Read Samba Leko GBANTUMSӘ̀ BƏD TÙSÁ 21 Bible Online

GBANTUMSӘ̀ BƏD TÙSÁ 21 - Samba Leko bible

GBANTUMSӘ̀ BƏD TÙSÁ 21

¹Zɔ̀ŋ aa bə́ pɛd kə̀ boò gə́, bə́ ɛ̀m bəní kə̀ kə̀ə̀d gbà'á, yɛ́b aa wəl tə́ŋú, bə̀ dɛ̀d Kos də ba. Nwúndù oòrə, ɛ̀m dá bə́ wə́ə́ yɛ́b aa wəl tə́ŋú, bə̀ dɛ̀d Rodes də ba. Bə́ zá' wərə̀ gə́, bə́ ɛ̀m Patara bìlú.

²Bə́ bɔ̀b kə̀ə̀d gbà'á wərà, dáànmbə̀ kə̀ Finisiya yɛ́b ba. Bə́ pìì wərə̀ gə́, bə́ ɛ̀m kúnú.

³Bə́ bàg yɛ́b aa wəl tə́ŋú, bə̀ dɛ̀d Kiprus də ba, bə́ bé' bìl núùrú, zá bə́ bàg pɛ́rə̀ gúu bə̀ rú, yɛ́b aa wəl tə́ŋə́ wərə̀ rə ba, ɛ̀m dá bə́ wə́ə́ Siriya yɛ́b ba. Bə́ sím Tirus bìlú, kə̀ə̀d dá sí' in bəd wərà.

⁴Bə́ bɔ̀b nɛ́b bagké bəd wərà. Bə́ kùm kə̀ boò tá, sɛŋ nə́ŋsínà. Kə̀ Nwul Gìdń kpɛŋsɛ́lá, nɛ́b aarə bə̀ bàà Pol gə́, oò dáá Urusalima bìlə́ sí.

⁵Zá sɛŋ taà nə́ŋsínà gə́, zá' bə́ ɛ̀m kúnú. Boò kóólé, kə̀ kɛ́ɛ̀m boò bəd tá, kə̀ yɛb boò bəd tá, àà yaà bə̀ zíg bə́ bìl bòórú. Bə́ kùm kə̀ dunlígə̀rá, wəl gbà'á kàd ba, bə́ nyɛ̀m Vɛnɛ́bá.

⁶Bə́ dɔ̀m bə̀ boò kùm sɔ̀ɔ̀ní gə́, bə́ pìì kə̀ə̀d gbà'á, bə́ ɛ̀m kúnú, boò kɔ̀ bə̀ bíd kíìn boò kàrú.

⁷Gəə̀l yaà bə́ bɛ́' sɛ̀ɛ́n kpaŋ̀ bə́ nwuu gbà'á ba. Bə́ zá' Tirus bìlú, ɛɛ̀mbə̀ kə̀ Potolemayis bìlú, zɔ̀ŋ aa ɛ̀m dá bə́ dɔ̀m ɔ̀dkudvɛɛ̀l bəd bəroó. Bə́ kùm wərə̀ kə̀ boò tá, nyàm nə́ŋ̀.

⁸Nwúndù rə, zá' bə́ ɛ̀m, bít dá bə́ wə́ə́ Kaisara bìlú. Ɛ̀m dá bə́ wə́ə́ gə́, bə́ pìì Filip nɛ́d Yéésù *Nwɔŋ Puu Sɔ̀ɔ̀nkè bə̀ gəə̀l baàn yiilú, bít bə́ ləə wərà. Oòrə, tə́ nɛ́b vɔ̀ɔ̀m bəraa sàà bə̀ vúŋ bà Urusalima bìlú, boò nə́ŋsínà rə tə́ŋú.

⁹Nɛ́ŋ váàndo aarə, kə̀ yɛb kɛ́ɛ̀m bèlzá bəd naà naara. Yɛb kɛ́ɛ̀m bəraa rə, ùd bə̀ sáá nɛ́b bəd nwɔŋ bəraa vúgà Vɛnɛ́b naà roó.

¹⁰Nɛ́ɛ̀m bə́ ləə wərə̀ sɛŋ ká'ke yée gə́, *Vɛnɛ́b gbantumsə̀ nə́ŋ̀ vúgà Yahudiya yɛ́b ba, nə́gə́l oò Agabus.

¹¹Yaà wə́ə́ obə́ səǹ gə́, pà' Pol yɛ́rə̀ gɔ̀sá, bít kò' tab dun oò bəd kə̀ nɛɛ̀n oò bəd tá, bít bàà: «Nwul Gìdń bàà: ‹Nɛ́d yɛ́rə̀ gɔ̀' bə̀ aa yée, *Yahudu bəd bə̀ dáù tabm̀ kə̀ aakíin, Urusalima bìlú, bít bə̀ dáù piìn nɛ́b aa bàg Vɛnɛ́b síndə nɛɛ̀n tɛ́mú.› »

¹²Bòórú bə́ kìì nwɔŋ aa gə́, bə́ kə̀ nɛ́b aa wərə̀ rə tá, bə́ nyɛ̀m Pol oò dáá Urusalima bìlə́ sí.

¹³Zá Pol kè' í': «Kə̀ níìbə̀ íí tə́ taà kpəə̀n, bít íí tə́ mə́ taà tɛ́m nyágə́lì? Bə̀ dá mə́ kíìn tabm̀ Urusalima bìlú máá, mə́ kè' yàá, kóó bə̀ dá mə́ lo'ǹ wərə̀ Báátììkpɛ̀ŋ Yéésù bòórú máá, mə́ nùù sé.»

¹⁴Nɛ́ɛ̀m bə́ bánə̀ kpɛ́'ǹmbə̀ gá yée gə́, bə́ dààù kíìn nyɛɛ̀mbìá, bít bə́ bàà: «Ogə́, in aa Báátììkpɛ̀ŋ í' rə, oò ma'míìn sùnú!»

¹⁵Kùm bə́ tá' sɛŋ wərə̀ zɔ̀gɔ̀ gə́, bə́ kùd sisá, bə́ ɛ̀m Urusalima bìlú.

¹⁶Nɛ́b bagké bəraa Kaisara rə, àà yaà bə̀ zíg bə́ kúnú, pà' bə̀ àà bə́ nɛ́ŋə̀ nə́ŋ̀ kàrú, nɛ́ŋə̀ aa dá bə́ zɔ̀ŋ ləə̀nmbə̀ piìn doó. Nə́gə́l oò Manason, nɛ́ŋə̀ yɛ́b aa wəl tə́ŋú, bə̀ dɛ̀d Kiprus də bìá, oò kɔ̀ nɛ́d bagké nyàamdoorú kpɔ̀ɔ̀m bìá.

¹⁷Zɔ̀ŋ aa dá bə́ wə́ə́ Urusalima bìlə́ gə́, ɔ̀dkudvɛɛ̀l bəraa wərə̀ rə, ìì kè' bə́ kə̀ tɛ́m làmkèá.

¹⁸Nwúndù rə, Pol ɛ̀m kə̀ obə́ tá, Yakuba kàrú. *Dam bəraa nɛ́b bagké bəd tə́ŋə́ rə gə́ kóólé, ìì wál wərà.

¹⁹Pol dɔ̀m bə̀ gə́, bít bàà ì' bə̀ tù' oò bəraa mà'à roó, bít kə̀ in bəraa Vɛnɛ́b mà'à nɛ́b aa bə̀ bàgə̀ síndə tə́ŋə́ rə gə́ kóólé.

²⁰Bə̀ zɛ̀ŋ nwɔŋ aa Pol bàà bə̀ rə gə́, bə̀ káŋ Vɛnɛ́bá, bít bə̀ bàà Pol: «Ḿ bé' yàá, ɔ̀dkudvɛɛ̀lá, nɛɛ̀n aa *Yahudu bəd boò zùúm, ìì bíl nɛ́b bagké bəd doó. Boò kóólé, kò' bə̀ və́' Musa indaŋ̀mbə̀ tə́ gbàákù.

²¹Kə̀ aakíin də, boò kóólé, bə̀ kìì nwɔŋ bəraa tə́ taàn ám yílə́ rə yàá. Bə̀ kìì gə́, ń tə́ *Yahudu bəraa bə̀ kùm nɛ́b aa bàg Vɛnɛ́b síndə tə́ŋə́ rə in sánàá, bɔ̀b lɛ́' boò dàà Musa indaŋ̀mbìá. Ḿ bàà bə̀ gə́, boò náá yɛb boò bəd gàb sí, bít boò bàg Yahudu bəd *láŋsə́ bəd sí.

²²Bít bə́ŋyée báan ma'ǹ leè gú? Kàandə, bə̀ dákíìn kiinàá vɛ́nà, yaà ń wə́ə́ì zɔ̀ŋə.

²³Bə́ŋyée, m̀ mà' in aa báan baàn doó. Nɛ́b bəd tə́ zɔ̀ŋə boò naara, gám bə̀ dúg gúsì kə̀ Vɛnɛ́bá.

²⁴Ǹ wál kə̀ boò tá, bít ǹ kùd si' *láŋsə́ bə̀ ma'ǹná, láŋsə́ aa mà' dá ii bí'ǹ Gìdń Vɛnɛ́b númú roó, bít ǹ káá sə̀n ba' boò roó, bɔ̀b boò kə̀' yíləsá. Kə̀ aakíin də, nɛ́b bəd dá taà gabàá, nwɔŋ bəraa bə̀ tə́ gáàm ám yílə́ rə gə́ kóólé, nwɔŋ sɔ̀ɔ̀n nə́ŋ̀má rú wərə̀ sé. Bə̀ dá taà gabàá, ám kɔ̀ ń tə́ Musa indaŋ̀mbə̀ bagàá.

²⁵Zá nɛ́b aa bàg Vɛnɛ́b sé, ìì bíl nɛ́b bagké bəd də gə́, bád bə́ pii bə̀ núúboòrá, bə́ bàà bə̀ boò bàg in bəraa yóo' ìì fù' gɔ̀g bəraa bə̀ mà' kə̀ vɔɔm láŋsə́ bəd də sí. Ìì líí gɔ̀g nyɛ̀lə́m sí, ìì fù' ingalə̀ bəraa nìb bə̀ lòd kíìn də gɔ̀g sí, ìì gú' yíl íí kə̀ labsə̀ ma'ǹmbìá.»

²⁶Kàanyée gə́, Pol ɛ̀m kə̀ nɛ́b vɔ̀ɔ̀m bəraa naarə rə tá. Nwúndù oòrə, mà' láŋsə́ kə̀ boò tá, bɔbm̀ kuùmbə̀ gìdń Vɛnɛ́b númú. Bít dáá pìì láŋsə́ wúuú, dáá bàà nɛ́b bəd nyàm aa mà' bə̀ dá láŋsə́ bɛ́'ǹ bəroó. Nyàm aarə, nɛ́b vɔ̀ɔ̀m bəraa yée bə̀ dá sadaka piinàá.

²⁷Sɛŋ nə́ŋsínà dá bɛ́dǹ gə́, *Yahudu kam Aziya yɛ́b bə bə̀ bəd bə̀ bé' Pol láŋsə́ wúuú. Bə̀ zá' nɛ́b bəd kóólé tɛ́má, boò kò' Pol la.

²⁸Bə̀ kpàm nwɔŋá, bə̀ bàà: «Íí nɛ́b Israila bə̀ bərá, ìì láŋ bə́ ba! Oò yóo, nɛ́ŋə̀ aa tə́ nɛ́b bəd nwɔŋ vaksə́ sáàn zɔ̀ŋ gə́ kóólé, nɛ́b bə́n bəd yílú, Musa indaŋ̀mbə̀ yílú, kə̀ láŋsə́ wúl aa yílə́ roó. Bít bə́ŋyée aa kàn nɛɛ̀n də, pú' àà Grɛg bəd tə́ zɔ̀ŋə láŋsə́ wúuú, bít tə́ taà zɔ̀ŋ gìdń bə́n aa yɛlàá!»

²⁹(Bə̀ bàà kàandə, bə̀ bé' Torofimus nɛ́d Efesus bìlə́ bə̀, kə̀ Pol tá, bìlú. Sèl bə̀ bàà nyà'aa Pol pà' pááù tə́ láŋsə́ wúuú.)

³⁰Bìl wá' yàá, nɛ́b bəd nùù vúgə́là zɔ̀ŋ gə́ kóólé, yaà bə̀ kò' Pol la. Dìŋ bə̀ vúŋ̀ láŋsə́ wúuú, bə̀ ààù gbaarú, bít bə̀ ke' waàlá.

³¹Nɛ́b bəd sàà Pol lo'ǹmbìá. Zɔ̀ŋ aa Roma bəd sóózè bəd gààd Urusalima bìlə́ bə̀ kìì bìl kə̀ zɔ̀ŋtá wá' tə́ kíìn yée gə́,

³²kə̀ nwɔŋ aa nuù yée kíinní, pà' àà sóózè yíl bə̀ bəd kə̀ sóózè kambəd tá. Nùù bə̀ ɛ̀m zɔ̀ŋ aa nɛ́b zùúm kùm bəroó. Nɛ́ɛ̀m nɛ́b bəd bé' sóózè gààd bəd, kə̀ sóózè kambəd tá, bə̀ wə́ə́ yée gə́, bə̀ dàà Pol kíìn zibm̀bìá.

³³Kàanyée gə́, sóózè bəd gààd gbarà Pol sunú, kò' Pol gə́, bít bàà sóózè bəd boò tabə̀ kə̀ sɛ̀gsɛ́g iira; dɛ̀d gə́, aarə nɛ́ɛ̀réè, bít í' in aa mà' rə gabm̀bìá.

³⁴Nɛ́b bəd kóólé, kpàm bə̀ bàà nwɔŋ luùm gɔ̀ŋ gɔ̀ŋ. Bə̀ gíb yàá. Sóózè bəd gààd bɔ̀b nwɔŋ nyɛdkè kiìnmbə̀ nwɔŋ kpaàmbə̀ zùúm bəraa rú gá yée gə́, bàà sóózè bəd gə́, boò àà Pol sóózè bəd wúl kpɛŋsɛ́l bə̀ rú.

³⁵Zɔ̀ŋ aa Pol tə́ na'ǹ zɔ̀ŋ aa bə̀ vəg na'ǹ piìnmbə̀ kə̀ wúu rə bə gə́, sóózè bəd pà' Pol naú, bə̀ nùù nɛ́b bəraa wál yéroó, kàandə, boò rə, ìì vé' sɔ̀ɔ̀n.

³⁶Nɛ́b bəd zùúm, bə̀ bàgə̀ bòórú kə̀ nwɔŋ kpaàmbìá: «Báà lo'ǹnə̀ kúnú!»

³⁷Sɛŋ aa sóózè bəd bə̀ dá Pol aàn bə wúl kpɛŋsɛ́l bə̀ rú rə, Pol bàà sóózè bəd gààd: «Má bée kpaŋ̀ bɔbm̀ ámbə̀ nwɔŋ nə́ŋ̀ gáàmbèì?» Sóózè bəd gààd dɛ̀rə̀: «Ń gàb Grɛg nwɔŋì gáàmbèì?

³⁸Ámda ń kùmsə̀n nɛ́d Misra yɛ́b bə bə̀ nə́ŋ̀ aa sɛŋ bəraa záá páá nɛ́b bəd boò gbəŋ̀ kə̀ gɔ̀mnà, bít àà nɛ́b yíl bə̀ lodǹ bəd laa núnà zɔ̀ŋ kób zɔ̀ŋ naara, kə̀ yɛ́rə̀ naà fɔ̀gú rə gá wa?»

³⁹Pol kè' í' bàà: «Ə́ùwə́, máá gə́, mə́ *Yahudu, bə̀ lɛ̀b mə́ Tarsus bìlú, Silikiya yɛ́b ba, mə́ nɛ́d bìl gbà'á aarə rú bìá. Mə́ tə́ən kíìn nyɛmàá, m̀ pii mə́ kpaŋ̀, máà gám nwɔŋ kə̀ nɛ́b aaú.»

⁴⁰Sóózè bəd gààd pii Pol kpaŋ̀ yée gə́, Pol dáá dìì zɔ̀ŋ na'ǹmbə̀ ba, yàl nɛ́b bəd nɛɛ̀ná. Zɔ̀ŋ aa bə̀ tɛb nwɔŋ gə́, Pol gám bə̀ nwɔŋ kə̀ Ibraniŋko bəd nwɔŋú: