daàn də, bàà bə̀: «Kid máà kíìn bídǹnà aí sunú, Vɛnɛ́b í'ì gə́ roó.» Bít pìì kə̀ə̀d gbà'á rú, zá' dàà Efesus bìlá.

²²Zɔ̀ŋ aa Pol dáá sím Kaisara bìlə́ gə́, zá' ɛ̀m Urusalima bìlú, Eklisiya wərə̀ bə̀ dáàn dɔ̀ɔ̀mbìá, bít taà ɛ̀m Antakiya bìlú.

²³Dáá ləə wərə̀ sɛŋ zɔ̀gɔ̀, bít zá' ɛ̀m kúnú, gəə̀l bìl kə̀ bìlá. Tàà dàà Galatiya yɛ́bá, kə̀ Frigiya yɛ́bá. Kpɛ́ŋ nɛ́b bagké bəd tɛ́má.

²⁴*Yahudu nə́ŋ̀ nə́gə́l oò Apolos, bə̀ lɛ̀bə̀ Alekzandriya bìlú, yaà wə́ə́ Efesus bìlú. Nɛ́ŋ váàndo aarə, nɛ́d in bə̀ gabm̀má, bít gàb Núúboòd Gìdń bəd nwɔŋì sɔ̀ɔ̀nkè.

²⁵Bə̀ sánə̀ Báátììkpɛ̀ŋ kpaŋ̀ yàá, nyìì kə̀ tɛ́m yádkeá, bàà nɛ́b bəd Vɛnɛ́b nwɔŋá, bít sán nɛ́b bəd Yéésù nwɔŋ kə̀ wɔ̀ɔ̀làá. Zá gàb baptisma aa Yohana tə́ piìn də ní.

²⁶Pìì Vɛnɛ́b nwɔŋ gámm̀bə̀ gə́, də́dǹ má nùù *Yahudu bəd wúlwáàlbə̀ rú gá. Zɔ̀ŋ aa Priskila kə̀ Akilas tá bə̀ kììù kàangə́, dɛ̀d bə̀ ààùwà boò kàrú. Zìb yaà bə̀ ì'ù Vɛnɛ́b kpaŋ̀ kə̀ nyɛdkèá.

²⁷Tə́ dáàn númú gə́, Apolos í' dáànmbə̀ Akaya yɛ́b ba. Ɔ̀dkudvɛɛ̀l í'sɛ̀lbə̀ bəraa wərə̀ rə, bə̀ piiù váàndo dáànmbə̀ wərà. Bít bə̀ bád núúboòd bərá, bə̀ pii nɛ́b bagké bəraa yɛ́b bə wərə̀ roó, bɔ̀b boò kè'ù kíìn sɔ̀ɔ̀nkè. Zɔ̀ŋ aa dá wə́ə́ wərə̀ gə́, dáá láŋ nɛ́b aa bə̀ bíl nɛ́b bagké Yéésù bə̀ wərə̀ rə ba, kàandə, Vɛnɛ́b mà' bə̀ pə̀dkè yàá.

²⁸Gám *Yahudu bəd nwɔŋ kə̀ kpɛŋsɛ́lá, nɛ́b zùúm númú kóólé. Bə̀ bé' gə́, bə̀ kə̀ vɛ́nà naà sé. Ì' bə̀ kə̀ Núúboòd Gìdń bərá Yéésù kùmsə̀n *Nɛ́ŋə̀ aa Vɛnɛ́b tɔ̀bə̀ gààd kílə́m yílə́ roó.